Ne Siiqiyo Ura Maaddaydda Ubbatoo Waana Ufayttana Danddayay?

1-2. Siiqiyo ura maaddiyageeta Yihoowi waati xeellii? (Leemiso 19:17) (Misiliyakka xeella.)

KOORIYAN deꞌiya Jeniyala giyo ishay hagaadan giis: “Taaninne ta machchiya aqo deꞌuwan 32 layttaappe daruwa deꞌida. Aadhdhida ichchashu layttawu ta keettaayyiya keehi harggido gishshawu, iyyo ta maadoy koshshees. I harggee wolqqaama gidiyo gishshawu A qaaxxanawu keehi metootawusu. Taani ta keettaayyiyo keehi siiqiyo gishshawu O maaddiyogan ufayttays. A qammi qammi, nu son deꞌiya hosppitaaliyagaa mala hiittan zinꞌꞌawusu. Taani I matan aqays; qassi nuuni kushiya oyqettidi xiskkoos.”

² Neeni nena yelidaagaa, ne aqo laggiya, ne naꞌaa, woy ne laggiya maaddaydda deꞌay? Yaanikko, neeni eta siiqiyo gishshawu, ufayssan maaddiyogee qoncce. Qassi neeni Yihoowa siiqiyo gishshawukka hegaadan oottaasa. (1 Xim. 5:4, 8; Yaq. 1:27) Shin siiqiyo ura maaddiyogee ubbatoo metennaba gidenna. Issi issitoo harati erenna metuwa genccaasa. Qassi ne metuwa hara ooninne akeekana danddayennabadan qoppana danddayaasa. Asay neeni noocu giishin beꞌana danddayees. Gidikkonne, issi issitoo neeni keehi azzaniyogaa eti erokkona. (Maz. 6:6) Neeni genccaydda deꞌiyo metuwa harati beꞌana xayikkonne, Yihoowi ubbatoo beꞌees. (Kessaabaa 3:7ra gatta xeella.) Ne afuttaanne ne agga bayiyobata I xoqqu ootti xeellees. (Maz. 56:8; 126:5) Neeni siiqiyo ura maaddanawu oottiyo ubbabaa I beꞌees. Neeni hegaadan oottiyo wode ne awu talꞌꞌidabadan xeellees; qassi I he acuwa neeyyo qanxxanawu qaalaa geliis.—Leemiso 19:17 nabbaba.

3. Taara maaddiyogee Abrahaamanne Saaro metana danddayiyoy aybissee?

³ Cimida woy sahettida ura maaddida darotubaa Geeshsha Maxaafay yootees. Leemisuwawu, Abrahaamabaanne Saaribaa ane qoppa. Eti Uurappe kiyiyo wode Abrahaama aawaa Taarassi layttay 200 heera. Taari keehi cimidaba gidikkonne, etaara Uurappe kiyiis. Eti Haaraana giyosaa gakkanawu 960 kilo meetire gidiyagaa manddaridosona. (Doo. 11:31, 32) Abrahaaminne Saara Taara keehi siiqiyaba gidikkonne, eti manddariyo wode A maaddiyogee keehi waayssiyogee qoncce. Geella eti gaameelan woy hariyan manddarennan aggokkona; hegee cimida Taarawu keehi deexxana danddayees. Abrahaaminne Saara issi issitoo keehi daafurennan aggokkona. Hanotay ayba gidikkonne, Yihoowi etawu koshshiya wolqqaa immidoogee qoncce. Yihoowi Abrahaamanne Saaro maaddidoogaadan, nenakka maaddana; qassi I neeyyo wolqqaa immana.—Maz. 55:22.

4. Nuuni ha huuphe yohuwan ay beꞌanee?

⁴ Ufayttiyogee siiqiyo ura aggennan maaddanaadan oottees. (Lee. 15:13) Ufayttiya uri ayba hanotay deꞌishinkka ufayttana danddayees. (Yaq. 1:2, 3) Hegaadan ufayttanawu waatana danddayay? Neeni ufayttanaadan oottiya gaasota akeekanaadan maaddana mala Yihoowa ubbatoo woossa. Neeni ubbatoo ufayttanaadan oottiya harabatikka deꞌoosona. Ha huuphe yohuwan hegeetuppe amaridaageeta beꞌana. Qassi harati nena waati maaddana danddayiyakkokka beꞌana. Ane koyro, siiqiyo ura maaddiyageeti ubbatoo ufayttana koshshiyoy aybissakko, qassi eti ufayttennaadan oottiya metooti aybakko beꞌoos.

