Taʼaga Lea
22 ʼE lelei age he matagafua lelei* ʼi ni koloa lalahi,+
ʼE lelei age te fakaʼapaʼapaʼi ʼo kita ʼi te siliva mo te aulo.
2 ʼE tatau ia ia ʼae ʼe maʼu koloa mo ia ʼae ʼe masiva,
Neʼe fakatupu naua e Sehova.+
3 ʼE sio te tagata aga fakaʼeteʼete ki te tuʼutamaki pea ʼe nono ia,
Kae ʼe haga alu pe te tagata vale pea fua kovi pe kia ia.
4 Ko te fua ʼo te agavaivai pea mo te manavasiʼi kia Sehova,
ʼE ko te maʼu koloa, mo te kololia pea mo te maʼuli.+
5 ʼE maʼu ni vao talatala mo ni hele ʼi te ala ʼo te tagata kaka,
Kae ʼe fakamamaʼo mai ai ia ia ʼae ʼe ina fakamaʼuhigaʼi tona maʼuli.+
6 Akoʼi ki te tama* te ala ʼae ʼe tonu ke haʼele ai,+
Tatau aipe moka matuʼa, ʼe mole mavae anai mai ai.+
7 ʼE puleʼi e te tagata maʼu koloa te kau masiva,
Pea ko ia ʼae ʼe toʼo maʼua ʼe popula kia ia ʼae neʼe toʼo maʼua ai.+
8 Ko ia ʼae ʼe ina nunusi te heʼe faitotonu ʼe ina utu anai te malaʼia,+
Pea ʼe fasiʼi anai te ʼakau ʼo tona ita.+
9 ʼE tapuakina anai ia ia ʼae ʼe lotofoaki,
He ʼe ina vaevae tana meʼa kai mo ia ʼae ʼe masiva.+
10 Kapu ia ia ʼae ʼe vava,
Ke mole toe ʼi ai he kē,
Pea hoki gata ai leva te ʼu fihi mo te ʼu laukovi.
11 ʼE kaumeʼa anai mo te hau
Ia ia ʼae ʼe maʼa tona loto pea mo ina fai ni palalau mālie.+
12 ʼE taupau e Sehova te ʼatamai malama,
Kae ʼe ina molehi te ʼu palalau ʼa te tagata kaka.+
13 ʼE ui e te tagata pikoʼelo: “ ʼE ʼi ai he laione ʼi tuʼa.
ʼE ina kai anai au ʼi te malaʼe lahi ʼo te kolo.”+
14 ʼE ko he luo loloto te gutu ʼo te ʼu fafine faiaga.*+
ʼE to anai ki ai ia ia ʼae ʼe mole ʼofainaʼi e Sehova.
15 ʼE pipiki te agavale ki te loto ʼo te tama,*+
Kae ʼe mamaʼo anai ia mai ai moka fakaʼaogaʼi te ʼakau ʼo te fakatonutonu.+
16 ʼE liliu anai ʼo masiva
Ia ia ʼae ʼe ina kakaʼi te masiva ke maʼu koloa ai+
Pea mo ia ʼae ʼe ina foaki he ʼu meʼa ʼofa ki te tagata koloaʼia.
17 Tokaga ʼo fakalogo ki te ʼu palalau ʼa te kau poto,+
Pea mo avahi tou loto ki te ʼatamai malama ʼae ʼe au foaki atu,+
18 Mo ke taupau he ʼe fua lelei anai kia koe,+
Pea ke faipalalau tuʼumaʼu ki ai.+
19 ʼE au foaki atu he ʼatamai malama ʼi te ʼaho nei
Ke feala ai hau falala kia Sehova.
20 Neʼe heʼeki au tohi atu koa la,
Mo foaki atu he ʼu tokoni mo he ʼatamai malama?
21 Neʼe au akoʼi atu he ʼu palalau ʼe moʼoni mo tuha mo te falala,
Ke feala ai hau foaki he ʼu logo ʼe totonu kia ia ʼae neʼe ina fekauʼi koe.
22 ʼAua naʼa ke kaihaʼa te masiva he ʼe masiva,+
Pea ʼaua naʼa ke gaohi koviʼi ia ia ʼae ʼe veliveli ʼi te matapa ʼo te kolo,+
23 He ʼe fakafofoga anai e Sehova ia naua ʼi te faifakamau,+
Pea ʼe ina pulihi anai ia natou ʼaia neʼe agakaka.
24 ʼAua naʼa ke fakatahi mo he tahi ʼe hoko ita,
Pea ke fakamamaʼo mai ia ia ʼae ʼe itaita,
25 Ke ʼaua naʼa ke mulimuli ki te ʼu aga ʼaia,
Naʼa ke to ai ki he hele.+
26 ʼAua naʼa ke fakatahi mo natou ʼae ʼe natou talaga mo tukuʼaki
ʼE natou huʼi anai te ʼu maʼua ʼo ʼihi.+
27 Ka mole feala hau totogi,
Pea ʼe toʼo anai tou palepale.
28 ʼAua naʼa ke hiki he tuʼakoi ʼafeā ʼo he kele
Neʼe fakatuʼu e ʼau kui.+
29 Neʼe ke sio koa ki he tagata ʼe faiva ʼi tana gaue?
ʼE tuʼu anai ia muʼa ʼo ni hau.+
ʼE mole tuʼu anai ia muʼa ʼo ni faʼahiga tagata pe.