Ha Wodiyan Yihoowa SHeniyaa Poliyaageeti Oonee? Giya Brooshuriyaa Goꞌettiyo Ogiyaa Geeshsha Maxaafaa Xinaateti Yihoowa Dirijjitiyaa Eranaadan Maaddanau Giigida Ooratta Brooshuriyaa
1. Yihoowa SHeniyaa giya brooshuree giigido heezzu gaasoti aybee?
1 Ha Wodiyan Yihoowa SHeniyaa Poliyaageeti Oonee? giya brooshuriyaa goꞌettiyoogaa doommadii? A giigissido gaasoy, (1) Geeshsha Maxaafaa xinaateti Yihoowa Markkata eranaadaana, (2) eti nu oosuwaabaa eranaadan maaddanaassanne (3) nu dirijjitee oottiyo ogiyaa eta akeekissanaassa. Yihoowa SHeniyaa giya brooshuriyan, xinaatiyaa wurssettan ubbatoo ichashaappe biidi tammu daqiiqan tobbana danddayiyo, issi issi sinttan wuriya timirtteti deꞌoosona.
2. Ha brooshuree giigido ogiyaanne a giddon deꞌiya qofaa qonccissa.
2 Giigido Ogiyaa: Yihoowa dirijjitiyaa xeelliyaagan qommoora odettidaagaadan, dumma dummabaa qonccissiya heezzu shaahoy ha brooshuriyan deꞌees. Brooshuriyan deꞌiya 28 timirttiyaa huuphe yohoy ubbay oysha; qassi borxxu gi xaafettida sima huuphe yohoti he oyshau zaaro. Nu oosoy alame yuushuwan oosettiyoogaa bessanau 50ppe dariya biittaappe shiishshido pootoy kumetta brooshuriyan deꞌees. Tamaaree oottanaadan neeni minttettana danddayiyo qofay deꞌiyo, “Loyttada Eranau” giya saaxinee daro timirttetun deꞌees.
3. Yihoowa SHeniyaa giya brooshuriyaa waatidi goꞌettana danddayiyoo?
3 Neeni Goꞌettana Danddayiyo Ogiyaa: Doommiyo wode timirttiyaa huuphe yoho gidida oyshaa tamaariyaa bessa. Yaatada, timirttiyaa intte issippe nabbabiyo wode borxxu gi xaafettida sima huuphe yohuwaa mintta yoota. Wurssettan, he sinttau tohossan deꞌiya zaareto oyshaa tobbite. Timirttiyaa issi kutti nabbabana danddayeeta; woy shaahuwan shaahuwan nabbabidi tobbana danddayeeta. Nabbabana xiqisee awugaakko akeekan doora. Misiliyan qonccidabaanne “Loyttada Eranau” giya saaxiniyan deꞌiyaabaa tobbennan aggoppite. Darotoo timirtteta maaraara tobbana koshshees. Gidoppe attin, biron gakkibeennaba gidikkonne, tamaaree eranau koyiyoobay deꞌiyo timirttiyaa tobbana danddayeeta. Leemisuwau, matan gita shiiqoy deꞌikko, timirtte 11 bessana danddayaasa.
4. Ha ooratta brooshuriyaa demmido gishshau intte ufayttiyoy aybissee?
4 Nuuni issi ura Geeshsha Maxaafaa xannaꞌissiyo wode, i saluwan deꞌiya nu Aawaa eranaadan maaddoos. Gidoppe attin, Yihoowa dirijjitiyaabaakka a tamaarissana koshshees. (Lee. 6:20) Hegaadan oottanau maaddiya ha ooratta brooshuriyaa demmido gishshau keehippe ufayttoos!