XANNAꞌIYO HUUPHE YOHUWA 23
MAZAMURE 2 Ne Sunttay Yihoowa
Nuuni Yihoowa Sunttaa Waati Xoqqu Ootti Xeelliyoo?
“GODAI hagaadan yaagees; ‘Intte ta markkata.’”—ISI. 43:10.
TAMAARANABAA
Yihooway geeshsha gidiyogaanne Seexaanay abaa yootido ubbabay worddo gidiyogaa bessanawu nuuni waatana danddayiyakko tamaarana.
1-2. Yesuusi Yihoowa sunttaa xoqqu ootti xeellidoogaa nuuni waati eriyoo?
YESUUSAWU Yihoowa sunttaappe aadhdhiya aybinne baawa. Appe aaruwan Yihoowa sunttaa erissida hara ooninne baawa. Yihooway geeshsha gidiyogeenne A oge ubbay suure gidiyogee qonccanaadan Yesuusi hayqqanawu eeno giidoogaa kasetiya huuphe yohuwan beꞌida. (Mar. 14:36; Ibr. 10:7-9) Qassi Yesuusi ba Shaꞌu Layttaa Haaruwappe simmin, Yihoowa sunttaa geeshshatettawu ba maata ubbaa ba dosan sheedhdhana. (1 Qor. 15:26-28) Yesuusi Yihoowawu oottido ubbabay I Yihoowa keehi siiqiyogaa bessees.
2 Yesuusi ba Aawaa sunttan ha saꞌaa yiis. (Yoh. 5:43; 12:13) I bana kaalliyageetuyyo ba Aawaa sunttaa erissiis. (Yoh. 17:6, 26) I Yihoowa sunttan tamaarissiisinne malaalissiyabata oottiis. (Yoh. 10:25) Qassi Yesuusi bana kaalliyageeta Yihooway ‘ba sunttaa gishshawu naaganaadan’ woossiis. (Yoh. 17:11) Yaatin Yesuusi Yihoowa sunttaa xoqqu ootti xeellikko, issi uri A Aawaa sunttaa erennan woy goꞌettennan tumuppe Kiristtoosa kaallays waani gaana danddayii?
3. Nuuni ha huuphe yohuwan ay beꞌanee?
3 Nuuni Kiristtoosa kottiya kaallanawu baaxetiya Kiristtaaneta gidiyo gishshawu A Aawaa sunttaa xoqqu ootti xeelloos. (1 PHe. 2:21) Yihooway, ‘Kawotettaa mishiraachchuwa’ yootiyageeta ba sunttan xeegidoy aybissakko ha huuphe yohuwan beꞌana. (Mat. 24:14) Nuuni ubbay Yihoowa sunttaa ay keena xoqqu ootti xeellana koshshiyakkokka beꞌana.
‘BA SUNTTAN XEEGETTANAADAN DOORIDO ASATA’
4. (a) Yesuusi saluwa simmanaappe guuttaa kasetidi bana kaalliyageetuyyo woygidee? (b) Hegaara gayttidaagan denddiya oyshay aybee?
4 Yesuusi saluwa simmanaappe guuttaa kasetidi, bana kaalliyageetuyyo hagaadan giis: “Geeshsha ayyaanay intte bolli wodhdhiyo wode, intte wolqqaa demmana, yaatidi Yerusalaamen, Yihudaaninne Samaariyan ubbasan, qassi kumetta saꞌan tabaa markkattana.” (Oos. 1:8) Hegaa gishshawu Yesuusa kaalliyageeti Israaꞌeela biittan xalaala gidennan, ubbasan mishiraachchuwa sabbakana. Wurssettan kumetta saꞌan deꞌiya asay ubbay Yesuusa kaalliyageeta gidiyo injjiya demmana. (Mat. 28:19, 20) Shin Yesuusi “Intte . . . tabaa markkattana” yaagiis. Yesuusa kaalliyageeta gidanaageeti abaa xalaala markkatiyageeta gidaneeyye, eti Yihoowa erananne abaakka markkattana koshshii? Oosuwa maxaafaa shemppo 15n odettidabati ha oyshaa zaaruwa nuuni eranaadan maaddana.
