ʼUluaki Kolonito

10 ʼU tehina, ʼe au loto ke kotou iloʼi, neʼe haʼele fuli ʼatatou kui ʼi te malumalu ʼo te ʼao+ pea neʼe natou fakalaka fuli ʼi te tai,+ 2 neʼe papitemaʼi fuli natou ʼaki te ʼao mo te tai ʼi tanatou fakatahi mo Moisese, 3 neʼe natou kakai fuli ki te meʼa kai fakalaumalie ʼe tahi,+ 4 pea neʼe natou iinu fuli ki te vai fakalaumalie ʼe tahi.+ Koteʼuhi neʼe natou iinu ʼi te foʼi maka fakalaumalie ʼae neʼe ina muliʼi natou, pea ko te foʼi maka ʼaia neʼe fakaʼuhiga ia kia* Kilisito.*+ 5 Kae tokolahi ia natou neʼe mole leleiʼia e te ʼAtua, koia neʼe matehi ai natou ʼi te toafa.+

6 ʼE feala ke tou taʼofi ni ako* mai te ʼu aluʼaga ʼaia, ke ʼaua naʼa tou holi ki he ʼu meʼa ʼe kovi, ohage ko tanatou holi ki ai.+ 7 ʼAua naʼa kotou liliu ko he ʼu hahaʼi tauhi taula ʼatua ohage ko ʼihi ia natou. Neʼe tohi ʼo ʼuhiga mo natou ʼaia: “Neʼe nonofo ifo te hahaʼi ki lalo ʼo kakai mo iinu. Pea neʼe natou tutuʼu ake leva ʼo fakafiafia.”+ 8 Pea ʼaua naʼa tou fai he ʼu felaveʼi fakasino heʼe ʼaoga* ohage ko tona fai e ʼihi ia natou, ʼo mamate ai te toko 23 000 ʼi te ʼaho pe ʼe tahi.+ 9 Pea ʼaua naʼa tou ʼahiʼahiʼi ia Sehova,*+ ohage ko tona ʼahiʼahiʼi e ʼihi ia natou, ʼo natou mamate ai ʼi te ʼu gata.+ 10 Pea ʼaua naʼa kotou muhumuhu, ohage ko te muhumuhu ʼa ʼihi ia natou,+ ʼo matehi ai natou e ia ʼae ʼe ina fakaʼauha.*+ 11 ʼE feala ke tou taʼofi ni ako mai te ʼu aluʼaga ʼaia neʼe tohi moʼo fakatokaga ʼo tatou,+ ia tatou ʼaeni ʼe maʼuʼuli ʼi te fakaʼosi ʼo te tuʼu ʼo te ʼu faʼahiga meʼa ʼaeni.

12 Koia ko ʼae ʼe manatu ʼe tuʼu, ke tokaga ia naʼa higa.+ 13 Ko te ʼu fakahala ʼae ʼe hoko kia koutou ʼe toe hoko foki ki te hahaʼi fuli.+ Kae ʼe agatonu te ʼAtua, pea ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi,+ kae ka hoko mai te fakahala, ʼe ina toe teuteuʼi foki anai he faigamalie ke kotou hao ai, ke feala ai hakotou ʼutakiʼi.+

14 Koia ʼoku ʼofaʼaga, kotou feholaki mai te tauhi taula ʼatua.+ 15 ʼE au palalau atu ohage ʼe au palalau ki he ʼu tagata ʼe fakasiosio tonu. Kotou fakamauʼi e koutou totonu ʼaku palalau. 16 ʼI tatatou fai he fakafetaʼi ʼo ʼuhiga mo te ipu ʼo te fakafetaʼi, ʼe mole koa la ko he kau ʼaia ki te taʼataʼa ʼo Kilisito?+ Pea ko te pane ʼae ʼe tou tofitofi, ʼe mole koa la ko he kau ʼaia ki te sino ʼo Kilisito?+ 17 ʼE ko te pane pe ʼe tahi, koia logo la totatou kaugamalie, kae ko tatou ʼe ko he sino ʼe tahi+ he ʼe tou kai fuli ki te pane ʼaia ʼe tahi.

