Yelagatoo—Intte Deꞌuwan Ay Oottanau Qoppidetii?

“Carkko yimppiya asadankka yimppikke.”—1 QOR. 9:26.

1, 2. Asa gamma gakkiyo wode, intte deꞌoy injjetanaadan inttessi aybi koshshii?

INTTE erennasaa biyaaba gidikko, karttaanne komppaasiyaa ekkidi baana danddayeeta. Karttay intte gakkido sohuwaa eranaadaaninne hegaappe simmin baana bessiya ogiyaa ubbaa kaseti qoppanaadan maaddees. Komppaasee intte suure ogiyaa oyqqidi baanaadan maaddees. SHin intte awu biyaakko erennaba gidikko, karttaykka komppaaseekka aynne maaddenna. Intte coo toylattenna mala gakkana sohuwaa shaakkidi erana koshshees.

² Asa gamma gakkiyo wode, hegaa malabay inttena gakkees. Ammanttiya karttaynne komppaasee intteyyo deꞌees. Geeshsha Maxaafay intte ay oge dooranaakko eranaadan maaddiya kartta mala. (Lee. 3:5, 6) Loyttidi loohissikko, intte zoriya wozanay suure ogiyaa oyqqidi baanau inttena keehi maaddana danddayees. (Roo. 2:15) Zoriya wozanay komppaase mala gidana danddayees. Gidoppe attin, intte deꞌoy injjetanaadan intte biyoosaakka erana koshshees. Qoncce hoollee intteyyo deꞌana koshshees.

3. PHauloosi 1 Qoronttoosa 9:26n hoolliyaa kessiyoogaa goꞌꞌay ayba gidiyoogaa yootidee?

³ Kiitettida PHauloosi, “Taani qofi bainnan woxxiyaabaadan woxxikke. Carkko yimppiya asadankka yimppikke” yaagidi xaafiyoogan, hoolliyaa kessidi hegaa gakkanau baaxetiyoogaa goꞌꞌaa qanttan qonccissiis. (1 Qor. 9:26) Intteyyo hoollee deꞌikko, gakkiyoosaa sirennan woxxana danddayeeta. Intte daro gamꞌꞌennan keehi koshshiya issi issi kuushshaa kuuyana; hegeetuppe amaridaageeti goynuwaara, oosuwaara, aqo deꞌuwaaranne so asaara gayttidabata. Issi issitoo corabay shiiqin dooranau intte metootidabadan qoppana danddayeeta. SHin intte Xoossaa Qaalan deꞌiya baaso siraataanne tumaa kaallidi baana bessiya ogiyaa ubbaa kasetidi qoppiyaaba gidikko, bala ogiyaa baanau paacettekketa.—2 Xim. 4:4, 5.

4, 5. (a) Intte hoolle kessennaba gidikko aybi gakkana danddayii? (b) Xoossaa ufayssanau koyiyoogee intte dooriyoobau baaso gidana koshshiyoy aybissee?

⁴ Intte hoolle kessennaba gidikko, laggetinne asttamaareti inttessi bessees giyoobaa oottanaadan inttena sugana danddayoosona. Intteyyo qoncce hoollee deꞌikkokka, issoti issoti bantta qofaa yootana danddayoosona. Intte eta qofaa siyiyo wode, ‘Eti yootiyo hoollee yelagatettan deꞌaydda tana Medhidaagaa hassayanau maaddiiyye hegaadan oottennaadan wora zaarii?’ yaagidi inttena oychite.—Eranchaa 12:1 nabbaba.

⁵ Xoossaa ufayssanau koyiyo koshshay intte deꞌuwan dooriyoobau baaso gidana koshshiyoy aybissee? Issi gaasoy nuussi deꞌiya loꞌꞌobaa ubbaa immiday Yihoowa gidiyoogaa. (Yaaq. 1:17) Ubba asay Yihoowa galatana koshshees. (Ajj. 4:11) Hoolliyaa kessiyo wode Yihoowa hassayiyoogaappe aadhiya, intte galatiyoogaa bessana danddayiyo ogee aybi deꞌii? Gakkana bessiya hoolleti awugeetakko, qassi hegaa gakkanau intte ay oottana bessiyaakko ane beꞌoos.

