Ufayssaa Nuuni Xoossaappe Demmiyo Eeshshaa

ASAY ufayttidi deꞌanawu koyees. SHin “waissiya” paacee ha wurssetta gallassi asa ubbaa gakkees. (2 Xim. 3:1) Naaqoy, sahoy, ooso xayiyoogee, azzanoy, woy hirgganaadaaninne kayyottanaadan oottiya harabay issoti issoti ufayttiyoogaa loddan loddan agganaadan oottana danddayees. Haray atto, Xoossawu oottiyaageetikka hidootaa qanxxananne ufayssaa xayana danddayoosona. Nena hegaa malabay gakkidaba gidikko, zaarettada waana ufayttana danddayay?

Ha oyshaa zaaranawu, tumu ufayssay aybakkonne harati paacee gakkishinkka waanidi ufayttiiddi deꞌidaakko nuuni koyro akeekana koshshees. Yaatidi, aggennan, ubba qassi darissidi ufayttanawu nuuni ay oottana koshshiyaakko beꞌana.

UFAYSSAY AYBEE?

Ufayttiyoogee coo poocamiyoogaara issi mala giidi nuuni qoppana koshshenna. Leemisuwawu, issi asi mattottidi, keehi miiccana danddayees. SHin, mattoy aggiyo wode, miicciyoogaa aggidi, moozottananne ba deꞌuwan metootana danddayees. I he mattuwaa wode poocammidoogee tumu ufayssa gidenna.—Lee. 14:13.

SHin, tumu ufayssay wozanan tokettidaba mala eeshsha. Ufayssay “loꞌꞌobaa demmido gishshawu woy demmanawu naagiyo gishshawu siyettiyaaba” geetettidi birshshettiis. Tumu ufayssay nu yuushuwan deꞌiya hanotati iitin loꞌꞌinkka sohuwaara xayennaba. (1 Tas. 1:6) Issi uri issiban unꞌꞌettana danddayikkonne, tumu ufayssay A wozanaappe xayenna. Leemisuwawu, kiitettidaageeti Kiristtoosabaa yootido gishshawu garafettidosona. SHin, “Yesuusa sunttaa gishshau, eti kauyyanau bessiyoogaa Xoossai qoppido gishshau, yaa7aappe ufaittiiddi kiyidosona.” (Oos. 5:41) Eti ufayttidoy garafettido gishshaassa gidennaagee tuma. SHin, eti Xoossawu ammanettidi oottiyoogan tumu ufayssaa demmidosona.

Nuuni hegaa mala ufayssaa laattidi yelettibookko; woy qassi hegee sohuwaara merettiyaaba gidenna. Ayssi giikko, tumu ufayssay Xoossaa geeshsha ayyaanaa ayfiyaa macara. Xoossaa ayyaanay maaddin, nuuni tumu ufayssay deꞌiyo kumetta “ooratta asatettaa” maayana danddayoos. (Efi. 4:24; Gal. 5:22) Nuuni tumu ufayssaa demmiyo wodiyan, deꞌuwan unꞌꞌettiyaabay deꞌishinkka genccana danddayoos.

NUUNI ETA LEEMISUWAA KAALLANA KOYIYOOGEETA

Nuuni ha wodiyan beꞌiyo iitabay gidennan, loꞌꞌobay saꞌan deꞌanaadan Yihooway halchchiis. SHin harati oottiyo iitabay Yihooway ufayttennaadan oottibeenna. Xoossaa Qaalay, “Minotettainne ufaissai a Beeta Maqidasiyan de7ees” yaagees. (1 Odi. 16:27) Qassi, Yihoowa ashkkarati oottiyo loꞌꞌobay A wozanaa ‘ufayssees.’—Lee. 27:11.

Issibay nuuni qoppidoogaadan hanenna wodiyan keehi unꞌꞌettennan aggiyoogan, Yihoowa leemisuwaa kaallana danddayoos. Hegan ufayttennan aggiyoogaappe, haꞌꞌi demmido loꞌꞌobaanne sinttappe demmana loꞌꞌobaa tishshi oottidi qoppana danddayoos.a