5. Kiitettidaageetinne Yerusalaamen deꞌiya cimati asay ubbay Yihoowa sunttaa erana koshshiyogaa waati bessidonaa? (Misiliyakka xeella.)
5 Kiitettidaageetinne Yerusalaamen deꞌiya cimati 49 M.Ln., qaxxarettibeenna hara biittaa asati Kiristtaane gidanawu waatana koshshiyakko tobbanawu issippe shiiqidosona. Eti tobbidi wurssiyo wode Yesuusa ishay Yaaqoobi hagaadan giis: “Xoossay hara biittaa asaa giddoppe ba sunttan xeegettanaadan asaa dooriyogaa doommidi, eta waati hassayidaakko [Pheexiroosi] loytti yootiis.” I Xoossay erissidobaa yootiya Amoxi giidobaappe ekkidi hagaadan giis: “Attiya asati hara ubba biittaa asaara Yihoowa wozanappe koyanaadan taani hegaa oottana; qassi . . . Yihooway eti A sunttan xeegettanaagaa yootiis.” (Oos. 15:14-18) Yesuusa kaalliyogaa mati doommida he asati Yihoowabaa tamaariyogaa xalaala gidennan, ‘A sunttankka xeegettana.’ Hegaa giyogee eti Xoossaa sunttaa haratuyyo awaajjana, qassi asay eta hegan erana yaagiyogaa.
Koyro xeetu layttan oosuwa kaalettiya citaa shiiquwan, ammanettida he attumaageeti Kiristtaaneti Xoossaa sunttawu doorettida asata gidiyogaa loytti akeekidosona (Mentto 5 xeella)
6-7. (a) Yesuusi ha saꞌaa yiidoy aybissee? (b) Yesuusi ha saꞌaa yiido hara keehi koshshiya gaasoy aybee?
6 Yesuusa sunttaa birshshettay “Yihooway Ashshiyagaa” giyogaa; qassi Yihooway bananne ba Naꞌaa ammaniyageeta ubbaa Yesuusa baggaara ashshees. Yesuusi ba shemppuwa asawu aatti immanawu ha saꞌaa yiis. (Mat. 20:28) I wozuwa qanxxiyogan asay attanaadaaninne merinaa deꞌuwa demmanaadan oottiis.—Yoh. 3:16.
7 Shin asawu wozoy koshshidoy aybissee? Edene ataakiltte sohuwan hanidabaappe denddidaagaana. Nuuni hagaappe kasetiya huuphe yohuwan beꞌidoogaadan, koyro asa gidida Addaamenne Hewana Yihoowa bolli makkalido gishshawu, merinawu deꞌiyo injjee etappe haliis. (Doo. 3:6, 24) Shin Yesuusi asaa ashshiyogaappe aadhdhiyabaa oottanawu ha saꞌaa yiis. Seexaanay Yihoowa xeelliyagan iita wordduwa yootiis. (Doo. 3:4, 5) Hegaa gishshawu Addaamenne Hewani zerettaa atotettay keehi gita allaalliyara, hegeekka Yihoowa sunttay geeyiyogaara gayttidaba. Yesuusi Yihoowa sunttan yiido gishshawunne A sunttaa erissido gishshawu Yihoowa sunttay geeyanaadan gitabaa oottiis.
Issi uri A Aawaa sunttaa erennan woy goꞌettennan tumuppe Kiristtoosa kaallays waani gaana danddayii?
