Te ʼu Gaue ʼa Te Kau Apositolo

2 ʼI te ʼAho Lahi ʼo Te Penikosite,+ neʼe natou fakatahitahi fuli ʼi te koga meʼa pe ʼe tahi. 2 Fokifa pe neʼe natou logo ki he logoaʼa neʼe haʼu mai te lagi, neʼe hage ko he tuʼani matagi. Neʼe logo ʼi te ʼapi katoa ʼae neʼe natou nonofo ai.+ 3 Pea neʼe natou sisio ki he ʼu ʼalelo neʼe hage ko he ʼu uloʼi afi, neʼe mavetevete ʼo tahi tuʼu ia natou takitokotahi. 4 Neʼe natou fonu fuli ai ʼi te laumalie maʼoniʼoni+ pea natou kamata palalau ai ʼi te ʼu lea kehekehe, ʼo mulimuli pe ki tona fakafealagia age e te laumalie ke natou palalau.+

5 ʼI te temi ʼaia, neʼe nonofo ʼi Selusalemi ia te kau Sutea neʼe tauhi lotu lelei neʼe ʼomai mai te ʼu fenua fuli ʼo te kele.+ 6 Pea ʼi te logo ʼa te hahaʼi tokolahi ki te logoaʼa ʼaia, neʼe natou fakatahitahi mo punamaʼuli, koteʼuhi neʼe natou tahi logo ki te palalauʼi ʼo ʼanatou lea totonu. 7 Koia, neʼe natou punamaʼuli ai ʼo natou ui: “Ko natou fuli ʼaeni ʼe palalau, ʼe mole koa la ko he kau Kalilea?+ 8 Kae he koʼe ʼe tou tahi logo ki tana lea totonu?* 9 ʼE ʼi ai ʼi heni te kau Paleta, mo te kau Metia,+ mo te kau Elame,+ pea mo te hahaʼi ʼo Mesopotamia, mo Sutea, mo Kapatosia, mo Ponito pea mo te potu fenua ʼo Asia,+ 10 mo Filisia, mo Pafilia, mo Esipito pea mo te ʼu koga fenua ʼo Lipi ʼae ʼe ovi ki Silene, mo te hahaʼi folau mai Loma, neʼe kau ai te kau Sutea mo te kau poloselite,*+ 11 mo te kau Kelete pea mo te kau Alape. ʼE matou logo ki tanatou palalau ʼi ʼamatou lea ʼo ʼuhiga mo te ʼu gaue taulekaleka ʼa te ʼAtua.” 12 ʼEi, neʼe natou punamaʼuli fuli pea mo feuiʼaki: “Kotea koa te fakaʼuhiga ʼo te aluʼaga ʼaeni?” 13 Kae neʼe vaʼi natou e ʼihi ʼo natou ui: “Neʼe lahi fau tanatou inu vino.”

14 Kae neʼe tuʼu ake ia Petelo mo te toko Hogofulu-ma-tahi+ pea neʼe palalau leʼo lahi kia natou: “ ʼU tagata ʼo Sutea pea mo koutou fuli, hahaʼi ʼo Selusalemi, ke kotou iloʼi te faʼahi ʼaeni pea kotou fagono fakalelei ki ʼaku palalau. 15 ʼE mole konana te hahaʼi ʼaeni, ohage ko takotou manatu, koteʼuhi ʼe ko te hola hiva uhu* pe ʼaeni. 16 Kae ʼe ko te faʼahi ʼaeni neʼe fakaha e te polofeta ko Soele: 17 “Neʼe ui e te ʼAtua: ‘Pea ʼi te ʼu ʼaho fakamuli, ʼe au foaki anai toku laumalie ki te faʼahiga hahaʼi fuli, pea ʼe faifakakikite anai ʼokotou foha pea mo ʼokotou ʼofafine, pea ʼe sisio anai ʼakotou kau tupulaga ki he ʼu meʼa ʼe ha kia natou, pea ʼe fai anai e ʼakotou matuʼa ni moemisi.+ 18 ʼI te temi ʼaia, ʼe au toe foaki anai toku laumalie ki ʼaku tagata mo fafine kaugana, pea ʼe natou faifakakikite anai.+ 19 Pea ʼe au fai anai ni meʼa fakaofoofo* ʼi ʼoluga ʼi te lagi pea mo he ʼu fakailoga ʼi te kele ʼi lalo nei. ʼE ʼi ai anai he toto, mo he afi pea mo he kohu. 20 ʼE liliu anai te laʼa ʼo fakapoʼuli pea mo te mahina ʼo toto ʼi muʼa ʼo te hoko mai ʼo te ʼaho lahi mo fakakololia ʼo Sehova.* 21 ʼE haofaki anai ia natou fuli ʼae ʼe fetapa ki te huafa ʼo Sehova.” ’*+

