Hayquwaa Xeelliyaagan Tumawu Exata

1-2. (a) Seexaanay asaa ayba ogetun cimmidee? (b) Nuuni ha huuphe yohuwan ay xannaꞌanee?

SEEXAANAY, ‘wordduwawu aaway,’ Addaamenne Hewaani wodiyaappe doommidi asaa cimmiis. (Yoh. 8:44) Seexaanaa wordduwaappe amaridaagee hayquwaabaanne hayquwaappe simmin deꞌiya hanotaabaa tamaarissiyo wordduwaa. He timirtteti daro asay dosiyo meezetussinne wogatussi denddo. Hegaappe denddidaagan, nu ishanttuppenne nu michchonttuppe daroti bantta son woy heeran asi hayqqiyo wode ‘ammanuwawu baaxetana’ koshshiis.—Yih. 3.

² Nena hegaa mala paacee gakkikko, hayquwaa xeelliyaagan Geeshsha Maxaafay tamaarissiyoobawu ammanettada deꞌanaadan aybi maaddana danddayii? (Efi. 6:11) Xoossaa ufayssenna meezeta kaallanaadan harati denttettiyo ne mala Kiristtaaniyaa waata minttettana danddayay? Ha huuphe yohoy Yihooway nuna waatidi maaddiyaakko qonccissana. Koyro, Geeshsha Maxaafay hayquwaabaa ay yootiyaakko ane beꞌoos.

HAYQQIDAAGEETU HANOTAA XEELLIYAAGAN TUMAA

3. Koyro worddoy ay kaalettidee?

³ Xoossay asay hayqqanaadan halchchibeenna. SHin Addaameenne Hewaana merinawu deꞌanawu, “Lo77uwaanne iitaa erissiya mittaa teeraappe mooppa; aissi giikko, neeni appe miido gallassi tumu haiqqana” yaagidi eta azazida Yihoowawu eti azazettana koshshiis. (Doo. 2:16, 17) He wode Seexaanay metoy merettanaadan oottiis. I shooshshan eqqidi Hewaaniyyo, “CHii, intte ainnekka haiqqekketa” yaagiis. A he wordduwaa ammanada mittaa teeraappe miidoogee azzanttiyaaba. Hegaappe simmin, I keettaawaykka he mittaa teeraappe miis. (Doo. 3:4, 6) Nagaraynne hayqoy hegan doommiis.—Roo. 5:12.

4-5. Seexaanay asaa aggennan waati cimmii?

⁴ Xoossay yootidoogaadan, Addaameenne Hewaana hayqqidosona. Gidoppe attin, Seexaanay hayquwaabaa worddotiyoogaa aggibeenna. Guyyeppe, I hara worddota yootiyoogaa doommiis. He worddotuppe issoy ashoy hayqqiyo wode, appe shaahettidi, geella ayyaana alamiyan paxa deꞌiyaabi deꞌees giyo timirttiyaa. Dumma dumma hanotan odettiya he worddoy ha wodiyaa gakkanaassi zawi baynna asay cimettanaadan oottiis.—1 Xim. 4:1.

⁵ Keehi daro asay cimettidoy aybissee? Hayquwaa xeelliyaagan asawu aybi siyettiyaakko Seexaanay eriyo gishshawu, asaa cimmanawu hegaa goꞌettees. Nuuni merinawu deꞌanawu merettido gishshawu, hayqqanawu koyokko. (Era. 3:11) Hayquwaa nuuni morkkedan xeelloos.—1 Qor. 15:26.

6-7. (a) Seexaanay hayquwaa xeelliyaagan tumay geemmanaadan oottidee? Qonccissa. (b) Geeshsha Maxaafaa tumay nuuni hayqqidaageeta yayyennaadan waati maaddii?

