Asau Immettana Diya Ooratta Brooshuriyaa!
1. Hidaare aginan asau immana xuufee awugee, ha xuufiyaa halchoy aybee?
1 “Naagi Uttite!” giya 2009n shiiqido Awurajjaa SHiiquwan Geeshsha Maxaafaa—A Giddon Deꞌiya Waanna Qofay Aybee? giya brooshuree kiyiis. Hidaare aginan, ha brooshuree alame yuushuwan deꞌiya gubaaꞌetun koyro wodiyau asau immettana. Ha xuufee nu moottan deꞌiya asaa waati maaddana danddayii? Daro asatussi, ubba qassi kiristtaane gidenna haymaanootiyan deꞌiyaageetusi Geeshsha Maxaafaa xeelliyaagan deꞌiya eray guutta. Yaatiyo gishshau, sinttaa 3n deꞌiyaagaadan ha brooshuree giigidoy ‘Geshsha Maxaafaa waanna qofaa’ qonccissanaassa.
2. Ha brooshuriyaa waatidi asau immana danddayiyoo?
2 Asau Waati Immanee?: Kaalliyaagaadan gaana danddayoos: “Ha xiqisiyaa qofaa xeelliyaagan intteyyo deꞌiya xeelaa erana koyoos. [2 Ximootiyoosa 3:16 nabbaba.] Nu haasayissiyo daroti ha qofan maayoosona; harati qassi Geeshshaa Maxaafay coo loꞌꞌo maxaafa xalla giidi ammanoosona. Intte qofay shin aybee? [Zaaro immanaashin takki ga.] Nu ammanoy augaanne gido, Geeshsha Maxaafaa pilgganaadan oottiya loꞌꞌo gaasoti doosona. [Sinttaa 3 huuphessan deꞌiya koyro qofaa nabbaba.] Ha brooshuriyan qonccida issi issi Geeshsha Maxaafaa qofata nabbabiyo wode, issi ufayssiyaabaa demmeeta; hegeekka kumetta Geeshsha Maxaafau issi huuphe yohoynne waanna qofay deꞌiyoogaa.”
3. Kiristtaane gidenna asay corattiyo heeran harabaa ay gaana danddayiyoo?
3 Qassi Kiristtaane gidenna haymaanootiyan deꞌiya asay corattiyo heeran hagaadan gaana danddayoos: “Ha Geeshsha Maxaafaa xiqisiyan intteyyo deꞌiya xeelaa erana koyoos. [Mazamure 37:11 nabbaba.] Ha hiraagay polettiyoode biittay ay malatana giidi qoppeetii? [Zaaro immanaashin takki ga.] Hagge dumma dumma wogaaninne ammanuwan deꞌiya asay Geeshsha Maxaafaappe demmana danddayiyo hidootaunne minttettuwau leemiso.” Sintta 3 huuphessan deꞌiya qofaa nabbaba simmada brooshuriyaa imma.
4. Geeshsha Maxaafaa xinaatiyaa doomissanau waatidi ha broshuriyaa goꞌettana danddayiyoo?
4 Geeshsha Maxaafaa Xinaatiyaa Doomissa: Sooppe soo demmido asaa zaaretti oychiyo wode hagaappe kase tobbido qofaa denttidi hassayissanaunne kasetidi doorido shaahuwaa wurssettan deꞌiya oyshaa goꞌettidi issi woykko naaꞌꞌu mentto malan tobbana danddayoos. Geeshsha Maxaafay Tamaarissiyoy giya maxaafaa erissana koyiyaaba gidikko qassi, ha brooshuriyaa wurssetta sinttaa nabbabana danddayoos; yaatidi, Geeshsha Maxaafay Tamaarissiyoy giya maxaafaa immidi, an deꞌiya shemppotuppe a ufayssiyaagee awugaakko oychi simmidi, he shemppuwaappe issi woykko naaꞌꞌu menttuwaa issippe tobbana danddayoos. Hidaare aginan, ha ooratta brooshuriyaa asau immiyoogan ubbaykka kumetta hanotan shaahettiyaageeta gidoos!