Dugang nga Mangalimbasog ha Aton Ministeryo
1 Hi apostol Pablo nagsagdon ha mga Kristiano nga maglakat ha dalan han Dios ngan mangalimbasog gud ha pagbuhat hito. (1 Tes. 4:1, NW) Ano an iginpapasabot hini para ha aton? An usa hini amo an aton padayon nga pagpamiling hin mga paagi para han dugang nga espirituwal nga buruhaton, nga nangangalimbasog pirme ha ‘pagtuman han aton pagkaministro.’—2 Tim. 4:5.
2 Motibo: An pagpangalimbasog para ha aton ministeryo ginpapagios han aton hingyap para ha dugang nga pag-alagad ha aton Maglalarang ha ngatanan nga bahin. Karuyag naton magtubo ha espirituwal ngan mamiling hin mga paagi nga mapauswag an aton ministeryo. An maopay nga rutina ngan husto nga motibo makakabulig ha aton nga magkaada teokratiko nga mga tumong.—Sal. 1:1, 2; Fil. 4:6; Heb. 10:24, 25.
3 Basi mapauswag an aton ministeryo, kinahanglan kultibaron naton an pagkamahinatagon ngan pagsakripisyo. Makukultibar ito pinaagi han mainampoon nga pagpamalandong ha maopay nga susbaranan ni Jesus. (Mat. 20:28) Nalipay gud hiya ha pagserbisyo ha iba durante han iya ministeryo. (Buh. 20:35) Masusubad naton hiya pinaagi ha pagpakita hin personal nga interes ha mga tawo ngan pagin andam ha mga higayon ha aton ministeryo.—Isa. 6:8.
4 Bahin han mga Kag-anak: An hingyap ha pagserbisyo ha iba ngan pagpauswag han aton ministeryo maipapasilsil ha kabataan ha temprano nga pangidaron. Maoobserbahan han kabataan an pagkamaduruto han ira mga kapamilya ngan an aktibo nga pakigbahin ha pagpauswag han ira ministeryo. Han bata pa an usa nga bugto, naaghat hiya nga dugang nga mangalimbasog tungod ha pagbuhat kaupod han iya apoy ha mga buruhaton ha kongregasyon. An pagkita han pagkamaduruto ngan kalipay han iya apoy nakaaghat ha iya nga mamiling hin higayon basi makagserbe ha iya kabugtoan. Ministeryal na hiya yana.
5 Panginahanglan hin Kabugtoan nga Kalalakin-an: “Kon an tawo magbiling [“mangalimbasog,” NW] . . . , maopay nga buhat an iya ginbibiling.” (1 Tim. 3:1) Nag-aaghat ini ha kabugtoan nga kalalakin-an nga mangalimbasog basi magin kwalipikado para ha dugang nga pribilehiyo ha organisasyon ni Jehova. Diri ito nagkikinahanglan hin espesyal nga abilidad. An bugto nga dugang nga nangangalimbasog para ha ministeryo an mamimiling anay han Ginhadian, ngan madasigon nga makikigbahin ha ministeryo. (Mat. 6:33; 2 Tim. 4:5) Mangangalimbasog hiya nga magin susbaranan ha iba.
6 Bug-os-Kalibotan: Gin-aapura ni Jehova an pagtirok. (Isa. 60:22) Importante para ha ngatanan nga nagsusubad kan Jesus nga mas mangalimbasog gud ha ira ministeryo. An report ha bug-os nga kalibotan para han 2006 nga tuig han pag-alagad nagpapakita nga 248,327 an nabawtismohan. Nangangahulogan ito nga ha aberids may sobra 680 nga bag-ohan kada adlaw! Hinaot magpadayon kita ngatanan ha pagpamiling hin mga paagi basi mas mapauswag pa gud an aton ministeryo.