XANNAꞌIYO HUUPHE YOHUWA 16
MAZAMURE 87 Yiidi Minettite
Ishanttuuranne Michchonttuura Laggetiyogee Nuussi Loꞌꞌo!
“Ishantti issippetettan de7iyoogee aiba lo77obeenne ufaissiyaabee!”—MAZ. 133:1.
TAMAARANABAA
Issoy issuwara waani laggetanaakko, qassi nu mala Kiristtaanetuura laggetiyo wode Yihooway nuna waati anjjiyakko beꞌana.
1-2. Yihooway xoqqu ootti xeelliyobay aybee, qassi I nuuni waatanaadan koyii?
NUUNI harata oyqqiyo ogiya Yihooway xoqqu ootti xeellees. Nuuni nuna siiqiyogaadan nu shooruwa siiqana bessiyogaa Yesuusi tamaarissiis. (Mat. 22:37-39) Hegee Yihoowawu haggaazennaageetussi kehiyogaarakka gayttidaba. Nuuni etawu kehiyo wode ‘iitatuyyokka loꞌꞌotuyyokka ba awaa awaxissiya, qassi xillotuyyokka xillo gidennaageetuyyokka iraa bukissiya’ Xoossaa Yihoowa milatoos.—Mat. 5:45.
2 Yihooway ubba asaa siiqiyaba gidikkokka, baayyo azazettiyageeta aaruwan siiqees. (Yoh. 14:21) Nuuni A milatanaadan I koyees. Nuuni nu ishanttanne michchontta ‘wozanappe siiqanaadaaninne’ issoy issuwara ‘gomppan mishettidi siiqettanaadan’ I zorees. (1 PHe. 4:8; Roo. 12:10) Hegee nuuni nu soo asa, nu dabbuwa woy nu mata laggiya siiqiyo siiquwa mala.
3. Siiquwa xeelliyagan nuuni ay hassayana koshshii?
3 Gaden tokkido ataakilttee diccanaadan nuuni koshshiyabaa oottiyogaadan harata nu siiqiyo siiqoykka diccanaadan baaxetana koshshees. Kiitettida Phawuloosi Kiristtaaneti ‘ishanttudan siiqettiyogaa aggennaadan’ zoriis. (Ibr. 13:1) Nuuni harata siiqiyo siiquwa aggennan dichchanaadan Yihooway koyees. Nuuni nu mala Kiristtaanetuura loytti laggetana koshshiyoy aybissakko, qassi hegaadan ubbatoo waati oottana danddayiyakko ha huuphe yohoy qonccissees.
NUUNI ISSOY ISSUWARA LOYTTI LAGGETANA KOSHSHIYOY AYBISSEE?
4. Mazamure 133:1y yootiyogaadan, nu ishanttunne michchonttu issippetettaa ubbatoo waati nashshana danddayiyoo? (Misiliyakka xeella.)
4 Mazamure 133:1 nabbaba. Yihoowa siiqiyageetuura laggetiyogee ‘loꞌꞌobanne ufayssiyaba’ gidiyogaa xaafida mazamuraawiya qofan nuunikka maayettoos. Shin issi uri ubba galla beꞌiyo gita mittaa akeekennan aggana danddayiyogaadan, nuunikka nu ishanttunne michchonttu giddon deꞌiya ufayssiya issippetettaa akeekennan aggana danddayoos. Nuuni nu ishanttanne michchontta darotoo, geella saaminttaa giddon zaari zaaridi beꞌana danddayoos. Nuuni ubbatoo eta waati nashshana danddayiyoo? Nu ishanttinne michchontti galchchawunne nuussi keehi koshshiyogaa wodiya bazzidi qoppiyaba gidikko nuuni eta siiqiyo siiqoy diccana.
