Kapite 11
‘Koutou Haga Kumi Muʼa Te Puleʼaga’
1. (a) He koʼe neʼe ʼui e Sesu ke kumi muʼa te Puleʼaga, kua ʼosi kiai taʼu e 1 900 tupu? (b) Ko te fehuʼi fea ʼaē ʼe tonu ke tou fai kia tatou?
KUA ʼosi taʼu e 1 900 tupu, ʼi te akonaki neʼe fai e Sesu ʼi Kalilea, neʼe ina fakaloto mālohiʼi te hahaʼi ʼaē neʼe fakalogo ki tana fai akonaki: “Ke koutou haga kumi muʼa te puleʼaga pea mo tona faitotonu.” Kae, he koʼe neʼe palalau feiā ia? Neʼe mole tonu koa la ke fakanofo hau ia ʼi ni ʼu sēkulō ki muli mai? ʼE moʼoni. Kae, ʼaki te Puleʼaga Faka Mesianike ʼe haga anai ia Sehova ʼo faka lākatonuʼi tona huafa maʼoniʼoni pea ʼe ina fakahoko anai tana fakatuʼutuʼu fakaofoofo ʼaē neʼe ina fai ʼo ʼuhiga mo te kele. Ko ʼaē ʼe mahino lelei ki te meʼa ʼaia, ʼe ina fakamuʼamuʼa anai te Puleʼaga ʼi tona maʼuli. Kapau neʼe feiā ʼi te ʼuluaki sēkulō, pea ʼe toe feiā ia ʼaho nei, tāfito la kua ʼafio te Puleʼaga. ʼE ʼiloga koa ʼi tokotou maʼuli ʼe koutou haga kumi muʼa te Puleʼaga ʼo te ʼAtua?—Mat. 6:33.
2. Koteā koa te ʼu meʼa ʼe kumi faka mānumānu e te hahaʼi?
2 ʼI te agamāhani, ʼe lahi te tokaga ʼa te hahaʼi ki te tahi ʼu meʼa. ʼE nātou kumi ʼaki he loto mānumānu te ʼu koloā, te ʼu mutuʼi meʼa, te meʼa kai pea mo niʼihi ʼu lelei pea mo fakafiafia ʼe totogi. (Mat. 6:31, 32) ʼE hā ʼi tonatou maʼuli ʼe nātou tokaga tāfito pe kia nātou pea mo te ʼu fakafiafia. ʼE tuʼulaga lua te ʼAtua ʼi tonatou maʼuli—tatau aipe peʼe nātou tui kia te ia.
3. (a) Ko te ʼu faʼahiga koloā feafeaʼi ʼaē neʼe fakaloto mālohiʼi e Sesu tana ʼu tisipulo ke nātou kumi, pea koteā tona tupuʼaga? (b) He koʼe neʼe mole ʼaoga ke nātou tuʼania fakavale ia te ʼu meʼa fakamālama ʼaē ʼe ʼaoga kia nātou?
3 Kae, neʼe foaki age e Sesu te tokoni ʼaenī ki tana kau tisipulo: “Tuku takotou tānaki maʼa koutou he ʼu koloā ʼi te kele,” koteʼuhi ʼe mole heʼegata te ʼu koloā ʼaia. Neʼe ina ʼui age fēnei: “Kae ke koutou tānaki maʼa koutou he ʼu koloā ʼi selo,” ʼo nātou kaugana kia Sehova. Neʼe ina fakatokagaʼi tana kau tisipulo ke nātou taupau maʼu ʼonatou ʼu mata ke “lelei,” ʼo fakahaga tanatou sio ki te meʼa e tahi: te fai ʼo te finegalo ʼo te ʼAtua. “ ʼE mole feala ke koutou tauhi ki te ʼAtua pea mo te Koloā ohage ko he kau kaugana,” ko tana ʼui age ʼaia. Kae, e feafeaʼi koa te ʼu meʼa fakasino ʼaē ʼe ʼaoga kia tatou—te meʼa kai, te ʼu mutuʼi meʼa pea mo te nofoʼaga? “Tuku takotou hoha,” ko te tokoni age ʼaia ʼa Sesu. Neʼe ina fakatokagaʼi ia nātou ki te ʼu manulele—ʼaē ʼe fafaga e te ʼAtua. Neʼe ina fakaloto mālohiʼi tana kau tisipulo ke nātou fakakaukauʼi te teuteuʼi taulekaleka e te ʼAtua te ʼu fisiʼi teu. Ko te hahaʼi ʼatamai ʼaē ʼe kaugana kia Sehova ʼe mole maʼuhiga age koa la nātou ʼi te ʼu meʼa ʼaia neʼe ina fakatupu? Pea neʼe fakaʼosi e Sesu ʼo ina ʼui fēnei, “Ke koutou haga kumi muʼa te puleʼaga pea mo tona faitotonu, pea ʼe toe foaki atu anai mo te ʼu meʼa fuli ʼaia ʼe [ʼaoga] kia koutou.” (Mat. 6:19-34) ʼE koutou tui koa ki te manatu ʼaia? ʼE hā koa te faʼahi ʼaia ʼi ʼakotou ʼu gāue?