⁶ Seexaanay baaxetikkonne, hayquwaa xeelliyaagan tumay geemmi attibeenna. Hayqqidaageetu hanotaanne dendduwaa hidootaa xeelliyaagan awudeegaappenne aaruwan daro asay Geeshsha Maxaafay tamaarissiyoobaa ha wodiyan ereesinne yootees. (Era. 9:5, 10; Oos. 24:15) ‘Asay hayqqiyo wode waanii?’ giidi nuuni sirennaadaaninne yayyennaadan ha tumay nuna minttetteesinne maaddees. Leemisuwawu, nu siiqiyo hayqqidaageeta iitabay gakkees giidi nuuni yayyokko. Nuuni eti paxa deꞌennaagaanne oonanne qohana danddayennaagaa eroos. Hegee eti xiskkuwan kayridoogaa mala. (Yoh. 11:11-14) Hayqqidaageeti ay keena wodee aadhdhidaakko akeekennaagaakka nuuni eroos. Hegaa gishshawu, hayqqoosappe xeetan qoodettiya layttaa gamꞌꞌidi denddidaageetikka, hegee liphida ayfee xeellanaashin hanidabadan qoppana.

⁷ Hayqqida asaa tumu hanotay qoncce, akeekanawu metennaagaanne bessiyaaba gidiyoogaa neeni maayiyoogee erettidaba. Hegee kirqqi gi erettennaba gidida Seexaanaa worddotuppe keehi dummatiyaaba! Ha worddoti asaa balettiyoogaappe aadhdhidi nuna Medhdhidaagaa sunttaakka mooroosona. Seexaanaa qohuwaa loytti akeekanawu maaddiya, ha oyshata ane pilggoos: Seexaanaa worddoti Yihoowa sunttaa waati mooridonaa? Qassi Kiristtoosa wozuwaa yarshshuwan ammaniyoogee koshshennaba giidi asay qoppanaadan waati oottidonaa? Eti kayyoynne metoy asaa bolli daranaadan waatidi oottidonaa?

SEEXAANAA WORDDOTI KEEHI QOHIDOSONA

8. Ermmaasa 19:5y qonccissiyoogaadan, hayqqidaageeta xeelliyaagan Seexaanay yootiyo worddoti Yihoowa sunttay moorettanaadan waati oottiyoonaa?

⁸ Hayqqidaageeta xeelliyaagan Seexaanay yootiyo worddoti Yihoowa sunttay moorettanaadan oottoosona. He worddotuppe issoy hayqqida uri siꞌooliyaa taman xuugettiiddi waayettees giyo timirttiyaa. He timirtteti Xoossaa sunttay moorettanaadan oottoosona! Waatidi? He timirtteti siiqo Xoossawu Dabloosaagaa mala eeshshay deꞌees giidi asay qoppanaadan oottoosona. (1 Yoh. 4:8) Hegee neeyyo aybi siyettanaadan oottii? Ubbaappe aaruwan, Yihoowayyo aybi siyettanaadan oottii? I iitaba ubbaa ixxees.—Ermmaasa 19:5 nabbaba.

9. Seexaanaa worddoti Yohaannisa 3:16⁠ninne 15:13n odettida Kiristtoosa wozuwaa yarshshuwaa ammaniyoogaara gayttidaagan waati qohiyoonaa?

⁹ Hayquwaa xeelliyaagan Seexaanay odiyo worddoti Kiristtoosa wozuwaa yarshshuwaa asay xaasayanaadan oottoosona. (Maa. 20:28) Seexaanay yootiyo hara worddoy asawu hayqqenna shemppoy deꞌees giyoogaa. Hegee tuma gidiyaakko, asay ubbay merinawu deꞌana shin. Yaaniyaakko, nuuni merinaa deꞌuwaa demmana mala, Kiristtoosi ba deꞌuwaa nuussi wozo yarshsho oottidi immana koshshenna. Kiristtoosa yarshshoy asayyo bessido siiqo ubbaappe aadhdhiya siiquwaa bessiyaaba gidiyoogaa hassaya. (Yohaannisa 3:16; 15:13 nabbaba.) He alꞌꞌo imotaa xaasayiya timirtteta xeelliyaagan Yihoowassinne A Naꞌaassi aybi siyettiyaakko qoppa!