8. Yesuusa kaalliya ubbati akeekana koshshiyabay aybee?
8 Yesuusa kaalliyageeti ubbay Ayhudatikka, hara biittaa asatikka bantta atotettawu Pulttoy Yesuusa Aawaa, Xoossaa Yihoowa gidiyogaa akeekana koshshees. (Yoh. 17:3) Hegaa bollikka, Yesuusaagaadan eti Yihoowa sunttan xeegettana. Qassi he sunttay geeyiyogee keehi koshshiyaba gidiyogaa eti akeekana bessees. Eta atotettay hegaara gayttidaba. (Oos. 2:21, 22) Hegaa gishshawu ammanettidi Yesuusa kaalliya ubbay Yihoowabaanne Yesuusabaa tamaarana koshshees. Yesuusi Yohaannisa 17n odettida woosaa kuuyiiddi, “Neeni tana siiqiyogaa mala siiquwa eti bessana malanne eti tanaara issuwa gidana mala, taani etawu ne sunttaa erissaas, qassi erissana” giido gaasuwa nuuni akeekana danddayoos.—Yoh. 17:26.
“TAAYYO INTTE MARKKATA”
9. Yesuusa kaalliyageeta gidanawu koyikko, nuuni waatana koshshii?
9 Nuuni beꞌidoogaadan, Yesuusa kaallanawu Yihoowa sunttaa geeshsha oottidi xeellana koshshiyogee qoncce. (Mat. 6:9, 10) Nuuni Yihoowa sunttaa keehi xoqqu oottidi xeellana koshshees. Hegee nuuni oottiyobaarakka gayttees. Yaatin Yihoowa sunttaa geeshsha oottidi xeellanawunne Seexaanay Yihoowabaa yootidobay worddo gidiyogaa bessanawu ay oottana danddayiyoo?
10. Isiyaasa maxaafan shemppo 42ppe 44n odettidabay aybee? (Isiyaasa 43:9; 44:7-9) (Misiliyakka xeella.)
10 Isiyaasa shemppo 42ppe 44y nuuni Yihoowa sunttay geeyanaadan waatana danddayiyakko yootees. Yihooway baassi goynnenna asati bantta xoossati tumuppe deꞌiyakkonne qonccissanaadan oychchidoogaa he shemppoti yootoosona. Pirddaa shilootaagaadan, I hegaa qonccissana danddayiya markkay deꞌiyakkonne oychchiis. Shin ooninne baawa!—Isiyaasa 43:9; 44:7-9 nabbaba.
Nuuni haasayiyonne oottiyo ubbaban Yihoowappe attin, hara Xoossi baynnaagaa bessoos (Mentto 10-11 xeella)
11. Isiyaasa 43:10-12n Yihooway ba asawu woygidee?
11 Isiyaasa 43:10-12 nabbaba. Yihooway ba asawu hagaadan giis: “Taani Xoossaa gidiyoogau taayyo intte markkata.” Yihooway, “Taappe attin, hara Xoossi de7ii?” giya oyshaa eti zaaranaadan oychchiiddi deꞌees. (Isi. 44:8) Hegaa gishshawu ha oyshaa zaariyo gita maatay nuussi deꞌees. Nuuni haasayiyobaaninne oottiyoban tumu Xoossay Yihoowa xalaala gidiyogaanne A sunttay hara suntta ubbaappe keehi aadhdhiyogaa qonccissoos. Seexaanay nu bolli wolqqaama paaciya gattikkokka, nuuni Yihoowa tumuppe siiqiyogaanne awu ammanettiyogaa nu deꞌuwan bessoos. Yaatiyogan A sunttay geeyanaadan oottana danddayoos.
12. Isiyaasa 40:3, 5n odettida hiraagay waani polettidee?
12 Nuuni Yihoowa sunttawu exatiyo wode, Yesuus Kiristtoosa leemisuwa kaalloos. Issi uri ‘Yihoowa ogiya giigissanaagaakka’ Isiyasi kasetidi yootiis. (Isi. 40:3) Hegee waani polettidee? Yihoowa sunttan yiidanne Yihoowa sunttan haasayida Yesuusawu, asaa haattan muukkiya Yohaannisi ogiya giigissiis. (Mat. 3:3; Mar. 1:2-4; Luq. 3:3-6) ‘He wode, Yihoowa bonchchoy qonccanaageekka’ he hiraagan odettiis. (Isi. 40:5) Hegee waani polettidee? Yesuusi ha saꞌaa yiido wode, wottiyobi baynna hanotan Yihoowa qonccissidoogee Yihooway bari huuphen ha saꞌaa yiidoogaa mala.—Yoh. 12:45.
