Senesi

19 Neʼe tau leva te ʼu ʼaselo ʼe lua ki Sotoma ʼi te afiafi, kae neʼe heka ia Lote ʼi te matapa ʼo Sotoma. ʼI te sio ʼa Lote kia naua, neʼe tuʼu ake ai ʼo alu ʼo fakafelaveʼi kia naua pea neʼe punou mo tulolo ki te kele.+ 2 Pea neʼe ina ui age: “Siʼoku ʼu ʼaliki, fakalelei ʼokolua loto, kae kolua afe age muʼa ki te ʼapi ʼo takolua tagata faifekau, ʼo momoe ai mo fufulu ai ʼokolua vaʼe. Pea hoki kolua ʼala uhuuhu leva ʼo hoko atu tokolua fagona.” Neʼe nā tali age ki ai: “Kailoa, ʼe ma momoe anai ʼi te malaʼe lahi ʼo te kolo.” 3 Kae ʼi tana faiga malohi age ʼaia, neʼe nā olo ai leva mo ia ki tona ʼapi. Neʼe ina teuteuʼi he toe meʼa kai lahi maʼa naua, pea neʼe ina taʼo he ʼu pane hala fakatupu, ʼo nā kakai ai.

4 Neʼe olo age te hahaʼi tagata ʼo te kolo ʼo ʼa takai ia te ʼapi kae neʼe heʼeki nā olo ʼo momoe. Neʼe ko te ʼu tagata fuli ʼo Sotoma mai te tamaliki tagata ʼo kaku ki te kau matuʼa, neʼe ko he toe hahaʼi kaugamalie mo logoaʼa. 5 Pea neʼe natou kalaga kia Lote: “Kofea te ʼu tagata ʼae neʼe hu ki tou ʼapi ʼi te po ʼaeni? ʼAumai naua ki tuʼa, ke matou momoe mo naua.”+

6 Neʼe alu ai leva ia Lote ki tuʼa kia natou, pea neʼe ina pupunu te matapa. 7 Neʼe ina ui age kia natou: “Siʼoku ʼu tehina, fakalelei ʼokotou loto, kae ʼaua naʼa kotou fai he meʼa ʼe kovi. 8 ʼE ʼi ai ʼoku ʼofafine ʼe lua neʼe heʼeki momoe mo ni tagata. Koia, ke au ʼaumai naua kia koutou pea kotou fai kia naua te meʼa ʼae ʼe kotou loto ki ai. ʼAua naʼa kotou fai he meʼa ki te ʼu tagata ʼaeni, koteʼuhi ʼe ko ʼaku fakaafe, koia ʼe tonu ai ke au puipui ia naua.”+ 9 Kae neʼe natou ui age: “Alu kehe!” Pea neʼe natou hoko atu: “Neʼe haʼu te matapule ʼaeni ʼo maʼuli ʼi heni, pea kua ina fia fakamauʼi leva tatou! ʼE kovi age anai te meʼa ʼae ka matou fai kia koe ia naua ʼaia.” Pea neʼe natou leʼei* ia Lote kae natou fakaovi ki te matapa ke natou maumauʼi. 10 Kae neʼe haga te ʼu tagata ʼae neʼe ʼi te loto fale ʼo puke ia Lote, ʼo nā ʼaumai ia ia ki loto, pea neʼe nā pupunu te matapa. 11 Kae neʼe nā fakakiviʼi te ʼu tagata ʼae neʼe ʼi te huʼaga ʼo te ʼapi, mai ia ia ʼae ʼe malalo kia ia ʼae ʼe maʼuhiga, ʼo natou fiu ai te kumi ʼo te huʼaga.