Nu ishanttunne michchonttu giddon deꞌiya ufayssiya issippetettaa xaasaya xeelloppa (Mentto 4 xeella)
5. Harati nuuni nu ishanttanne michchontta siiqiyogaa beꞌidi ay akeekana danddayiyonaa?
5 Shiiquwa koyro yiida amaridaageeti nuuni issoy issuwara siiqettiyogaa beꞌidi keehi malaalettidosona. Eti hegaa xalaalaa beꞌidikka tumaa demmidoogaa akeekana danddayoosona. Yesuusi hagaadan giis: “Intte issoy issuwa siiqiyogan, asay ubbay intte tana kaalliyageeta gidiyogaa erana.” (Yoh. 13:35) Yuniversttiyan tamaaraydda Yihoowa Markkatuura Geeshsha Maxaafaa xannaꞌiyogaa doommida Chatri hanotaa beꞌa. Killiliya shiiquwa shiiqanaadan O shoobbin eeno gaasu. A koyro gallassaa shiiqa simmada, bana Geeshsha Maxaafaa xannaꞌissiyariyyo hagaadan gaasu: “Tana yelidaageeti tana mule qoommi erokona. Shin ha gita shiiquwan issi gallassa xalaalan tana 52 asay qoommiis! Yihooway tana siiqiyogaa A soo asaa baggaara akeekaas. Taani he soo asaa yara gidanawu koyays.” Chatra aggennan xannaꞌada, qassi ba deꞌuwan issi issiban laamettada 2024n haattan muukettaasu. Oorattati, nuuni issoy issuwa siiqiyogaa gujjin, nu loꞌꞌo oosota beꞌidi Yihoowayyo haggaazanawu darotoo koyana danddayoosona.—Mat. 5:16.
6. Nuuni nu ishanttuuranne michchonttuura laggetiyogee nuna qohuwappe waati naagana danddayii?
6 Ishanttuuranne michchonttuura laggettiyogee nuna qohuwappe naagana danddayees. Phawuloosi ba mala Kiristtaanetuyyo hagaadan giis: “Ubba gallassi . . . intteppe oonanne nagari balettin, zore ekkennan ixxenna mala, issoi issuwaa zorite.” (Ibr. 3:13) Suurebaa aggennan oottanawu metootidi nuuni hidootaa qanxxikko, hegaa akeekida nu mala Kiristtaanee nuna koshshiyaban maaddanaadan Yihooway A denttettana danddayees. (Maz. 73:2, 17, 23) Hegaa mala maadoy nuussi loꞌꞌo.
7. Siiqoynne issippetettay waani gayttii? (Qolasiyasa 3:13, 14)
7 Nuuni issoy issuwawu siiquwa bessanawu minnidi oottiyageetuura deꞌiyo gishshawu daro anjjuwa demmoos. (1 Yoh. 4:11) Leemisuwawu, siiqoy nuuni ‘issoy issuwa mooruwa qoodennaadan’ oottees; qassi ishanttunne michchonttu issippetettawu maaddees. (Qolasiyasa 3:13, 14 nabbaba; Efi. 4:2-6) Hegaa gishshawu nu shiiqoti hara ay shiiquwappekka aaruwan keehi ufayssoosona.
ISSOY ISSUWA BONCHCHITE
8. Nuuni nu ishanttuuranne michchonttuura issippetettan deꞌanaadan Yihooway waati maaddii?
8 Kumetta saꞌan deꞌiya nu issippetettay keehi malaaliyaba. Nuuni nagaranchcha gidikkokka, he issippetettay deꞌanaadan oottidaagee Yihoowa. (1 Qor. 12:25) Nuuni ‘issoy issuwa siiqanaadan Xoossaappe tamaaridoogaa’ Geeshsha Maxaafay yootees. (1 Tas. 4:9) Hegaa giyogee, nuuni issoy issuwara laggetanawu oottana koshshiyabaa Yihooway ba Qaalaa baggaara nuussi yootees giyogaa. Nuuni A timirtteta loytti pilggiyogaaninne hegeeta oosuwan peeshshiyogan Xoossaappe tamaaridaageeta gidana danddayoos. (Ibr. 4:12; Yaaq. 1:25) Qassi Yihoowa markkati oottanawu baaxetiyogeekka hegaa.
