“Taani wurssettan tumu laꞌatettaa demmaas”

KASE DEꞌUWAA:

Taani yelettidoy Amarkkan huuphessa West Verginiyan Ohayiyo SHaafaa matan deꞌiya Mawundizvil giyoosaana. Nu soo naatu oyddaappe taani naaꞌꞌantta naꞌa; nuuppe heezzati attumaageeta; cora naati deꞌiyo hara keettaa naatudan nuuni ufayssan kaaꞌiiddi diccida. Ta aawaynne aayyiyaa mino oosancha; qassi eti asa siiqiyaanne ammanettiya asata. Nu soo asay dure gidennaba gidikkokka, ubba wode koshshiyaabaa demmoos. Ta aawaynne ayyiyaa Yihoowa Markka gidiyo gishshau, nuna naatettaappe doommidi Geeshsha Maxaafay yootiyoobaa tamaarissanau daro baaxetidosona.

SHin taani tamaaridobaappe yelagatettan sherꞌi giyoogaa doommaas. Geeshsha Maxaafay yootiyoogaadan deꞌiyoogee ufayssiya deꞌuwaa deꞌanau maaddenna gaada qoppaas. Ta sheniyaadan deꞌiyoogan tumu ufayssaa demmana gaada qoppaas. Hegaappe takkennan, gubaaꞌiyaa shiiquwaa biyoogaa aggaas. Ta bayra ishaynne ta kaalo michiyaakka taagaadan deꞌiyoogaa doommidosona. Aawaynne aayyiyaa nuna maaddanau oottibeennabi baawa; shin eta siyibookko.

Taani laꞌatettaa gaada qoppidobi tana iita amale ubbau aylle oottanaagaa erabeykke. Issi galla taani timirtte keettaappe soo yiishin, issi laggee sijaaraa uyana mala tau immin, ekkada uyaas. He gallassaappe doommada, asi shoobbiyo iitabaa ubbaa poliyoogaa doommaas. Guyyeppe, jallissiya xaliyaa goꞌettiyaagaa, ushshaanchanne kandduwan shori baynnabaa haniyaagaa gidaas. Kaalliya layttatun, keehi mino gidida jallissiya xaleta goꞌettiyoogaa doommaas; yaatiyo gishshau, hegau aylle gidaas. Taani daro amaliyau haarettido gishshau, hegau koshshiya miishshaa demmanau jallissiya xaliyaa zalꞌꞌiyoogaa doommaas.

Taani haniyoobay likke gidennaagaa ta wozanaynne kahay ubbatoo yootees; shin sheneho gaas. SHin, taani issitoo gelaychido gishshau, hegaappe kiyana danddayikke gaada qoppaas. Yetti durssi deꞌiyo soho ubban daro asaara deꞌiyaaba gidikkokka, taani darotoo boorasaysinne unꞌꞌettays. Issi issitoo, ta aawaynne aayyiyaa keehi loꞌꞌo asa gidiyoogaanne taani hagaa mala deꞌuwaa deꞌiyoy aybissakko qoppays.

TAANI LAAMETTANAADAN GEESHSHA MAXAAFAY MAADDIDO OGIYAA:

Taani laamettana danddayennabadan qoppiyaaba gidikkokka, harati hegaadan qoppibookkona. Ta aawaynne ta aayyiyaa 2000 M.Ln, taani Yihoowa Markkatu awuraajjaa shiiquwaa baanaadan shoobbido wode, ufayttabeennaba gidikkokka, he shiiquwaa baas. Taagaadan tumaappe haakkida, ta ishaynne ta michiyaakka he shiiquwaa biidoogan garamettaas.

