XANNAꞌIYO HUUPHE YOHUWA 15
MAZAMURE 30 Ta Aawaa, Ta Xoossaanne Ta Miyyiyaa
‘Xoossaa Matan Deꞌiyogee Nuuyyo Loꞌꞌo’!
“Taassa gidikko, taani Xoossaa matan de7iyoogee taayyo lo77o.”—MAZ. 73:28.
TAMAARANABAA
Nuuni Yihoowakko waani shiiqana danddayiyakko, qassi yaatiyogan waani goꞌettiyakko beꞌana.
1-2. (a) Nuuni issi uraara loytti laggetanawu waatana koshshii? (b) Nuuni ha huuphe yohuwan ay beꞌanee?
NEESSI mata laggee deꞌii? Neeni aara laggetanawu ay oottadii? Neeni aara wodiya aattidoogee, A gakkida metuwa, qassi I dosiyobaanne ixxiyobaa neeni eridoogee qoncce. Neeni bessana koyiyo loꞌꞌo eeshshati awu deꞌiyogaa akeekadasa. Yaatiyo gishshawu, neeni ne laggiya siiqadasa.
2 Neeni issi uraara loytta laggetanawu aara wodiya aattana koshshees. Xoossaa Yihoowara dabbotaa minttiyogeekka hegaa mala. Nuuni nu Xoossaakko waani shiiqana danddayiyakko, qassi yaatiyogee ay goꞌꞌaa demissiyakko ha huuphe yohuwan beꞌana. Ooppenne aadhdhiya nu Dabbuwa Yihoowakko shiiqiyogee nuussi loꞌꞌo gidiyoy aybissakko koyruwan ane beꞌoos.
3. Nuuni Yihoowakko shiiqiyogee demissiyo goꞌꞌaa wotti dentti qoppana koshshiyoy aybissee? Leemisuwa yoota.
3 Yihoowakko shiiqiyogee loꞌꞌo gidiyogaa neeni maayettiyogee qoncce. Yihoowakko shiiqiyogee keehi loꞌꞌo gidiyogaa nuuni wotti dentti qoppiyogee, ubbatoo akko shiiqanaadan nuna maaddees. (Maz. 63:6-8) Leemisuwawu, bollawu koshshiya qumaa miyogee, bollaa minttiyabaa oottiyogee, gidiyagaa keena shemppiyogeenne haattaa uyiyogee nuna maaddees. Shin, daroti hageetubaa loytti qoppokkona, qassi bantta payyatettaa sheneho goosona. Gidikkokka, nu payyatettawu maaddiyabaa oottiyogee ay keena goꞌiyakko darotoo qoppikko hegeeta ubbatoo oottana danddayoos. Hegaadankka, Yihoowakko shiiqiyogee nuna goꞌiyogaa eroos, shin hegaa goꞌꞌaa wotti dentti qoppikko nu Dabbuwakko ubbatoo shiiqana danddayoos.—Maz. 119:27-30.
4. Mazamure 73:28 xaafidaagee woygidee?
4 Mazamure 73:28 nabbaba. Mazamure 73 xaafidaagee Yihoowa garuwan muuziqaa miishshaa kaaꞌanaadan sunttettida Leewa zare. I daro layttawu Yihoowawu ammanettidi goynnidoogee qoncce. Gidikkokka, “Xoossaa matan de7iyoogee” loꞌꞌo gidiyogaa bawu hassayana, qassi haratakka hassayissana koshshiis. Yaatiyogee demissiyo goꞌatuppe amaridaageeti awugeetee?
“XOOSSAA MATAN DE7IYOOGEE” UFAYSSAA DEMISSEES
5. (a) Yihoowakko shiiqiyogee nuuni ufayttanaadan oottiyoy aybissee? (b) Yihooway immiyo aadhdhida eratettay nuna maaddiyoynne naagiyoy ayba ogiyanee? (Leemiso 2:6-16)
5 Nuuni Yihoowakko loytti shiiqiyo wode kaseegaappe aaruwan ufayttana. (Maz. 65:4) Nuuni ufayttanaadan oottiya daro gaasoti deꞌoosona. Leemisuwawu, I nuussi yootiyobaa Geeshsha Maxaafaappe nabbabidi ayyo azazettiyo wode nuuni hayyottiyageeta gidoos. He hayyoy nuna iitabaappe naagananne gita mooro moorennaadan maaddana. (Leemiso 2:6-16 nabbaba.) Geeshsha Maxaafay, “Aadhdhida eratettaa demmiya urai, akeekaakka babaa oottiya urai anjjettidaagaa” woy ufayttiyagaa giyoy hegaassa.—Lee. 3:13.