9. Issoy issuwa bonchchiyogaa xeelliyagan Roome 12:9-13ppe ay tamaariyoo?
9 Issoy issuwara laggetanaadan Xoossaa Qaalay nuna waati maaddii? He allaalliya xeelliyagan Roome 12:9-13n Phawuloosi yootido qofaa beꞌa. (Nabbaba.) “Harata bonchchanawu sintta xeera gidite” I giidoogaa akeeka. Hegaa giyogee woygiyogee? Nuuni dumma dumma ogetun, leemisuwawu atto giyogan, imattaa mokkiyogaaninne kehiyogan harata ‘wozanappe siiqiyogaa’ bessiyo ogeta koyana koshshees. (Efi. 4:32) Ne ishay woy ne michchiya nenaara laggetana gakanaashin naagana koshshenna. Neeni ‘sintta xeera gidada’ yaatana danddayaasa. Yesuusi, “Immiyogee ekkiyogaappe aaruwan ufayssees” giidoogee bessiyaba.—Oos. 20:35.
10. “Harata bonchchanawu” waani minni oottana danddayiyoo? (Misiliyakka xeella.)
10 Phawuloosi issoy issuwa bonchchanawu sintta xeera gidanaadan yooti simmidi sohuwara “minnidi oottite, azalloppite” giidoogee malaalissiyaba. Minnidi oottiya uri bawu imettiya oosuwa wozanappe oottees. Leemiso 3:27, 28y hagaadan gees: “Neeyyo wolqqai de7ishin, metootidaagau lo77obaa oottiyoogaa aggoppa.” Yaatiyo gishshawu, maadoy koshshiyo issi ura nuuni akeekiyo wode sohuwara A maaddanawu nuussi danddayettidabaa oottoos. Nuuni oottana koshshiyabaa oottanawu mammottana bessenna; woy hegaa hara uri oottana giidi qoppana koshshenna.—1 Yoh. 3:17, 18.
Nuuni metootida nu ishanttanne michchontta maaddanawu sintta xeera gidana koshshees (Mentto 10 xeella)
11. Issoy issuwara laggetanawu aybi maaddana danddayii?
11 Nuuni harata bonchchiyogaa bessana danddayiyo hara ogee eti nuna yiilloyiyo wode sohuwara etassi atto giyogaa. Efisoona 4:26y hagaadan gees: “Intte hanqqetti uttidaashin away wullana koshshenna.” Aybissi? Nuuni hegaadan oottiyaba gidikko paydo 27y yootiyogaadan ‘Dabloosayyo miikkiya immoos.’ Nuuni issoy issuwawu atto gaanaadan Yihooway ba Qaalaa baggaara nuussi zaari zaari yootiis. Qolasiyasa 3:13y nuuni ‘issoy issuwawu coo atto giyogaa aggennaadan’ nuna zorees. Nuuni haratu balaa atto giyogee etaara laggetiyo keehi loꞌꞌo ogetuppe issuwa. Nuuni haratuyyo atto giyogee “issoy issuwara sarotettan deꞌiyogan ayyaanaa issippetettaa naagidi deꞌanawu” maaddees. (Efi. 4:3) Atto giyogee nu sarotettawunne issippetettawu keehi maaddiyogee qoncce.
12. Atto giyageeta gidanaadan Yihooway nuna waati maaddii?
12 Nuna yiilloyidaagetussi woy qohidaageetussi atto giyogee deexxiyaba gidana danddayees. Shin Xoossaa ayyaanay maaddin nuuni etassi atto gaana danddayoos. Geeshsha Maxaafay nuuni ‘issoy issuwara gomppan mishettidi siiqettanaadaaninne minnidi oottanaadan’ yooti simmidi, ‘ayyaanan suullanaadankka’ zorees. ‘Suulliya’ uri keehi yeemottanaadaaninne mishettanaadan geeshsha ayyaanay maaddees. (Roo. 12:11) Yaatiyo gishshawu, Xoossaa ayyaanay nuuni gomppan mishettidi siiqettanaadaaninne issoy issuwawu coo atto gaanaadan maaddana danddayees. Yihooway maaddanaadan nuuni wozanappe woossiyoy hegaassa.—Luq. 11:13.
‘INTTENA SHAAKKIYABI DEꞌANA’ BESSENNA
13. Nu giddon shaahotettay deꞌanaadan oottana danddayiyabay aybee?
13 Galchchan dumma dumma wogaappe yiida ‘ubba qommo asay’ deꞌees. (1 Xim. 2:3, 4) Hegaappe denddidaagan nuuni buzuwan dooriyo maayiyobaa, alleeqettiyobaa, akkamuwa woy allaxxiyobaa malabatun dummatettay deꞌana danddayees. Nuuni naagettana xayikko, ha dummatettay shaahotettay deꞌanaadan oottana danddayees. (Roo. 14:4; 1 Qor. 1:10) Nuuni issoy issuwa siiqanaadan Xoossaappe tamaarido gishshawu, nu dooriyobay haratuugaappe kehiyabadan haasayennaadan naagettana koshshees.—Pili. 2:3.
