Naaqoy Gakkiyo Maccaasaa Maaddiyabaa

Yaatiyo gishshawu, jw.org saytiyan “Maccaasaa Qohuwappe Naagiyogaa—Geeshsha Maxaafay Yootiyobaa” giya huuphe yohuwan ha qofay doomettan deꞌees. He huuphe yohuwa wurssettan deꞌiya linkkiya bochchada hegaa attamana, qassi oyddusan qalamꞌꞌada trakttedan giigissana danddayaasa. Amarkkan deꞌiya Istteso giyo michchiya hagaadan gaasu: “Taani he huuphe yohuwa attamaas; qassi yaatada hegaa issi michcheera ta galchchaa haggaazo moottan qohettida maccaasaa maaddiya eqotaakko ekkada baas.”

Hegan oottiyara yan deꞌiya haratussi immanawu attamettidaagee haray deꞌiyakkonne O oychchaasu. Yaaniyo gishshawu, eti he attamettida hara 40 trakttetanne jw.org saytiya xomoosanawu maaddiya 30 karddeta immidosona. Zaaretti oychchiyo wode, Yihoowa Markkati Geeshsha Maxaafaa waati xannaꞌissiyakko yan deꞌiya maccaasaa bessanaadan alaafiya koyaasu.

Isttesanne hara naaꞌꞌu michchoti qohettida maccaasaa maaddiya hara eqotaakko bin yan oottiyageeti attamettida ichchashu traktteta ekkidosonanne haraakka ehanaadan oychchidosona. Yan oottiyageetuppe issinniya, “Ha attamettida trakttee hagan deꞌiya maccaasaa maaddana” yaagaasu. Qassi A gujjada, “Nuussi hagee koshshees” yaagaasu. He michchoti zaarettidi biido wode, yan deꞌiya maccaageetuppe amaridaageeti Geeshsha Maxaafaa waati xannaꞌiyakko beꞌanawu koyidosona; qassi etappe naaꞌꞌati Shiiquwa Addaraashan shiiqiyo saaminttaa wurssetta shiiquwa yaanawu koyiyogaa yootidosona.

Isttesa hagaadan gaasu: “Ha ufayssiya huuphe yohuwa asay nabbabanawu keehi koyiyogaa beꞌidi nuuni malaalettida. Hegaa attamidi oyddusan qalamꞌꞌidi giigissiyogee naaqettida maccaasatussi Xoossaa Kawotettaabaa yootiyo loꞌꞌo oge. Ha huuphe yohuwa nabbabidi asay keehi ufayttiyogaa beꞌidi nuuni malaalettida, qassi ha maccaasatussi mishiraachchuwa aggennan yootiyo wode Yihoowi nuna maaddanaagaa akeekidi keehi ufayttida.”