Kapite 15

E Feafeaʼi Koa Te Takitaki e Sehova Tana Kautahi?

1. Koteā te talanoa ʼa te Tohi-Tapu ʼo ʼuhiga mo te kautahi ʼa te ʼAtua, pea he koʼe ʼe maʼuhiga kia tatou?

ʼI TE Tohi-Tapu katoa, neʼe fakahā mai e Sehova tana kautahi fakatalakitupua ʼaē ʼi selo. (Is. 6:2, 3; Esk. 1:1, 4-28; Tan. 7:9, 10, 13, 14) Logope la ʼe mole feala hatatou sisio ki te ʼu laumālie, ʼe ina fakakatokagaʼi tatou ki te mālohi ʼo te gāue ʼa te kau ʼaselo maʼoniʼoni ki te kau atolasio moʼoni ʼi te kele. (Sen. 28:12, 13; 2 Hau 6:15-17; Pes. 34:7; Mat. 13:41, 42; 25:31, 32) ʼE fakamatala e te Tohi-Tapu te koga fakahāhā ʼo te kautahi ʼo Sehova pea mo tokoni kia tatou ke tou mahino peʼe feafeaʼi tana takitaki. Kapau ʼe ia tatou he ʼatamai fakalaumālie ʼo ʼuhiga mo te ʼu meʼa ʼaia, ko te faʼahi ʼe tokoni anai kia tatou ke ‘mata feʼauga tatatou haʼele mo Sehova, ke tou lelei ʼaupito kia ia.’ — Kol. 1:9, 10.

Ko Te ʼIloʼi ʼo Tona Koga Fakahāhā

2. Neʼe ko ai te kokelekasio ʼo te ʼAtua talu mai te Penikosite ʼo te taʼu 33 ʼo totatou temi?

² Lolotoga taʼu e 1 545, ko te puleʼaga ʼo Iselaele neʼe ko te kokelekasio ʼa te ʼAtua. Kae neʼe mole nātou taupau te fuakava ʼo te Lao pea neʼe nātou fakafisi ki te ʼAlo totonu ʼo te ʼAtua. Koia ʼaē neʼe fakatuʼutuʼu ai e Sehova te kokelekasio foʼou, ʼo ina fai mo ia te fuakava foʼou. Ko te kokelekasio ʼaia, ʼe fakahigoa ʼi te Tohi-Tapu ko te “ ʼohoana” ʼo Kilisito, ʼe faʼufaʼu e te toko 144 000 hahaʼi neʼe fili e te ʼAtua ke nātou fakatahi mo tona ʼAlo ʼi te lagi (Efesi 5:22-32; Fakahā 14:1; 21:9, 10) Ko te ʼu ʼuluaki hahaʼi neʼe fakanofo e te laumālie maʼoniʼoni ʼi te Penikosite ʼo te taʼu 33 ʼo totatou temi. ʼAki tona laumālie maʼoniʼoni, neʼe foaki age e Sehova te fakamoʼoni ko te kokelekasio foʼou ʼaia, ka ina fakaʼaogaʼi anai moʼo fakahoko ʼo tana fakatuʼutuʼu.—Hepeleo 2:2-4.

3. Ko ai ʼaē ʼe nātou faʼufaʼu ia te kautahi fakahāhā ʼo Sehova ʼi te temi nei?

³ ʼI te temi nei, ko te toe ʼo te 144 000 ʼe kei nonofo nei ʼi te kele. Kae, ʼo mulimuli ki te ʼu lea faka polofeta, ko te toe hahaʼi tokolahi ʼo te “tahi ʼu ōvi” neʼe ʼōmai ʼo gāue fakatahi mo nātou. Ko Sesu Kilisito, te Tagata Tauhi ōvi Lelei, neʼe ina fakatahiʼi te “tahi ʼu ōvi” pea mo te toe ʼo tana ʼu tisipulo ʼaē neʼe fakanofo ʼaki te laumālie, ke feala hanatou fakatahi ko te “faga ōvi e tahi” ʼo fakalogo ki te “Tagata tauhi ōvi e tahi.” (Soane 10:11, 16; Fakahā 7:9, 10) ʼO nā fakatahi ai ko te kautahi e tahi ʼi te logo tahi, ko te kautahi fakahāhā ʼo Sehova ia ʼaho nei.