18 Kotou fakakaukauʼi ia te kau Iselaele. Ko natou ʼae neʼe kakai ki te ʼu sakilifisio ʼae neʼe momoli ʼi te ʼaletale, neʼe mole hage koa la ʼe natou kakai fakatahi mo te ʼAtua?+ 19 Pea kotea tona fakaʼuhiga? ʼE maʼuhiga koa te kanoʼi manu ʼae neʼe momoli ki te ʼu taula ʼatua? Peʼe maʼuhiga koa he taula ʼatua? 20 Kailoa ia. Kae ʼe au ui ko te ʼu sakilifisio ʼae ʼe momoli e te ʼu puleʼaga, ʼe natou momoli ki te kau temonio kae mole ki te ʼAtua.+ Pea ʼe mole au loto ke kotou fakatahi mo te kau temonio.+ 21 ʼE mole feala ke kotou iinu ki te ipu ʼo Sehova* pea mo te ipu ʼo te kau temonio. ʼE mole feala ke kotou kakai ʼi “te laupapa ʼo Sehova”*+ pea mo te laupapa ʼo te kau temonio. 22 Pe ʼe ‘tou loto koa ke tou fakatupu te maheka ʼo Sehova’?*+ ʼE tou malohi age koa tatou ia te ia?

23 ʼE gafua ia meʼa fuli pe, kae ʼe mole ʼaoga ia meʼa fuli. ʼE gafua ia meʼa fuli pe, kae ʼe mole fakalotomalohi ia meʼa fuli.+ 24 Ke tahi kumi te meʼa ʼae ʼe lelei ki tona tatau, kae mole ko te meʼa pe ʼae ʼe lelei kia ia.+

25 Kotou kai ki te ʼu meʼa ʼae ʼe fakatau ʼi te fakatauʼaga kanoʼi manu, ʼo mole kotou fai he fehuʼi ʼuhi ko ʼokotou leʼo ʼo loto, 26 koteʼuhi “ ʼe ʼa Sehova* te kele pea mo meʼa fuli ʼe maʼu ai.”+ 27 Kapau ʼe fakaafe koutou e he tahi ʼe mole tui pea mo kotou fia olo ki ai, kotou kai ia meʼa fuli ʼae ʼe tuku atu ki ʼokotou muʼa, ʼo mole kotou fai he fehuʼi ʼuhi ko ʼokotou leʼo ʼo loto. 28 Kae kapau ʼe ui atu e he tahi: “Neʼe momoli te kanoʼi manu ʼaia ki te ʼu taula ʼatua,” ʼaua naʼa kotou kai ʼuhi ko ia ʼae neʼe ina fakaha atu pea ʼuhi ko te leʼo ʼo loto.+ 29 ʼE mole au talanoa ʼo ʼuhiga mo ʼokotou leʼo ʼo loto, kae ki te leʼo ʼo loto ʼo ia ʼaia. Koteʼuhi he koʼe ʼe fakamauʼi anai toku ʼateaina e te leʼo ʼo loto ʼo he tahi age?+ 30 Kapau ʼe au kai mo fakafetaʼi ki te ʼAtua, he koʼe ʼe fatufatuʼi anai au ʼuhi ko te meʼa kai ʼae ʼe au fakafetaʼi ai ki te ʼAtua?+

31 Koia pe ʼe kotou kakai, peʼe kotou iinu, peʼe kotou fai he tahi age meʼa, kotou fai ia meʼa fuli moʼo fakakololiaʼi ia te ʼAtua.+ 32 ʼAua naʼa kotou fakatupu tukia ki te kau Sutea, mo te kau Keleka pea mo te kokelekasio ʼa te ʼAtua.+ 33 ʼE feia pe mo au, ʼe au faiga ke leleiʼia au e te hahaʼi fuli ʼi te ʼu meʼa fuli ʼae ʼe au fai, ʼo mole au kumi te meʼa ʼae ʼe lelei kia au,+ kae ko te meʼa ʼae ʼe lelei ki te tokolahi, ke haofaki ai natou.+