Deꞌuwan Hanidabata
◼ Awusttiraaliyaa: Joni tamaarida asa; naatettan deꞌiiddi woosa keettaa bees, shin guyyeppe “Xoossi baawa giidi mintti ammaniya” asa gidiis. Issi aqinyee ayyo Deꞌon Deꞌiyaabay Merettidee? giya brooshuriyaa immiis; qassi zaarettidi oychiyo wode Deꞌuwaa Doomettaa giya brooshuriyaa immiis. Aqinye ishay meretaa xeelliyaagan woy Geeshsha Maxaafaa hiraagaa xeelliyaagan ooratta kiyiya xuufiyaa ayyo immidi koshshaa denttettiyoogaa aggibeenna. I Joni nabbabanau koyiyoogaa akeekidi, Geeshsha Maxaafay—Xoossa Qaaleeyye woy Asa Qaalee? giya maxaafaa au immiis. Joni hegaa nabbabi simmidi, bana “Xoossay deꞌiyoogaa guuttaa guuttaa siriya” asadan xeelliyoogaa doommiis. Hegaappe simmin, aqinye ishay Geeshsha Maxaafay Tamaarissiyoy giya maxaafaa Jonau immidi, sinttaa 20n mentto 8nne sinttaa 23-24n mentto13-16 a bessiis. Hegan deꞌiya xiqisee Jona keehippe maalaalissido gishshau, “Taani Geeshsha Maxaafaa pilggana koshshennan aggenna” yaagiis.
◼ Mekisiiko: Issi bitanee Geeshsha Maxaafay Xoossaa ayyaanaa kaaletuwan xaafettidoogaa ammanennaagaa issi ishaassi yootiis. He ishay Geeshsha Maxaafay ayyaanaa kaaletuwan xaafettidoogau naqaasha gidiyaabaa bessanaagaa yootiis. Amaridaagaa tobbi simmin, bitanee Geeshsha Maxaafaappe eridobay a wozanaa denttettiyoogaa doommiis. Ubbaappe aaruwan Xoossay kessido maaraabaa eridobay a wozanaa keehippe denttettiis. I ishaayyo hagaadan giis: “Taani koyro nenaara Geeshsha Maxaafaappe nabbabiyo wode, tau hara maxaafaappe nabbabiyo zore mala milatiis, qassi hegee ta wozanaa denttettibeenna. SHin haꞌꞌi appe nabbabiyo wode, ubba qassi kandduwaaban zoriyoobay ta wozanaa keehippe denttettiis.”
◼ Amarkkaa: Issi azinaynne machiyaa gita kataman asay dariyoosan markkattiiddi, Xoossay deꞌiyoogaa ammaniyaaba gidikkokka, Geeshsha Maxaafay Amarkkaanne Awurooppaa biittaa maxaafaa gada qoppiya, Taywaane biittaappe yiida maccaaseera gayttidosona. A ishalo deꞌo deꞌiyaaba gidikkokka, deꞌuwan ufayttenna gishshau, eti maxeetiyaa micci wottiyo sohuwaa yaasu. A ufayssiya deꞌo deꞌanaadan Geeshsha Maxaafay bana maaddan gaada qoppaasu. He azinaynne machiyaa Geeshsha Maxaafay Tamaarissiyoy giya maxaafaanne Adussa wodiyau saruwaanne ufayssaa—Hegaa ayba ogiyan Demmanee? giya brooshuriyaa goꞌettidi o xannaꞌissiyoogaa doommidosona. Geeshsha Maxaafay Tamaarissiyoy giya maxaafan shemppo naaꞌꞌaa xannaꞌiyoogaa aggidi, he brooshuriyan “Asaa Naati Ubbay Anjjuwaa Demmanau Kaaleto Gidiya Maxaafaa” giya huuphe yohuwaa tobbidosona. He huuphe yohuwan koyro usuppun menttota tobbi simmin, maccaasiyaa garamettada Geeshsha Maxaafay hara haymaanoote maxaafatuura geeddarssiyo wode keehi dumma maxaafa gidiyoogaa yootaasu. Geeshsha Maxaafan deꞌiya polettida hiraagata tobbi simmin, “Geeshsha Maxaafaagaadan likke gidida hara maxaafi deꞌiyaaba milatenna!” yaagaasu.
◼ Jaappaane: Haasayissiyo bitanee Xoossan ammanennaagaa aassiyaagaassi yootidaba gidikkokka, aassiyaagee zaaretti oychiyo wode ubban Beegottite! maxeetiyan “Hagaa Giigissiday Deꞌii?” giya huuphe yohuwaa guutta saatiyau au yootiis. Wodiyaappe wodiyan, he bitanee ba qofaa laammidi Medhidaagee deꞌennan aggenna giidi qoppiyoogaa doommiis. Haꞌꞌi he bitanee Xoossay deꞌiyoogaa ammanees; qassi aassiyaagee Xoossaappe Yiya Mishiraachuwaa! giya brooshuriyaappe a xannaꞌissiiddi deꞌees.
◼ Kanaada: Issi maccaasiyaa ba sooppe kiyada ba kaamiyan gelana hanishin issi michiyaa iyyo ooratta maxeeteta immaasu. Michiyaa hara gallassi yiyo wode, maccaasiyaa siyanau koyennaagaa, qassi Xoossan ammanennaagaa minttada yootaasu. Michiyaa hidootaa qanxxennan, Ufayssiya Deꞌuwaa—Waatidi Demmana Danddayettii? giya brooshuriyaa iyyo ehaanau qoppaasu. Michiyaa hara gallassi he maccaasiyo son demmada, a Xoossan ammanennaba gidikkokka, a barkka naata dichiyoogaa erido gishshau ibaa qoppaydda takkidoogaa maccaaseeyyo yootaasu. Michiyaa he brooshuriyan loꞌꞌo zoriyaa auppe demmana danddayiyaakko yootiya, sinttaa 4n mentto 6 maccaasiyo bessaasu. Bessada, naata dichiyoogaa xeelliyaagan timirtte 2n imettida qofaa nabbabanaadan o minttettaasu. Maccaasiyaa brooshuriyaa keehippe ufayttada ekkaasu.