Ha Wodiyan Yihoowa SHeniyaa Poliyaageeti Oonee?
1. Ha Wodiyan Yihoowa SHeniyaa Poliyaageeti Oonee? giya brooshuriyaa xannaꞌiyoogaa doommanay awudee, hegee nuna ayba ogiyan goꞌꞌanee?
1 Mata wode Gubaaꞌiyaa Geeshsha Maxaafaa Xinaatiyau Ha Wodiyan Yihoowa SHeniyaa Poliyaageeti Oonee? giya brooshuriyaa xannaꞌana. Ha brooshuree, “Ne Wozanaa Minttada Naaga!” giya Awuraajjaa SHiiquwan kiyiis; qassi giigidoy Geeshsha Maxaafaa xinaateti Yihoowa dirijjitiyaa eranaadan maaddanaassa. Ha brooshuriyaa xannaꞌiyoogee nuuni Yihoowa dirijjitiyaa yara gidiyoogaa keehi nashshana mala maaddiyoogaa xalla gidennan, haggaazuwau maaddiya ha muruta xuufiyaa loytti erana malakka maaddees.—Maz. 48:13.
2. Ha brooshuriyaa gubaaꞌiyan xannaꞌanay ayba ogiyaanee?
2 Xannaꞌanay Ayba Ogiyaanee? Kaalettiyaagee ubba timirtteta imettida wodiyan loytti shiishshana koshshees. I 28 timirttetakka oyshan xaafettida huuphe yohuwaa nabbabidi doommees. Kaallidi, nabbabiyaagee koyro menttuwaa nabbabanaadan shoobbees. Kaallidi, kaalettiyaagee he menttuwau giigissido oyshaa ezggiyaageeta oychees. Hegaappe simmidi, borxxu gi xaafettida qofa qashuwan doommiya menttota huuphiyan huuphiyan nabbabidi tobbana koshshees. Menttoy nabbabetti simmin, kaalettiyaagee he menttoy timirttiyau huuphe yoho gidida oyshaa zaariyoy ayba ogiyaanakko yootanaadan oychees. Ezggiyaageeti qofaa immana danddayiyo daro misileti brooshuriyan deꞌoosona. Wodee deꞌikko, waanna qofaa oyqqida xiqiseta nabbabana koshshees. Kaalliya timirttiyaa tobbanaappe kase, kaalettiyaagee tohossan deꞌiya oyshata oychidi zaarettees. “Loyttada Eranau” giya saaxinee deꞌikko, kaalettiyaagee hegaa nabbabissidi, Geeshsha Maxaafaa xannaꞌiya uri he qofan waanidi goꞌettana danddayiyaakko ezggiyaageeta oychees. Wodee deꞌiyaaba gidikko, kaalettiyaagee xinaatiyaa kuushshan, zaarettanau timirttiyau huuphe yoho gidida oyshaa oychana danddayees. Ha qofaa Geeshsha Maxaafaa xannaꞌissiyo wode goꞌettana koshshees giyoogaa gidenna.
3. Ha brooshuriyaa xannaꞌiyoogan keehippe goꞌettana danddayiyoy ayba ogiyaanee?
3 Keehippe goꞌettanau, shiiquwau loytti giigettidi yiite. Intte qofaa yootanau danddayettida ubbabaa oottite. Tobbiyo wode, ha brooshuree Geeshsha Maxaafaa xannaꞌissiyo uraa ayba ogiyan goꞌꞌiyaakko qoppite. Haratikka nunaara Xoossaa sheniyaa poliyoogan merinaa deꞌuwaa hidootaa demmanaadan maaddanau ha brooshuriyaa xannaꞌiyoogee nuna maaddana giidi qoppoos.—1 Yoh. 2:17.