10. Hayquwaa xeelliyaagan Seexaanay yootiyo worddoti kayyoynne metoy asaa bolli daranaadan waati oottidonaa?

¹⁰ Seexaanaa worddoti kayyoynne metoy asaa bolli daranaadan oottoosona. Naꞌi hayqqin kayyottiiddi deꞌiya aawaassinne aayeessi he naꞌa geella saluwan kiitanchcha gidanaadan Xoossay ekkiis geetettidi odettana danddayees. Seexaanay yootiyo ha worddoy eta kayyuwaappe guuttaa shemppisiiyye woy yaa kayyottanaadan oottii? Woosa keettay ba timirtteta eqettiyaageeta mittaa bolli kaqqidi xuuggiyoogaanne asaa barchchiyaa bessiyo hegaa malabaa likke gaanawu siꞌooliyaa tamaa worddo timirttiyaa goꞌettiiddi takkiis. Isppaanish Inkiyuzishin giyo shilootaa xeelliyaagan xaafettida maxaafay yootiyoogaadan, woosa keettaa timirttiyaa eqettiyaageeti hayqqanaappe kase bantta nagaraappe simmidi siꞌooliyaa tamaappe attana mala, “toꞌennan eexxiya siꞌooliyaa tamay ay malakko he asati xeelli beꞌanaadan” giidi, ha meqetti baynna pirddaa pirddoos giidi amaridaageeti ammanennan waayi aggana. Daro biittatun deꞌiya asati hayqqida bantta mayzzatussi goynnanaadan, eta bonchchanaadan, woy eti anjjana mala koyanaadan banttana giddidobadan qoppoosona. Harati qassi bantta mayzzatu qixaatiyaappe attanawu giidi eta ufayssanawu koyoosona. Seexaanaa worddoti denddo gidido ammanoti tumuppe minettanaadan oottennaagee azzanttiyaaba. Eti asay coo hirgganaadan woy ubba qassi yayyanaadan oottoosona.

NUUNI GEESHSHA MAXAAFAA TUMAWU WAANI EXATANA DANDDAYIYOO?

11. Dabboti woy laggeti loꞌꞌobaa qoppidi, Xoossaa Qaalan digettidabaa nuuni oottanaadan nuna waati giddana danddayiyoonaa?

¹¹ Dabboti woy laggeti loꞌꞌobaa qoppidi, hayqqida asaara gayttidaagan nuuni Geeshsha Maxaafan digettidabaa oottanaadan nuna giddiyo wodekka, Xoossaanne A Qaalaa nuuni siiqiyoogee Yihoowayyo azazettanaadan nuna minttettees. Eti intte hayqqida ura siiqekketa woy bonchchekketa giidi yootiyoogan nuna yeellayanawu baaxetana danddayoosona. Woy qassi eti nu eeshshay hayqqida uri paxa deꞌiyaageeta issi issiban qohanaadan oottees giidi yootana danddayoosona. Nuuni Geeshsha Maxaafaa tumawu waani exatana danddayiyoo? Geeshsha Maxaafay yootiyo kaallidi deꞌiya maarata ne waata oosuwan peeshshana danddayiyaakko akeeka.

12. Hayqqidaageetuura gayttidaagan Geeshsha Maxaafan digettida meezeti aybee?

¹² Geeshsha Maxaafan digettida ammanotuppenne meezetuppe ‘shaahettanawu’ murtta. (2 Qor. 6:17) Karibiyaane haruuruwan, issi uri hayqqi simmin, A “moytillee” heeran deꞌananne A naaqqida asaa qaxxayana danddayees giidi daro asay ammanees. He “moytillee” ubba qassi “heeraa asaa bolli metuwaa gattana” danddayiyoogaa issi xuufee yootees. Hayqqida ura son deꞌiya heregaa kammiyoonne godan deꞌiya pootota aatti yeggiyo meezee Afirkkan issi issi heeran deꞌees. Gaasoy aybee? Hayqqidaageeti banttana xeellana bessenna giidi issoti issoti yootoosona. Nuuni Yihoowa ashkkarata gidiyo gishshawu, Seexaanaa worddota minttiya ayba malaanne ammanokko woy ayba oosonne oottokko!—1 Qor. 10:21, 22.

13. Yaaqooba 1:5y yootiyoogaadan, neeni issi meeziyaabaa shaakka erana xayikko, waatana koshshii?

¹³ Neeni issi meeziyaabaa shaakka erana xayikko, Yihooway ba aadhdhida eratettaa immana mala A woossa. (Yaaqooba 1:5 nabbaba.) Yaatada, loytta akeekanawu nu xuufeta pilgga. Koshshikko, ne gubaaꞌiyaa cimata zoriyaa oychcha. Eti neeni oottanabaa neeyyo yootana xayikkokka, Geeshsha Maxaafay yootiyo, hagan odettidaageetu mala maarata neeni akeekanaadan nena maaddana danddayoosona. Neeni hegaa oottiyo wode, ne akeekaa abbiyaa loohissaasa; qassi ha abbee neeni ‘iitaa kehaa shaakkada’ eranaadan maaddana.—Ibr. 5: 14.