SIIQIYO URA MAADDIYO WODE UFAYTTIYOGEE METANA DANDDAYIYOY AYBISSEE?

5. Siiqiyo ura maaddiyageeti ubbatoo ufayttana koshshiyoy aybissee?

⁵ Siiqiyo ura maaddiyageeti ufayttana xayikko, eesuwan daafurana danddayoosona. (Lee. 24:10) Qassi eti daafuriyo wode koyidoogaadan maaddana danddayokkona. Siiqiyo ura maaddiyageeti ufayttennaadan oottana danddayiya metooti awugeetee?

6. Siiqiyo ura maaddiya amaridaageeti keehi daafuriyoy aybissee?

⁶ Siiqiyo ura maaddiyogee nena keehi daafurssana danddayees. Liyo giyo michchiya hagaadan gaasu: “Hanotati loꞌꞌo gidido wodiyankka taani gallassaa wurssettan darotoo unꞌꞌettays; qassi daafurays. Issi issitoo asi xaafi kiittidobaa zaaranawukka danddayikke.” Harati qassi koshshiyagaa keenaa shemppanawu woy banttana ufayssiyabaa oottanawukka wodiya demmokkona. Eeniso giyo michchiya hagaadan gaasu: “Taani gidiyagaa keena xiskkanawu metootays. Qammi qammi ta bollotiyo maaddanawu darotoo naaꞌꞌu naaꞌꞌu saate dummatettan denddays. Qassi ta keettaawaynne taani shemppanawu daro layttawu harasaa bi erokko.” Amaridaageeti bantta siiqiyogeeta ubbatoo maaddana koshshiyo gishshawu, eti bantta laggetuura wodiya aattanawu woy Yihoowa haggaazuwan issi aawatettan oottana danddayokkona. Hegaappe denddidaagan, bantta hanotay muleera laamettido gishshawu, eti azzanana danddayoosona.

7. Siiqiyo ura maaddiya amaridaageeti banttana mooranchchadan xeelliyoy woy keehi azzaniyoy aybissee?

⁷ Siiqiyo ura maaddiyogee neeni nena mooranchchadan xeellanaadan woy keehi azzananaadan oottana danddayees. Jessikko giyo michchiya hagaadan gaasu: “Taani ta aawaa maaddanawu darobaa oottana koshshiyabadan qoppays; qassi guuttaa shemppa ekkiyo wodekka ta xalaalaa siiqiyabadan tawu siyettees.” Siiqiyo ura maaddiya issoti issoti bantta hanotan yiillotiyo gishshawu banttana mooranchchadan xeelloosona. Harati qassi bantta siiqiyo ura koshshiyagaa keenaa maaddaydda deꞌikke giidi unꞌꞌettoosona. Amaridaageeti hanqqettido wode maaddiyo ura bolli qohiyabaa haasayido gishshawu banttana mooranchchadan xeelloosona. (Yaq. 3:2) Issoti issoti qassi eti siiqiyo urawu harggee goobi goobi biyogaa beꞌiyo wode keehi azzanoosona. Barbbaro giyo michchiya hagaadan gaasu: “Ta siiqiyo uri ubba galla sahettiyogaa beꞌiyogee tawu keehi deexxees.”