Ayba Hoolle Kessana Danddayeetii?

6. Intte kessana danddayiyo, keehippe koshshiya hoollee awugee, aybissi?

⁶ Aadhida huuphe yohuwan beꞌidoogaadan, intte kessana danddayiyo keehi koshshiya hoollee Geeshsha Maxaafay yootiyoobay tuma gidiyoogaa intte huuphe shaakki eriyoogaa. (Roo. 12:2; 2 Qor. 13:5) Intte laggeti lodda laamiyan woykko dumma dumma worddo haymaanoote timirttiyan ammaniyoy hara asay eti ammananaadan yootido gishshataassa gidana danddayees. SHin intte hara asay yootido gishsha xallau issibaa ammanana koshshenna. Yihooway intte intte kumetta qofaappe ayyo oottanaadan koyiyoogaa hassayite. (Maatiyoosa 22:36, 37 nabbaba.) Saluwan deꞌiya nu Aaway intte naqaashaa goꞌettidi intte ammanuwaa minttanaadan koyees.—Ibr. 11:1.

7, 8. (a) Intte ammanuwaa minttanau maaddiyay mata wodiyan gakkiyo ayba hoolleta kessiyoogee? (b) Intte kessido mata wodiyan gakkiyo hoolletuppe amaridaageeta gakkiyo wode waananau, qassi waatanau danddayeetii?

⁷ Intte ammanuwaa minttanau maaddanaadan, mata wodiyan gakkiyo issi issi hoolleta aybissi kessekketii? Issi hoollee galla galla woossiyoogaa gidana danddayees. Intte woosay ufayssiyaagaanne qoncce gidana mala, intte woossana koyiyo, gallassaa giddon hanettidabata hassayana woy xaafidi oyqqana danddayeeta. Gakkida metotu xallau gidennan, inttena ufayssidabaukka woossiyoogaa dogoppite. (Pili. 4:6) Hara hoollee Geeshsha Maxaafaa galla galla nabbabiyoogaa. Intte galla galla oyddu sintta gidiyaagaa nabbabikko, kumetta Geeshsha Maxaafaa issi layttan nabbabidi wurssanaagaa ereetii?a Mazamure 1:1, 2y, ‘Yihoowa higgiyan ufayttiya uri anjjettidaagaa; a higgiyaa i gallassinne qammi qoppees’ yaagees.

⁸ Intte kessana danddayiyo, mata wodiyan gakkiyo heezzantto hoollee ubba gubaaꞌe shiiquwankka issitoo zaaranau giigettiyoogaa. Koyruwan, nabbabidi zaaranau woy issi xiqisiyaa nabbabanau koyana danddayeeta. Takkidi, nabbabennan zaaranau halchana danddayeeta. Intte zaarido payduwan Yihoowayyo yarshshuwaa immeeta. (Ibr. 13:15) He halchotuppe amaridaageeta gakki simmidi, kaseegaappe aaruwan ammanettananne Yihoowakka nashshana danddayeeta; qassi adussa wode hoolliyaa kessanau giigetteeta.

9. Intte Kawotettaabaa aassiyaagaa gidana xayikko, ayba adussa wode hoolleta kessana danddayeetii?

⁹ Intte kessana danddayiyo, adussa wode hoolleti awugeetee? Mishiraachuwaa asau yootiyoogaa doommibeennaba gidikko, Kawotettaabaa aassiyaageeta gidiyoogee intteyyo adussa wode hoolle gidana danddayees. Ha boncho hoolliyaa gakki simmidi, issi aginaunne pacissennan, ubbatoo muruta ogiyan hegaa polanau koyeeta. Geeshsha Maxaafaa haggaazuwan goꞌettanaukka koyeeta. Hegaadan oottiyo wode, sabbakiyo oosuwaa intte daroppe dosiyoogaa akeekana danddayeeta. Yaatidi, kaseegaappe daro wodiyau sooppe soo biidi sabbakana danddayeeta; woykko issi uraa Geeshsha Maxaafaa xannaꞌissanaukka baaxetana danddayeeta. Xammaqettennan aassiyaageeta gididi, xammaqettanau gidaa kunttiyoogaappenne intte huuphiyaa geppidi xammaqettida, Xoossaa Yihoowa Markka gidiyoogaappe aadhiya ayba hoollee deꞌii?