Wayssiyaabay gakkishin bantta deꞌuwan ufayttiiddi deꞌida daro asatu leemisuwaakka Geeshsha Maxaafay yootees. Abrahaami harati A shemppuwawu hirggissiyaabaa A bolli gattishin gencciis. (Doo. 12:10-20; 14:8-16; 16:4, 5; 20:1-18; 21:8, 9) Hegaadan unꞌꞌissiyaabay gakkikkokka, Abrahaami ba wozanan ufayttiiddi deꞌiis. I hegaadan waani deꞌidee? Ooratta alamiyan Masiyaa haaruwan deꞌanaagee ayyo qoncci beettiis. (Doo. 22:15-18; Ibr. 11:10) Yesuusi, “Intte aawai Abrahaami, ta gallassaa be7anau laamotiis” yaagiis. (Yoh. 8:56) Nuunikka sinttanaa ufayssaa Abrahaamaagaadan qoppana danddayoos.—Roo. 8:21.

Abrahaamaagaadan, kiitettida PHawuloosinne A laggee Sillaasi Xoossay immana giidobaa bolli bantta qofaa wottidosona. Etawu mino ammanoy deꞌees; qassi iita metoy gakkikkokka, eti ufayttiiddi deꞌidosona. Leemisuwawu, eta keehi wadhdhidi qasho keettan yeggi simmin, eti ‘qamma bilahiyankka Xoossaa woossiiddi, mazamuriyaa yettan Xoossaa galatidosona.’ (Oos. 16:23-25) PHawuloosanne Sillaasa eta hidootay minttettiis; qassi Kiristtoosa sunttaa gishshawu waayettiyoogee eta ufayssiis. Nuunikka PHawuloosaagaadaaninne Sillaaseegaadan Xoossawu ammanettidi haggaaziyoogan demmiyo loꞌꞌobaa ubbatoo hassayana danddayoos.—Pili. 1:12-14.

Ha wodiyan, paacee gakkishin ufayttidi deꞌiyoogan loꞌꞌo leemiso gidiya daroti nu ishanttu giddon deꞌoosona. Leemisuwawu, Hidaare 2013n, Supper Tayfuun Hiyan giyo gotee giddo Pilippinsse heeran denddidi, 1,000⁠ppe dariya Yihoowa Markkatu keettaa laaliis. Taklobane kataman deꞌiya A keettay muleera xayido Jorjji hagaadan giis: “He iitabay haninkka ishantti ufayttoosona. Nu ay keena ufayttidaakko odanawukka tawu metees.” Nuna gita metoy gakkiyo wodekka, Yihooway nuussi oottobaa nashshiyaabanne hegaa wozanan wottiyaaba gidikko, ufayttiiddi deꞌana. Yihooway nuussi oottido, nuuni ufayttanaadan oottiya harabay aybee?

NUUNI UFAYTTANAADAN OOTTIYAABAA

Xoossa dabbo gidiyoogaappe aaruwan nuna ufayssana danddayiya harabi aybee? Ane hagaa qoppa: Ubbabaa Haariyaagaa eroos. I nuussi Aawa, Xoossanne dabbo!—Maz. 71:17, 18.

Deꞌuwaa imotaanne deꞌuwan ufayttana danddayiyoogaa keehi nashshoos. (Era. 3:12, 13) Nuuni Yihoowakko shiiqana danddayiya akeekanchcha mereta gidiyo gishshawu, Xoossay nuussi halchchobaa eroos. (Qol. 1:9, 10) Hegaa gishshawu, nu deꞌuwan tumu ufayssaanne loꞌꞌo kaaletuwaa demmoos. Hara baggaara qassi, daro asay Xoossay deꞌuwawu halchchidobaa loytti akeekenna. He dummatettaa xeelliyaagan PHawuloosi hagaadan giis: “‘Ooninne aifiyan be7ibeennaagee, haittankka siyibeennaagee, qassi ooninne ba wozanan qoppibeennaagee Xoossai bana siiqiyaageetussi giigissidoogaa’. . . . Xoossai ba xuura yohuwaa ba Ayyaanan nuna erissiis.” (1 Qor. 2:9, 10) Yihooway nuussi halchchidobaa eriyoogee nuna keehi ufayssees.

Yihooway ba asaassi oottido harabaakka qoppa. Nu nagaray atto geetettiyoogee nuna keehi ufayssees. (1 Yoh. 2:12) Xoossaa maarotan, mata wode ooratta alamiyan deꞌana hidootay nuussi deꞌees. (Roo. 12:12) Haꞌꞌikka nunaara issippe goynniya loꞌꞌo laggeta Yihooway immiis. (Maz. 133:1) Yihooway ba asaa Seexaanaappenne daydanttatuppe naagiyoogaa Xoossaa Qaalay yootees. (Maz. 91:11) Nuuni Xoossay immido he anjjota ubbaa loytti qoppikko, nu ufayssay yaa gujjanaagaanne daranaagaa akeekana.—Pili. 4:4.