14. Nuuni asawu xube gidennaadan naagettana danddayiyoy ayba ogetuunee?

¹⁴ ‘Ubbabaa Xoossaa bonchchuwaassi oottite. Xube gidoppite.’ (1 Qor. 10:31, 32) Nuuni issi meeziyaadan woy wogaadan oottanawu woy qassi oottennan agganawu kuuyiyo wode, nuuni kuuyiyoobay haratu kahaa, ubba qassi nu mala Kiristtaanetu kahaa ay keena qohana danddayiyaakko qoppana koshshees. Nuuni oossinne mule xube gidanawu koyokko! (Mar. 9:42) Qassi Yihoowa Markka gidennaageeta koshshennan yiilloyenna mala naagettana koyoos. Nuuni eta bonchchuwan haasayissanaadan siiqoy denttettees, hegee Yihoowa bonchchissees. Nuuni asaara ooyettennaagee woy eta wogaa borennaagee erettidaba. Siiquwawu wolqqay deꞌiyoogaa hassaya! Nuuni asaassi qoppiyoogaaninne eta bonchchiyoogan siiquwaa bessiyo wode, nuna eqettiyaageetu wozanaakka shugissana danddayoos.

15-16. (a) Nu ammanuwaabaa harati eranaadan oottiyoogee loꞌꞌo gidiyoy aybissee? Leemisuwaa yoota. (b) PHawuloosi yootido Roome 1:16n deꞌiya qofay nuuyyo waani hanii?

¹⁵ Neeni Yihoowa Markka gidiyoogaa heeraa asaa erissa. (Isi. 43:10) Neeni Xoossaa Yihoowawu goynniyoogaa ne dabbotinne ne shooroti erikko, hanqqetissiya hanotay merettiyo wode metootennan giigissana danddayaasa. Moozambbiken deꞌiya Fransiskoy hagaadan giis: “Ta machchiyaa Karoliinanne taani tumaa erido wode, nuuni hegaappe simmin hayqqidaageetussi goynnennaagaa nu soo asaassi yootida. Nu kuuyidobay Karoliini michchiyaa hayqqido wode paacettiis. Haymaanootiyaa siraataadan anhaa meecciyo meezee heeran deꞌees. Yaatin, meeccido haattaa gussido sohuwan mata dabboy heezzu gallassaa xiskkana koshshees. He meezeti hayqqidaagaa ayyaanaa ufayssoosona geetettidi qofettees. Karoliininttasoo asay anhaa meeccido haattaa gussido sohuwan A xiskkawusu giidi qoppiis.”

¹⁶ Fransiskoynne A machchiyaa waatidonaa? Fransiskoy hagaadan giis: “Nuuni Yihoowa siiqiyo gishshawunne A ufayssanawu koyiyo gishshawu, he meeziyaadan oottennan ixxida. Karoliininttasoo asay keehi hanqqettiis. Eti hayqqida ura bonchchekketa giidi nuna mootidosona; qassi so asay hegaappe simmin nuna oychchennaagaa woy maaddennagaa yootiis. Nuuni kase nu ammaniyoobaa etawu qonccissido gishshawu, eti hanqqettido wode etaara hegaa denttidi haasayibookko. Nuuni nu hanotaabaa kasetidi qonccissidoogaa gaasuwan, amarida dabboti nuussi exatidosona. Guyyeppe, Karoliini dabboti hanqqettiyoogaa aggin, nuuni etaara sarotettaa medhdhida. Ubba qassi issoti issoti Geeshsha Maxaafaa qofay deꞌiyo xuufiyaa oychchanawu nu soo yiidosona.” Hayquwaa xeelliyaagan nuuni erido tumawu exatanawu mule yeellatanawu koyokko.—Roome 1:16 nabbaba.

