Kapite 10

Ko He Puleʼaga “ ʼe Mole Pulihi Anai”

1, 2. (a) Koteā te meʼa ʼe fakahā ʼi te ʼaho fuli e te ʼu meʼa ʼaē ʼe hoko ʼi te malamanei, pea e feafeaʼi? (b) Koteā te puleʼaki pe e tahi ki te ʼu faigataʼaʼia ʼo te malamanei?

ʼI TE ʼaho fuli pe, ko te ʼu meʼa ʼaē ʼe hoko ʼi te malamanei ʼe nātou fakahā lelei mai ʼe mole heʼeki maʼu e te hahaʼi te fīmālie, ʼi tanatou līaki te pule ʼa Sehova ʼo nātou faiga ke nātou takitaki totonu pe ia nātou. ʼE mole ʼi ai he faʼahiga puleʼaga fakatagata kua ina foaki mai he ʼu tapuakina ki te malamanei ka mole ina fakakeheʼi he tahi. Logope la tanatou maʼu he faʼahiga poto lahi, neʼe mole feala tanatou molehi te agahala, hanatou tauʼi te mahaki pea mo fakagata te mate, māʼiape la ki he tokotahi ia nātou. Kae ko te ʼatu ʼu puleʼaga ʼe nātou haga faʼu aipe nātou te ʼu mahafu foʼou ʼe toe lahi age tona fakamataku. Ko te fakapō kua tuputupu. Ko te faʼu masini, mo te fia fai paʼaga pea mo te mole mahino, ko te ʼu meʼa fakatahi ʼaia ʼe fakatupu ʼaki ai te ʼuli ʼo te kele, te vai pea mo te ʼaele. ʼO ʼuhiga mo te totogi kovi ʼo te ʼu meʼa ʼe ʼaoga ki te maʼuli, pea mo te mole kei maʼu ʼo he gāue, ʼe faigataʼa ki te tokolahi hanatou maʼu te ʼu meʼa ʼaē ʼe ʼaoga ki tonatou maʼuli. ʼE ʼaoga ʼaupito ki te hahaʼi ke nātou maʼu he puleʼaki ki tonatou ʼu faigataʼaʼia.—Tnk. 8:9.

² Koteā koa te puleʼaki ʼaia? Ko te Puleʼaga ʼo te ʼAtua ʼaē neʼe akoʼi age e Sesu ki tana kau tisipulo ke nātou faikole kiai. (Mat. 6:9, 10) ʼE tonu ke tou fiafia ʼi tatatou ʼiloʼi ʼaē ko te fīmālie ʼe haʼu anai mai te Puleʼaga ʼaia!

3. (a) ʼO ʼuhiga mo te Puleʼaga, koteā te meʼa neʼe hoko ʼi te lagi ʼi te taʼu 1914 ʼo totatou temi? (b) He koʼe ʼe maʼuhiga te meʼa ʼaia kia tatou?

³ Talu mai te 1914 ʼo totatou temi, ko te Puleʼaga ʼo te ʼAtua ʼaē ʼe takitaki e Sesu Kilisito kua kamata tana gāue.a ʼI te taʼu ʼaia, neʼe hoko ʼi te lagi te ʼu meʼa neʼe sio kiai ia Taniela ʼi te meʼa fakakikite ʼaē neʼe hā. Ko te “Matuʼa ʼo te ʼu ʼAho,” ia Sehova ʼAtua, neʼe ina foaki age ki te Foha ʼo te tagata, ia Sesu Kilisito, “te pule, pea mo te fakaʼaliʼaliki, pea mo te puleʼaga, koteʼuhi ke tauhi kia te ia te hahaʼi, pea mo te ʼu fenua, pea mo te ʼu faʼahiga lea fuli pe.” ʼI tana fakamatala te meʼa ʼaē neʼe mamata ki ai, neʼe tohi fēnei e Taniela: “Ko tana pule ʼe ko he pule ia ʼe mole ʼiloʼi hona gataʼaga, ʼe mole tuku anai ia, pea ko tona puleʼaga ʼe ko he puleʼaga ʼe mole pulihi anai ia.” (Tan. 7:13, 14) ʼAki te Puleʼaga ʼaia, ʼe feala anai ke foaki e te ʼAtua ki te hahaʼi ʼaē ʼe manako ki te faitotonu, ke nātou maʼu te ʼu tapuakina ʼaē neʼe ina teuteuʼi ʼi te temi ʼaē neʼe ina fakanofo ai tatatou ʼu ʼuluaki mātuʼa ʼi te Palatiso.