13. Nuuni Yesuusa leemisuwa waati kaallana danddayiyoo?
13 Yesuusaagaadan nuunikka Yihoowabaa markkattoos. Nuuni Yihoowa sunttan xeegettoosinne nunaara gayttiya ubbawu I oottido malaalissiyabata yootoos. Shin nuuni Yihoowabaa loytti markkattiyageeta gidanawu Yesuusi Yihoowa sunttaa geeshshanawu oottido ubbabaa asaa erissana koshshees. (Oos. 1:8) Yesuusaagaadan Yihoowabaa markkattida hara ooninne baawa; qassi nuuni A leemisuwa kaalloos. (Ajj. 1:5) Yaatin nuuni Yihoowa sunttaa xoqqu ootti xeelliyogaa bessanawu harabaa ay oottana danddayiyoo?
NUUNI YIHOOWA SUNTTAA XOQQU OOTTI XEELLIYOGAA BESSIYO HARA OGETA
14. Mazamure 105:3y yootiyogaadan, Yihoowa sunttay nuuni waananaadan oottii?
14 Nuuni Yihoowa sunttan ceeqettoos. (Mazamure 105:3 nabbaba.) Yihooway nuuni A sunttan ceeqettiyo wode keehi ufayttees. (Erm. 9:23, 24; 1 Qor. 1:31; 2 Qor. 10:17) Yihoowa sunttaa bonchchiyogaanne A sunttawu exatiyogaa nuuni gita maatadan xeelloos. Nuuni Yihoowa Markka gidiyogaa nunaara oottiyageetuyyo, nunaara tamaariyageetuyyo, nu shoorotuyyonne haratuyyo yootanawu mule yeellatana bessenna! Dabloosi nuuni Yihoowa sunttaa haratuyyo yootiyogaa agganaadan koyees. (Erm. 11:21; Ajj. 12:17) Qassi Seexaanaynne A wordduwa aassiyageeti asay Yihoowa sunttaa doganaadan oottanawu koyoosona. (Erm. 23:26, 27) Shin nuuni Yihoowa sunttaa siiqiyo gishshawu ubba wode A sabbanawu koyoos.—Maz. 5:11; 89:16.
15. Yihoowa sunttaa xeegiyogaa giyogee woygiyogee?
15 Nuuni ubbatoo Yihoowa sunttaa xeegoos. (Yuu. 2:32; Roo. 10:13, 14) Yihoowa sunttaa xeegiyogaa giyogee Xoossaa buzo sunttaa eriyogaanne goꞌettiyogaa xalaala gidenna. Xoossaa oonatettaa eriyogaa, an ammanettiyogaa, maaduwanne kaaletuwa demmanawu akko xeelliyogaa qonccissees. (Maz. 20:7; 99:6; 116:4; 145:18) Yihoowa sunttaa xeegiyogee haratuyyo A sunttaanne A eeshshatubaa yootiyogaa, qassi eti Yihoowan sabettanawu zilꞌꞌetti laamettanaadan maaddiyogaakka qonccissees.—Isi. 12:4; Oos. 2:21, 38.
16. Seexaanay worddanchcha gidiyogaa nuuni waati bessana danddayiyoo?
16 Nuuni Yihoowa sunttaa gishshawu waayettanawu eeno goos. (Yaaq. 5:10, 11) Nuna waayee gakkishinkka nuuni Yihoowawu ammanettidi deꞌiyo wode, Seexaanay worddanchcha gidiyogaa bessoos. Iyyooba wode, Seexaanay Yihoowawu haggaaziyageeta hagaadan giidi mootiis: “Asi ba shemppuwaa gishshau, bau de7iyaabaa ubbaa immana.” (Iyy. 2:4) Asay injjetiyo wode xalaalan Yihoowawu haggaazeesinne metoy gakkikko Yihoowa aggiigees yaagidi Seexaanay yootees. Ammanettida Iyyoobi hegee worddo mooto gidiyogaa bessiis. Ha wodiyan nuunikka, waayissiyabati nuna gakkishin woy Seexaanay nuna hidootaa qanxxissanawu baaxetishin Yihoowawu haggaaziyogaa mule aggennaagaa bessana danddayoos. Yihooway nuna ba sunttaa gishshawu naaganaagaa wozanappe ammanettana danddayoos.—Yoh. 17:11.
