Geeshsha Maxaafay Asay Laamettanaadan Oottees

Issi yelagay ba deꞌo laytta ubban amottido aawaa waati demmidee?

“Aawaa siiqoy tana keehi yeemoyiis.”—MARKO ANTONIYO ALVAREZ SOTA

YELETTIDO LAYTTAA: 1977

YELETTIDO BIITTAA: CHIILE

KASE TAARIKIYAA: DEEZ-MEETAL MUUZIQAA KAAꞌIYAAGAA

KASE DEꞌUWAA: Tana ta aayyiyaa dichchaasu; taani Tohossa Amarkkawu tohossa bagga gaxan deꞌiya Majelan giyo heeran deꞌiya, Puntta Arenas giyo loꞌꞌiya kataman diccaas. Ta aawaynne ta aayyiyaa tawu layttay ichchasha gidiyo wode shaahettidosona; hegaappe denddidaagan, tana aggibayidabadan qoppaas. Aawa keehi laamotaas.

Ta aayyiyaa Yihoowa Markkatuura Geeshsha Maxaafaa xannaꞌiyo gishshawu, gubaaꞌe shiiquwaa biyo wode SHiiquwaa Addaraashaa tana ekkada bawusu. SHin taani shiiquwaa biyoogaa dosenna gishshawu, darotoo yiillotaydda bays. Tawu layttay 13 gidiyo wode, shiiquwaa biyoogaa muleera aggaagaas.

He wode muuziqaa dosiyoogaa doommaas; qassi tawu muuziqaa imotay deꞌiyoogaa akeekaas. Tawu layttay 15 gidiyo wode, baalatun, hooteeliyaaninne asay shiiqido harasan heevi-meetal giyoonne deez-meetal giyo muuziqaa kaaꞌiyoogaa doommaas. Muuziqaa eranchcha gidida haratuura laggetido gishshawu, kilaasikal muuziqaa dosaas. Yaatada, heeran deꞌiya issi muuziqa timirtte keettan tamaariyoogaa doommaas. Tawu layttay 20 gidiyo wode, gujja tamaaranawu gita katamaa Santiyaago baas. He wodekka heevi-meetal banddiyaaninne deez-meetal banddiyan muuziqaa kaaꞌiyoogaa aggabeykke.

Taani he wode ubbatoo ta deꞌuwan unꞌꞌettays. Unꞌꞌettiyoogaa agganawu ta so asadan xeelliyo, tanaara muuziqaa issippe kaaꞌiyaageetuura mattottana gakkanawu uyaysinne jallissiyaabaa goꞌettays. Taani makkalanchcha asa gidiyoogaa ta hanotay erissees. Karetta maayuwaa maayays, buuchchaa dichchays, qassi ta huuphee xeessaa gakkanaashin dicciis.

Ta eeshshaappe denddidaagan, taani darotoo asaara warettaysinne polisetuura ooyettays. Issi gallassi ushshan sugettada tananne ta laggeta yiilloyida, jallissiyaabaa bayzziya asata shocaas. Eti tana keehi shocido gishshawu ta goggocoy meqqiis.

SHin tana keehi qohidabay ta mata laggeti oottidobaa. Issi gallassi, ta macca laggiyaa ta mata laggetuppe issuwaara daro layttawu qosan siiqettiyoogaa eraas; shin ta laggeti ubbay hegaa eriiddi taappe genttidosona. Hegee tana keehi qohiis.

Taani Puntta Arena katamawu simmada muuziqaa tamaarissiyoogaanne cheelo giyo muuziqaa miishshaa kaaꞌiyoogaa doommaas. Taani he wodekka heevi-meetal muuziqaanne deez-meetal muuziqaa banddetuura kaaꞌaysinne kaaꞌaydda duuqettays. Qassi Suzano giyo loꞌꞌiya naꞌeera gayttada iira issippe deꞌiyoogaa doommaas. Amarida wodeppe guyyiyan, Suzana I aayyiyaa Sillaasiyaa ammaniyoogaanne taani hegaa ammanennaagaa akeekaasu. A, “Yaatin, tumay awugee?” gaada tana oychchaasu. Oychchin, Sillaase timirttee worddo gidiyoogaa taani erikkonne hegaa Geeshsha Maxaafaappe bessana danddayennaagaa yootaas. SHin bessana danddayiyay oonakko erays. Yihoowa Markkati Geeshsha Maxaafaappe tumaa bessana danddayiyoogaa iyyo yootaas. Hegaappe simmada, taani daro layttawu oottabeennabaa oottaas; hegeekka, Xoossay tana maaddana mala woossaas.