4. Koteā te ʼu faʼahiga meʼa ʼo ʼuhiga mo te Puleʼaga ʼe tou fia ʼiloʼi ʼaupito, pea koteā tona tupuʼaga?

⁴ Ko te ʼu hahaʼi fakalogo agatonu ʼo te Puleʼaga ʼaia, ʼe nātou holi ʼaupito ke nātou ʼiloʼi te agaaga ʼo te puleʼaga ʼaia pea mo te faʼahiga fai ʼo tana gāue. ʼE nātou fia ʼiloʼi te meʼa ʼaē ʼe ina fai ʼi te temi nei, pea mo te meʼa ka ina fai anai ʼi te temi ka haʼu, pea mo te meʼa ʼaē ʼe ina fakamaʼuaʼi kiai ia nātou. ʼE nātou sivi fakaleleiʼi te faʼahi ʼaia, pea ʼe tuputupu ai tonatou loto fakafetaʼi ki te Puleʼaga ʼaia, pea ʼe nātou fakatuputupu te ʼu kalitate ʼaē ʼe ʼaoga ke nātou palalau ki niʼihi ʼo ʼuhiga mo te Puleʼaga ʼaia.—Pes. 48:12, 13.

Ko He Sivi Fakaloto Mālohi

5. (a) ʼI te Tohi-Tapu, ko te Puleʼaga Faka Mesianike ʼe ko te meʼa ʼaē ʼe ina fakatā te pule ʼo ai? (b) ʼE lave feafeaʼi kia tatou te meʼa ʼaē ʼe tou ako ʼo ʼuhiga mo te Puleʼaga?

⁵ Ko te taʼi sivi ʼaia, ʼe ina ʼuluaki fakahā mai kia tatou ko te Puleʼaga Faka Mesianike ʼe ko te meʼa ʼe ina fakatā te pule māʼoluga ʼa Sehova. Ko ia ʼaē neʼe ina foaki “te pule, pea mo te fakaʼalikiʼaga, pea mo te puleʼaga” ki tona ʼAlo. Koia, ʼi te ʼosi pe ʼo te fakatuʼu ʼo te Puleʼaga, neʼe ʼui e te ʼu leʼo ʼi te lagi te lea ʼe feʼauga mo te faʼahi ʼaia: “Ko te puleʼaga ʼo te malamanei kua liliu ia ko te puleʼaga ʼo totatou ʼAliki [ia Sehova ʼAtua] pea mo tana Kilisito, pea ʼe hau anai ia [Sehova] ʼo heʼegata.” (Fkhā. 11:15) Koia, ko te ʼu meʼa fuli ʼaē ʼe tou ʼiloʼi ʼo ʼuhiga mo tona Puleʼaga, pea mo te ʼu meʼa fuli ʼe ina fai, ʼe ina fakaōvi ia tatou kia Sehova. Ko te faʼahi ʼaia ʼe fakatupu ia tatou te fia fakalogo ki tana pule ʼo heʼegata.

6. He koʼe ʼe tou fiafia ʼaupito ʼi te fili e Sehova ia Sesu Kilisito ke ina fai tana pule ʼaki tona huafa?

⁶ ʼE ko he meʼa lelei ia te haga ʼa Sehova ʼo fakanofo ia Sesu Kilisito ki te hekaʼaga faka hau ko he tagata fakafofoga ʼo Tana pule. ʼI tona ʼuhiga ʼaē ko te Tufuga Faiva neʼe fakaʼaogaʼi e te ʼAtua moʼo fakatupu ʼo te kele pea mo te tagata, ʼe ʼiloʼi lelei e Sesu ia tatou, te meʼa ʼaē ʼe ʼaoga kia tatou. Pea tahi foki ʼaē, ʼi te kamataʼaga ʼo te hisitolia ʼo te tagata, neʼe ina fakahā ‘tona ʼofa ki te ʼu foha ʼo te tagata.’ (Taag. 8:30, 31; Kol. 1:15-17) ʼI te lahi ʼaupito ʼo tona ʼofa, neʼe haʼu tonu ia ki te kele, pea ina foaki tona maʼuli ko he totogi maʼa te malamanei. ʼAki te faʼahi ʼaia, neʼe ina foaki mai kia tatou te fealagia ʼaē ke tou ʼāteaina mai te agahala pea mo te mate, pea ke tou maʼu ia te maʼuli heʼegata.—Mat. 20:28.