Issi layttappe kase, yexxiya asaa beꞌanau he sohuwaa biidoogaa shiiquwan deꞌaydda hassayaas. SHin taani beꞌidoban keehi maalaalettaas. Yexxiya asaa beꞌanau biido wode, he sohoy sijaaraaninne hara buuraban kumiis. Qassi, yaa biyaageeti issoy issuwaara dosettokkona; yettan siyiyoobaykka ufayssennaba. SHin awuraajjaa shiiquwan, ta yuushuwan deꞌiya ubbay tumuppe ufayttiyaageeta; taani etaara daro layttau gaytta erennaba gidikkokka, eti tana ufayssan mokki ekkidosona. SHiiquwaa sohoy geeshsha; qassi yan tamaariyoobaykka sintta wodiyaabaa ufayssan naaganaadan oottiyaaba. Geeshsha Maxaafaa tumay keehi goꞌꞌiyoogaa akeekada, ta hanotaa yuushsha qoppiyoogaa doommaas.—Isiyaasa 48:17, 18.

Awuraajjaa shiiquwaappe simmin takkennan, Kiristtaane gubaaꞌiyau simmanau qofaa qachaas. Ta ishaynne ta michiyaakka, awuraajjaa shiiquwaara gayttidabay eta wozanaa denttettin, etikka gubaaꞌiyau simmanau qofaa qachidosona. Hegaa gishshau, nuuni heezzaykka Yihoowa Markkatuura Geeshsha Maxaafaa xannaꞌiyoogaa doommida.

Ta wozanaa keehi denttettida Geeshsha Maxaafaa xiqisee, “Xoossaakko shiiqite; ikka inttekko shiiqana” yaagiya, Yaaqooba 4:8n deꞌiyaagaa. Taani Xoossaakko shiiqana koyikko, ta deꞌuwaa giigissana koshshiyoogaa akeekaas. Harabaa gujjin, taani sijaaraa uyiyoogaa, jallissiya xaliyaanne ushshaa bessenna ogiyan goꞌettiyoogaa aggana koshshees.—2 Qoronttoosa 7:1.

Taani kase laggeta aggada, Yihoowayyo goynniya laggeta dooraas. Tana Geeshsha Maxaafaa xannaꞌissiya gubaaꞌe cima gidida ishay keehi maaddiis. I ubbatoo tau silkkiyaa dawalees; yiidikka oychees. Hachi gakkanau, tau mata lagge gididaageetuppe issoy a.

Taanikka ta ishaanne ta micheegaadan, 2001 M.L, boniyan ta huuphiyaa Xoossau geppada xammaqettaas. Wurssettan, nu soo asay Yihoowa goynuwan issuwaa gidido gishshau, ta aaway, ta aayyiyaanne Yihoowayyo ammanettidi deꞌida ta kaalo ishay keehippe ufayttidosona.

TAANI GOꞌETTIDO OGIYAA:

Taani kase Geeshsha Maxaafaa higgee keehi huqqunnees gaada qoppaas; shin keehi maaddiyoogaa haꞌꞌi akeekaas. Jallissiya xaliyaa goꞌettiyoogaanne a zalꞌꞌiyoogaa aggada taani loꞌꞌo asa gidanaadan Geeshsha Maxaafay maaddiis.

Taani alame yuushuwan deꞌiya Yihoowa Markkatu maabaraa yame gidiyo gita maataa demmaas. Eti issoy issuwaa wozanappe siiqoosona; qassi Xoossaayyo oottiyoogan issippetettaa medhidosona. (Yohaannisa 13:34, 35) He ishatu maabaraa yara gidida, taani keehi siiqiyo ta keettaayiyaa, Adiriyaana tau hara gita anjjo. Medhidaagaa issippe haggaaziyoogan keehi ufayttoos.

Taani ta xallaa siiqiyoogaappe, ta dosan kumetta wodiyaa haggaaziyoogan, haratikka Xoossaa Qaalan waanidi goꞌettana danddayiyaakko tamaarissaydda deꞌays. Ha oosoy aybippenne aaruwan tana ufayssees. Ta kumetta wozanaappe, Geeshsha Maxaafay taani laamettanaadan oottiis gaana danddayays. Taani wurssettan tumu laꞌatettaa demmaas.