“Daro asay tana kase ixxees”

KASE DEꞌUWAA:

Taani CHiile waanna katamaa Santtiyaagon diccaas; nu heeran jallissiya xaliyaa goꞌettiyoogee, citan danobaa oottiyoogeenne makkalabaa oottiyoogee meeze gididaba. Taayyo layttay ichasha gidido wode ta aawaa asi woriis. Hegaappe simmin, ta aayyiyaa issi meqettaa iita bitaniyaara deꞌiyoogaa doommaasu. He bitanee tananne ta aayyiyo ubbatoo qoxxees. Hegee taani hanno gakkanaashin qofan unꞌꞌettanaadan oottiis.

Taani gitatiyo wode, keehippe makkalancha gidada, tana qohiyaageetu bolli haluwaa kiyiyoogaa doommaas. Hevi-meetal giyo muuziqaa siyiyoogaa, ushshaa likkiyaappe aattada uyiyoogaanne issi issitoo jallissiya xaliyaa goꞌettiyoogaa doommaas. Jallissiya xaliyaa bayzziyaageetura ogiyaa bolli ooshshaa denttidi darotoo warettoos; eti tana woranau darotoo malidosona. Issi wode, nu morkke gidida danobaa oottiya citay tana worissanau meqettaa iita bitaniyaa miishshan shammiis, i tana cubiyan caddikkokka baqatada attaas. Hara wode qassi, jallissiya xaliyaa bayzziyaageeti ta huuphiyaa shugguxiyan tokkosanaunne tana sullanau malidosona.

Taani 1996n Karoliino giyo maccaasiyo siiqada, 1998n o ekkaas. Nu bayra naꞌay yeletti simmin, taani yiilluwaa eexxa kiyiyo gishshau ta aayee azinaa mala gidana gaada, qassi ta soo asaa qohana gaada yayyiyoogaa doommaas. Yaatiyo gishshau, iita amalee deꞌiyoogeeta maaddiya nu heeran deꞌiya dirijjitee tana maaddanaadan koyaas. Eti tana dumma dumma ogiyan akkamidosona, shin aynne maadettabeykke. Guuttaban gitaban yiillotiyoogaa aggabeykke; ta yiilluwaa teqqana danddayabeykke. Ta soo asaa qohiyoogaa agganau, bala qofaa qoppada tana tarkka woranau malaas. Ta koyidobay polettibeennaagee ufayssiyaaba.

Taani daro layttau Xoossi baawa gaydda takkidaba gidikkokka, Xoossan ammananau koyaas. Yaatiyo gishshau, amarida wodiyau Protesttantte haymaanootiyaa kaalliyoogaa doommaas. He wode ta keettaayiyaa Yihoowa Markkatuura Geeshsha Maxaafaa xannaꞌausu. Taani Yihoowa Markkata ixxays, qassi darotoo eta iita cashshaa cayays. SHin eti ubbatoo taani qoppiyoogaadan gidennan saruwan haasayissoosona.

Issi gallassi, Karoliina ta Geeshsha Maxaafan Mazamure 83:18 nabbabanaadan yootaasu. He xiqisee Xoossaa sunttay Yihoowa gidiyoogaa qonccissi yootees. Ta haymaanootiyan xoossaabaa tamaaraas shin Yihoowabaa erabeennaagan garamettaas. Taani 2000 M.L. doomettaa heeran Yihoowa Markkatuura Geeshsha Maxaafaa xannaꞌiyoogaa doommaas.

TAANI LAAMETTANAADAN GEESHSHA MAXAAFAY MAADDIIS:

Taani eraa kaseegaappe gujjiyo wode, Yihooway qarettiyaanne atto giya Xoossa gidiyoogaa erada minttettuwaa demmaas. Leemisuwau, Geeshsha Maxaafay Kessaabaa 34:6, 7n, Yihooway “qaretainne maarotai kumido Xoossaa, danddayanchchaa, aggenna siiqoi daridoogaanne daro ammanettiyaagaa. . . . Aggenna siiquwaa sha7atussi naagiyaagaa; iitatettaa, makkalaanne nagaraa atto yaagiyaagaa” gidiyoogaa yootees.

Gidoppe attin, taani tamaariyoobaa oosuwan peeshshiyoogee metennaba gidenna. Taani hanqquwaa eexxa kiyiyoogaa mule aggana danddayennabadan qoppaas. Taani yiillotiyo wode ubban Karoliina tana siiquwan minttettausu. A taani hegaa agganau baaxetiyoogaa Yihooway beꞌiyoogaa hassayanaadan yootausu. Taani ta eeshshaa laammana danddayennabadan qoppiyaaba gidikkokka, a yootiyoobay ubbatoo Yihoowa ufayssiyaabaa oottanau baaxetanaadan tana minttettiis.

Tana xannaꞌissiya Alahanddiroy, issi gallassi taani Galaatiyaa 5:22, 23 nabbabanaadan yootiis. He xiqisee Xoossaa ayyaanaa ayfee “siiquwaa, ufaissaa, sarotettaa, danddayaa, kehatettaa, lo77otettaa, ammanuwaa, ashkketettaa, ba huuphiyaa naagiyoogaa” gidiyoogaa yootees. Alahanddiroy, taassi he eeshshati deꞌana danddayiyoy ta minotettaana gidennan, Xoossaa ayyaanaa maaduwaana gidiyoogaa yootiis. Hegee taani ta qofaa laammanaadan oottiis!

Guyyeppe, Yihoowa Markkatu gita shiiquwaa shiiqaas. Yan deꞌiya asay maaran mankkan simerettiyoogee, eta geeshshatettaynne siiqoy taani tumu haymaanootiyaa demmidoogaa ammanettanaadan oottiis. (Yohaannisa 13:34, 35) Hegaappe simmin, Usuppune 2001 M.Ln xammaqettaas.

TAANI GOꞌETTIDO HANOTAA:

Yihooway taani makkalancha asa gidiyoogaa aggada saro asa gida laamettanaadan maaddiis. I taani gelido kiyana danddayenna torqquwaappe tana dafidi kessidabadan qoppays. Daro asay tana kase ixxees; gidikkokka, eta moorancha giikke. Haꞌꞌi ta keettaayeeranne nu naaꞌꞌu attuma naatuura sarotettan Yihoowayyo oottaydda deꞌays.

Ta dabbotinne ta kase laggeti taani hegaadan laamettidoogan keehippe garamettidosona. Hegaappe denddidaagan, etappe daroti Geeshsha Maxaafaa tumaa siyanau koyidosona. Taani harati Yihoowa eranaadan maaddiyo maataakka demmaas. Geeshsha Maxaafaa tumay etikka laamettanaadan oottiyoogaa beꞌiyoogee keehi ufayssiyaaba!