10, 11. Xammaqettida yelagati banttassi kessana danddayiyo adussa wode hoolleti awugeetee?

¹⁰ Intte Yihoowassi oottiya xammaqettidaageeta gidikko, gakkanau baaxetana danddayiyo amarida adussa wode hoolleti kaallidi deꞌiyaageeta. Darotoo ootti erenna moottan oottiyoogan, gubaaꞌeta issi issitoo maaddanau koyana danddayeeta. Intte wolqqaanne intte payyatettaa goꞌettidi kaafiya aqinye woy kumetta wodiyaa aqinye gidanau qofaa qachanakka danddayeeta. Kumetta wodiyaa haggaazoy intte yelagatetta wodiyan inttena Medhidaagaa hassayanau maaddiya ooso gidiyoogaa tammu shaꞌan qoodettiya, ufayttiya aqinyeti intteyyo yootana danddayoosona. Intte inttena yelidaageetuura deꞌiiddi gakkana danddayiyo hoolleti hageeta. Intte he hoolleta gakkiyoogan intte gubaaꞌeekka goꞌettees.

¹¹ Hara adussa wode hoolleti intte gubaaꞌiyaappe hara gubaaꞌetakka intte goꞌꞌanaadan maaddoosona. Leemisuwau, aassiyaageeti keehi koshshiyo, hara heeran woy hara biittan oottanau halchana danddayeeta. Hara biittan Kawotettaa Addaraashaa woykko macara biiruwaa keexxiyoogan maaddanau koyana danddayeeta. Ubba Beeteelen oottanau woy misoonaawe gidanaukka danddayeeta. Hagan denttido adussa wode hoolletuppe darota gakkanau, intte gakkana koshshiya waanna hoollee xammaqettiyoogaa gidiyoogee qoncce. Intte xammaqettabeennaba gidikko, intte deꞌuwan keehi koshshiya ha allaalliyaa poliyoogee ay gujjiyaakko ane beꞌite.

Xammaqettanau Kessido Hoolliyaa Gakkiyoogaa

12. Issoti issoti xammaqettiyo gaasoti awugeetee, he gaasoti bessennaba gididoy aybissee?

¹² Xinqqatiyaa halchuwaa waatidi qonccissana danddayeetii? Issoti issoti nagaran kunddennaadan hegee banttana naagiyoobadan qoppana danddayoosona. Harati bantta laggeti xammaqettido gishshau etikka xammaqettana koshshiyoobadan qoppana danddayoosona. Hara naati banttana yelidaageeta ufayssanau koyana danddayoosona. SHin, xammaqettiyoogee intte qosan oottana koyiyoobaa oottennaadan teqqiyaaba gidenna; woy qassi haratu sugettan intte xammaqettana koshshenna. Yihoowa Markka gidiyoogee woygiyoogaakko loyttidi eriyo wode, qassi intte he aawatettaa ekkanau giigi uttidoogaanne koyiyoogaa ammanettiyo wode xammaqettana koshshees.—Era. 5:4, 5.

13. Intte xammaqettana koshshiyoy aybissee?

¹³ Xammaqettiyo issi gaasoy, ‘asaa bana kaalliyaageeta oottanaadaaninne xammaqanaadan’ Yesuusi ba erissiyo ashkkarata azazido gishshataassa. I ba huuphekka xammaqettiyoogan leemiso gidiis. (Maatiyoosa 28:19, 20; Marqqoosa 1:9 nabbaba.) Hegaa bollikka, atotettaa koyiyaageetussi xinqqatee keehi koshshiya tanggo. Nohee ba soo asaara bashshaappe attido markkabiyaa keexxidoogaa yooti simmidi, kiitettida PHeexiroosi hagaadan giis: “Hegee xinqqatiyau leemiso gididi, inttena ha77⁠i ashshees; . . . hegee inttena Yesuus Kiristtoosi haiquwaappe denddidoogan ashshees” yaagiis. (1 PHe. 3:20, 21) Gidoppe attin, hegaa giyoogee intte xammaqettiyoy attana xallaassa giyoogaa gidenna. Hegaappe, intte xammaqettiyoy Yihoowa siiqiyoonne intte kumetta wozanaappe, shemppuwaappe, qofaappenne wolqqaappe ayyo oottanau koyiyo gishshataassa.—Mar. 12:29, 30.

