Batan-on nga Kabugtoan nga Kalalakin-an, Nangangalimbasog ba Kamo?
1. San-o sadang tikangan han batan-on nga bugto nga lalaki an pag-aplikar han 1 Timoteo 3:1?
1 “Kon an bisan hin-o nga lalaki nagtatalinguha pagkab-ot hin pribilehiyo . . . maopay nga buhat an iya gintitinguha.” (1 Tim. 3:1) Iton giniyahan nga mga pulong nag-aaghat ha kabugtoan nga kalalakin-an nga mangalimbasog basi magin kwalipikado para hin pribilehiyo ha kongregasyon. Kinahanglan ba magin adulto ka anay antes ito buhaton? Diri. Ha pagkamatuod, maopay an pagtikang ha pagbuhat hito samtang batan-on ka pa. Hini nga paagi, makakakarawat ka hin pagbansay ngan maipapakita mo nga kwalipikado ka ha pagin ministeryal pag-abot han panahon. (1 Tim. 3:10) Kon bawtismado ka nga batan-on nga lalaki, ano an imo sadang himoon basi makakab-ot hin pribilehiyo?
2. Paonan-o makukultibar ngan maipapakita an espiritu han pagsakripisyo?
2 Pagsakripisyo: Hinumdumi nga nangangalimbasog ka para hin maopay nga buhat, diri para hin katungdanan. Salit, kultibara an hingyap ha pagbulig ha kabugtoan. Usa nga paagi ha pagbuhat hini amo an pagpamalandong han susbaranan ni Jesus. (Mat. 20:28; Juan 4:6, 7; 13:4, 5) Hangyoa hi Jehova nga buligan ka nga magkaada interes ha iba. (1 Cor. 10:24) Mahimo ka ba maghatag hin praktikal nga bulig ha kabugtoan nga lagas na o may sakit? Nagbuboluntaryo ka ba ha pagdalos, pag-mop han salog, o ha iba nga buruhaton ha pagmintinar han Kingdom Hall? Puydi ka ba sumaliwan ha paghatag hin bahin ha Teokratiko nga Eskwelahan ha Ministeryo, bisan kon waray abanse nga pahibaro? Kon oo, makikita mo nga an pagsakripisyo nagbubunga hin kalipay.—Buh. 20:35.
3. Mationan-o kaimportante an marig-on nga espirituwalidad, ngan paonan-o ito makukultibar?
3 Espirituwalidad: Mas importante ha surugoon ha kongregasyon an marig-on nga espirituwalidad kay ha talento o abilidad. An espirituwal nga tawo nangangalimbasog ha pagkaada panhunahuna nga pariho han kan Jehova ngan kan Jesus. (1 Cor. 2:15, 16) Iginpapakita niya “an bunga han espiritu.” (Gal. 5:22, 23) Madasigon hiya nga ebanghelisador ngan gin-uuna an intereses han Ginhadian. (Mat. 6:33) Mahimo mo liwat makultibar an diosnon nga mga kalidad pinaagi han maopay nga rutina han personal nga pag-aram. Upod hini an pagbasa han Biblia kada adlaw, pagbasa han tagsa nga gowa han An Barantayan ngan Pagpamata!, ngan an pagpangandam ngan pagtambong ha mga katirok. (Sal. 1:1, 2; Heb. 10:24, 25) Han gindasig ni Pablo hi Timoteo nga mag-uswag ha espirituwal, hiya nagsurat: “Pirme tagi hin atensyon . . . an imo pagtutdo.” (1 Tim. 4:15, 16) Salit pangandami hin maopay an imo mga bahin ha Teokratiko nga Eskwelahan ha Ministeryo. Pag-andam para ha ministeryo, ngan regular nga makigbahin hito. Magkaada espirituwal nga tumong sugad han pagpayunir, pag-alagad ha Bethel, o pag-eskwela ha Bible School for Single Brothers, ngan pangalimbasugi nga makab-ot ito. An marig-on nga espirituwalidad mabulig ha imo nga ‘makalikay ha mga hingyap han pagkabatan-on.’—2 Tim. 2:22.
4. Ano an bili han pagin masasarigan ngan pagin matinumanon?
4 Pagin Masasarigan Ngan Pagin Matinumanon: An kabugtoan nga kalalakin-an nga gintokahan ha panhatag hin pagkaon ha pobre nga mga Kristiano han siyahan nga siglo may “maopay nga reputasyon,” tungod hito kilala hira ha pagin masasarigan ngan pagin matinumanon, salit sigurado an mga apostol nga ira tutumanon an ira toka. Tungod hini, nakagpokus an mga apostol ha iba nga importante nga butang. (Buh. 6:1-4) Salit kon gintatagan ka hin toka, himoa an pinakamaopay ha pagtuman hito. Subara hi Noe nga ginsunod gud an mga instruksyon ha paghimo han arka. (Gen. 6:22) Oo, an pagkamatinumanon ginpapabilhan ni Jehova ngan nagpapakita ito hin pagin hamtong ha espirituwal.—1 Cor. 4:2; kitaa an kahon nga “An mga Kapulsanan ha Pagbansay.”
5. Kay ano nga sadang magkab-ot hin pribilehiyo an batan-on nga kabugtoan nga kalalakin-an?
5 Sugad han igintagna, ginpapadagmit ni Jehova an pag-ani. (Isa. 60:22) Ha aberids, 250,000 an nababawtismohan kada tuig. Tungod kay damu nga bag-ohan an nakarawat han kamatuoran, ginkikinahanglan an kwalipikado nga kalalakin-an ha pag-ataman han mga responsabilidad ha kongregasyon. Yana kay ha bisan kakan-o pa man, damu an buruhaton ha pag-alagad kan Jehova. (1 Cor. 15:58) Batan-on nga kabugtoan nga kalalakin-an, nangangalimbasog ba kamo pagkab-ot hin pribilehiyo? Kon oo, naghihingyap kamo hin maopay gud nga buhat!
[Blurb ha pahina 2]
Tungod kay damu nga bag-ohan an nakarawat han kamatuoran, ginkikinahanglan an kwalipikado nga kalalakin-an ha pag-ataman han mga responsabilidad ha kongregasyon
[Kahon ha pahina 3]
An mga Kapulsanan ha Pagbansay
An kwalipikado nga batan-on nga kalalakin-an nagpapahimulos kon gintatagan hira hin toka ngan ginbabansay han mga tigurang. Pananglitan, samtang nakadto ha entablado an usa nga paramangno han sirkito ngan may gindadasig nga magwarali, usa nga batan-on nga lalaki an nagtitinukdaw ha hirani. Ginpakianhan ito han paramangno han sirkito kon may tuyo ito ha iya. Binaton ito nga magba-vacuum la hiya han entablado kay ito an iya toka kada katatapos han katirok. Tiuli na an iya mga kag-anak, pero diri niya karuyag umuli nga diri natutuman an iya toka. Malipayon nga binalhin hin pwesto an paramangno han sirkito. Hiya nagsiring: “Pirme gintatagan hin toka han mga tigurang hito nga kongregasyon an kwalipikado nga batan-on nga kalalakin-an ha ira kongregasyon basi mabansay. Sugad nga resulta, may iginrirekomendar hira nga batan-on ha pagin ministeryal ha pagbibisita ko ha ira kongregasyon.”