8. Siiqiyo ura maaddiyageeta harati galatiyo wode etawu aybi siyettii?

⁸ Siiqiyo ura maaddiyo wode eti nena galatennabadan neeyyo siyettana danddayees. Aybissi? Neeni minna oottiyonne aggabayidobatuyyo galatiyay woy nashshiyay ubba asaa gidenna gishshataassa. Ne oottido ubbabaa gishshawu issi uri nena galatikko, hegee nena keehi ufayssana danddayees. (1 Tas. 5:18) Meliso giyo michchiya hagaadan gaasu: “Taani keehi daafurido woy hidootaa qanxxido gishshawu issi issitoo yeekkaas. Shin taani maaddiyo asati, ‘Ne oottido ubbabaa gishshawu nena galatays’ giyo wode taani keehi ufayttays! Eti yootiyo he qofay taayyo wolqqaa immeesinne taani eta ubbatoo maaddanaadan tana denttettees.” Amadu giyo ishay ba keettaayeera issippe gididi, keehi sahettiya I michchee naꞌiyo maaddees. Naꞌiya eta galatido wode I bawu siyettidabaa hagaadan giis: “Naꞌiya nu O maaddanawu ay keenaa daafuriyakko loytta akeekennan aggana danddayawusu. Shin A nuna galatiyo wode woy ‘taani inttena siiqays’ gaada xaafiyo wode nuuni keehi ufayttoos.”

UBBATOO WAANA UFAYTTANA DANDDAYAY?

9. Siiqiyo ura maaddiyageeti oottana danddayiyobaanne danddayennabaa shaakki eranawu waatana bessii?

⁹ Ne oottana danddayiyobatanne danddayennabata akeeka. (Lee. 11:2) Koyido ubbabaa oottana danddayiya uri baa. Yaaniyo gishshawu, ne oottana danddayiyobatanne danddayennabata xeelliyagan kuuyana koshshees. Qassi issi issitoo chii gaana bessees! Hegaadan giido gishshawu ne azzanana koshshenna. Hegee neeni oottana danddayiyobatanne danddayennabata shaakkada eriyogaa bessees. Qassi harati nena maaddanawu koyikko eta maaduwa ufayttada ekka. Jaaya giyo ishay hagaadan giis: “Nuuni nuussi deꞌiya wodiyappenne wolqqaappe bolla gididabaa oottana danddayokko. Hegaa akeekiyogee nuuni ubbatoo ufayttanaadan maaddees.”

10. Neeni siiqiyo ura maaddiyo wode, ay akeekana koshshii? (Leemiso 17:27)

¹⁰ Akeekanchcha gida. (Leemiso 17:27 nabbaba.) Neeni akeekanchcha gidikko, yiilloyiyabay merettiyo wode woppu gaana danddayaasa. Akeekanchcha uri issi asi issibaa oottido gaasuwa akeekanawu malees. Issi issi wolqqaama harggeti issi uri bessennabaa hananaadan oottana danddayiyogee qoncce. (Era. 7:7) Leemisuwawu, kase kehanne loꞌꞌo gidida asi nenaara palamettiyogaa woy ooyettiyogaa doommana danddayees. Woy I amassaliyogaa woykko keehi hanqqettiyogaa doommana danddayees. Caddi oyqqiya harggiya sahettiya ura ne maaddiyaba gidikko, A harggiyabaa loytta eriyogee nena maaddana danddayees. Neeni A harggiyabaa akeekiyogee he uri iitabaa haasayiyoy woy oottiyoy dosidi gidennan, harggiya gaasuwana gidiyogaa akeekanaadan maaddees.—Lee. 14:29.

11. Siiqiyo ura maaddiyageeti galla galla wodiya bazzana bessiyo keehi koshshiyabati awugeetee? (Mazamure 132:4, 5)

¹¹ Yihoowara dabbotaa minttanawu wodiya bazza. Keehi koshshennabawu guutta wodiya bazziyogan ‘keehi koshshiyabawu’ gidiya wodiya demmana danddayaasa. (Plp. 1:10) He keehi koshshiyabatuppe issoy Yihoowara dabbotido dabbotaa minttiyogaa. Kawuwa Daawiti ba deꞌuwan Yihoowa goynuwa kaseyiis. (Mazamure 132:4, 5 nabbaba.) Hegaadan, neenikka ubba galla Geeshsha Maxaafaa nabbabiyogaanne woossiyogaa kaseyiyogee keehi koshshiyaba. Eelisho giyo michchiya hagaadan gaasu: “Taani Yihoowa woossiyo wode, mazamure maxaafaappe amaridaagaa nabbabiyo wodenne nabbabido minttettiya qofata loytta qoppiyo wode woppu gaysinne ubbatoo ufayttays. Tana keehi maaddiyabaappe issoy Yihoowa woossiyogaa. Taani woppu gaanaadan Yihoowi tana maaddana mala gallassaa giddon darotoo A woossays.”

