Ufayssiya Deꞌuwaa Deꞌanau Yesuusa Leemisuwaa Kaalla

YESUUSI ufayssiya deꞌo deꞌidoogaa hagaappe kasetiya huuphe yohuwan beꞌida. Yaatiyo gishshau, nu deꞌuwan keehippe ufayttanau a leemisuwaa kaallananne a zoriyaa siyana bessees.

Qommoora deꞌiya xiqisee bessiyoogaadan, Yihooway nuuni hegaadan oottanaadan zorees. Yesuusi deꞌidoogaadan deꞌiyoogee nu deꞌo ubban a leemisuwaa kaalliyoogaanne i tamaarissidobaa oottiyoogaa gujjees. Nuuni hegaadan oottiyoogee, Xoossan nashettanaadaaninne ufayssiya deꞌo deꞌanaadan maaddees.

Yesuusi tamaarissidobay, i deꞌidoogaadan deꞌanau nuna maaddana danddayiya kaaletuwaa gujjees. He kaaletotuppe darota Yesuusi Deriyaa Bolla Timirttiyan qonccissiis. He kaaletotuppe amaridaageeta, qassi hegeeta nu deꞌuwan waatidi oosuwan peeshshana danddayiyaakko ane beꞌoos.

KAALETUWAA: “Bantta ayyaanan hiyyeesa gididoogaa eriyaageeti anjjettidaageeta.”—Maatiyoosa 5:3.

HA KAALETOY UFAYSSIYA DEꞌUWAU MAADDIYO OGIYAA:

Yesuusi asaa naati ayyaanaabaa koshshay deꞌiyoogeeta gididi merettidoogaa qonccissiis. Nuuni ha oyshatu zaaruwaa eranau koyoos: Nuuni ha saꞌan deꞌiyoy aybissee? Ha saꞌan metoynne tuggay daridoy aybissee? Tumuppe Xoossay nuussi qoppii? Hayqqi simmin deꞌoy deꞌii? Nuuni ufayssiya deꞌo deꞌanau hagaa mala oyshatu zaaruwaa erana koshshees. Ha oyshatuyyo ammanttiya zaaro demmana danddayiyoy Xoossaa Qaalaa xallaappe gidiyoogaa Yesuusi erees. Yesuusi ba Aawaakko woossido woosan, “Ne qaalaikka tumatettaa” yaagiis. (Yohaannisa 17:17) Xoossaa Qaalay ayyaanaaban koshshiyaabaa nuuni demmanaadan tumuppe maaddana danddayii?

HANIDABAA:

Erettida banddiyan waannatiya yettancha gidida Eesi hegaappekka aaruwan erettanau matiis. Gidikkokka, Eesi ba deꞌuwan keehippe ufayttenna. I, yettaa yexxiyoogan ufayttiyaaba gidikkokka, hegaappekka aaruwan ufayssiya deꞌo deꞌanau keehi koyidoogaa yootiis. SHin, Eesi guyyeppe issi Yihoowa Markkaara gayttiis. I hagaadan giis: “Taani a daro oyshaa oychaas. I Geeshsha Maxaafaappe zaarido ammanttiya zaaruwan taani keehi ufayttido gishshau, aara Geeshsha Maxaafaa xannaꞌanau maayaas.” Eesi Geeshsha Maxaafaappe xannaꞌidobaa wozanappe ammanido gishshau, ba huuphiyaa Yihoowayyo geppanau koyiis. I, “Taani hagaappe kase darotoo metuwaaninne daafaban gelays. SHin haꞌꞌi ufayssiya deꞌo deꞌays” yaagiis.a

KAALETUWAA: “Maariyaageeti anjjettidaageeta.” —Maatiyoosa 5:7.

HA KAALETOY UFAYSSIYA DEꞌUWAU MAADDIYO OGIYAA:

Maariyoogaa giyoogee haratuyyo qarettiyoogaa, etau kehiyoogaanne qoppiyoogaa giyoogaa. Yesuusi metootidaageeta maariis. I wozanappe qarettidi, harata metuwaappe shemppissiis. (Maatiyoosa 14:14; 20:30-34) Harata maariyaageeti ufayttiyo gishshau, nuuni Yesuusa leemisuwaa kaallidi maariyaageeta gidiyo wode ufayttoos. (Oosuwaa 20:35) Kehabaa haasayiyoogaaninne oottiyoogan harata maarana danddayoos; hegaadan oottiyoogee nu maadoy koshshiyoogeeta woppissees. Harata maariyoogee tumuppe nuuni ufayttanaadan oottii?