6. Mazamuraawee ufayttiyogaa agganaadan oottidabay aybee?
6 Yihoowa dabbotikka issi issitoo azzaniyogee tuma. Mazamure 73 xaafidaagee iitabaa qoppiyogaa doommido wode ufayttiyogaa aggiis. Mazamuraawee Xoossaa bonchchennanne awu azazettenna iita asati loꞌꞌo deꞌuwa deꞌiyogaa qoppidi yiillotiis. Ubbakka etaagaadan deꞌanawu koyiis. Makkalanchchanne otorettiya asati ubbatoo dure, payyanne ubba qassi waayettokkona giidi I balan qoppiis. (Maz. 73:3-7, 12) He mazamuraawee issi wode keehi unꞌꞌettido gishshawu Yihoowawu haggaazanawu baaxetiyogee hada giidi qoppiis. I keehi azzanidi hagaadan giis: “Taani ta wozanaa geeshsha oottidoogeenne taani ta xillotettaa bessanau ta kushiyaa meecettidoogee tumuppe mela.”—Maz. 73:13.
7. Nuuni azzaniyo wode waatana danddayiyoo? (Misiliyakka xeella.)
7 Mazamuraawee keehi azzanidaba gidikkokka, I ba qofaa laammanawu issibaa oottiis. I ‘Xoossaa geeshsha sohuwa gelin’ Yihooway A qofaa suurissiis. (Maz. 73:17-19) Nuuni keehi azzaniyo wode nu mata Dabboy Yihooway hegaa erees. Nuuni kaaletuwa demmanawu Yihoowa woossiyageeta, qassi I ba Qaalaanne galchchaa baggaara immiyo maaduwa ekkiyageeta gidikko, nu azzanuwa genccanawu minotettaa demmana. Nuuni keehi unꞌꞌettiyo wodekka Yihooway nuna mintteesinne woppissees.—Maz. 94:19.a
Mazamure 73 xaafida Leewa zaree ‘Xoossaa geeshsha sohuwan’ eqqiis (Mentto 7 xeella)
“XOOSSAA MATAN DE7IYOOGEE” LOꞌꞌO DEꞌUWANNE HIDOOTAA DEMISSEES
8. Xoossaakko shiiqiyogee nuna maaddiyo keehi koshshiya hara ogeti awugeetee?
8 Xoossaakko shiiqiyogee keehi koshshiya naaꞌꞌu ogetunkka nuna maaddees. Koyruwan, nuuni ufayssiya deꞌuwa deꞌanaadan oottees. Naaꞌꞌanttuwan, nuuyyo ammanttiya hidootay deꞌanaadan maaddees. (Erm. 29:11) Ane ha goꞌꞌatubaa loytti pilggoos.
9. Nuuni Yihoowakko shiiqiyogee ufayssiya deꞌo deꞌanaadan waati maaddii?
9 Nuuni Yihoowakko shiiqiyogee loꞌꞌo deꞌo deꞌanaadan oottees. Ha wodiyan Xoossi baawa giya daroti asay saꞌan deꞌiyoy aybissakko erokkona; qassi sinttappe asay deꞌenna giidi ammanoosona. Shin nuuni Geeshsha Maxaafaa xannaꞌido gishshawu, “Xoossai de7iyoogaanne bana koyiyaageetuyyo woituwaa immiyoogaa” ammanida. (Ibr. 11:6) Ha wodiyankka nuuni ufayssiya deꞌuwa deꞌoos; ayssi giikko, nuuni merettido halchchuwara maayettiya ogiyan saluwan deꞌiya nu Aawaa Yihoowawu haggaazoos.—Zaa. 10:12, 13.
10. Sinttanaa xeelliyagan Yihoowan hidootaa wottiyageetussi Mazamure 37:29y yootiyobay aybee?
10 Darotussi deꞌo giyogee ooso oottiyogaa, naata dichchiyogaanne sinttanaassi miishshaa shiishshiyogaa xalaala. Eti Xoossay sinttanaassi qaalaa gelidobaa erokkona. Shin Yihoowa ashkkarati an hidootaa wottoosona. (Maz. 25:3-5; 1 Xim. 6:17) Nuuni nu Xoossaanne nu Dabbuwa Yihoowan ammanettoos, qassi I nuussi qaalaa gelidobaa polanaagaa eroos. Nuuni gannatiyan awu merinawu goynniyogaa gujjin, ufayssiya darobata yeemuwan naagoos.—Mazamure 37:29 nabbaba.