12. Siiqiyo ura maaddiyageeti bantta payyatettaa naaganawu wodiya bazzana koshshiyoy aybissee?

¹² Ne payyatettaa naaganawu wodiya bazza. Bollawu maaddiya qumaa shammanawunne kattanawu neeyyo gidiya wodee deꞌennan aggana danddayees. Shin bollawu maaddiya qumaa miyogeenne ubbatoo ispporttiya oottiyogee ne guuggeenne bollay payya gididi deꞌanaadan keehi maaddees. Yaaniyo gishshawu, neeyyo daro wodee deꞌennaba gidikkonne, bollawu maaddiya qumaa maanawunne ubbatoo ispporttiya oottanawu wodiya bazziyogee keehi koshshiyaba. (Efi. 5:15, 16) Hegaa bollikka, gidiyagaa keenaa xiskkanawu baaxeta. (Era. 4:6) Guuggiyabaa xannaꞌiya eranchchati nu guuggee bana barkka ooraxissanaadan xiskkoy keehi maaddiyogaa yootoosona. Payyatettaabaa yootiya issi xuufee issi uri gidiyagaa keenaa xiskkikko, darin unꞌꞌettennaagaanne metiya hanotatunkka woppu gaana danddayiyogaa qonccissees. Neeni allaxxanawukka wodiya bazzana koshshees. (Era. 8:15) Siiqiyo ura maaddiya issi michchiya ubbatoo ufayttanaadan bana maaddidabaa qonccissaasu. A hagaadan gaasu: “Carkkuwa hanotay loꞌꞌo gidiyo wode kare kiyada awaa hoꞌꞌays. Baa giishshin aginan issitoo ta laggetuura ufayssiyabaa oottanawu wodiya bazzays.”

13. Miicciyogee loꞌꞌo gidiyoy aybissee? (Leemiso 17:22)

¹³ Nena miichchiyabata koya. (Leemiso 17:22 nabbaba; Era. 3:1, 4) Miicciyogee ne guuggiyawunne ne bollaa payyatettawu keehi loꞌꞌo. Siiqiyo ura ne maaddiyo wode darotoo ne qoppabeennabay hanana danddayees. Shin hegaa mala wodiyan neeni miicciyaba gidikko, darin yiillotennan aggana danddayaasa. Qassi neeni maaddiyo uraara issippe miicciyogee intte issoy issuwara keehi siiqettanaadan oottana danddayees.

14. Neeyyo siyettiyabaa ne loꞌꞌo laggiyawu yootiyogee nena waati maaddana danddayii?

¹⁴ Neeyyo siyettiyabaa loꞌꞌo laggiyawu yoota. Ufayttanawu neeni neeyyo danddayettida ubbabaa oottikkonne, issi issitoo unꞌꞌissiyabay merettana danddayees. Hegaa mala wodiyan, ne haasayidoban ne bolli pirddenna loꞌꞌo laggiyawu neeyyo siyettiyabaa yootana danddayaasa. (Lee. 17:17) I ne yootiyobaa siyananne nena minttettana; qassi neeni zaarettada ufayttanawu koshshiyabay hegaa xalaala gidana danddayees.—Lee. 12:25.

15. Gannatiyan deꞌana deꞌuwabaa haasayiyogee neeni ufayttanaadan waati oottana danddayii?

¹⁵ Ne siiqiyo uraara Gannatiyan oottanabaa qoppa. Ne siiqiyo ura maaddiyogee guutta wodiyassa gidiyogaa hassaya; qassi Yihoowi asaa medhdhidoy hegaa mala ooso oottanaassa gidenna. (2 Qor. 4:16-18) “Tumu deꞌuwa” sinttappe deꞌana. (1 Xim. 6:19) Siiqiyo uraara Gannatiyan issippe oottanabaa haasayiyogee intte naaꞌꞌaykka keehi ufayttanaadan oottana danddayees. (Isi. 33:24; 65:21) Heezero giyo michchiya hagaadan gaasu: “Taani maaddiyo urawu nuuni sinttappe issi issibata issippe sikkanaagaa, issippe woxxanaagaanne issippe bishkkiliitiya laagganaagaa darotoo yootays. Hayquwappe denddida nu siiqiyogeetussi daabbuwa uukkananne malꞌꞌiya qumaakka kattana. Qassi nu hidootaa gishshawu Yihoowa issippe galatana.”

