Wozoy Nuna Ashshiyo Ogiyaa

“Na7aa ammaniya urau merinaa de7⁠oi de7⁠ees; shin Na7aa ammanennaagaa bolli Xoossaa hanqqoi de7anaagaappe attin, i de7⁠o be7⁠enna.” —YOH. 3:36.

1, 2. Xiyoone Wochiyo Keelay koyro attamettido gaasuwaappe issoy aybee?

XIQIMITA 1879n kiyida, oyddantta Wochiyo Keelay hagaadan giis: “Geeshsha Maxaafaa akeekan xannaꞌiya ooninne Yesuusi hayqqiyoogee keehippe koshshiyaaba gidiyoogaa akeekiyoogee attenna.” He huuphe yohoy ha keehi koshshiya qofan kuuyettiis: “Kiristtoosi hayqqidoy nuuni nagaraappe maarotettaa demmanaadaana gidennaagaa bessiyaaba aybanne eqettana bessees.”—1 Yohaannisa 2:1, 2 nabbaba.

² Xiyoone Wochiyo Keelay koyro Isiine 1879n attamettido gaasuwaappe issoy, Geeshsha Maxaafay tamaarissiyo wozuwau exatanaassa. Banttana Kiristtaane giya daroti 1800 layttaa wurssettaa heeran Yesuusa hayqoy waanidi wozo gididaakko siriyoogaa doommido gishshau, he xuufee “koshshiyo wodiyan” giigida qumaa oyqqiis. (Maa. 24:45) He wode, daroti asaa naati polo gidido hanotaappe nagarancha gididosona giyo qofaara maayettenna, lodda laamiyan ammaniyoogaa doommidosona. Lodda laamiyaa ammaniyaageeti asaa naati kaseegaappe loꞌꞌo hanotau laamettiyo gishshau, wozo koshshennaagaa tamaarissoosona. Yaatiyo gishshau, kiitettida PHauloosi Ximootiyoosa, “Issi issi asai balan eratetta giyo eeyya palamaappenne hada haasayaappe baqataidda, neeyyo imettida hadaraa naaga. Aissi giikko, issooti issooti nuuyyo eratetti de7⁠ees yaagiiddi, ammanuwaa balidosona” yaagidi zoridoogee keehippe koshshiyaaba.—1 Xim. 6:20, 21.

3. Nuuni haꞌꞌi woygiya oyshata tobbanee?

³ Neeni ‘ammanuwaa balennaadan’ murttidoogee erettidaagaa. Hegaadan oottanau kaallidi deꞌiya oyshata oychiyoogee loꞌꞌo: Wozoy taayyo koshshiyoy aybissee? Wozoy ay keena waagaa qanxxissidee? Xoossaa hanqquwaappe tana ashshana danddayiya ha alꞌꞌo giigissuwaappe waana goꞌettana danddayiyaanaa?

Xoossaa Hanqquwaappe Ashshees

4, 5. Xoossaa hanqqoy ha iita siraatan deꞌiyoogaa bessiyay aybee?

⁴ Geeshsha Maxaafaynne asaa naatu taarikee Addaamee nagaraa oottoosappe doommidi asaa naatu bolli Xoossaa hanqqoy ‘deꞌiyoogaa’ bessees. (Yoh. 3:36) Ubba asay hayqqiyoogee hegaa qonccissees. Seexaanaa haaroy asaa naata dari dari biya metuwaappe ashshanau mule danddayibeenna; qassi ba haaro garssan deꞌiya ubbaassi koshshiyaaba kunttana danddayiya asa aysoy baawa. (1 Yoh. 5:19) Yaatiyo gishshau, olay, danoynne hiyyeesatettay asaa naata metiiddi dees.

⁵ Hegaa gishshau, ha iita siraataa Yihooway anjjibeennaagee qoncce. PHauloosi, “asaa iita ooso ubbaa bolli, Xoossaa hanqqoi saluwaappe wodhdhidi” qoncciyoogaa yootiis. (Roo. 1:18-20) Yaatiyo gishshau, bantta nagaraappe simmennan iitabaa oottiyaageeti hegee kaalettiyoobaappe attana danddayokkona. Ha wodiyan, Xoossaa hanqqoy Seexaanaa alamiyaa bolli boshadan gakkiiddi deꞌiya pirddaa kiitan qoncciiddi dees; qassi he kiitay Geeshsha Maxaafan baasettida daro xuufetun kiyees.—Ajj. 16:1.