ʼAua Naʼa Koutou Tuku He Meʼa Ke Ina Fakapuli Te Moʼoni ʼo Te Puleʼaga Ia Koutou
4. Kapau ʼe lahi fau te pipiki ʼa he tahi ki te ʼu meʼa fakamālama, koteā te meʼa ʼe feala ke iku kiai? Koutou fakamahino.
4 Kapau ʼe tokaga fakavale he tahi ki te ʼu meʼa fakamālama, ʼe feala ke iku kovi ki ai. Tatau aipe peʼe ʼui e he tahi ʼe fia fai ki te Puleʼaga kae, kapau ʼi tona loto ʼe ina fakamuʼamuʼa niʼihi ʼu meʼa, ʼe pulihi anai e te ʼu meʼa ʼaia te moʼoni ʼo te Puleʼaga. (Mat. 13:18, 19, 22) Ohage la, ko te pule tūpulaga maʼu koloā ʼaē neʼe fēnei tana fehuʼi age kia Sesu: “Koteā te meʼa ʼaē ʼe tonu ke ʼau fai ke ʼau maʼu ai te maʼuli heʼegata?” Ko tana tali ʼaē kia Sesu neʼe ina fakahā ai ʼe ina fai te aga ʼaē ʼe lelei pea neʼe aga fakapoipoi ia ki niʼihi. Kae neʼe lahi fau tana mānumānu ki ʼona ʼu koloā fakamālama. Neʼe mole feala ia ke lītuʼa ki te ʼu koloā fakamālama ʼo muli ia Kilisito. Koia neʼe mole ina tali te faigamālie ʼaē ke liliu ko he pule ia tafa ʼo Sesu ʼi te Puleʼaga ʼaē ʼi selo. Koia neʼe ʼui ai e Sesu ʼi te lakaga ʼaia: “ ʼE faigataʼa anai kia nātou ʼaē ʼe maʼu paʼaga tanatou hū ki te puleʼaga ʼo te ʼAtua!”—Maleko 10:17-23.
5. (a) ʼI te ʼu palalau ʼa Paulo, koteā te meʼa neʼe tonu ke fakafeauga kiai ia Timoteo, pea koteā tona tupuʼaga? (b) E feafeaʼi te fakaʼaogaʼi e Satana te “manako ki te paʼaga” ko he fakahala fakatupu tuʼutāmaki?