Te ʼu Fakatuʼutuʼu Faka Teokalatike

4. Ko ai ʼaē ʼe ina takitaki te kautahi ʼaia, pea ʼe feafeaʼi?

⁴ Ko te kupu ʼaē ʼe fakaʼaogaʼi e te Tohi-Tapu “ko te kokelekasio ʼo te ʼAtua maʼuli” ʼe ʼiloga ai ia ia ʼaē ʼe ina takitaki. Ko te kautahi faka teokalatike, peʼe takitaki e te ʼAtua. ʼE takitaki e Sehova tana hahaʼi, ʼaki ia ia ʼaē neʼe ina fakanofo ko te pule fakapulipuli ʼo te kokelekasio, ia te ʼAliki ko Sesu Kilisito, pea mo Tana Folafola ʼaē ko te Tohi-Tapu. — 1 Timoteo 3:14, 15; Efesi 1:22, 23; 2 Timoteo 3:16, 17.

5. a) Koteā ʼaē ʼe ʼiloga ai neʼe takitaki te kokelekasio faka kilisitiano ʼi te ʼuluaki sēkulō mai te lagi? b) Koteā ʼaē ʼe ʼiloga ai ʼe kei Pule tuʼumaʼu pe ia Sesu ki te kokelekasio?

⁵ Ko te taʼi takitaki faka teokalatike ʼaia, neʼe lahi tona ʼiloga ʼi te Penikosite ʼo te taʼu 33 ʼo totatou temi, ʼi te temi neʼe uga ai e te laumālie maʼoniʼoni ia te ʼu ʼuluaki hahaʼi ʼo te kokelekasio ke nātou fai te gāue. (Gāue 2:1-4, 32, 33) Neʼe toe ʼiloga foki ʼi te temi ʼaē neʼe taki ai e te ʼaselo ʼa Sehova te ʼu faʼahiga ʼaluʼaga kehekehe ke aʼu te logo lelei ki Afelika. (Gāue 8:26-39) ʼO feia ʼaipe ʼi te temi ʼaē neʼe foaki ai e Sesu te ʼu fakatotonu ʼo ʼuhiga mo te maliu ʼa Saulo ʼo Talesi ʼo kau ki te kau Kilisitiano, pea mo te kamata ʼo te gāue faka misionea ki te kau Senetile. (Gāue 9:3-7, 10-17; 10:9-16, 19-23; 11:12) Kae, ko te ʼu fakatotonu ʼaoga ki te fakaʼaluʼalu lelei ʼo te kokelekasio neʼe mole fēnei tuʼumaʼu tona foaki ifo. Ki muli mai, neʼe mole kei logo leva te ʼu leʼo mai te lagi, mole kei hā te kau ʼaselo ki te tagata pea neʼe mole kei ʼi ai he ʼu meʼa ʼofa faka milakulo neʼe fakahoko e te laumālie. Kae, neʼe fakapapau age e Sesu ki tana kau tisipulo agatonu: “Koʼeni ʼe ʼau nofo mo koutou ʼi te ʼaho fuli, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī,” pea, ʼe hā mai ʼi te ʼu meʼa fuli ʼe nofo ia mo tatou. (Mateo 28:20; 1 Kolonito 13:8) ʼE mole gata ʼaki pe ʼi te ʼiloʼi ʼaē e te kau Fakamoʼoni ʼa Sehova tana pule, kae ʼe hā lelei mai neʼe mole feala ke hoko tanatou faka mafola te logo ʼo te Puleʼaga ʼo nātou tauʼi te fakafeagaʼi mokā na pau neʼe mole tokoni ia Sesu kia nātou.

6. a) Ko ai ʼaē ʼe nātou faʼufaʼu te “tagata kaugana agatonu mo poto”, pea koteā tona tupuʼaga? b) Koteā te gāue neʼe foaki age e Sesu ki te “kaugana” ʼaia?