7. (a) ʼI tona kehekehe mo te ʼu puleʼaga fakatagata, he koʼe ʼe tuʼu anai te puleʼaga ʼaia ʼo talu ai? (b) Koteā te pikipikiga ʼo te “tagata kaugana agatonu mo poto” pea mo te puleʼaga ʼaē ʼi selo?

⁷ Ko te Puleʼaga ʼaia ʼe ko he puleʼaga ʼe tuʼu mālohi pea mo fualoa. ʼE tou ʼiloʼi ʼe moʼoni te potu ʼaia heʼe ko Sehova totonu ʼe mole feala ke mate. (Ha. 1:12; Pes. 146:3-5, 10) ʼI tona kehekehe mo te ʼu hau fakatagata, ko Sesu Kilisito, ʼaē neʼe foaki ki ai e Sehova te pule faka hau, ʼe toe maʼuli tuputupua mo ia. (Lom. 6:9; 1 Tim. 6:15, 16) ʼE ʼi ai anai mo nātou ʼaē ka fakatahi mo Kilisito ʼi selo, ko te toko 144 000 hahaʼi, ko te kau kaugana agatonu ʼa te ʼAtua neʼe ina filifili “mai te ʼu telepi kehekehe, mo te ʼu lea kehekehe, mo te ʼu hahaʼi kehekehe pea mo te ʼu puleʼaga kehekehe.” Ko te ʼu hahaʼi ʼaia ʼe nātou toe maʼu foki mo nātou te maʼuli tuputupua. (Fkhā. 5:9, 10; 1 Ko. 15:42-44, 53) Ko te tokolahi ia nātou ʼaia kua nonofo ʼi selo, pea ko tona toe ʼaē ʼi te kele ʼe nātou faʼufaʼu ia te kalasi ʼo te “tagata kaugana agatonu mo poto” ko he kalasi ʼo te kau Kilisitiano agatonu ʼe nātou lagolago lelei, ki te ʼu meʼa ʼaē ʼe ʼaoga ki te Puleʼaga ʼaia ʼi te kele.—Mat. 24:45-47.

8, 9. (a) Koteā te ʼu faʼahiga meʼa fakatupu maveuveu mo fakahehema ʼaē ka pulihi anai e te Puleʼaga? (b) Kapau ʼe mole tou fia liliu ko he ʼu fili ʼo te Puleʼaga ʼo te ʼAtua, ko te ʼu kautahi pea mo te ʼu gāue fea ʼaē ʼe mole tonu ke tou kau kiai?

⁸ Kua vave pe, ʼi te temi ʼaē kua fakakatofa e Sehova, tana fekauʼi anai tana ʼatu kautau, ke nātou fakamaʼa ia te kele. ʼE nātou fakaʼauha anai ʼo talu ai te hahaʼi ʼaia kua nātou fakatotonu, ʼe mole nātou fia ʼiloʼi te ʼAtua, mo nātou fakafisi ʼe mole nātou fia tokagaʼi tana pule, pea mo nātou meʼa noaʼi tana ʼu fakatuʼutuʼu fonu ʼi te ʼofa neʼe ina fai ʼaki ia Sesu Kilisito. (2 Tes. 1:6-9) Ko te ʼaho leva ʼaia ʼo Sehova, te temi ʼaē kua fualoa te talitali kiai, ʼaē ka ina faka lākatonuʼi ai tana pule ʼi te ʼatulaulau.