5 ʼI te ʼu taʼu ki muli age, neʼe faitohi te ʼapositolo ko Paulo kia Timoteo, ʼaē neʼe nofo ʼi Efesi, ko he kolo maʼu koloā. Neʼe ina fakamanatuʼi age ki ai: “Neʼe mole tou ʼaumai he meʼa ki te malamanei, pea ʼe mole feala foki ke tou ʼave he meʼa. Koia kapau ʼe tou maʼu te meʼa kai mo te mutuʼi meʼa, pea ʼe tou fakafeauga anai ʼi te ʼu meʼa ʼaia.” Ko te gāue ʼaē ke maʼu ai e tokita famili pea mo kita totonu he ‘meʼa kai pea mo he ʼu mutuʼi meʼa ʼe feʼauga ʼe ko he meʼa ʼe lelei ia. Kae neʼe toe fakatokagaʼi fēnei e Paulo: “Ko nātou ʼaē kua nātou fakatotonu ke nātou maʼu koloā ʼe nātou tō ki te fakahala pea mo te hele, pea mo te ʼu holi lahi ʼe fakavale pea mo fakatupu mamahi ki te ʼu meʼa noa pea mo popo, ʼaē ʼe nātou fakatō te tagata ki te fakaʼauha pea mo te pulinoa.” ʼE kākā ia Satana. ʼE ina kamata kākāʼi he tahi ʼaki he ʼu kiʼi meʼa noa. ʼOsi ʼaia pea ina fakamuli ʼaki te ʼu ʼaʼahi lalahi ʼaupito—ʼe lagi faka fealagia anai ki he Kilisitiano ke maʼu tuʼulaga ʼi he gāue ʼe lahi age tona totogi, kae ʼe feala ke fakatupu kovi ki te temi ʼaē neʼe ina fakatuʼutuʼu moʼo fai ʼo te ʼu gāue fakalaumālie. Kapau ʼe mole tou tokakaga, “ko te manako ki te paʼaga” ʼe feala hana pulihi tatatou tokaga ki te ʼu lelei ʼo te Puleʼaga. Ohage ko te ʼui ʼa Paulo, “ko ʼihi, ʼi tanatou holi ki te manako ʼaia [te manako ki te paʼaga] neʼe nātou hēʼia ʼo mamaʼo ʼi te tui moʼoni pea neʼe nātou fehukiʼaki ia nātou totonu ʼaki te ʼu mamahi lahi.”—1 Tim. 6:7-10.
6. (a) Kapau ʼe mole tou loto ke fakahalaʼi tatou, koteā koa te meʼa ʼaē ʼe tonu ke tou fai? (b) Ko he manatu lelei koa ʼaia, logope la te ʼaluʼaga faka ekonomike ʼi te temi ʼaenī?
6 ʼI tona ʼofa moʼoni ki tona tēhina Kilisitiano, neʼe fakaloto mālohiʼi e Paulo ia Timoteo ʼo fēnei: “Hola ʼi te ʼu meʼa ʼaia,” pea: “Ke ke tauʼi, te tau matalelei ʼo te tui moʼoni.” (1 Tim. 6:11, 12) ʼE tonu ke tou faiga mālohi mo kapau ʼe mole tou fia higa ʼi te faʼahiga maʼuli mānumānu ʼo te mālama ʼaenī. Kae, kapau ʼe tou maʼuli ʼo ʼalutahi mo tatatou tui, ʼe mole līʼakina anai tatou e Sehova. Tatau aipe, peʼe totogi kovi te ʼu meʼa ʼe ʼaoga ki te maʼuli pea mo haʼele kovi te gāue, ʼe tokaga anai ia ke tou maʼu te ʼu meʼa tāfito ʼaē ʼe ʼaoga kia tatou.—Hep. 13:5, 6
Te Faʼifaʼitaki ʼa Te ʼu ʼUluaki Tisipulo
7. ʼI te fekauʼi ʼaē e Sesu tana kau ʼapositolo ke ʼolo ʼo fai faka mafola ʼi Iselaele, koteā te ʼu fakatuʼutuʼu neʼe ina foaki age kia nātou, pea he koʼe neʼe ʼaoga te ʼu fakatuʼutuʼu ʼaia?