22 “ ʼU tagata ʼo Iselaele, kotou fagono ki te ʼu palalau ʼaeni: Neʼe fakahaha e te ʼAtua kia koutou ia Sesu te tagata Nasaleti, ʼaki he ʼu gaue malohi mo he ʼu meʼa fakaofoofo* pea mo he ʼu milakulo ʼae neʼe fakahoko e te ʼAtua ʼaki ia ia ʼi te lotolotoiga ʼo koutou,+ ohage pe ko takotou iloʼi. 23 Ko te tagata ʼaia, ʼae neʼe tuku ki ʼona fili ʼo mulimuli ki te meʼa ʼae neʼe kua fakatuʼutuʼu pea mo iloʼi fakatomuʼa e te ʼAtua,+ neʼe kotou haʼi ia ia ki he pou ʼo kotou fakaʼaogaʼi he ʼu tagata agakovi, pea neʼe kotou matehi ia ia.+ 24 Kae neʼe fakatuʼuake ia ia e te ʼAtua,+ ʼo ina fakaʼateainaʼi mai te ʼu haʼi* ʼo te mate, koteʼuhi neʼe mole feala ke taʼofi ia ia e te mate.+ 25 He ʼe ui e Tavite ʼo ʼuhiga mo ia: ‘ ʼE au tuku tuʼumaʼu pe ia Sehova* ki muʼa, he ʼe nofo ʼi toku faʼahi mataʼu ke ʼaua naʼa au tukia ʼi he temi. 26 ʼUhi ko te faʼahi ʼaia, neʼe liliu ai toku loto ʼo fiafia pea mo au palalau ʼaki he fiafia lahi. Pea ʼe au nofo anai* ʼi te ʼamanaki, 27 koteʼuhi ʼe mole ke tuku anai au* ʼi te Faitoka,* pea ʼe mole ke fakagafua anai ke pala te sino ʼo tau tagata agatonu.+ 28 Neʼe ke fakaha mai te ala ʼo te maʼuli pea ʼe ke fakafonu anai au ʼaki te fiafia lahi ʼi ʼou tafa.’+