⁶ ʼI te kiʼi temi siʼisiʼi ʼi muʼa ʼo te mate ʼo Sesu, neʼe palalau Sesu ki tana kau tisipulo ʼo ʼuhiga mo te “tagata kaugana agatonu mo poto”, heʼe ʼi tona ʼuhiga Takitaki, ʼe ina foaki anai ki ai te ʼu maʼua makehe. Ko te “kaugana” ʼaia ʼo mulimuli pe ki te fakamatala ʼa Sesu, e hā ʼi te temi ʼaē ʼe hake ai te ʼAliki ki selo, pea ʼi te liliu mai ʼa Kilisito ʼe kei maʼuli ʼaipe. Ko te taʼi fakamatala ʼaia ʼe mole feala ke faka ʼuhiga ki he tagata moʼoni. Kae, ko te fakamatala ʼa Kilisito ʼe faka ʼuhiga ki te kokelekasio, ia te kau tisipulo agatonu katoa ʼaē neʼe fakanofo e te laumālie. ʼI te ʼiloʼi ʼaē e Sesu ka ina totogi anai nātou ʼaki tona taʼataʼa totonu, neʼe totonu ke fakatātā e Sesu ia nātou fulifuli ohage ko tana “kaugana.” Neʼe ina foaki age kia nātou te gāue, ke nātou fai he ʼu tisipulo, pea mo fafaga mamalie ia nātou ʼi te faʼahi fakalaumālie, ko tona faka ʼuhiga ke nātou foaki kia nātou “hanatou meʼa kai [fakalaumālie] ʼi tona temi totonu.” Neʼe fakamoʼoni tanatou gāue e te laumālie maʼoniʼoni ʼi te Penikosite ʼi te taʼu 33 ʼo totatou temi. — Mateo 24:45-47; 28:19, 20; 1 Kolonito 6:19, 20; vakaʼi ia Isaia 43:10.

7. a) Koteā te ʼu maʼua lahi ʼe fakahoko e te “kaugana” ia ʼaho nei? b) He koʼe ʼe tonu ke tou fakamaʼuhigaʼi te akonaki ʼe foaki mai e te kaugana ʼaia?

⁷ Kapau ʼe fai fakalelei e te “kaugana” tana gāue, ʼe foaki anai ki ai te ʼu maʼua maʼuhiga age ʼi te liliu mai ʼo tona Pule. ʼI te ʼu taʼu ki muli mai, neʼe fai te fagonogono ʼi te malamanei katoa ʼo ʼuhiga mo te Puleʼaga pea ko te “toe hahaʼi tokolahi” kau atolasio kia Sehova, neʼe tātānaki ke nātou hāofaki ʼi te toe “mamahi lahi.” (Mateo 24:14; Fakahā 7:9, 10) Ko nātou foki ʼaia, ʼe ʼaoga kia nātou te meʼa kai fakalaumālie, pea ʼe foaki age anai e te “kaugana,” te kau kaugana ʼa Kilisito neʼe fakanofo ʼaki te laumālie maʼoniʼoni. Ke leleiʼia tatou e Sehova, ʼe tonu ke tou taupau tana akonaki ʼaē, ʼe ina foaki mai, ʼaki tana fakafofoga ʼaia pea ke tou taupau ʼi totatou maʼuli.

8, 9. a) ʼI te ʼuluaki sēkulō, ko ai ʼaē neʼe fakatotonuʼi ke ina fakatokatoka te ʼu fihi ʼo ʼuhiga mo te tauhi, pea mo fai he ʼu fakatuʼutuʼu ʼe ʼaoga moʼo faka mafola ʼo te logo lelei? b) Koteā te ʼu fakatuʼutuʼu ia ʼaho nei ʼe tatau mo te ʼuluakki sekulo?

⁸ ʼI ʼihi temi, ʼe feala ke malaga he ʼu fehuʼi ʼo ʼuhiga mo he faʼahiga tauhi peʼe ko he ʼu fakatuʼutuʼu. Koteā anai te meʼa ke fai? Ko te kapite 15 ʼo te tohi Gāue ʼe ina fakamatala mai pe neʼe feafeaʼi te fakatokatoka ʼo te fihi ʼo ʼuhiga mo te ʼu meʼa neʼe tonu ke fai e te kau Senitile ʼaē neʼe kua nātou tali te moʼoni. Neʼe ʼave te fihi ʼaia ki te kau ʼapositolo pea mo te ʼu tagata ʼāfea ʼo Selusalemi, he neʼe ko nātou ʼaē ʼe nātou faʼufaʼu te kolesi pule. Ko te ʼu tagata ʼāfea ʼaia, neʼe mole haohaoa; neʼe mole ko he ʼu tagata neʼe hāo mai te hala. (Vakaʼi ia Kalate 2:11-14.) Kae, neʼe fakaʼaogaʼi nātou e Sehova. Neʼe nātou vakaʼi, peʼe koteā te tali ʼa te Tohi-Tapu ki te fihi ʼaia pea mo nātou mulimuli ki te gāue ʼa te laumālie maʼoniʼoni, ʼaē neʼe ina avahi te gāue faka Kilisitiano ki te kau Senitile, pea nātou fakahā ai tanatou tonu. Neʼe tapuakina e te ʼAtua te faʼahiga fai ʼaia. (Gāue 15:1-29; 16:4, 5) Neʼe fekauʼi e te kolesi pule niʼihi ke nātou faka mafola ʼo te logo lelei, ʼo mulimuli ki te fakatotonu ʼa te ʼAliki. — Gāue 8:14; Kalate 2:9.

