Ooratta Alamiyan Waanada Deꞌana Danddayay?

Xoossay mata wodiyan ha iita alamiyaa A metuwaara issippe xayssanaagaa hagaappe kasetiya huuphe yohuwan beꞌida. Hegee hananaagaa nuuni ammanana danddayoos. Aybissi? Xoossaa Qaalay, Geeshsha Maxaafay hegee hananaagaa yootiyo gishshataassa:

‘Ha alamee aadhdhana.’—1 YOHAANNISA 2:17.

Qommoora deꞌiya Geeshsha Maxaafaa xiqisiyan Xoossay qaalaa gelido gishshawu attana asay deꞌiyoogaa ammanettana danddayoos:

“Xoossai giidoogaa oottiya urai merinau de7ana.”

Yaatiyo gishshawu, nuuni attanawu koyiyaaba gidikko Xoossaa sheniyaa polana koshshees. Xoossaa shenee aybakko eranawu nuuni koyro A erana koshshees.

XOOSSAA ‘ERIYOOGAN’ BASHSHAAPPE ATTA

Misiliyaa: 1. Issi aakimiyaa daafuran hitti gaada hosppitaaliyan saꞌan uttaasu. 2. A shemppo saatiyan shaye malabaa uyaydda banaara oottiyaara maxeetiyaa nabbabiyoogan ufayttiyoogaa akeekawusu. 3. Iira oottiyaara Geeshsha Maxaafaappe issi xiqisiyaa iyyo nabbabada jw.org saytiyaa erissiyo karddiyaa immawusu.

Yesuusi hagaadan giis: “Asai nena issi Xoossaa gididaagaa [eriyoogee], . . . . merinaa de7o.” (Yohaannisa 17:3) Nuuni bashshaappe attanawunne merinawu deꞌanawu, Xoossaa ‘erana’ koshshees. Hegaa giyoogee coo Xoossan ammaniyoogaappe woy abaa guuttabaa eriyoogaappe aadhdhiyaabay koshshees giyoogaa. Nuuni A dabbo gidana koshshees. Nu laggetuura nu dabbotay minnanaadan koyikko, etaara wodiyaa aattana koshshees. Xoossaara dabbotiyoogeekka hegaa mala. Nuuni Xoossaara mino dabbotaa medhdhanawu nuna maaddiya Geeshsha Maxaafaappe tamaariyo keehi koshshiya amarida tumaa beꞌa.

Nuuni Geeshsha Maxaafaappe Tamaariyo Tumaa

Nuuni Gannatiyan deꞌanaadan Xoossay koyiyoogaa erana.

I koyro asata, Addaamanne Hewaano medhdhiis; qassi Edene ataakiltte sohuwaa giyo, keehi loꞌꞌiya sohuwan eta wottiis. Eti he wode wottiyoobi baynnaageeta; qassi ufayssiyaa deꞌuwawu koshshiya ubbabaa Xoossay etawu giigissiis. Eti merinawu deꞌana danddayoosona. Eti Xoossaara dabbotidi deꞌiyaakko mule hayqqokkona. SHin eti Xoossay etawu immido waayissenna azazuwaa azazettennan agganawu dooridosona.

Nuuni haꞌꞌi tuggatiyoy aybissakko akeekoos.

Koyro bitanee Addaamee Xoossawu azazettennan ixxido gishshawu, baappenne hara asa ubbaappe merinaa deꞌoy halanaadan oottiis. Geeshsha Maxaafay hagaadan gees: “Nagarai ha sa7aa issi asa baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis.” (Roome 5:12) Issi uri bana yelidaageetuppe pacaa laattana danddayiyoogaadan, Addaame naati ubbaykka appe nagaraa laattidosona. Hegaa gaasuwan nuuni ceeggoosinne hayqqoos.

Xoossay nuna maaddanawu oottidobaa akeekoos.