⁹ Ko te lotu hala fuli, pea mo te ʼu puleʼaga fakatagata fuli pea mo tanatou ʼu kautau, ʼaē neʼe taki e te pule agakovi pea mo fakapulipuli ʼo te mālama ʼaenī, ʼe fakaʼauha anai nātou ʼo talu ai. Ko nātou fuli ʼaē ʼe nātou fakahā ʼe nātou kau ki te mālama ʼaenī ʼaki hanatou manatu pe kia nātou, hanatou aga kākā mo aga heʼemaʼa ʼi tonatou maʼuli, ʼe pulihi ʼosi anai nātou e te mate. Ko Satana mo tana kau temonio ʼe pilisoniʼi anai nātou lolotoga taʼu e afe, ʼo mole feala ai ke nātou felāveʼi mo te hahaʼi ʼo te kele. ʼI meʼa fakafimālie leva kia nātou fuli ʼaē ʼe manako ki te faitotonu!—Fkhā. 18:21, 24; 19:11-16, 19-21; 20:1, 2.

Tana ʼu Fakatuʼutuʼu—ʼE Feafeaʼi Anai Tona Fakahoko

10. (a) ʼE fakahoko feafeaʼi anai e te Puleʼaga Faka Mesianike te fakatuʼutuʼu ʼa Sehova ʼo ʼuhiga mo te kele? (b) Koteā anai tona faka ʼuhiga ki te hahaʼi ʼaē ka maʼuʼuli ʼi te kele?

¹⁰ Ko te Puleʼaga Faka Mesianike ʼe ina fakahoko katoa anai te fakatuʼutuʼu ʼa te ʼAtua ʼi te kamataʼaga ʼo ʼuhiga mo te kele. (Sen. 2:8, 9, 15; 1:28) ʼO aʼu mai ki te temi nei, neʼe mole lavaʼi e te tagata ia te fakahoko ʼo te faʼahi ʼaia. Kae, ko te “kele ʼaē ka haʼu” neʼe tuku ke puleʼi e te Foha ʼo te tagata, ia Sesu Kilisito. Ko nātou ʼaē ka maʼuʼuli anai ʼi te ʼaho ʼaē ʼe fakahoko ai te fakamāu ʼa Sehova ki te mālama ʼāfea ʼaenī, ʼe nātou gāue anai ʼi te logo tahi ʼo mulimuli ki te takitaki ʼa Kilisito, tonatou Hau, ʼo nātou fai ʼaki te loto fiafia te ʼu meʼa fuli ʼe ina fakatotonuʼi age kia nātou, ke liliu te kele katoa ko he Palatiso. (Hep. 2:5-9) ʼE fiafia anai te hahaʼi ʼi te fua ʼo te gāue ʼo tonatou ʼu nima, pea mo nātou fakaʼaoga lahi anai te mahu ʼo te meʼa kai ʼi te kele.—Pes. 72:1, 7, 8, 16-19; vakaʼi ia Isaia 65:21, 22.

11. (a) ʼE foaki feafeaʼi anai te maʼuli haohaoa ʼo te ʼatamai pea mo te sino ki te hahaʼi fakalogo ʼo te Puleʼaga? (b) Koteā anai tona ʼu fua?

¹¹ ʼI te fakatupu ʼo Atama mo Eva neʼe nā maʼuli haohaoa, pea ko te fakatuʼutuʼu ʼa te ʼAtua ke fakafonu te kele ʼaki tonā hākoga, ʼo nātou maʼu fuli te maʼuli haohaoa ʼo te ʼatamai pea mo te sino. ʼI te pule ʼa te Puleʼaga, ko te fakatuʼutuʼu ʼaia ʼe liliu anai ko he moʼoni faka kolōlia. ʼE tonu foki ke molehi te ʼu ikuʼaga fuli ʼo te agahala, pea ko te faʼahi ʼe fakahoko e Kilisito ʼi tona ʼuhiga Hau, pea mo Pelepitelo Lahi. ʼAki tana faʼa kātaki, ʼe tokoni anai ki tana hahaʼi fakalogo ke nātou fakaʼaoga te maʼuhiga ʼo te sakilifisio faifakalelei ʼo tona maʼuli fakatagata. Pea ʼe ava anai te ʼu mata ʼo te kau kivi pea mo te ʼu taliga ʼo te hahaʼi tuli. Ko te kakano ʼaē kua fefe ʼuhi ko te matutuʼa peʼe ʼuhi ko te mahaki, ʼe liliu anai ia ʼo foʼou age ʼi te kakano ʼo he tamasiʼi. ʼE mole toe ʼi ai anai ni mahaki, ʼe maʼuli mālōlō anai te hahaʼi. ʼE hoko mai anai te ʼaho ʼaē ʼe mole toe ʼui ai anai e he tahi: “ ʼE ʼau mahaki,” heʼe ko te hahaʼi ʼaē neʼe manavasiʼi ki te ʼAtua kua faka ʼāteaina nātou mai te agahala pea mo tona ʼu ikuʼaga fakatupu mamahi.—Vakaʼi ia Isaia 33:22, 24; 35:5, 6; Sopo 33:25; Luka 13:11-13.