⁹ Ia ʼaho nei, ko te Kolesi pule ʼe faʼufaʼu ʼaki te ʼu tēhina fakanofo e te laumālie maʼoniʼoni mai te ʼu fenua kehekehe. ʼE nofo ʼi te Fale lahi ʼo te kau Fakamoʼoni ʼa Sehova ʼo te malamanei. ʼE kaugana agatonu ki te ʼu meʼa ʼe ʼaoga ki te tauhi maʼa ʼaki te pule ʼa Sesu Kilisito. Ko te ʼu tēhina ʼaē ʼe nātou faʼufaʼu te kolesi pule, ʼe nātou manatu tahi mo te ʼapositolo ko Paulo, ʼi tana tokoni fakalaumālie neʼe ina foaki ki tona ʼu tēhina Kilisitiano, ʼo ʼui maʼana: “ ʼE mole mātou pule ki takotou tui, kae ʼe mātou kaugāue mo koutou ʼo ʼuhiga mo takotou fakafiafia, heʼe ko takotou tui ʼaē ʼe koutou tuʼu ai.” — 2 Kolonito 1:24.

10. a) ʼE feafeaʼi koa te fili ʼo te ʼu tagata ʼāfea pea mo te ʼu tagata faifekau faka minisitelio? b) He koʼe ʼe tonu ke tou lagolago fakalelei kia nātou ʼaē neʼe hinoʼi ki te ʼu tuʼulaga ʼaia?

¹⁰ Ko te kau Fakamoʼoni ʼa Sehova ʼi te malamanei ʼe nātou ʼiloʼi te fakatuʼutuʼu faka teokalatike ʼaenī. Ko ʼanatou ʼu kokelekasio fuli ʼe nātou gāue tahi mo ia. ʼE nātou tuku ki te Kolesi pule te maʼua tāfito ʼaē, ko te fakanofo ʼo te ʼu tagata ʼāfea pea mo te ʼu tagata faifekau faka minisitelio ke nātou tokakaga ki te fakahaʼele ʼo te ʼu kokelekasio. ʼE fakatafito kitea te fili ʼo te ʼu tagata ʼaē ke nātou fakahoko te tuʼulaga ʼaia? Ko te ʼu faʼahi ʼaia ʼe tuʼu ʼi te Tohi-Tapu. Ko te ʼu tagata ʼāfea ʼaē ʼe nātou hinoʼi niʼihi pea mo nātou ʼaē ʼe fakanofo ki te tuʼulaga ʼaia, ʼe nātou maʼu te maʼua mamafa ia muʼa ʼo te ʼAtua ʼaē ko te muliʼi ʼo te ʼu meʼa ʼaē ʼe tonu ke nātou maʼuliʼi. (1 Timoteo 3:1-10, 12, 13; 5:22; Tito 1:5-9) ʼE mole fai he vote ʼi te kokelekasio. Kae, ʼo mulimuli ki te meʼa neʼe fai e te kau ʼapositolo ʼi te ʼuluaki sēkulō, ko te ʼu tagata taupau ʼaē neʼe nātou fili niʼihi ke fakanofo pea mo nātou ʼaē ʼe nātou fai te ʼu fakanofo ʼe tonu ke nātou faikole, ke nātou maʼu te tokoni ʼa te laumālie ʼo te ʼAtua pea mo nātou kumi te taki ʼe haʼu mai Tana Folafola. (Gāue 6:2-4, 6; 14:23; vakaʼi ia Pesalemo 75:6, 7.) ʼAki tatatou tali ki te ʼu tonu ʼa te ʼu tagata ʼāfea, ʼe tou fakahā anai, ʼe tou fakamaʼuhigaʼi te ʼu “meʼa ʼofa ʼaē ko te ʼu tagata” neʼe foaki mai e Kilisito ʼaki tona ʼofa, moʼo tokoniʼi ʼo tatou ke tou kaku ki te “logo tahi ʼo te tui.” — Efesi 4:8, 11-16.