NE UFAYSSAY WAANIDI GUJJII?

Ufayttiya issi Kiristtaanee ba ufayssaa yaa gujjana danddayii? Yesuusi, “Ta ufaissai inttenaara de7ana malanne, inttekka daro ufaittana mala, taani hagaa intteyyo yootaas” yaagiis. (Yoh. 15:11) Hegee nu ufayssay gujjana danddayiyoogaa bessennee? Ne ufayssay gujjanaadan oottiyoobaa taman mela mittaa gujjiyoogaara geeddarssana danddayaasa. Lacoy pololattanaadan neeni mittaa taman shiishshana bessees. Hegaadankka, ne ufayssay gujjanaadan ayyaanaaban neeni minnana bessees. Tumu ufayssaa immiyaagee Xoossaa ayyaanaa gidiyoogaa hassaya. Hegaa gishshawu, ubba wode Yihooway ba ayyaanan maaddanaadan oychchada woossiyoogaaninne ayyaanaa kaaletuwan xaafettida A Qaalaa wotta denttada qoppiyoogan, keehi ufayttana danddayaasa.—Maz. 1:1, 2; Luq. 11:13.

Yihoowa ufayssiyaabaa minnada oottiyoogankka ne ufayssay gujjees. (Maz. 35:27; 112:1) Ayssi giikko, “hegee asassi waanna ooso” gidiyo gishshawu, nuuni ‘Xoossaassi yayyananne A azazuwaa naagana’ bessees. (Era. 12:13) Hegaa giyoogee, nuuni Xoossaa sheniyaa oottanaadan merettida giyoogaa. Yaatiyo gishshawu, nuuni Yihoowawu oottiyo wode, nu deꞌuwan aaro ufayssaa demmoos.b

UFAYTTIYOOGAN DEMMIYO ANJJOTA

Xoossay nuuyyo immiyo ufayssay gujjiyo wode, nu ufayttiyoogaappekka keehi aadhdhiya anjjota demmoos. Leemisuwawu, ay keena metoy nu bolla gakkikkonne, nuuni saluwan deꞌiya nu Aawaayyo ufayssan oottiyo wode, A keehi ufayssiyaageeta gidana. (Zaa. 16:15; 1 Tas. 5:16-18) Qassi, nuuni demmido tumu ufayssay asatettaabaa koyiyoogaappe, nuuni Xoossaa Kawotettaa gishshawu nuna goꞌꞌiya darobaa aggibayanawu koyanaadan oottees. (Maa. 13:44) Nuuni hegee demissiyo loꞌꞌobaa beꞌiyo wode, nu ufayssay gujjees, gita woppaa demmoosinne haratikka ufayttanaadan oottoos.—Oos. 20:35; Pili. 1:3-5.

Amarkkan Nebraska Yuniversttiyan payyatettaabaa darobaa xannaꞌida issi bitanee hagaadan giis: “Neeni haꞌꞌi ne deꞌuwan ufayttiyaaba gidikko, sinttappe payyatettan deꞌana danddayaasa.” Hegee, Geeshsha Maxaafay, “Wozani ufaittiyoogee asassi lo77o xale” giyo qofaara maayiyaaba. (Lee. 17:22) Tumakka, ne ufayssay gujjiyo wode, ne asatettaykka payya gidana danddayees.

Hegaa gishshawu, nuuni unꞌꞌettiya wodiyan deꞌikkonne, Yihoowa woossiyoogan, A Qaalaa xannaꞌiyoogaaninne wotti dentti qoppiyoogan xayenna tumu ufayssaa demmana danddayoos. Qassi nuuni haꞌꞌi demmiyo anjjota qoppiyoogee, haratu loꞌꞌo ammanuwaa leemisuwaa kaalliyoogeenne Xoossaa sheniyaa polanawu koyiyoogee nu ufayssay gujjanaadan oottees. Ha ubba ogetun, Mazamure 64:10y, ‘Xilloti Yihoowan ufayttananne akko baqatidi attana’ giyo qofay tuma gidiyoogaa nuuni akeekana.