14. Issoti issoti xammaqettanau guyye giyoy aybissa gidana danddayii, shin aybin ammanettana danddayeetii?

¹⁴ Issoti issoti wodeppe bohettana danddayays giyo yashshan xammaqettanau guyye gaana danddayoosona. Inttekka hegaadan yayyeetii? Yayyiyaaba gidikko, hegee bessennaba gidenna. Hegee, Yihoowa Markka gidiyoogee kaalettiyo gita aawatettaa intte akeekidoogaa bessiyaaba gidana danddayees. Hara gaasoykka deꞌana danddayii? Geella Xoossaa maaraa kaallidi deꞌiyoogee aybippenne aadhiya deꞌo oge gidiyoogaa hanno gakkanau wozanappe ammanennan aggana danddayeeta. Hegaadan gidikko, Geeshsha Maxaafaa maaraa sheneho giyaageeta gakkiyaabaa qoppiyoogee intte qofaa qachanaadan maaddana danddayees. Hara baggaara, Xoossay kessido maaraa siiqana danddayeeta; shin intte he maaraa kaallana danddayiyoogaa ammanettennan aggana danddayeeta. Hegee intte inttena ziqqi oottiyoogaa bessiyo gishshau, loꞌꞌoba gidana danddayees. Polotettay paccido asaa ubbaa wozanay cimmiyaagaa gidiyoogaa Geeshsha Maxaafay yootees. (Erm. 17:9) SHin intte ubbatoo ‘Xoossaa qaalay giyoogaadan deꞌanau naagettikko,’ intteyyo hirattana danddayees. (Mazamure 119:9 nabbaba.) Intte xammaqettanau guyye giyo gaasoy ayba gidikkokka, hegaa mala hanotaanne qofaa giigissana koshshees.

15, 16. Intte xammaqettanau giigi uttidaakkonne waatidi erana danddayeetii?

¹⁵ SHin intte xammaqettanau giigi uttidaakkonne waatidi erana danddayeetii? Issi ogee hageetu mala oyshata inttena oychiyoogaa: ‘Geeshsha Maxaafaa baaso timirtteta haratussi qonccissana danddayiyaanaa? Tana yelidaageeti kiyennaba wodekka, haggaazuwau kiyiyaanaa? Gubaaꞌe shiiqotu ubban beettanau baaxetiyaanaa? Laggetu sugettaa taani eqettido hanotata hassayiyaanaa? Tana yelidaageetinne ta laggetti Yihoowayyo oottiyoogaa aggikkokka, taani aggennan hegaa oottanee? Xoossaara tau deꞌiya dabbotaa xeelliyaagan woossiyaanaa? Ta huuphiyaa Yihoowayyo muleera geppidanaa?’

¹⁶ Xinqqatee xaasayi xeellana bessenna, deꞌo laammiya tanggo. Ha tanggoy xoqqu oottidi xeelliyooba gidiyoogaa ammaniyoogaa keenaa kaymidetii? Kaymiyoogee madirakiyaappe loꞌꞌo haasayaa shiishshiyoogaa woy shiiquwan loꞌꞌo zaaruwaa zaariyoogaa xalla gidenna. Hegaa giyoogee, Geeshsha Maxaafaa baaso siraataa akeekidi kuuyana danddayiya kayma Kiristtaane gidanau wodiyaappe wodiyan nuna loohissiyoogaa giyoogaa. (Ibraawe 5:14 nabbaba.) Intte hegaadan oottana danddayiyo xekkan deꞌiyaaba gidikko, inttena keehi gita bonchoy naagees; hegeekka Yihoowayyo kumetta wozanaappe oottiyoogaanne intte huuphiyaa tumuppe ayyo geppidoogaa bessiya hanotan deꞌiyoogaa.