11. a) Koteā koa te tuʼulaga maʼuhiga ʼo te ʼu fafine ʼi te fakatuʼutuʼu faka teokalatike? b) Ko te temi fea ʼaē ʼe tonu ke pūlouʼi ai ʼonatou ʼulu, pea koteā tona tupuʼaga?

¹¹ ʼE fakahā fakalelei mai e te Tohi-Tapu, ʼi te kokelekasio ko te ʼu gāue ʼo ʼuhiga mo te taupau ʼe fai e te ʼu tagata. Kae ʼe mole meʼa noaʼi te ʼu fafine, heʼe tokolahi ia nātou ʼe kau ki te ʼu tofiʼa ʼo te Puleʼaga ʼi selo. ʼAki tanatou agavaivai pea mo fakapoipoi, pea mo tanatou gāue fakamalotoloto ki tonatou famili, ʼe kau foki te ʼu fafine Kilisitiano ki te faka haʼele lelei ʼo te kokelekasio. (Tito 2:3-5) ʼE lahi tanatou kau ki te gāue ʼaē ko te kumi ʼo te hahaʼi ʼaē ʼe fia logo pea mo tokoni kia nātou ke nātou ʼiloʼi te kautahi. (Pesalemo 68:11) Kae, ko te akonaki ʼaē ʼe fai ʼi te kokelekasio, ʼe tonu ke fai e te ʼu tagata neʼe fili ki te gāue ʼaia. (1 Timoteo 2:12, 13) Pea kapau ʼe mole ʼi ai he tagata ʼe nofo ʼi te fakatahi ʼe fealagia ki te ʼu meʼa ʼaia, ʼe feala anai ke takitaki e he fafine te fono, pea mo ina fai te faikole, kae ʼe tonu ke ina pūlouʼi tona ʼulua. ʼAki tana aga ʼaia, ʼe ina fakahā anai tana fakaʼapaʼapa ki te fakatuʼutuʼu neʼe fai e Sehova, ʼo muliʼi te faʼifaʼitaki ʼa Sesu neʼe ina foaki age ki te kau Kilisitiano fuli ohage ko tana fakalogo totonu ki tana Tāmai. — 1 Kolonito 11:3-16; Soane 8:28, 29.

12. a) ʼO mulimuli ki te Tohi-Tapu, ʼe feafeaʼi te faka ʼuhiga e te ʼu tagata ʼāfea ʼonatou tuʼulaga? b) Koteā te pilivilesio ʼe tou kau fuli kiai?

¹² ʼI te mālama ʼaenī, ko te tagata ʼaē ʼe maʼu tuʼulaga ʼe tokagaʼi ia ohage he tagata maʼuhiga, kae, ko te kautahi ʼo te ʼAtua ʼe mulimuli ki te fakatuʼutuʼu ʼaenī: “Ko ʼaē ia koutou fuli ʼe hage ko he kiʼi tamasiʼi, ʼe ko ia ia ʼaē ʼe lahi.” (Luka 9:46-48; 22:24-26) Koia ʼe tokoniʼi e te Tohi-Tapu te ʼu tagata ʼāfea, ke ʼaua naʼa nātou puleʼi fakakinau ia nātou ʼaē ko te ʼu koloā ʼo te ʼAtua, kae ke nātou liliu ko ni ʼu faʼifaʼitaki ki te faga ōvi. (1 Petelo 5:2, 3) Ko te kau Fakamoʼoni ʼa Sehova, tagata mo fafine, ʼe nātou maʼu te pilivilesio fakafiafia ʼaē ko te fakafofoga ʼo te Tuʼi ʼo te atulaulau, mo palalau ki tona huafa ʼaki he agavaivai pea mo fakahā tona Puleʼaga ʼi te potu fulipe.

13. ʼAki te fakaʼaogaʼi ʼo te ʼu vaega ʼe tuʼu ʼi henī, koutou tali ki te ʼu fehuʼi ʼaē ʼe tuʼu ʼi lalo ʼo te palakalafe.