11. Nuuni Xoossaakko shiiqiyogee nuna aybin maaddii, qassi I waananaadan oottii?
11 Xoossaakko shiiqiyogee hara daro ogetunkka nuussi loꞌꞌo. Leemisuwawu, nuuni zilꞌꞌettidi laamettiyo wode nu nagaraa atto gaanawu Yihooway qaalaa geliis. (Isi. 1:18) Yaatiyo gishshawu nuuni kase oottido nagaran ubbatoo unꞌꞌettana koshshenna. (Maz. 32:1-5) Qassi nuuni Yihoowakko shiiqiyogee ikka ufayttanaadan oottees. (Lee. 23:15) Nuuni Yihoowakko shiiqido gishshawu hara daro anjjotakka demmidoogee qoncce. Yaatin neeni ubbatoo Yihoowakko shiiqada deꞌanawu waatana danddayay?
UBBATOO ‘XOOSSAA MATAN DEꞌANAWU’ WAATANA DANDDAYAY?
12. Neeni Xoossaakko loytta shiiqanawu ay oottadii?
12 Neeni haattan muukettida Kiristtaane gidikko Yihoowakko shiiqanawu darobaa oottadasa. Neeni Xoossaa Yihoowabaanne Yesuus Kiristtoosabaa tumaa tamaarada, ne kase nagaran zilꞌꞌetta laamettadasa, Xoossan ammaniyogaa bessadasa, qassi A sheniyadan deꞌanawu murttadasa. Nuuni Xoossaakko loytti shiiqanawu hageeta aggennan oottana koshshees.—Qol. 2:6.
13. Nuuni Yihoowakko shiiqidi deꞌanaadan maaddana danddayiya heezzubati awugeetee?
13 Nuuni ubbatoo Yihoowakko shiiqidi deꞌanawu nuna aybi maaddanee? (1) Nuuni Geeshsha Maxaafaa ubbatoo nabbabananne xannaꞌana koshshees. Nuuni Geeshsha Maxaafaa nabbabiyo wode Xoossaabaa eriyogaappe aarobaa oottana koshshees. Yihooway nuuppe koyiyobay aybakko loytti akeekanawunne I ba Qaalan xaafissido maratussi azazettanawu nuuni baaxetana koshshees. (Efi. 5:15-17) (2) Yihooway nuna siiqiyogaa bessido daro ogeta wotti dentti qoppiyogan nu ammanuwa minttana koshshees. (3) Nuuni Yihoowa yiilloyiyabata ubbatoo ixxananne hegeeta oottiya asatuppe haakkana koshshees.—Maz. 1:1; 101:3.
14. Koyro Qoronttoosa 10:31 yootiyogaadan, nuuni ubba galla nu deꞌuwan Yihoowa ufayssanawu oottana danddayiyo amaridabati awugeetee? (Misiliyakka xeella.)
14 Koyro Qoronttoosa 10:31 nabbaba. Yihoowa ufayssiyabata ubbatoo oottiyogee keehi koshshiyaba. Shin nuuni haggaazuwa kiyiyogaappenne shiiqota shiiqiyogaappe aarobaa oottana koshshees. Nuuni ubba galla oottiyoban Yihoowa ufayssana koshshees. Leemisuwawu, nuuni ubbabaa geeshsha wozanan oottiyageetanne nuussi deꞌiyabaa haratussi shaakkiyageeta gidiyo wode Yihooway ufayttanaadan oottoos. (2 Qor. 8:21; 9:7) Deꞌuwa imotaa nuuni xoqqu ootti xeellanaadan Yihooway koyees. Nuuni likkiyappe aaruwan meennaadaaninne uyennaadan naagettiyogan, qassi payyatettawu maaddiyabata oottiyogan deꞌuwa Immidaagaakko loytti shiiqana danddayoos. Nu oottiyo ubbaban A ufayssanawu koyiyogaa Yihooway beꞌiyo wode kaseegaappe aaruwan nuna siiqana.—Luq. 16:10.