7 ʼI te ʼosi akoʼi e Sesu ki tana ʼu ʼapositolo te meʼa ʼaē ʼe ʼaoga ke nātou fai, neʼe ina fekau ia nātou ke nātou ʼolo ʼo faka mafola te logo lelei ʼi Iselaele. “Kua fakaōvi mai te puleʼaga ʼo selo.” Neʼe ko he logo fakafiafia ia ʼaē neʼe nātou fakahā! ʼE moʼoni foki, ko Sesu Kilisito, te Hau Faka Mesianike, neʼe ʼi te lotolotoiga ʼo nātou. Neʼe fakaʼaogaʼi e te kau ʼapositolo tonatou temi ki te gāue ʼa te ʼAtua, koia neʼe uga ai nātou e Sesu ke nātou falala ki tana Tāmai, heʼe tokaga anai kia nātou. Pea neʼe ina ʼui fēnei age: “ ʼAua naʼa koutou toʼo he meʼa ki te ala, pe ko he ʼakau tokotoko, pe ko he kato fafaʼo meʼa kai, pe ko he pane, pe ko he falā; pe ko he ʼu kofu loto e lua. Kae ʼi he potu pe ʼe koutou hū ai ki he loto fale, koutou nonofo ai pea mo koutou mavae mai ai.” (Mat. 10:5-10; Luka 9:1-6; 10:4-7) ʼE tokaga anai Sehova ki tana kau kaugana ke foaki age e ʼonatou ʼu tēhina Iselaelite te ʼu meʼa ʼaē ʼe ʼaoga kia nātou, heʼe ʼi tanatou agaʼi fenua ʼe nātou tali kāiga ki te kau matāpule.
8. (a) He koʼe neʼe fetogi leva te ʼu fakatuʼutuʼu ʼa Sesu ʼi muʼa ʼo tona mate? (b) Koteā te meʼa ʼaē neʼe tonu ke nātou fakamuʼamuʼa tuʼumaʼu ʼi tonatou maʼuli?
8 Ki muli age, ʼi he kiʼi temi siʼipe ʼi muʼa ʼo tona mate, neʼe fakatokaga age e Sesu ki tana kau ʼapositolo, kua tonu leva ke fetogi te fai ʼo tanatou gāue. ʼUhi ko te fakafeagai faka puleʼaga, ʼe lagi mole toe tali anai nātou ʼi Iselaele ohage ko te agamāhani. Tahi foki ʼaē, neʼe kua vave pāui ia nātou ke nātou ʼave te logo ʼo te Puleʼaga ki te ʼu fenua Senitile. Kua tonu leva ke nātou toʼo mo nātou he “taga” pea mo he “kato fafaʼo meʼa kai.” Kae neʼe tonu aipe ke nātou haga kumi muʼa te Puleʼaga ʼo Sehova pea mo tana faitotonu, ʼo nātou falala ʼe tapuakina anai e Sehova tanatou ʼu faiga ʼaē ke nātou maʼu he meʼa kai pea mo he ʼu mutuʼi meʼa ʼe ʼaoga kia nātou.—Luka 22:35-37.
9. (a) Neʼe fakatuʼutuʼu feafeaʼi e Paulo ke ina fakamuʼamuʼa te Puleʼaga ʼi tona maʼuli? (b) Neʼe feafeaʼi tana taupau tona maʼuli? (c) Koteā te ʼu tokoni neʼe ina foaki ʼo ʼuhiga mo te meʼa ʼaia?
9 Neʼe foaki e te ʼapositolo ko Paulo he faʼifaʼitaki lelei ʼo ʼuhiga mo te fakahoko ʼo te tokoni ʼaē neʼe foaki age e Sesu. ʼE moʼoni, neʼe fakatafito e Paulo tona maʼuli ki tona minisitelio. (Gāue 20:24, 25) Neʼe ʼalu ki te kolo ʼo fai faka mafola ai, pea neʼe ina faʼu te ʼu fale lā ke feala ai hana maʼu te ʼu meʼa ʼaē ʼe ʼaoga ki tona maʼuli. Neʼe mole talitali ia ke ʼōmai niʼihi mo he ʼu meʼa ʼe ʼaoga kia te ia. (Gāue 18:1-4; 1 Tes. 2:9; 1 Ko. 9:18) Kae, neʼe ina tali ʼaki te loto fakafetaʼi te tali kāiga pea mo te ʼu meʼa ʼofa ʼaē neʼe foaki age e ʼihi moʼo fakahā ʼaki ai tonatou ʼoʼofa pea mo tanatou loto fakafetaʼi kia ia. (Gāue 16:15, 34; Filp. 4:15-17) Neʼe mole ina fakaloto mālohiʼi te ʼu tagata pea mo te ʼu fafine Kilisitiano ke nātou meʼa noaʼi ʼonatou ʼu maʼua faka famili kae nātou ʼolo ʼo fai faka mafola, kae, ke nātou fakafuafua peʼe feafeaʼi hanatou fai fakalelei ʼonatou ʼu maʼua kehekehe. Neʼe ina tokoniʼi nātou ke nātou gāue ʼaki ʼonatou ʼu nima, mo nātou ʼoʼofa ki ʼonatou famili pea mo vaevae fakalelei ki niʼihi ake. (Ef. 4:28; 2 Tes. 3:7-12; Tito 2:3-5) Neʼe ina toe ʼui age foki ke nātou tuku tanatou falala ki te ʼAtua, kae ʼaua naʼa nātou falala ki tonatou ʼu koloā fakamālama, pea ke nātou fakahā ʼi tonatou maʼuli ʼe nātou mahino ki te ʼu meʼa ʼo te maʼuli ʼaē ʼe ʼaoga tāfito. ʼO mulimuli ki te ʼu akonaki ʼa Sesu, neʼe tonu muʼa ke nātou ʼuluaki kumi te Puleʼaga ʼo te ʼAtua pea mo tana faitotonu.—Filp. 1:9-11.