6, 7. Tiyettida Kiristtaaneti sintta xeera gididi oottiyo oosoy aybee, Seexaanaa alamiyan deꞌiya asau haꞌꞌikka waatiyo injjee deꞌii?

⁶ Hegee issi uri Seexaanaa haaruwaappe naxa kiyidi, Xoossaara sigettanau wodee aadhiichiis giyoogee? CHii, Yihoowaara haꞌꞌikka sigettanau danddayoos. “Kiristtoosa gishshaa haasayiya,” i kiittido, tiyettida Kiristtaaneti ubba asaa “Xoossaara sigettite” giidi shoobbiyo oosuwan sintta xeera gididi oottoosona.—2 Qor. 5:20, 21.

⁷ Yesuusi “sinttappe yaana Xoossaa hanqquwaappe” nuna ashshanaagaa kiitettida PHauloosi yootiis. (1 Tas. 1:10) He wurssetta Yihoowa hanqqoy bantta nagaraappe simmennaageeta merinau xayssana. (2 Tas. 1:6-9) Yaatin oonee attanay? Geeshsha Maxaafay, “Na7aa ammaniya urau merinaa de7⁠oi de7⁠ees; shin Na7aa ammanennaagaa bolli Xoossaa hanqqoi de7anaagaappe attin, i de7⁠o be7⁠enna” yaagees. (Yoh. 3:36) Ee, Yesuusanne wozuwan ammaniyoogaa oosuwan bessiya, ha iita siraatay xayana haniyo wode deꞌiya ubbay Xoossaa wurssetta gallassa hanqquwan xayokkona.

Wozoy Goꞌꞌiyo Ogiyaa

8. (a) Addaameyyoonne Hewaaniyyo ayba gita hidootay imettidee? (b) Yihooway suure pirddaa pirddiyaagaa gidiyoogee qonccidoy ayba ogiyaanee?

⁸ Addaameenne Hewaana polo gididi merettidosona. Eti Xoossaayyo azazettidaba gidiyaakko, ha wodiyan saꞌay ufayssan etaara issippe Gannatiyan deꞌiya naatun kumana shin. SHin nu koyro aawaynne aayyiyaa Xoossaa higgiyaa eriiddi azazettennan aggidoogee azzanttiyaaba. Hegaappe denddidaagan, merinaa hayquwau pirddettidi, koyro Gannatiyaappe yedetettidosona. Addaameenne Hewaana naata yelido wode, asaa naati nagaraa laattidosona; qassi koyro bitaneenne maccaasiyaa wurssettan ceeggidi hayqqidosona. Hegee Yihooway yootidobay polettiyoogaa bessees. Hegaa bollikka, i suure pirddaa pirddiya Xoossaa. Yihooway mooppa giido mittaa teeraa miyaaba gidikko Addaamee hayqqanaagaa i yootiis; hanettidabaykka hegaa.

9, 10. (a) Addaame zerettay aybissi hayqqii? (b) Merinaa hayquwaappe waanidi attana danddayiyoo?

⁹ Nuuni Addaame zeretta gidiyoogaadan, nagaraa oottiyo koshshay deꞌiyoonne wurssettan hayqqiya polo gidenna asatettaa laattida. Hegee, Addaamee nagaraa oottido wode, nuuni a qanttan deꞌoos giyoogaa mala. Yaatiyo gishshau, hayquwaa pirdday nunakka gujjees. Yihooway wozuwaa waagaa ekkennan hayquwaa pirddaa aggibayiyaaba gidiyaakko, ba qaalaa naagennaagaa gidees. PHauloosi, “Nuuni higgee Xoossaabaa gidiyoogaa eroos; shin taani tana nagarau baizzida haiqqiya asa; Taani aiba ufaissi bainna asee! Tana haiquwau efiya ha asatettaappe ashshanai oonee?” yaagido wode, nu ubbay giyoobaa malabaa yootiis.—Roo. 7:14, 24.