12. (a) Koteā te tahi meʼa ʼaē ʼe fakamaʼua kiai te maʼuli haohaoa fakatagata? (b) ʼE feafeaʼi anai te fakahoko ʼo te faʼahi ʼaia, pea koteā anai tona fua?

¹² Kae moʼo kaku ki te maʼuli haohaoa, ʼe mole gata ʼaki pe he sino pea mo he ʼatamai ʼe maʼa. ʼE toe kau kiai mo te maʼuliʼi ʼo te ʼu kalitate ʼo Sehova, he neʼe fakatupu te tagata ‘ki te paki ʼo te ʼAtua, ke hoko ia ki ai.’ (Sen. 1:26.) Ko te hahaʼi ʼe tonu foki anai ke akoʼi nātou. ʼE nātou maʼuʼuli anai ʼi he fakatuʼutuʼu foʼou “ ʼe tonu ke nofo ai te faitotonu” pea, ohage ko te meʼa neʼe fakahā e te polofeta ko Isaia, “ko te faitotonu ʼaē ka ako moʼoni anai e te hahaʼi ʼo te kele maʼuli.” (2 Pe. 3:13; Isaia 26:9) Ko te kalitate ʼaia ʼe ina taki ki te tokalelei, ʼi te hahaʼi ʼo te ʼu puleʼaga fuli, ʼi te ʼu kaumeʼa, ʼi te ʼu loto famili, kae tāfito foki mo te ʼAtua totonu. (Is. 32:17; Pes. 85:10-13) Ko nātou ʼaē ʼe nātou ako anai te faitotonu ʼaki te temi ʼe nātou mahino anai ki te finegalo ʼo te ʼAtua ʼo ʼuhiga mo nātou. Kapau ko tonatou ʼofa ki te ʼu ala ʼo Sehova ʼe loloto tona tauaka ʼi tonatou loto, ʼe nātou muliʼi anai te ʼu ala ʼaia ʼi te ʼu faʼahi fuli ʼo tonatou maʼuli. Neʼe feala ke ʼui fēnei e te tagata haohaoa ko Sesu: ‘ ʼE ʼau fai tuʼumaʼu te meʼa ʼaē ʼe leleiʼia e taku Tāmai.’ (Soane 8:29) ʼI taulekaleka leva ʼo te maʼuli, mokā ʼe hoko moʼoni anai ki te malamanei katoa!

TE ʼu Gāue Kua ʼIloga

13. Koutou fakaʼaoga te ʼu fehuʼi ʼaē ʼe tuʼu ʼi ai moʼo fakahā te ʼu meʼa ʼaē ka fai anai e te Puleʼaga pea mo te meʼa ʼaē ʼe maʼua ke tou fai e tatou totonu.

¹³ ʼE ʼi ai te ʼu gāue fakaofoofo ʼa te Puleʼaga kua ʼiloga lelei kia nātou ʼaē ʼe nātou sio ʼaki tanatou tui. Ko te ʼu fehuʼi ʼaē ka hoa mai pea mo te ʼu vaega faka Tohi-Tapu ʼaē ʼe tuʼu ʼi ai, ʼe nātou toe fakamanatu atu anai niʼihi meʼa ʼo te ʼu gāue ʼaia, pea mo ʼihi faʼahiga meʼa ʼe feala pea ʼe tonu ke fai e te hahaʼi fakalogo ʼo te Puleʼaga ʼi te temi nei:

Ko ai ʼaē neʼe ʼuluaki tauʼi e te Hau, pea neʼe koteā tona ikuʼaga? (Fkhā. 12:7-10, 12)

ʼI te ʼosi ʼo tona fakanofo hau, ko te tānaki ʼo te kūtuga fea ʼaē neʼe tokaga fakavilivili ki ai ia Kilisito? (Mat. 24:31; Fkhā. 7:1-4)

Ia Mateo 25:31-33, koteā te tahi gāue neʼe fakakikite e Sesu ʼe ina fai anai ʼi te ʼosi ʼo tona fakanofo hau pea ia muʼa ʼo tana fakaʼauha te hahaʼi agakovi?