Koutou Fakamuʼamuʼa Te Puleʼaga ʼi Tokotou Maʼuli
10. (a) Koteā koa te faka ʼuhiga ʼo te ‘ ʼuluaki kumi muʼa ʼo te Puleʼaga’? (b) Kae koteā te meʼa ʼe mole tonu ke tou meʼa noaʼi?
10 Ko temi koa e fia ʼe tou faka mafola ai te logo lelei ʼo te Puleʼaga ki te hahaʼi? ʼE fakalogo pe te faʼahi ʼaia ki totatou ʼu ʼaluʼaga, kae tāfito ki te loloto ʼo totatou loto fakafetaʼi. Ke tou manatuʼi, neʼe mole ʼui e Sesu: ‘Koutou kumi te Puleʼaga mokā ʼe mole ʼi ai he tahi meʼa ʼe koutou fai.’ Neʼe mole ina ʼui fēnei, ‘Kapau ʼe koutou tautau palalau ʼo ʼuhiga mo te Puleʼaga, kua koutou fai te ʼu meʼa fuli ʼaē ʼe ʼaoga.’ Peʼe neʼe mole ina ʼui fēnei, ‘Ke koutou faiva ʼi te ʼu meʼa ʼe ʼaoga ki te Puleʼaga; kae kapau ʼe hage ʼe tuai te hoko mai ʼo te Tuʼu Foʼou, koutou haga fai takotou gāue ki te ʼAtua kae ke lahi takotou faʼifaʼitakiʼi te maʼuli ʼo te hahaʼi ʼaē.’ ʼI tana ʼiloʼi lelei te maʼuhiga ʼo te Puleʼaga, neʼe fakamahino e Sesu te finegalo ʼo tana Tāmai ʼo ʼuhiga mo te faʼahi ʼaia, ʼo ina ʼui fēnei: “Koutou haga kumi tona puleʼaga.” Peʼe, ohage ko te ʼui ʼa te ʼapositolo ko Mateo: “Ke koutou haga kumi muʼa te puleʼaga pea mo tona faitotonu.” (Luka 12:31; Mat. 6:33) Logope la ʼe tokolahi ia tatou ʼe tou fakafuafua ʼe ʼaoga ke tou gāue ke feala ai hatatou maʼu he meʼa ʼe ʼaoga kia tatou pea mo totatou famili, kapau ʼe tou tui moʼoni, ʼe tou fakatafito anai totatou maʼuli ki te gāue ʼaē neʼe tuku mai e te ʼAtua ʼo ʼuhiga mo tona Puleʼaga. Kae ʼaua naʼa tou meʼa noaʼi totatou ʼu maʼua faka famili.—1 Tim. 5:8; Taag. 29:15.
11. (a) Ko te lea fakatātā fea ʼaē neʼe fakahā ai e Sesu ʼe mole feala ke tatau fuli ʼatatou ʼu gāue ki te faka mafola ʼo te Puleʼaga? (b) Koteā te ʼu meʼa ʼe tonu ke nātou fakatokagaʼi?