¹⁰ Bessiya ogiyan, nu nagaraa atto giyoonne hayquwaa pirddaappe nuna kessiyo issibaa giigissana danddayiyay Xoossaa Yihoowa xalla. Nuussi ba deꞌuwaa wozo oottidi immana, i siiqiyo Naꞌay polo asa gididi yelettana mala kiittiyoogan i hegaa poliis. Addaameegaappe dumma hanotan, Yesuusi polo asa gididi deꞌiis. “Nagara i oottibeenna.” (1 PHe. 2:22) Hegaa gishshau, Yesuusi polo gidida naata yelana danddayees. SHin i hegaadan oottiyoogaappe, nagarancha gidida Addaame naata ba naata oottanaunne banan ammaniyaageeti merinaa deꞌuwaa demmanaadan Xoossaa morkketi bana woranaadan eeno giis. Geeshsha Maxaafay hagaadan qonccissees: “Issi Xoossai de7⁠ees; Xoossaappenne asaappe gidduwan gididi gaannatiya issoi de7⁠ees. Hegeekka Kiristtoos Yesuusa giyo asa. I asaa ubbaa wozanau bana ubbau immiis.”—1 Xim. 2:5, 6.

11. (a) Wozuwaa goꞌꞌay aybin leemisettana danddayii? (b) Wozuwaa goꞌꞌay ay keena aahoo?

¹¹ Wozuwaa goꞌꞌaa, bankke keettan dagayido miishsha ubbaa cimmi min acotida asatu hanotan leemisana danddayoos. He bankkiyaa godati daro layttau qashettana mala pirddettidoogee bessiyaaba. He cimettida asatubaa shin woygana danddayettii? Issi kehanne dure gidida uri he bankkiyaa shammidi, he cimettida asatuyyo eta miishshaa zaariyoogan acuwaappe eta kessana xayikko, eti manqqido gishshau he hanotaappe kiyana danddayokkona. Hegaara issi mala hanotan, Xoossaa Yihoowaynne a siiqo Naꞌay Addaame zerettaa wozidi, eta nagaraa acuwaa Yesuusa suuttaa gaasuwan maaridosona. Yesuusa xeelliyaagan xammaqiya Yohaannisi, “Xoossaa dorssai, sa7aa nagaraa xaissiyaagee, hageeho!” yaagidoy hegaassa. (Yoh. 1:29) Bantta nagaraappe naxa kiyidaageetu giddon paxa deꞌiyaageetu xalla gidennan hayqqidaageetikka deꞌoosona.

Wozoy Qanxxissido Waagaa

12, 13. Abrahaami Yisaaqa yarshshanau eeno giido hanotaappe nuuni ay tamaarana danddayiyoo?

¹² Wozoy saluwan deꞌiya nu Aawaanne a siiqo Naꞌaa ay keena waagaa qanxxissidaakko nuuni akeekana danddayokko. SHin Geeshsha Maxaafay nuuni hegaa xeelliyaagan wotti denttidi qoppanaadan maaddiyaabaa yootees. Leemisuwau, Xoossay, “Neeni siiqiyo ne mexi issi na7aa Yisaaqa ekkada, Mooriyaa giyo biitti ba; baada yan taani neeyyo yootiyo issi deriyaa bollan a xuuggiyo yarshsho oottada taayyo yarshsha” yaagidoogaa Abrahaami azazettidi, heezzu gallassaa hemettidi Mooriyaa giyo biitti bin awu siyettidabaa qoppa.—Doo. 22:2-4.

¹³ Abrahaami wurssettan he sohuwaa gakkiis. Abrahaami yarshshanau gimbbido gimbbiyan, Yisaaqa kushiyaanne tohuwaa qachidi a zinꞌꞌissido wode ay keena qarettidaakko qoppa. Abrahaami ba naꞌaa shukkanau billamaa ekkido wode keehippe unꞌꞌettennan aggenna. Yarshshiyo sohuwan zinꞌꞌidi, iita waayiyan hayqqana haniyoogaa naagishin, Yisaaqau aybi siyettidaakko qoppa. Yihoowa kiitanchay Abrahaami shukkana hanishin diggiis. Abrahaaminne Yisaaqi he wode oottidobay, Seexaanaa sheniyaa poliyaageeti ba Naꞌaa woranaadan Yihooway paqqadido wode, I ay keenaa waagaa qanxxidaakko nuuni akeekanau maaddees. Yisaaqi Abrahaamayyo eeno giidoogee, Yesuusi waayettidi nuuyyo hayqqanau eeno giidoogaa loytti qonccissees.—Ibr. 11:17-19.