14. Nuuni ay oottanawu ubbatoo baaxetana koshshii, qassi aybissi?
14 Nuuni ubbatoo harata gazddissiyogaaninne minttettiyogankka galchchaa giddon shaahotettay deꞌennaadan oottana danddayoos. (1 Tas. 5:11) Ha wodiyan ayyaanaaban shuggida woy galchchaappe kiyida daroti simmidosona. Nuuni eta siiquwan mokki ekkoos! (2 Qor. 2:8) Tammu layttawu ayyaanaaban shugga takkada Shiiquwa Addaraashaa yiida issi michcheebaa beꞌa. A hagaadan gaasu, “Ubba asay noocu giiddi tana sarotidosona.” (Oos. 3:19) Kehatettan oottido he guuttabay A waananaadan oottidee? A hagaadan gaasu, “Yihooway taani zaarettada ufayttanaadan maaddidabadan tawu siyettees.” Nuuni harata minttettanawu baaxetikko, “daafuriyanne deexobaa tookkiya” asata Kiristtoosi nu baggaara gazddissana danddayees.—Mat. 11:28, 29.
15. Nuuni nu issippetettaa minttana danddayiyo hara ogee aybee? (Misiliyakka xeella.)
15 Nuuni haasayiyobankka issippetettaa minttana danddayoos. Iyyooba 12:11 hagaadan gees: “Inxxarssai qumaa shaakki eriyoogaadan, haittai haasayaa shaakkidi erenneeyye?” Qumaa loytti kattiya issi uri ba qumaa asa sintti aattanaappe kase malꞌꞌuwa eranawu laacci xeelliyogaadan, nuunikka haasayanaappe kase haasayanabaa loytti qoppana koshshees. (Maz. 141:3) Nuuni haasayiyobay ubbatoo minttettiyagaa, gazddissiyagaanne ‘siyiyageeta maaddiyagaa’ gidanaadan koyoos.—Efi. 4:29.
Haasayanaappe kase loytta qoppa (Mentto 15 xeella)
16. Haasayiyoban harata minttettanawu ubbaappe aaruwan baaxetana koshshiyay oonee?
16 Ubbaappe aaruwan azinatinne yelidaageeti minttettiyabaa haasayana koshshees. (Qol. 3:19, 21; Tii. 2:4) Cimatikka Yihoowa dorssata heemmiyageeta gidiyo gishshawu, gazddissiyageetanne minttettiyageeta gidana koshshees. (Isi. 32:1, 2; Gal. 6:1) Geeshsha Maxaafay hagaadan gees: “Haasayaa likke wodiyan haasayiyoogee aiba lo77obee!”—Lee. 15:23.
“OOSUWANINNE TUMATETTAN” SIIQETTITE
17. Nu ishanttanne michchontta wozanappe siiqiyogaa waati bessana danddayiyoo?
17 Kiitettida Yohaannisi “nuuni oosuwaaninne tumatettan siiqettanaappe attin, coo haasayan woikko bolla doonan [siiqettennaadan]” minttettiis. (1 Yoh. 3:18) Nu ishanttanne michchontta nuuni wozanappe siiqanawu koyoos. Hegaadan waati oottana danddayiyoo? Nu ishanttuuranne michchonttuura daro wodiya aattikko, issoy issuwara kaseegaappe aaruwan laggetananne siiqettana. Hegaa gishshawu shiiqotuuninne haggaazuwan haratuura wodiya aattanawu injjiya koya. Harata oychchanawu wodiya bazza. Nuuni yaatiyo wode, “issoy issuwa siiqanaadan Xoossay tamaarissido” asata gidiyogaa bessoos. (1 Tas. 4:9) Qassi ‘ishantti issippetettan deꞌiyogee keehi loꞌꞌobanne ufayssiyaba’ gidiyogaa nu deꞌuwan ubbatoo beꞌana!—Maz. 133:1.
MAZAMURE 90 Issoy Issuwaa Minttettite