KAYYOTTIDAAGEETA MINTTETTANNE MAADDA

17. Kayyottida nu mala Kiristtaaniyawu tumu lagge gidanawu nuna aybi maaddana danddayii?

¹⁷ Nu mala Kiristtaanee siiqiyo uri hayqqiyo wode, ayyo nuuni ‘metuwaa wode maaddanawu yelettida ishanne tumu lagge’ gidanawu baaxetana koshshees. (Lee. 17:17) Kayyottiiddi deꞌiya ishay woy michchiyaa, Geeshsha Maxaafan digettida meeziyaadan oottanaadan asay giddiyo wode, nuuni ‘tumu lagge’ waani gidana danddayiyoo? Kayyottidaageeta minttettanawu nuna maaddana danddayiya naaꞌꞌu maarata Geeshsha Maxaafaappe ane beꞌoos.

18. Yesuusi afuxxanaadan denttettidabay aybee, qassi nuuni A leemisuwaappe ay tamaarana danddayiyoo?

¹⁸ ‘Yeekkiyaageetuura yeekkite.’ (Roo. 12:15) Keehi azzanida urawu nuuni woyganaakko erennan aggana danddayoos. Woyganaakko nuuyyo erettennaba gidinkka, nuuni yeekkiyoogaa eti beꞌikko, etassi nuuni qarettiyoogaa eti erana. Yesuusawu lagge gidida Alꞌꞌaazari hayqqido wode, Mayraama, Marttanne harati bantta siiqiyo ishawunne laggiyawu yeekkidosona. Yesuusi oyddu gallassay aadhdhin gakkidi, Alꞌꞌaazara sohuwaara denttanaagaa erikkonne, ikka “afuxxiis.” (Yoh. 11:17, 33-35) Yesuusi yeekkidoogee A Aawaayyo siyettiyaabaa qonccissees. Yesuusi yeekkiyoogaa so asay beꞌido wode, I eta siiqiyoogaakka eti akeekana danddayoosona; hegee Mayraamonne Martto minttettidoogee erettidaba. Hegaadan, nu ishantti nuuni eta siiqiyoogaanne etawu qoppiyoogaa akeekiyo wode, eti banttarkka deꞌennaagaanne etawu qoppiyaanne eta maaddiya laggeti eta matan deꞌiyoogaa eroosona.

19. Kayyottida nu mala Kiristtaaniyaa minttettiyo wode, Eranchchaa 3:7 nuuni ayba ogetun oosuwan peeshshana danddayiyoo?

¹⁹ “Co77u gaanau wodee de7ees; qassi haasayanaukka wodee de7ees.” (Era. 3:7) Kayyottida nu mala Kiristtaaniyaa minttettiyo hara ogee loyttidi ezggiyoogaa. Ne ishay baassi siyettiyaabaa yootanaadan eeno ga; qassi I haasayiyo ‘xala qaalan’ yiillotoppa. (Iyy. 6:2, 3) Yihoowa Markka gidenna dabboti wolqqanttiyoogaa gaasuwan I unꞌꞌettiiddi deꞌiyaagaa gidana danddayees. Hegaa gishshawu aara issippe woossa. Ayyo minotettaanne woppaa immanaadan ‘woosaa siyiyaagaa’ woossa. (Maz. 65:2) Hanotay injjetikko, Geeshsha Maxaafaa aara issippe nabbaba. Woy qassi issi ura deꞌuwan hanida minttettiyaabaa mala, haniya qofaa nu xuufetuppe nabbaba.

20. Kaalliya huuphe yohuwan nuuni ay xannaꞌanee?

²⁰ Hayqqidaageeta xeelliyaagaaninne duufuwan deꞌiyaageeta sinttappe naagiya maalaalissiya wodiyaabaa tumaa eriyoogee nuna keehi ufayssees! (Yoh. 5:28, 29) Hegaa gishshawu, haasayiyoobaaninne oottiyooban, Geeshsha Maxaafaa tumawu xalidi exatoos; qassi danddayiyo wode ubban he tumaa haratussi yootoos. Seexaanay asay tumaa erennaadan diggiyo hara ogiyaa, hegeekka iita ayyaanaa oosuwaa kaalliya huuphe yohoy qonccissana. Iita meezetuppenne iita ayyaanaa oosuwaara gayttida allaxxiyoobatuppe nuuni naagettana koshshiyoy aybissakkokka beꞌana.