E feafeaʼi te fakahoko ʼo te gāue ʼaia? Ko ai ʼaē ʼe kau kiai? (Mat. 24:14; Pes. 110:3; Fkhā. 14:6,7)

He koʼe neʼe mole feala ia ke fakagata te gāue e te ʼu fili faka politike pea mo te ʼu fili faka lotu? (Gāue 5:38, 39; Sakl. 4:6)?

ʼAki te ako Tohi-Tapu ʼaē ʼe lolotoga fai ʼi te temi nei, ko te ʼu fetogi fea ʼaē kua ʼiloga ia nātou ʼaē ʼe fakalogo ki te pule ʼo te Puleʼaga? (Is. 2:4; 1 Ko. 6:9-11)

Ko Te Puleʼaga ʼe Tuʼu ʼo Talu Ai

14. (a) Ko taʼu e fia ʼaē ka nofo hau ai ia Kilisito? (b) Koteā te meʼa ka fakahoko anai ʼi te temi ʼaia?

¹⁴ ʼI te ʼosi lī anai ʼo Satana mo tana kau temonio ki te vanu, ko Sesu Kilisito pea mo tana toko 144 000 ʼe nātou hau anai lolotoga taʼu e afe. (Fkhā. 20:6) Lolotoga te temi ʼaia, ʼe taki anai te hahaʼi ki te maʼuli haohaoa. Ko te puleʼaga fuli, pe ko he pule, peʼe ko he mālohi ʼe fakafeagai kia Sehova ʼe pulihi anai ʼo talu ai. ʼI te ʼosi fakahoko ʼo te ʼu meʼa ʼaia, ʼe toe tuku age anai e Sesu te Puleʼaga ki tana Tāmai, “koteʼuhi ke pule te ʼAtua ia meʼa fuli ki te hahaʼi fuli pe.”—1 Ko. 15:24, 28.

15. Koteā ʼaē ʼe moʼoni ai te ʼui ʼaē, ko te Puleʼaga ʼaia ‘ ʼe mole pulihi anai ia’?

¹⁵ Ko te tuʼulaga tonu ʼo Sesu ʼo ʼuhiga mo te kele ʼe fetogi anai, kae ki tana pule ʼe fai anai “ ʼo mole ʼiloʼi hona gataʼaga” pea ko tona Puleʼaga “ ʼe mole pulihi anai ia.” (Tan. 7:14) Koteā tona faka ʼuhiga? Ko tona faka ʼuhiga ko te pule ʼe mole toe maʼu anai e niʼihi ʼu tagata takitaki ʼe kehe ʼanatou ʼu fakatuʼutuʼu. Ko te ʼu gāue ʼaē neʼe fakahoko e te Puleʼaga ‘ ʼe mole pulihi anai ia.’ Ko te meʼa ʼaē ʼe fai e te Puleʼaga moʼo faka lākatonuʼi ʼo te huafa ʼo Sehova pea mo tana fakatuʼutuʼu ʼo ʼuhiga mo te kele, ʼe tuʼu anai ia ʼo heʼegata.

Toe Fakamanatu

● He koʼe ko te Puleʼaga ʼo te ʼAtua ʼe ko te puleʼaki pe ʼaia e tahi ki te ʼu faigataʼaʼia ʼo te malamanei? Neʼe kamata ʼanafea tana pule?

● Ko te ʼu agaaga fea ʼo te Puleʼaga ʼaē ʼe taulekaleka tāfito, pea koteā te meʼa ʼaē ka ina fakahoko? Koteā tona tupuʼaga?

● Koteā te ʼu gāue ʼa te Puleʼaga kua feala ke tou sio kiai ʼi te temi nei? E feafeaʼi tatatou kau ki te ʼu gāue ʼaia?

[Paki]

Ko te hahaʼi ʼe nātou akoʼi anai te faitotonu