HARATI NENA WAATI MAADDANA DANDDAYIYONAA?

16. Nu galchchan deꞌiya siiqiyo ura maaddiyageetuura waani hashetana danddayiyoo? (Misiliyakka xeella.)

¹⁶ Eti koshshiyagaadan shemppanawu wodiya demmana mala maadda. Galchchan deꞌiyageeti siiqiyo ura maaddiyageetuura hashetana danddayoosona. (Gal. 6:2) Hegee siiqiyo ura maaddiyageeti guuttaa shemppanawu woy bantta koyiyobaa oottanawu wodiya demmanaadan maaddees. Issi issi ishatinne michchoti saaminttan saaminttan eta maaddanawu halchchuwa kessidosona. Heemettana danddayenna ba azinaa maaddiya Nataliyo giyo michchiya hagaadan gaasu: “Nu galchchan deꞌiya issi ishay saaminttan issitoo woy naaꞌꞌutoo yiidi ta azinaara wodiya aattees. Eti issippe haggaazoosona, issippe haasayoosona; ubba qassi biidotakka issippe beꞌoosona. Ta azinay ba laggiyara aattiyo he wodiyan keehi ufayttees; qassi taanikka shemppanawu woy kare kiyada heemettiyogaa mala ta dosiyo issi issibata oottanawu wodiya demmays.” Galchchan deꞌiya amaridaageeti hegaa mala ura maaddiiddi aqana danddayoosona; yaatiyogee A maaddiya uri loytti xiskkanawu wodiya demmanaadan oottees.

17. Galchchaa shiiqotu wode siiqiyo ura maaddiyageetuura nu waani hashetana danddayiyoo?

¹⁷ Galchchaa shiiqotu wode eta maadda. Eti bantta siiqiyogeeta maaddanawu darobaa oottiyo gishshawu, galchchaa shiiqotun, woradaa shiiqotuninne killiliya shiiqotun tamaariyobaa loytti ezggana danddayokkona. Galchchan deꞌiyageeti cimida woy sahettiya uraara kumetta shiiquwa woy amarida shiiquwa shaahota issippe uttiyogan eta maaddana danddayoosona. Hegaa mala uri sooppe kiyana danddayennaba gidikko, A maaddiya uri shiiquwa baanaadan neeni eta soo baada silkkiyan woy Intternneetiyan aara shiiquwa kaallana danddayaasa.

18. Siiqiyo ura maaddiyageetuyyo harabaa ay oottana danddayiyoo?

¹⁸ Eta minttettanne etawu woossa. Cimati eta minttettanawu ubbatoo wodiya bazzana koshshees. (Lee. 27:23) Qassi nu hanotay ayba gidinkka, nuuni ubbay eta siiqiyogaanne eti oottiyobaa nashshiyogaa ubbatoo yootana danddayoos. Hegaa bollikka, Yihoowi eta minttettanaadaaninne eti ubbatoo ufayttanaadan maaddana mala woossana danddayoos.—2 Qor. 1:11.

19. Nuuni sinttappe yeemuwan naagiyobay aybee?

¹⁹ Yihoowi nuuni waayettanaadaaninne azzananaadan oottiya ubbabaa matan xayssana. Hegaappe simmin harggeenne hayqoy deꞌenna. (Ajj. 21:3, 4) “Wobbeti genessadan guppana.” (Isi. 35:5, 6) He wode cimatettaa gaasuwan yiya metooti xayana, qassi cimidaageeta woy sahettidaageeta maaddiyogee attana. “Kasebai ubbai hassayettennanne qofettenna.” (Isi. 65:17) He malaalissiya hidootati polettana gakkanaashin ha wodiyankka Yihoowi nuna ubbatoo maaddanaagaa ammanettoos. Yihoowi nuussi wolqqaa immanaagaa nu ubbatoo ammanettikko, nuuni “ubbaban danddayiiddinne ufayttiiddi genccana mala” I nuna maaddana.—Qol. 1:11.