14. Nuuni wozuwau qanxxettida waagaa akeekanaadan maaddiya, Yaaqooba deꞌuwan gakkidabay aybee?

¹⁴ Wozoy qanxxissido waagaa Yaaqooba deꞌuwan gakkidabaykka qonccissees. Yaaqoobi ba naatu ubbaappe Yooseefa aattidi siiqees. Yooseefa ishantti a qanaatidoogeenne ixxidoogee azzanttiyaaba. SHin Yooseefi ba ishantti awan deꞌiyaakko beꞌanau baanaadan a aaway kiittido wode eeno giis. Eti he wode, Kebroonan deꞌiya bantta sooppe huuphessa baggan 100 kilo meetire gidiyaagaa haakkidi, Yaaqooba wudiyaa heemmoosona. Yaaqooba naati suuttan moorettida Yooseefa maayuwaa ekkidi yiido wode Yaaqoobau aybi siyettidaakko qoppa! I dagammidi, “Hagee ta na7aa maayuwaa! Iita do7⁠i a mirggiis. Yooseefi tumakka zaazettiichchiis” yaagiis. Ha hanotay Yaaqooba azzanttin, i Yooseefayyo daro gallassaa yeekkiis. (Doo. 37:33, 34) Issi hanotan Yihoowau siyettiyaabay polo gidenna asaa naatuyyo siyettiyaagaa mala gidenna. Gidikkokka, Yaaqooba deꞌuwan gakkida ha hanotaa qoppiyoogee Xoossay siiqiyo Naꞌay asa gididi saꞌan deꞌiiddi meqetti baynna iita hanotan hayqqiyo wode, Xoossaayyo siyettidabaa nuuni amarida ogiyan akeekanau maaddana danddayees.

Wozuwaappe Goꞌettiyoogaa

15, 16. (a) Yihooway wozuwaa ekkidoogaa waatidi bessidee? (b) Neeni wozuwan waana goꞌettadii?

¹⁵ Yihooway ammanettida ba Naꞌaayyo boncho gidida ayyaana bollaa immidi hayquwaappe denttiis. (1 PHe. 3:18) Yesuusi hayquwaappe denddidi ba erissiyo ashkkaratuyyo 40 gallassau qonccidi, eta ammanuwaa minttiis; qassi eti oottana wolqqaama sibikate oosuwau eta giigissiis. Yaatidi, saluwaa biidi, ba wozuwaa yarshshuwaa waagan ammaniya, bana tumuppe kaalliyaageetu gishshau, gukkida ba suuttaa waagaa Xoossaayyo shiishshiis. Yesuusi PHenxxaqosxxe galla 33 M.Ln Yerusalaamen shiiqi uttida ba erissiyo ashkkaratu bolli geeshsha ayyaanaa gussanaadan oottiyoogan, Xoossaa Yihooway Kiristtoosa wozuwaa ekkidoogaa bessiis.—Oos. 2:33.

¹⁶ Kiristtoosa kaalliya, ayyaanan tiyettida he asati hara asay Xoossaa hanqquwaappe attanau bantta nagaraappe simmidi, Yesuus Kiristtoosa sunttan xammaqettanaadan sohuwaara minttettiyoogaa doommidosona. (Oosuwaa 2:38-40 nabbaba.) He dumma gaallassaappe hanno gakkanau, miilooniyan qoodettiya, ubba biittan deꞌiya asay Yesuusa wozuwaa yarshshuwan ammaniyoogan Xoossaara dabbotaa medhiis. (Yoh. 6:44) Haꞌꞌi, nuuni naaꞌꞌu oyshata beꞌana koshshees: Loꞌꞌo oosuwaa oottido gishshau merinaa deꞌuwaa hidootaa demmida uri deꞌii? Ha maalaalissiya hidootaa demmi simmin nuuppe halana danddayii?