Qohuwappe naagettidi laaggiyogee, bollaa minttiyabaa oottiyogaaninne bollawu maaddiya qumaa miyogan nu payyatettaa naagiyogee, qassi haratuyyo kehiyogee nuuni Yihoowa ufayssana danddayiyo amarida ogeta (Mentto 14 xeella)
15. Nuuni harata waati oyqqanaadan Yihooway koyii?
15 Yihooway iitatuyyokka loꞌꞌotuyyokka keha. (Mat. 5:45) Nuunikka haratuyyo kehanaadan I koyees. Leemisuwawu, nuuni ‘oonanne cayennaageeta, palamettennaageetanne asa ubbawu ashilaaliyageeta’ gidana koshshees. (Tii. 3:2) Yaatiyo gishshawu, asay Yihoowan ammanana xayikkokka, nuuni etappe aadhdhiyabadan qoppokko. (2 Xim. 2:23-25) Nuuni harata ubbatoo kehatettan oyqqiyogan Yihoowakko shiiqoos.
NUUNI XUBETTIYO WODEKKA “XOOSSAA MATAN” DEꞌANA DANDDAYOOS
16. Mazamure 73 xaafidaagee amarida wodiyawu Yihoowawu haggaazi simmin awu aybi siyettidee?
16 Neeni balabaa oottido gishshawu, Yihooway neekko shiiqenna gaada issi issitoo qoppana danddayaasa. Nuuni beꞌidoogaadan Mazamure 73 xaafidaagaakka hegaa malabay gakkiis. I hagaadan giis: “Ta gedee xubettanau guuttaa attiis; ta tohoi hallixxanau matiis.” (Maz. 73:2) I ‘yiillotidoogaanne’ Yihoowa sinttan ‘aynne akeekenna’ “miizza mala” gididoogaa yootiis. (Maz. 73:21, 22) Shin I balabaa qoppido gishshawu Yihooway A haranttuwa siiqennabadaaninne awu atto geennabadan ayyo siyettidee?
17. (a) Mazamuraawee hidootaa qanxxido wodekka waatidee? (b) Nuuni appe ay tamaarana danddayiyoo? (Misiliyakka xeella.)
17 Mazamuraawee Yihooway bana aggidabadan qoppikkokka, I hegaadan qoppidoy amarida wode xalaalawu gidiyogee qoncce. I hidootaa qanxxido wodekka, Yihoowakko shiiqiyogee koshshiyaba gidiyogaa eriis; I hagaadan giis: “SHin taani ubbatookka nenaara [Yihoowara] de7ais; ta ushachcha kushiyaa neeni oiqqadasa. Ne zoriyan tana kaalettaasa; hegaappe guyyiyan neeni tana bonchchuwaayyo efaana.” (Maz. 73:23, 24) Nuunikka nu ammanoy shuggiyo wode woy balabaa oottidoogaa gaasuwan hidootaa qanxxiyo wode Yihooway nuna minttanaadan woossana koshshees. (Maz. 73:26; 94:18) Nuuni gita nagara oottikkokka, Yihooway nuussi ‘atto gaanawu’ giigi uttidoogaa ammanettidi akko simmana danddayoos. (Maz. 86:5) Ubba qassi, nuuni hidootaa qanxxiyo wode nu Xoossaakko shiiqiyogee keehi koshshiyaba.—Maz. 103:13, 14.
Nuuni nu ammanuwa minttana koshshiyabadan nuussi siyettiyo wode, darotoo woossiyogaaninne ubbatoo shiiqota shiiqiyogan Yihoowara dabbotaa minttana bessees (Mentto 17 xeella)
MERINAWU ‘XOOSSAA MATAN DEꞌA’
18. Nuuni merinawu Yihoowakko shiiqana koshshiyoy aybissee?
18 Nuuni Yihoowakko merinawu shiiqidi deꞌana danddayoos. Nuuni abaa tamaariyogaa mule aggokko. Geeshsha Maxaafay Yihoowa ogiya, A hayyuwanne A eraa “ooni akeekana danddayii” yaagees.—Roo. 11:33.
19. Sinttanaabaa xeelliyagan Mazamure maxaafay yootiyobay aybee?
19 Mazamure 79:13y hagaadan gees: “He wode nuuni ne asati, ne wudiyaa dorssati, merinau galataa neeyyo immana; yeletaappe yeletaa gakkanaayyo nena zaari zaaridi galatana.” Neenikka Xoossaakko shiiqada deꞌikko, merinaa anjjuwa demmanaagaa ammanettada, “Xoossai ta wozanaa minttiyaagaanne merinaayyo tana gakkida saamaa” gaana danddayaasa.—Maz. 73:26.
MAZAMURE 32 Yihoowa Bagga Gida!
a Adussa wodiyawu unꞌꞌettiya woy azzaniya amaridaageetussi aakimiya maadoy koshshana danddayees. Gujjada eranawu, Wochchiyo Keelaa, Paydo 1 2023 xeella.