HANIDABAA:

Maariyanne i keettaaway Karloosi maariyoogan leemiso gidoosona. Maaree aaway machiyaa hayqqin barkka deꞌees; qassi mata wodeppe doommidi keehi sahettidi hiixaappekka denddenna. Maariyanne Karloosi a bantta soo efiidi, koshshiya ubbaban maaddoosona. Eti darotoo xiskkennan aqoosona; ubba sahoy goobiyo wode darotoo aakime keetti efoosona. Eti issi issitoo keehippe daafuriyoogaa yootoosona. SHin eti keehippe ufayttoosona; ayssi giikko, eti Maaree aawaassi koshshiyaabaa kunttiyoogaa eriyoogee Yesuusi giidoogaadan wozanappe ufayttanaadan oottees.

KAALETUWAA: “Sarotettaa medhiyaageeti ufayttiyaageeta.”—Maatiyoosa 5:9, NW.

HA KAALETOY UFAYSSIYA DEꞌUWAU MAADDIYO OGIYAA:

Sarotettaa medhiyoogee ufayttanaadan oottiyoy ayba ogiyaanee? Sarotettaa medhiyaageeta gidiyoogee nuuni asa ubbaara siga deꞌanaadan maaddees. Geeshsha Maxaafay, “Asa ubbaara sarotettan de7anau, intte baggaara, intteyyo danddayettidabaa ubbaa oottite” giyo zoriyaa nuuni oosuwan peeshshana koshshees. (Roome 12:18) “Asa ubbaara” giyaagee nu soo asaanne harata, geella nu ammanuwaa kaallennaageetakka gujjees. “Asa ubbaara” sarotettan deꞌiyoogee tumuppe nuuni ufayttanaadan oottii?

HANIDABAA:

Nayro giyo maccaasee hanotaa qoppa. A hara asaara, ubba qassi so asaara sarotettan deꞌennaadan paacciya darobay adussa wodiyau gakkiis. I azinay 15 laytta gidiya wodeppe kase o aggidi biis; he wodeppe doommada ba naata barkka dichausu. I naatuppe issoy jallissiya xaliyaa goꞌettiyo meezee deꞌiyoogaa; i darotoo wayssees, qassi onne i naꞌiyo yashissees. Nayra Geeshsha Maxaafaappe tamaaridobay, hegaa mala metiya hanotankka sarotettaa medhanaadan o maaddidoogaa akeekaasu. A issi metoy merettiyo wode palamettennan woy ooyettennan agganau baaxetausu. Qassi haratussi kehiyaaro, qarettiyaaronne qoppiyaaro gidanau baaxetausu. (Efisoona 4:31, 32) Sarotettaa medhiyoogaa xeelliyaagan tamaaridobay so asaaranne haratuura a siga deꞌanaadan maaddidoogaa ammanausu.

SINTTANAABAA QOPPIYOOGAA

Nuuni Yesuusi zorido aadhida eratetta zoriyaa kaalliyaaba gidikko, nu deꞌuwan ufayssaanne woppaa demmana. Gidikkokka, nuuni tumuppe ufayssiya deꞌo deꞌanau sinttanaabaa erana koshshees. Qassi, asaa wurssettay ceeggiyoogaa, sahettiyoogaanne hayqqiyoogaa xalla giidi nuuni qoppiyaaba gidikko, deꞌoy waani ufayssiyaagaa gidana danddayii? SHin ha alamiyan deꞌoy hegaa mala gidiyoogee qoncce.

Gidikkokka, mishiraachoy deꞌees! “Kiristtoosi de7idoogaadan de7anau” baaxetiya ubbau Yihooway daro anjjuwaa giigissi wottiis. Yihooway ammanettida asaa naati deꞌanaadan i halchido ogiyan, giishin xilloti payya gididi merinau deꞌiyo, ooratta alamiyaa mata wode ehaanau qaalaa geliis. A Qaalay hagaadan gees: “Xoossaa keettai asaara de7ees; Xoossai asaara issippe de7ana. Eti a asa gidana; Xoossai ba huuphen etaara de7ana. I eta Xoossaa gidana. Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna. Aissi giikko, ceegabai xayiis.”—Ajjuutaa 21:3, 4.

Ibaa kasetidi yootido, 84 laytta maccaasiyaa Maariya, ha qaalay polettiyo wode beꞌanau hidootan naagausu. Neeni shin? Xoossaa Kawotettan demmiyo “tumu de7uwaa” xeelliyaagan gujjada eranau koyay? (1 Ximootiyoosa 6:19) Koyiyaaba gidikko, ne heeran deꞌiya Yihoowa Markkata oychana danddayaasa woy ha maxeetiyaa giigissiyaageetussi xaafana danddayaasa.b