11 Ko ʼihi ia tatou ʼe feala ke lahi age te temi ʼaē ʼe nātou fakaʼaogaʼi ʼi te minisitelio ʼi ʼihi age. Kae, ʼi te lea fakatātā ʼa Sesu ʼo ʼuhiga mo te ʼu faʼahiga kele, neʼe ina fakahā ko te ʼu loto ʼaē ʼe fakatatau ki te kele lelei ʼe fua anai. Ko ʼona fua koa e fia? ʼE fakalogo pe ki te ʼuhiga ʼo te tagata takitokotahi. Ko te taʼu, te maʼuli mālōlō, pea mo te ʼu maʼua faka famili, ko te ʼu faʼahi fuli ʼaia ʼe ʼaoga ke fakatokagaʼi. Kae kapau ʼe ia tatou te loto fakafetaʼi moʼoni, ʼe lahi te ʼu gāue ʼe feala ke tou fai.—Mat. 13:19, 23.
12. Koteā te fakatuʼutuʼu fakalaumālie ʼe tonu ke fakakaukauʼi e te kau tūpulaga?
12 ʼE lelei hatatou fai he ʼu fakatuʼutuʼu ke feala ai hatatou kau katoa ki te minisitelio ʼo te Puleʼaga. ʼE feala ke metitasioʼi e te kau tūpulaga ia te faʼifaʼitaki lelei ʼo te tūpulaga Kilisitiano faiva ʼaē ko Timoteo. (Filp. 2:19-22) ʼE ʼi ai koa he tahi meʼa ʼe lelei age, ʼi tanatou gāue katoa ʼi te minisitelio ʼi te ʼosi ʼo tonatou temi ako? Ko nātou ʼaē kua matutuʼa, ʼe toe ʼaoga anai mo nātou ke nātou fai hanatou ʼu fakatuʼutuʼu fakalaumālie.
13. (a) Ko ai ʼaē ʼe feala ke ina fakafuafua te meʼa ʼe koutou lavaʼi takitokotahi ʼi te gāue ki te ʼAtua? (b) Kapau ʼe tou kumi moʼoni te Puleʼaga ʼo te ʼAtua, koteā anai te meʼa ka tou fakahā?
13 Ke ʼaua naʼa tou fatufatuʼi ia nātou ʼaē, ʼe tou ʼui ʼe feala ke lahi te fai ʼo tanatou gāue, ʼe tonu ke uga tatou e tatatou tui, ke feala hatatou tuputupu ʼi te gāue ki te ʼAtua, ʼo mulimuli pe ki te ʼu meʼa ʼaē ʼe feala ke tou fai. (Lom. 14:10-12; Kal. 6:4) Ohage ko tona hā mai ʼi te hisitolia ʼo Sopo, ʼe ʼui e Satana ʼe tou tokaga tāfito ki ʼotatou ʼu koloā, totatou ʼu lelei fakamālama pea mo te ʼu meʼa ʼaē ʼe ʼaoga ki totatou maʼuli, pea ko te meʼa ʼaē ʼe ina uga tatou ke tou tauhi ki te ʼAtua, ko tatatou manatu pe ʼaē kia tatou. Kae kapau ʼe tou ʼuluaki kumi muʼa te Puleʼaga ia meʼa fuli, ʼe tou kau anai ki te fakamoʼoni ʼaē ko te Tevolo ʼe gutuloi. ʼE tou fakahā ai leva ko te meʼa ʼaē ʼe tou fakamuʼamuʼa ʼi totatou maʼuli, ʼe mole ko te ʼu koloā fakamālama, pe ko te ʼu meʼa ʼaē ʼe ʼaoga ki totatou maʼuli, kae ko te gāue ʼaē ki te ʼAtua. Ko ʼatatou ʼu palalau pea mo tatatou ʼu aga, ʼe fakahā ai te loloto ʼo totatou ʼofa kia Sehova, ʼo tatatou lagolago faitotonu ki tana pule faʼitaliha pea mo totatou ʼofa ki te hahaʼi.—Taag. 27:11; Sopo 1:9-11; 2:4, 5.
