ʼUluaki Kolonito
2 Koia ʼu tehina, ʼi taku alu atu ʼo tala ia te meʼa fakalilo tapu*+ ʼa te ʼAtua kia koutou, neʼe mole au fakaʼaogaʼi he ʼu kupu faigataʼa+ pea neʼe mole au fia poto. 2 Koteʼuhi ʼi taku nofo ʼae mo koutou, neʼe au fakatotonu ke au palalau pe ʼo ʼuhiga mo Sesu Kilisito* ʼae neʼe tutuki ki te pou.+ 3 Pea ʼi taku alu atu, neʼe au vaivai, mo mataku pea mo tete. 4 Pea neʼe mole au fakatafito ʼaku palalau pea mo te meʼa ʼae neʼe au fakamafola ki te ʼu palalau fakaoloolo ʼo te poto fakatagata, kae neʼe ha ʼi ʼaku palalau te malohi ʼo te laumalie ʼo te ʼAtua,+ 5 ke mole fakatafito takotou tui ki te poto fakatagata kae ki te malohi ʼo te ʼAtua.
6 ʼE tou palalau ʼo ʼuhiga mo te poto ʼi te lotolotoiga ʼo natou ʼae kua fotufotuʼa ʼi te faʼahi fakalaumalie,+ kae ʼe mole ko te poto ʼo te malama* ʼaeni peʼe ko te poto ʼo te kau pule ʼo te malama ʼaeni, he ʼe natou pupuli anai.+ 7 Kae ʼe tou palalau ʼo ʼuhiga mo te poto ʼo te ʼAtua ʼae neʼe fufu ʼi te meʼa fakalilo tapu.+ Neʼe fakatuʼutuʼu fakatomuʼa e te ʼAtua ke ina fai te faʼahi ʼaia ʼi muʼa ʼo te ha ʼo te malama* agakovi ʼaeni, ke tou maʼu ai te kololia. 8 Neʼe mole lava iloʼi e he tahi ʼo te kau pule ʼo te malama* ʼaeni ia te poto ʼaia.+ Koteʼuhi ka na pau la neʼe natou iloʼi, neʼe mole natou matehi* ia te ʼAliki ʼo te kololia. 9 Kae ohage ko tona tohi: “Neʼe mole sisio te ʼu mata, pea neʼe mole logo te ʼu taliga, pea neʼe mole fakakaukauʼi e te tagata ʼi tona loto te ʼu meʼa ʼae neʼe teuteuʼi e te ʼAtua maʼa natou ʼae ʼe ʼoʼofa kia te ia.”+ 10 Koteʼuhi neʼe fakaha mai e te ʼAtua kia tatou te ʼu faʼahi ʼaia+ ʼaki tona laumalie,+ he ʼe vakavakaʼi e te laumalie ia meʼa fuli, maʼia mo te ʼu meʼa loloto ʼo ʼuhiga mo te ʼAtua.+
11 Ko ai ʼae ʼe feala ke ina iloʼi te manatu ʼa he tahi tagata? ʼE gata pe ki te tagata ʼaia ia tana iloʼi ʼana manatu. ʼO toe feia pe, ʼe mole he tahi ʼe ina iloʼi te ʼu meʼa ʼo ʼuhiga mo te ʼAtua, gata pe ki te laumalie ʼo te ʼAtua. 12 Pea neʼe mole tou maʼu te faʼahiga manatu* ʼa te malamanei kae ko te laumalie ʼae ʼe haʼu mai te ʼAtua,+ ke feala hatatou iloʼi te ʼu meʼa ʼae neʼe foaki fakaʼofa mai e te ʼAtua. 13 ʼE tou toe palalau foki ʼo ʼuhiga mo te ʼu faʼahi ʼaia, mole ʼaki he ʼu kupu neʼe tou ako mai te poto fakatagata+ kae ko he ʼu kupu neʼe akoʼi mai e te laumalie,+ ʼi tatatou fakaʼaogaʼi he ʼu kupu fakalaumalie moʼo fakamahino te ʼu faʼahi fakalaumalie.
14 Kae ko te tagata ʼae ʼe takitaki e ʼona holi ʼe mole ina tali ia te ʼu meʼa ʼae ʼe haʼu mai te laumalie ʼo te ʼAtua, koteʼuhi ʼe ko he ʼu meʼa vale ia kia ia. Pea ʼe mole feala ia ke ina iloʼi te ʼu meʼa ʼaia, he ʼe tonu ke vakavakaʼi ʼaki te laumalie maʼoniʼoni. 15 Kae ko te tagata ʼae ʼe takitaki e te laumalie ʼo te ʼAtua, ʼe ina vakavakaʼi ia meʼa fuli,+ pea ʼe mole he tahi ʼe ina fakamauʼi ia ia. 16 Koteʼuhi “ko ai ʼae ʼe ina lava iloʼi te manatu ʼa Sehova* ke ina akoʼi ia ia?”+ Kae ʼe tou maʼu tatou te manatu ʼa Kilisito.+