12 Pea neʼe ui leva e te ʼu tagata kia Lote: “ ʼE ʼi ai koa hou tahi ʼu kaiga ʼi heni? Ke ke fakamavae ʼi te koga meʼa ʼaeni te ʼu ʼohoana ʼo ʼou ʼofafine,* ʼo feia mo ʼou foha, mo ʼou ʼofafine, ia natou fuli ʼo tou famili! 13 Koteʼuhi ʼe ma maumauʼi anai te koga meʼa ʼaeni, he ʼe kua logo ia Sehova+ ki te lauga leʼo lahi ʼa te hahaʼi ʼo ʼuhiga mo te kolo ʼaeni. Koia neʼe fekauʼi mai ai maua e Sehova ke ma maumauʼi te kolo.” 14 Neʼe alu ai ia Lote ʼo palalau ki te ʼu tama ʼae neʼe teu ʼohoana mo ʼona ʼofafine, pea neʼe ina ui age: “Kolua tutuʼu ake mo mavae ʼi te koga meʼa ʼaeni, he ʼe fakaʼauha anai e Sehova te kolo!” Kae neʼe hage ia ki te ʼu tama ʼaia ko hana fakahuahua.+

15 ʼI te kua mafoa ʼo te ʼaho, neʼe uga malohi e te ʼu ʼaselo ia Lote, ʼo nā ui age: “Fakavilivili! Toʼo tou ʼohoana mo ʼou ʼofafine ʼe lua ʼae ʼe ʼi heni, naʼa ke mate ʼuhi ko te agahala ʼa te kolo!”+ 16 Kae neʼe fakatuatuai ia. Koia, neʼe toʼo ai e te ʼu tagata tona nima, mo te nima ʼo tona ʼohoana pea mo te ʼu nima ʼo ʼona ʼofafine ʼe lua, koteʼuhi neʼe manavaʼofa ia Sehova kia ia.+ Neʼe nā ʼave ai ia natou ki te tuʼa kolo.+ 17 ʼI tanā ʼosi ʼave ʼaia ia natou ki te tuʼa kolo, neʼe ui e he tahi ia naua kia Lote: “Hola ke ke haofaki ai tou maʼuli!* ʼAua naʼa ke sio ki muli+ pea ʼaua naʼa ke tuʼu ʼi he potu pe ʼo te koga fenua ʼaeni!+ Hola ki te potu moʼugaʼia ke mole ke mate!”

18 Kae neʼe ui age e Lote kia naua: “Sehova, fakalelei siʼou loto, ʼaua naʼa ke fekauʼi au ke au alu ki ai! 19 Neʼe ke manavaʼofa kia au ʼaeni ko tau tagata faifekau, pea neʼe lahi tau agalelei* kia au ʼi tau haofaki toku maʼuli.*+ Kae ʼe mole feala ke au hola ki te potu moʼugaʼia ʼaia he ʼe au mataku naʼa hoko he malaʼia kia au pea mo au mate ai.+ 20 Kae koʼeni ʼe tuʼu ovi mai he kiʼi kolo veliveli, pea ʼe feala haku hola ki ai. Koia, fakalelei siʼou loto, ʼe feala la haku hola ki ai? ʼE ko he kiʼi kolo veliveli pe ia. Pea ʼe au hao anai.” 21 Koia neʼe ina tali age ki ai: “ ʼIo, ʼe au tali tau kole.+ ʼE mole au maumauʼi anai te kolo ʼae neʼe ke talanoa ki ai.+ 22 Fakavilivili! Hola ki ai, he ʼe mole feala ke au fai he meʼa kae ʼe heʼeki ke tau ki ai!”+ Koia neʼe fakahigoaʼi ai te kolo ko Tesoa.*+

23 Neʼe kua hopo ake te laʼa ʼi te fenua ʼi te tau atu ʼa Lote ki Tesoa. 24 Pea neʼe fakato ifo leva e Sehova he ʼua ki Sotoma mo Komola neʼe ko te sulifa mo te afi, ʼei, neʼe haʼu mai ia Sehova, mai te lagi.+ 25 Koia, neʼe ina maumauʼi ai te ʼu kolo ʼaia, ʼei, te koga fenua katoa, ʼo kau ai mo te hahaʼi fuli ʼo te ʼu kolo ʼaia pea mo te ʼu ʼakau ʼo te kele.+ 26 Kae ko te ʼohoana ʼo Lote, ʼae neʼe ina muliʼi ia ia, neʼe sio leva ki muli pea neʼe liliu ko he pou masima.+