Geeshsha Maxaafay hagaadan gees: “Xoossaa Na7aa ammaniya ubbai merinaa de7uwaa ekkanaappe attin, xayenna mala, Xoossai ha sa7aa keehi siiqido gishshau, ba mexi issi Na7aa immiis.” (Yohaannisa 3:16) Nu gishshawu ba deꞌuwaa aattidi immanaadan Xoossay Yesuusa ha saꞌaa kiittiis. Siiqoy denttettin oottido he oosuwaa xeelliyaagan, awu layttay 86 gidido Hindden deꞌiya Parabihakar giyo bitanee hagaadan giis: “Wozoy Yihoowaya tana wozanappe siiqiyoogaa bessees. A siiqoy tawu merinaa deꞌuwaa hidootaa immiis.”

Xoossay nuussi oottidobaa nuuni nashshiyoogaa waati bessana danddayiyaakko akeekoos.

“Xoossaa azazuwaa naagikko” I oottidobawu nuuni A nashshiyoogaa bessana danddayiyoogaa Geeshsha Maxaafay yootees. (1 Yohaannisa 2:3) Xoossaa Yihooway siiqoy denttettin nuuni nu deꞌuwan ufayttanawu ay oottanaakko bessiis. (Isiyaasa 48:17, 18) Nuuni tuggatanaadan Xoossay koyenna. Nuuni A kaaletuwaa kaallikko, haꞌꞌi ufayssiya deꞌuwaa deꞌiyoogaa xalla gidennan, merinaa deꞌuwaa nuuni demmanaagaa qaalaa geliis.

XOOSSAA QAALAA, GEESHSHA MAXAAFAA UBBA GALLA NABBABA

Aakimiyaa laaxaa karen shemppuwan Geeshsha Maxaafaa nabbaba simmada saluwaa xeellawusu. — Maaduwaa demmanawu Xoossaa woossiyoogaaninne A sheniyaa oottiyoogan alamiyaa bashshaappe attana danddayaasa

Deꞌuwan deꞌanawu nuuni ubbatoo qumaa moos. SHin Yesuusi hagaadan giis: “Asi Xoossai haasayiyo qaala ubban de7anaappe attin, oitta xalaalan de7enna.”—Maatiyoosa 4:4.

Ha wodiyan nuuni Xoossaa qaalaa, Geeshsha Maxaafan demmoos. Neeni Geeshsha Maxaafaa xannaꞌikko, Xoossay hagaappe kase oottidobaa, Xoossay ha wodiyan oottiyoobaanne sinttappe I oottanabaa akeekaasa.

MAADUWAA DEMMANAWU XOOSSAAKKO WOOSSA

Neeni Xoossawu azazettanawu koyaasa shin I bala giyoobaa oottiyoogaa agganawu ne metootikko waatana danddayay? Hegaadaana gidikko, Xoossaa loytti eriyoogee nena maaddana danddayees.

Pokkobaa oottaydda deꞌida Sakuro giyo maccaasee hanotaa qoppa. A Geeshsha Maxaafaa xannaꞌiyoogaa doommido wode, “shaaramuxappe baqatite” giya Xoossaa azazuwaa tamaaraasu. (1 Qoronttoosa 6:18) Sakura minotettaa demmanawu Xoossaa woossaasu qassi he iitabaa oottiyoogaa aggaasu. SHin he iitabaa oottiyoogee O paacciyoogaa aggibeenna. A hagaadan gaasu: “Pokkobaa oottiyoogaa taani qoppiyo wode, hegaa tarkka baaxetada xoonana danddayenna gishshawu, aynne qosennan woosan Yihoowawu yootays. Woosan demmido wolqqan taani Yihoowakko shiiqaas.” Sakuriigaadan, miilooniyan qoodettiyaageeti Xoossaa eriiddi doosona. Xoossay eti bantta deꞌuwan koshshiyaaban laamettanaadaaninne A ufayssiya deꞌuwaa deꞌanaadan koshshiya minotettaa etawu immiiddi dees.—Piliphphisiyuusa 4:13.

Neeni Xoossaa loytta erikko, ‘Xoossan erettida’ siiqo dabbo gidaasa. (Galaatiyaa 4:9; Mazamure 25:14) Yaatikko bashshaappe attada Xoossay ehaana ooratta alamiyan deꞌana. SHin he ooratta alamee ay milatii? Kaalliya huuphe yohoy hegaa qonccissana.

a Geeshsha Maxaafay koyro xaafettido doonan Xoossaa sunttay Yihoowa.