17. Xoossaara dabbo gidiyo, ha maalaalissiya anjjuwaa neeni waata xeellana koshshii?

¹⁷ Wozoy aaro kehatettan giigidaba. Ha wodiyan miilooniyan qoodettiya asay wozuwan ammaniyoogan Xoossaa dabbo gididi, gannate saꞌan merinau deꞌiyo hidootaa demmiis. SHin Yihoowa dabbo gidiyoogee, ubbatoo aara dabbo gididi daanau waabe gidenna. Nuuni sinttaara yiya Xoossaa hanqquwaa gallassaappe attanau, ‘Kiristtoos Yesuusa wozuwaa’ wozanappe nashshiyoogaa ubbatoo bessana koshshees.—Roo. 3:24; Piliphphisiyuusa 2:12 nabbaba.

Wozuwan Ammaniyoogaa Aggoppite

18. Wozuwan ammaniyoogee ay gujjii?

¹⁸ Ha huuphe yohoy baasettido Yohaannisa 3:36y, Godaa Yesuus Kiristtoosan ammaniyoogee ayyo azazettiyoogaa gujjiyoogaa bessees. Wozuwaa nashshiyoogee kandduwaa xeelliyaagan Yesuusi tamaarissidobaa gujjin, nuuni a timirttiyaara moggiya ogiyan deꞌanaadan denttettana koshshees. (Mar. 7:21-23) Pornograafiyaa ubbatoo beꞌiyoogaa gujjiya ‘tunatetta ubbaanne’ bessenna asho gaytotettaa poliyoogaa, qassi pattenna qiriyaa qiriyoogaa malabaa aggennaageetu ubbaa bolli “Xoossaa hanqqoi” yaana.—Efi. 5:3-6.

19. Nuuni wozuwan ammaniyoogaa bessana danddayiyo loꞌꞌo ogeti awugeetee?

¹⁹ Nuuni wozuwaa nashshiyoogan ‘Xoossaa milatiyoogaa’ bessiya oosoy daridoogeeta gidanau koshshees. (2 PHe. 3:11) Ubbatoo wozanappe woossanau, Geeshsha Maxaafaa buzo xannaꞌanau, shiiquwan beettanau, so asaa goynuwaunne Kawotettaabaa mishshettidi sabbakanau gidiya wodiyaa bazziyaageeta gidoos. “Lo77⁠obaa oottiyoogaanne issoi issuwaa maaddiyoogaa” dogennaageeta gidoos. “Aissi giikko, Xoossaa ufaissiyaagee hegaa mala yarshshuwaa.”—Ibr. 13:15, 16.

20. Wozuwan aggennan ammaniya ubbay sinttappe ayba anjjo demmanau naagana danddayii?

²⁰ Ha iita siraataa bolli Yihoowa hanqqoy wodhiyo wode, nuuni wozuwan ammanidoogaaninne hegaa nashshiyoogaa aggennan bessidoogan ayba ufayttanee! Xoossaa hanqquwaappe aattanaadan oottida ha maalaalissiya giigissuwau, Xoossay qaalaa gelido ooratta alamiyan nuuni merinau galatiyaageeta gidana.—Yohaannisa 3:16; Ajjuutaa 7:9, 10, 13, 14 nabbaba.

Woygada Zaaruutii?

• Wozoy nuussi ayssi koshshidee?

• Wozoy ayba waagaa qanxxissidee?

• Wozuwaappe demmiyo goꞌꞌay aybee?

• Nuuni Yesuusa wozuwan ammaniyoogaa oosuwan waati bessana danddayiyoo?

[Sinttaa 17n deꞌiya misiliyaa]

Haꞌꞌikka Yihoowaara sigettiyo injjee dees

[Sinttaa 19n deꞌiya misiliyaa]

Abrahaama, Yisaaqanne Yaaqooba deꞌuwan gakkida ha hanotata nuuni qoppiyoogee wozuwau qanxxettida alꞌꞌobaa akeekanau maaddana danddayees