Amarida gallassappe guyyiyan, taani eriyo asa milatiya issi ura demmada, I Yihoowa Markkakkonne oychchaas. I ta ay milatiyaakko beꞌidi yayyikkokka, SHiiquwaa Addaraashshaa shiiquwaabaa taani oychchido oyshaa kehatettan zaariis. Hegee ta woosaa zaaro gidiyoogaa akeekaas. SHiiquwaa Addaraashaa baada, tana asi erenna mala wurssetta yafaran deꞌiya oydiyan uttaas. SHin taani naatettan shiiquwaa shiiqiyoogaa daroti hassayidosona. Eti tana qoommidi siiquwan mokki ekkin, taani woppu gaas. Taassi ta soo simmidoba milatiis. Tana naatettan Geeshsha Maxaafaa tamaarissida ishaa demmada, zaarettidi xannaꞌissanaadan oychchaas.

TAANI LAAMETTANAADAN GEESHSHA MAXAAFAY MAADDIIS: Issi gallassi, Leemiso 27:11n, ‘Ta naꞌawu aadhdhida eranchcha gidada tana ufayssa’ yaagiyaagaa nabbabaas. Laafa asi saluwaa saꞌaa Medhdhida Xoossaa ufayssana danddayiyoogaa qoppada maalaalettaas. Ta deꞌo laytta ubban koyaydda deꞌido Aaway Yihoowa gidiyoogaa akeekaas!

Saluwan deꞌiya ta Aawaa ufayssanawunne A sheniyaa oottanawu koyaas; shin daro layttawu jallissiyaabawunne ushshawu haarettaas. Yesuusi tamaarissido, Maatiyoosa 6:24n deꞌiya, “Naa77u godatuyyo haarettanau danddayiyai ooninne baawa” yaagiya qofaa akeekaas. Ta deꞌuwan laamettanawu baaxetiyo wode, 1 Qoronttoosa 15:33n, “Iita laggetettai lo77o hanotaa moorees” giya zoree tana keehi maaddiis. Taani kase biyo sohuwaa biyoogaanne kase laggetuura peꞌiyoogaa aggana xayikko, iita meeziyaa aggana danddayennaagaa akeekaas. Geeshsha Maxaafaa zoree qoncce: Tawu xubbe gidana danddayiyaabatuppe muleera haakkanawu taani keehi laamettana koshshees.—Maatiyoosa 5:30.

Taani muuziqaa keehi siiqiyo gishshawu, heevi-meetal muuziqaa kaaꞌiyoogaanne siyiyoogaa agganawu daro metootaas. SHin gubaaꞌiyan deꞌiya ta laggeti maaddin, taani wurssettan aggaas. Daro ushshaa uyiyoogaanne jallissiyaabaa goꞌettiyoogaakka aggaas. Hegaa bollikka, ta huuphiyaa qanxxettaas, buuchaa meedettaas, qassi karetta maayo xallaa maayiyoogaa aggaas. Taani huuphiyaa qanxxetana koyiyoogaa Suzanissi yootin, A taani ayssi koyidaakko eranawu keehi koyaasu. A ubba hagaadan gaasu: “Ha SHiiquwaa Addaraasha giyoobay aybakko beꞌanawu taani nenaara baana!” A yan beꞌidobaa keehi dosido gishshawu, sohuwaara Geeshsha Maxaafaa xannaꞌiyoogaa doommaasu. Amarida wodiyaappe guyyiyan nuuni eketti gelettida. Qassi 2008n xammaqettidi Yihoowa Markka gidida. Ta aayeera issippe Yihoowawu haggaaziyo gishshawu keehi ufayttida.

TAANI GOꞌETTIDO HANOTAA: Haꞌꞌi ha alamiyaa worddo ufayssaappenne cimmiya laggetuppe shemppaas. Taani muuziqaa haꞌꞌikka dosays; shin doorada siyays. Ta deꞌuwan beꞌidoban ta so asaanne harata, ubba qassi yelagata maaddays. Ha alamee shoobbiyo darobay loꞌꞌiyaaba milatikkokka, wurssettan hegee ‘goꞌꞌennabanne wora oliyo’ buura mala gidiyoogaa eti akeekanaadan maaddanawu koyays.—Piliphphisiyuusa 3:8.

Taani siiqoynne sarotettay kumido gubaaꞌiyan ammanettiya laggeta demmaas. Ubbaappe aaruwan qassi, Yihoowakko shiiqiyoogan, wurssettan ta Aawaa demmaas.