27 Neʼe ʼala uhuuhu leva ia Apalahamo pea neʼe alu ki te koga meʼa ʼae neʼe tuʼu ai ʼi muʼa atu ʼo faipalalau mo Sehova.+ 28 ʼI tana sio ki Sotoma mo Komola pea mo te koga fenua katoa, neʼe sio ia ki he meʼa fakamataku. Neʼe alu ake he kohu matolu mai te fenua ohage ko te kohu matolu ʼo he gutuʼumu.+ 29 Koia, ʼi te temi ʼae neʼe maumauʼi ai e te ʼAtua te ʼu kolo ʼo te koga fenua ʼaia, neʼe manatuʼi e te ʼAtua ia Apalahamo, ʼo ina fakamavae ia Lote mai te ʼu kolo ʼaia neʼe ina maumauʼi, te ʼu kolo ʼae neʼe nofo ai ia Lote.+

30 Ki muli age, neʼe mavae ia Lote ʼi Tesoa ʼo alu ʼo nofo ʼi te potu moʼugaʼia mo ʼona ʼofafine ʼe lua,+ he neʼe mataku ia ʼi te nofo ʼi Tesoa.+ Koia, neʼe nofo ai ʼi he ʼana mo ʼona ʼofafine ʼe lua. 31 Pea neʼe ui e te taʼahine lahi ki ʼae ʼe veliveli: “Kua matuʼa tatā tamai pea ʼe mole he ʼu tagata ʼi te fenua ke momoe mo taua, ohage pe ko tona fai mahani e te hahaʼi ʼi te kele katoa. 32 Haʼu ke ta fakainu tatā tamai ʼaki te vino, pea ta momoe mo ia ke maʼu ai he hakoga ʼo tatā tamai.”

33 Koia ʼi te po ʼaia, neʼe nā fakainu ai tanā tamai ʼaki te vino. Pea neʼe alu leva te taʼahine lahi ʼo momoe mo tana tamai, kae neʼe mole iloʼi pe la e tana tamai te temi ʼae neʼe takoto ai pea mo te temi ʼae neʼe tuʼu ake ai ʼo alu. 34 ʼI te ʼaho ake, neʼe ui e te taʼahine lahi ki ʼae ʼe veliveli: “Koʼeni, neʼe au momoe mo taku tamai ʼanapo. Ta toe fakainu ia ia ʼaki te vino ʼi te po ʼaeni. Pea ke alu leva koe ʼo momoe mo ia ke maʼu ai he hakoga ʼo tatā tamai.” 35 Koia ʼi te po ʼaia, neʼe nā toe fakainu tanā tamai ʼaki te vino. Pea neʼe alu leva te taʼahine veliveli ʼo momoe mo ia, kae neʼe mole iloʼi pe la e tana tamai te temi ʼae neʼe takoto ai pea mo te temi ʼae neʼe tuʼu ake ai ʼo alu. 36 Neʼe faitama leva te ʼu ʼofafine ʼe lua ʼo Lote ki tanā tamai. 37 Neʼe fanauʼi leva e te taʼahine lahi he tamasiʼi tagata pea neʼe ina fakahigoaʼi ko Moape.+ ʼE ko te kui ʼaia ʼa te kau Moape ʼo te temi nei.+ 38 Neʼe toe fanauʼi foki e te taʼahine veliveli he tamasiʼi tagata pea neʼe ina fakahigoaʼi ko Pene-ami. ʼE ko te kui ʼaia ʼa te kau Amone+ ʼo te temi nei.