17. Koyro PHeexiroosa 2:12n qonccidaagaadan, nuuni Yihoowa sunttaa bonchchissana danddayiyo hara ogee aybee?
17 Nuuni Yihoowa sunttaa bonchchiyogaa bessoos. (Lee. 30:9; Erm. 7:8-11) Nuuni Yihoowa Markka gidiyogaa asay eriyo gishshawu, nuuni oottiyobay A sunttaa sabissana woy tooshissana danddayees. (1 PHeexiroosa 2:12 nabbaba.) Hegaa gishshawu nu haasayiyobaaninne nu kandduwan Yihoowa sabissanawu nuuyyo danddayettida ubbabaa oottanawu koyoos. Nuuni nagaranchcha gidikkokka, yaatiyogan Yihoowa sunttay bonchchettanaadan oottoos.
18. Nuuni Yihoowa sunttaa xoqqu ootti xeelliyogaa bessana danddayiyo hara ogee aybee? (Tohossa qofaakka xeella.)
18 Nu sunttaappe aaruwan Yihoowa sunttay nuna keehi qofissees. (Maz. 138:2) Hegee keehi koshshiyaba gidiyoy aybissee? Nuuni Yihoowa ufayssiyabaa oottiyo wode, darotoo asay hegaa dosennan aggananne nubaa iitabaa haasayana danddayiyo gishshataassa.a Yesuusi Yihoowa sunttaa bonchchissanawu danobaa oottida asadan qoodettidi yeellayiya hayquwa hayqqanawu eeno giis. A xeelliyagan harati qoppiyobay A darin qofissibeenna gishshawu I ‘yeellaa kariis.’ (Ibr. 12:2-4) I Xoossay koyiyobaa oottiyogan xeelaa wottiis.—Mat. 26:39.
19. Neeni Yihoowa sunttaa waata xeellay, qassi aybissi?
19 Nuuni Yihoowa sunttan ceeqettoos; qassi Yihoowa Markkata geetettiyogaa gita maatadan xeelloos. Nuuni Yihoowa sunttaa keehi xoqqu ootti xeelliyo gishshawu harati nuna karikkokka, A ubbatoo sabboos. Nuuni nu sunttaappekka aaruwan Yihoowa sunttaa xoqqu ootti xeelloos. Yaakko, Seexaanay nuna hidootaa qanxxissanawu baaxetikkokka, nuuni ubbatoo Yihoowa sunttaa sabbanawu murttidaageeta gidoos. Yaatiyogan, Yesuus Kiristtoosaagaadan nuunikka aybippenne aaruwan Yihoowa sunttaa xoqqu ootti xeelliyogaa bessoos.
MAZAMURE 10 Nu Xoossaa, Yihoowa Sabbite!
a Ammanettida bitanee Iyyoobikka A heezzu laggeti A sunttaa bashshido wode babaa xalaalaa qoppiyogaa doommiis. Koyro heeran, ba naatanne ba aqo ubbaa xayido wode, “Iyyoobi nagaraa oottibeenna; Xoossaa amassalibeenna.” (Iyy. 1:22; 2:10) Shin moorobaa oottiis giidi Iyyooba mootido wode I ‘xala qaalaa’ haasayiis. I Yihoowa sunttaa bonchchiyogaa aggidi, ba sunttaa xoqqu ootti xeelliis.—Iyy. 6:3; 13:4, 5; 32:2; 34:5.