17. Xammaqetti simmin gakkana danddayiya paaciyaa xoonanau inttena maaddanay aybee?

¹⁷ Intte xammaqettosaara Xoossaayyo oottanau keehippe koyana danddayeeta. SHin takkennan, intte ammanuwaanne intte minotettaa paacciyaabi gakkana danddayees. (2 Xim. 3:12) He paaciyaa intterkka xoonana bessiyaabadan qoppoppite. Inttena yelidaageeta zoriyaa oychite. Gubaaꞌiyan deꞌiya, ayyaanaaban tishsha gididaageeta maaduwaa oychite. Inttena maaddana danddayiyaageetuura lagge gididi deꞌite. Yihooway intteyyo qoppiyoogaanne aybi merettikkonne xoonanau koshshiya minotettaa intteyyo immanaagaa mule dogoppite.—1 PHe. 5:6, 7.

Intte Hoolliyaa Waanidi Gakkana Danddayeetii?

18, 19. Intte kaseyiyoobaa qoriyoogan waanidi goꞌettana danddayeetii?

¹⁸ Intte loꞌꞌobaa qoppikkokka, intte koyiyoobaanne inttessi koshshiyaabaa oottanau gidiya wodee baynnaba intteyyo milatii? Hegaadan gidikko, intte kaseyiyoobaa qorana koshshees. Leemisuwau: Balddiyan amarida gita shuchata yeggite. Yaatidi shafiyaa balddiyan kunttite. Intte balddiyan shuchaynne shafee kumiis. Yaatidi, he shuchaanne shafiyaa balddiyaappe kessidi issisan wottishshite. SHafiyaa balddiyan qolite; hegaappe simmin shuchata yegganau malite. SHuchaa ubbaa yegissibeenna gidennee? Hegaadan hanidoy intte shafiyaa koyro balddiyan qolido gishshataassa.

¹⁹ Intte wodiyaa goꞌettiyoogankka hegaa mala metoy inttena gakkees. Wodiyaa aattiyoobaa malabau intte koyro sohuwaa immikko, gita allaalletuyyo, giishin ayyaanaabaa oosuwau gidiya wodiyaa demmekketa. SHin Geeshsha Maxaafay “lo77⁠obai aibakko” dooranaadan immiyo zoriyaa intte kaallikko, Kawotettaara gayttida oosuwaa oottanaunne amarida keenan allaxxanau danddayiyoogaa akeekeeta.—Pili. 1:10.

20. Intte kessido hoolliyaa gakkanau baaxetiyo wode unꞌꞌettiyaabanne siriyaaba gidikko, ay oottana koshshii?

²⁰ Xammaqettiyoogaa gujjin, intte hoolliyaa gakkanau baaxetiyo wode, issi issitoo intte unꞌꞌettanaunne siranau danddayeeta. Hegaadan haniyo wode, ‘intte toohuwaa Xoossan wottite; i inttena zemppissana.’ (Maz. 55:22) Asaa naatu taarikiyan awudeegaappenne aaruwan ufayssiyaanne keehi koshshiya oosuwaa, alame yuushuwan sabbakiyoonne tamaarissiyo oosuwaa oottiyo injjee haꞌꞌi inttessi deꞌees. (Oos. 1:8) Intte he oosuwaa oottennan agganau woy oottanau doorana danddayeeta. Xoossau oottiyoogaaninne a Kawotettau exatiyoogan intte abbiyaa goꞌettanau guyye gooppite. ‘Intte yelagatettaa layttan inttena Medhidaagaa’ oosuwaa oottiyoogan mulekka zilꞌꞌettekketa.—Era. 12:1.

[Tohossa qofata]

Woygada Zaaruutii

• Neeni hoolliyaa kessana koshshiyoy aybissee?

• Gakkana koshshiya issi issi hoolleti awugeetee?

• Xammaqettiyo hoolliyaa gakkiyoogee ay ay gujjii?

• Neeni kaseyiyoobaa qoriyoogee ne hoolliyau gakkanau waatidi maaddana danddayii?

[Sinttaa 20n deꞌiya misiliyaa]

Geeshsha Maxaafaa galla galla nabbabiyo hoolliyaa kessadii?

[Sinttaa 22n deꞌiya misiliyaa]

Xammaqettanau kessido hoolliyau gakkanau nena aybi maaddii?

[Sinttaa 23n deꞌiya misiliyaa]

Ha leemisuwaappe ay tamaaray?