29 “ ʼU tagata mo tehina, kotou fakagafua mai ke au palalau fakahagatonu atu ʼo ʼuhiga mo te pule famili ko Tavite, kua mate pea mo ʼavaifo,+ pea ʼe kei tuʼu nei tona fale maka ʼi totatou kolo. 30 Mai tona ʼuhiga ʼae neʼe ko he polofeta pea neʼe ina iloʼi neʼe fakapapauʼi age e te ʼAtua, ʼe ʼafio anai he tahi ʼo tona hakoga ʼi tona hekaʼaga fakahau,+ 31 koia neʼe sio fakatomuʼa pea neʼe palalau ʼo ʼuhiga mo te fakatuʼuake ʼo Kilisito,* ʼi tana ui ʼae ʼe mole tuku ʼi te Faitoka* pea ʼe mole pala tona sino.+ 32 Neʼe fakatuʼuake e te ʼAtua ia Sesu, pea ʼe matou fakamoʼoni fuli ki ai.+ 33 Koia, ʼi tona hiki ake ki te toʼomataʼu ʼo te ʼAtua+ pea mo maʼu mai te Tamai te laumalie maʼoniʼoni ʼae neʼe fakapapauʼi age,+ neʼe ina foaki ai te meʼa ʼaeni ʼe kotou sisio mo logo ki ai. 34 He neʼe mole hake ia Tavite ki selo, kae neʼe ina ui: ‘Neʼe ui e Sehova* ki toku ʼAliki: “Heka ʼi toku toʼomataʼu 35 ʼo kaku ki taku tuku ʼou fili ki ʼou lalo vaʼe.” ’+ 36 Koia, ke iloʼi papau e te puleʼaga katoa ʼo Iselaele kua fakanofo e te ʼAtua ke ʼAliki+ pea mo Kilisito, ia Sesu ʼae neʼe kotou tutuki ki te pou.”+

37 ʼI tanatou logo ki te ʼu palalau ʼaia, neʼe malave ʼaupito ki ʼonatou loto, pea natou ui kia Petelo mo te tahi ʼu apositolo: “ ʼU tagata mo tehina, kotea ʼae ʼe tonu ke matou fai?” 38 Neʼe ui e Petelo kia natou: “Kotou fakahemala+ mo kotou tahi papitema+ ʼi te huafa ʼo Sesu Kilisito ke fakamolemole ai ʼakotou agahala,+ pea ʼe kotou maʼu noa anai te meʼa ʼofa ʼo te laumalie maʼoniʼoni. 39 Koteʼuhi neʼe fai te fakapapau ʼaia+ kia koutou mo ʼakotou fanau pea kia natou fuli ʼae ʼe nonofo mamaʼo, ia natou fuli ʼae ʼe pauʼi mai e Sehova* totatou ʼAtua kia te ia.”+ 40 Pea neʼe hoko atu tana palalau ʼo faifakamafola fakamalotoloto pea mo ina fakalotomalohiʼi natou: “Ke haofaki koutou mai te taʼiake aga fakapikopiko ʼaeni.”+ 41 Koia, ko natou ʼae neʼe natou tali fakafiafia ʼana palalau, neʼe natou papitema+ pea ʼi te ʼaho ʼaia, ko te teitei toko 3 000 hahaʼi* neʼe liliu ko ni tisipulo.+ 42 Pea neʼe hoko atu tanatou tokakaga tafito ki te faiakonaki ʼa te kau apositolo, mo natou fakatahitahi,* mo kakai fakatahi+ pea mo faikole tuʼumaʼu.+

43 Neʼe natou* manavasiʼi fuli pea neʼe lahi ia te ʼu meʼa fakaofoofo* mo te ʼu milakulo neʼe fakahoko e te kau apositolo.+ 44 Ko te kau tisipulo foʼou fuli ʼaia neʼe natou fakatahitahi pea mo natou fevaevaeʼaki te ʼu meʼa fuli ʼae neʼe natou maʼu, 45 pea neʼe natou fakatau ʼonatou kele mo ʼonatou koloa fuli,+ pea neʼe natou tufa leva te falā, ʼo mulimuli ki te meʼa ʼae neʼe ʼaoga kia natou takitokotahi.+ 46 Pea ʼi te ʼaho fuli neʼe natou fakatahitahi ʼi te fale lotu, neʼe natou manatu tahi. Pea neʼe natou kakai ʼi he ʼu loto fale kehekehe pea mo natou fevaevaeʼaki ʼanatou meʼa kai ʼaki he fiafia lahi mo he loto ʼe lelei, 47 ʼo natou fakavikiviki ki te ʼAtua, pea neʼe tali leleiʼi natou e te hahaʼi fuli. ʼI te ʼaho fuli neʼe haofaki e Sehova* te hahaʼi pea neʼe natou liliu ko ni tisipulo.+