Hanqquwabaa Geeshsha Maxaafay Woygii?

Geeshsha Maxaafay yootiyobaa

Geeshsha Maxaafay hanqquwan eexxi kiyiyogee izaawakka A matan deꞌiyageetakka qohiyogaa yootees. (Leemisota 29:22) Issi issitoo hanqqettiyo gaasoy deꞌana danddayikkokka, Geeshsha Maxaafay “hanqquwa” aggennaageeti deꞌuwa laattennaagaa yootees. (Galaatiya 5:19-21) Geeshsha Maxaafaa maarati issi asi hanqqettiyo wode waatana danddayiyakko bessoosona.

• Hanqqettiyogee ubbatoo balee?

• Hanqqetiyogee bala gidiyoy awudee?

• Hanqqettiyo wode waatana danddayay?

• Hanqquwabaa yootiya Geeshsha Maxaafaa xiqiseta

Hanqqettiyogee ubbatoo balee?

Akkay. Issi issitoo hanqqettanawu bessiya gaasoy deꞌana danddayees. Leemisuwawu, ammanettida Nahimee aagaadan Xoossawu goynniya issoti issoti naaqettiyogaa siyido wode ‘keehi hanqqettiis.’—Nahimiyaa 5:6.

Issi issitoo, Xoossay hanqqettiis. Leemisuwawu, beni deꞌida A asay A xalaalawu goynnanawu aara maacettido maachchaa kolidi, worddo xoossatuyyo oottiyogaa doommin, ‘GODAA hanqqoy eta bolli eexxi kiyiis.’ (Daannata 2:13, 14) Gidoppe attin, hanqqoy Xoossaa Yihoowa waanna eeshshatuppe issuwa gidenna. I awudekka bessiya gaasuwan hanqqettees, qassi ba hanqquwa teqqees.—Kessaabaa 34:6; Isiyasa 48:9.

Hanqqetiyogee bala gidiyoy awudee?

Bessenna woy teqettenna hanqqoy bala; nagaranchcha asaa hanqqoy darotoo hegaa mala. Leemisuwa:

• Qaaꞌeeli ba yarshshuwa Xoossay ekkennan ixxin, “keehi yiillotiis.” Qaaꞌeeli ba ishaa bolli keehi hanqqettidi A woriis.—Doomettaabaa 4:3-8.

• Xoossay Nanawe asaa maarido gishshawu, Yoonaasi “keehi hanqqettiis.” Xoossay ‘Yoonaasi keehi hanqqettana bessennaagaanne’ bantta nagaran zilꞌꞌettidi laamettidaageetuyyo qarettana koshshiyogaa yootidi A seeriis.—Yoonaasa 3:10–4:1, 4, 11.a

Nagaranchcha “asi hanqqettiyo wode, Xoossaa sinttan suurebaa” oottennaagaa ha leemisoti bessoosona.—Yaaqooba 1:20.

Hanqqettiyo wode waatana danddayay?

• Teqettenna hanqqoy qohiyogaa akeeka. Hanqqettiyogee minotettaa bessiyaba giidi issoti issoti qoppana danddayoosona. Shin issi uri hanqquwa teqqana danddayennaagee minotetta gidenna. “Ba huuphiyaa naagenna asi dirssai meqqido katamaa mala.” (Leemisota 25:28; 29:11) Shin nuuni hanqquwa teqqanawu baaxetiyo wode, tumuppe minonne akeekanchcha gidiyogaa bessoos. (Leemisota 14:29) Geeshsha Maxaafay, “wolqqaama asa gidiyoogaappe, hanqqettanau eesotenna asa gidiyoogee lo77o” yaagees.—Leemisota 16:32.

• Guyyeppe zelꞌꞌettanabaa oottiyogaappe hanqquwa teqqa. Mazamure 37:8y, “hanqquwaa agga; yiilluwaappe teqetta. Yiillotoppa; aissi giikko, hegee metuwan yeggees” yaagees. Nuuni hanqqettiyo wode, nuna ‘metuwan yeggiyabaa’ oottanaappe kase hanqqettiyogaa aggana danddayiyogaa akeeka. Efisoona 4:26y yootiyoogaadan, ‘hanqqettana danddayikkonne nagaraa oottoppa.’

• Danddayikko, hanqqoy doommiyo wode aggaaga. Geeshsha Maxaafay, “ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga” yaagees. (Leemisota 17:14) Haratuura walaqettiyo wode sohuwara haasayidi giigissiyogee loꞌꞌo gidikkokka, he yohuwa haasayanaappe kase neenikka nenaara walaqettida uraykka koyro woppu gaana koshshees.

• Hanotaabaa tumaa shaakka era. Leemisota 19:11, “Aawussi de7iya aadhdhida eratettai hanqquwaa mitissees” yaagees. Nuuni yohuwa qachchanaappe kase, ubbabaa akeekiyogee loꞌꞌo. He yohuwara gayttida ubbabaa nuuni loytti siyiyo wode, coo mela hanqqettennan aggana danddayoos.—Yaaqooba 1:19.

• Sarotettaa immanaadan woossa. Woosay “asi akeekana danddayenna sarotettaa Xoossay” neessi immana mala maaddana danddayees. (Piliphphisiyusa 4:7) Sarotettay, danddayaynne bana naagiyogaa mala eeshshati nuuyyo deꞌanaadan maaddiya, Xoossaa geeshsha ayyaanay nuussi imettiyo waanna ogetuppe issoy woossiyogaa.—Luqaasa 11:13; Galaatiya 5:22, 23.

• Oonaara zuppetanaakko akeekan doora. Nuuni nunaara zuppetiya asata qulloos. (Leemisota 13:20; 1 Qoronttoosa 15:33) Geeshsha Maxaafay, “hanqqettiya uraara laggetoppa; hanqqettanau eesotiya uraarakka zuppetoppa” giyogee bessiyaba. Aybissi? “Neeni a hanuwaa meezetikko, guyyeppe agganau danddayakka.”—Leemisota 22:24, 25.