¹³ ʼE tonu foki ke tou fakakaukau te meʼa ʼaenī: “ ʼE tou leleiʼia koa te taki e Sehova ʼo tana kautahi fakahāhā? Ko tatatou ʼu aga, mo ʼatatou ʼu palalau, pea mo ʼatatou ʼu gāue, ʼe hā ai koa te faʼahi ʼaia?” Tou fakakaukauʼi muʼa te ʼu puani ʼe hoa mai, ʼaē ʼe feala ke tokoni kia tatou takitokotahi:

Kapau ʼe tou fakalogo lelei kia Kilisito, te Pule ʼo te kokelekasio, koteā koa te meʼa ʼe tonu ke tou fai, ohage ko tona ʼui mai e te ʼu vaega ʼaenī? (Mateo 24:14; 28:19, 20; Luka 21:34-36; Soane 13:34, 35)

Kapau ʼe fia maʼu e te kau Kilisitiano he ʼu fua, ʼe tonu ke feafeaʼi koa tanatou falala ki te ʼAtua pea mo Kilisito? (Soane 15:5; 1 Kolonito 3:5-7)

Mokā fakatonutonuʼi e te ʼu tagata ʼāfea te ʼu faʼahiga manatu ʼa ʼihi ke ʼalu tahi mo te toe ʼo te kautahi, ʼe tonu anai ke fakaʼaogaʼi te ʼu tokoni ʼaia ko he ʼu meʼa ʼofa mai ia ai? (Efesi 4:7, 8, 11-13; 2 Kolonito 13:11)

Kapau ʼe tou tali leleiʼi ʼaki he loto fakafetaʼi te ʼu meʼa kai fakalaumālie ʼaē ʼe foaki mai e te kalasi ʼo te “kaugana” pea mo tana Kolesi pule, ko ai ʼaē ʼe tou fakaʼapaʼapa ki ai? Kae ʼe feafeaʼi anai mokā tou fai kiai he ʼu palalau ʼe mole lelei? (Luka 10:16; vakaʼi ia 3 Soane 9, 10)

He koʼe ʼe mole tonu ke tou fatufatuʼi te ʼu tagata ʼāfea? (Gāue 20:28; Loma 12:10)

14. a) ʼI tatatou aga ki te kautahi faka teokalatike, koteā ʼaē ʼe ʼiloga ai? b) ʼI te potu ʼaia, ko te faigamalie fea ʼe tou fakahā ai ko te Tevolo ʼe gutu loi pea mo tou fakafiafia te loto ʼo Sehova?

¹⁴ ʼE tokaga ia Sehova kia tatou ʼaki tona kautahi fakahāhā, ʼaē ʼe pule kiai Kilisito. Koia ko tatatou aga ki te kautahi ʼaia, ʼe ʼiloga ai tatatou lagolago ki ta,a pule. (Hepeleo 13:17) Neʼe ʼui e Satana ʼe tou ʼuluaki faiga pe kia tatou, kae, kapau ʼe tou fakahā ʼe tou loto lelei ʼi te fai ʼo he faʼahiga gāue ʼe ʼaoga, ʼo mole tou faiga pe kia tatou totonu, ʼe tou fakahā anai ko te Tevolo ʼe gutu loi. Kapau ʼe tou ʼoʼofa pea mo fakaʼapaʼapa kia nātou ʼaē ʼi ‘ ʼotatou ʼulu,’ ʼo tou faʼifaʼitaki ki tanatou tui kae ke tou fakafisi naʼa tou hage ko nātou ʼaē ‘ ʼe nātou vikiviki he ʼu tagata ke nātou maʼu ai hona fua lelei,’ kae tou fakafiafia ia te loto ʼo Sehova. (Hepeleo 13:7; Suta 16) ʼAki tatatou fakaʼapaʼapa ki te kautahi ʼa Sehova pea mo tatatou gāue mo te loto katoa ʼi te gāue ʼaē ʼe ina takitaki, ʼe tou fakamoʼoni anai ko Sehova ko totatou ʼAtua moʼoni, pea ʼe tou logo tahi ʼi tana tauhi. — 1 Kolonito 15:58.

[Nota]

Toe Fakamanatu

● Ko ai koa te kautahi fakahāhā ʼa Sehova ʼi te temi nei? Koteā te fakatuʼutuʼu ʼo te kautahi ʼaia?

● Ko ai ʼaē neʼe fakanofo ko te pule ʼo te kautahi ʼaia? Koteā te ʼu meʼa fakahāhā ʼe ina foaki mai ai te ʼu tokoni ʼofa?

● Koteā te ʼu aga lelei ʼe tonu ke tou fai ʼo ʼuhiga mo totatou ʼu maʼua pea mo ʼihi ʼi te kautahi?