14. (a) He koʼe ʼe ʼaoga ke tou fai he polokalama ʼo ʼuhiga mo tatatou fai faka mafola? (b) Ko temi e fia ʼe fakaʼaogaʼi e te kau Fakamoʼoni ʼi te minisitelio, pea koteā tona tupuʼaga?
14 Ko he polokalama lelei ʼe feala ke tokoni kia tatou ke lahi tatatou gāue. ʼE ʼi ai te “temi kua fakakatofa” e Sehova moʼo fakahoko tana fakatuʼutuʼu, pea ʼe lelei ke tou faʼifaʼitaki ki ai. (Ek. 9:5; Maleko 1:15; Kal. 4:4) Kapau ʼe feala, ʼe lelei hatatou kau ki te minisitelio ʼo tuʼa tahi peʼe tuʼa lahi ʼi te vāhaʼa fuli ʼi he temi kua kita fakatuʼutuʼu kiai. ʼI te malamanei katoa, neʼe lauʼi hogofulu afe te kau Fakamoʼoni ʼa Sehova neʼe pionie vaeluaʼi temi, pea neʼe nātou fai hola e lua ʼi te ʼaho peʼe laka atu ʼi te fai faka mafola. Ko ʼihi ʼe nātou pionie hoholo; pea ko ʼihi ʼe nātou fai ʼo tuʼa lahi ʼi te taʼu. Ko te hahaʼi ʼe lauʼi afe ʼe nātou pionie katoa, ʼo nātou fakaʼaogaʼi te ʼu hola e tolu ʼi te ʼaho moʼo faka mafola te logo ʼo te Puleʼaga. Ko ʼihi ʼe pionie makehe peʼe misionea, pea ʼe lahi ʼaupito tonatou temi ʼe nātou fakaʼaogaʼi ʼi te gāue ki te Puleʼaga. Pea ʼe feala ke tou kumi he ʼu faigamālie ke tou fakahā ai te Puleʼaga ʼi te temi fuli pe kia nātou ʼaē ʼe fia logo. (Vakaʼi ia Soane 4:7-15.) ʼE tonu kia tatou fuli ke tou fakakaukau fakalelei ki te maʼuhiga ʼo te lea faka polofeta ʼaē neʼe ʼui e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” Ko totatou loto, ke tou kau katoa ki te gāue ʼaia mokā ʼe faigamālie tatatou fai te faʼahi ʼaia.—Mat. 24:14; Ef. 5:15-17.
15. ʼO ʼalutahi mo totatou minisitelio, he koʼe ʼi takotou manatu ʼe tō lelei te tokoni ʼaē ia 1 Kolonito 15:58?
15 ʼI te ʼu koga kehekehe ʼo te kele, ʼi te ʼu fenua ʼe nātou maʼuʼuli ai, ko te kau Fakamoʼoni ʼa Sehova ʼe nātou gāue mālohi ʼo fakahoko te pilivilesio lahi ʼaia ʼi te logo tahi. ʼE nātou fakaʼaogaʼi kia nātou totonu te tokoni faka Tohi-Tapu ʼaenī ʼaē ʼe haʼu mai te ʼAtua: “Koutou lotomālohi, ke ʼaua naʼa koutou higa, ʼo fai ke lahi tuʼumaʼu takotou ʼu gāue ʼi te gāue ʼo te ʼAliki, heʼe koutou ʼiloʼi ko takotou gāue ʼe mole vaʼiganoa ʼo ʼuhiga mo te ʼAliki.”—1 Ko. 15:58.
Toe Fakamanatu
● ʼI te ʼui ʼaē e Sesu ke kumi muʼa te Puleʼaga, koteā koa ʼaē ʼe tonu ke tou tuku ki muli?
● E feafeaʼi hatatou maʼu te ʼu meʼa ʼaē ʼe ʼaoga kia tatou pea mo totatou famili? Koteā koa te tokoni ʼe foaki mai anai e Sehova ʼo ʼuhiga mo te faʼahi ʼaia?
● Kapau ʼe tou kau ki te faka mafola ʼo te Puleʼaga, ʼe maʼuhiga koa te temi ʼaia? Koteā tona tupuʼaga?