Maio

ʼI te ʼuluaki sekulo neʼe mole hao te ʼu ʼuluaki Kilisitiano ʼi te “toe hoge lahi ʼi te kele katoa.” Neʼe lagi tuʼania te ʼu pule famili pe ʼe feafeaʼi hanatou fafaga tonatou kiʼi famili. Pea neʼe feafeaʼi ki te kau tupulaga ʼae neʼe natou fakatuʼutuʼu ke lahi age tanatou faifakamafola? Neʼe lagi natou manatu ke ʼosi muʼa te hoge pea natou fakahoko tanatou fakatuʼutuʼu ʼaia. Kotea pe te aluʼaga ʼo te ʼu ʼuluaki Kilisitiano ʼaia, kae neʼe natou fai ni fetogi. Neʼe hoko atu tanatou faifakamafola ʼo mulimuli ki ʼonatou fealagia, pea neʼe natou vaevae ʼonatou koloa mo te ʼu tehina mo tuagaʼane ʼo Sutea. (Gaue 11:​29, 30) Ko natou ʼae neʼe fai ki ai te ʼu tokoni neʼe natou sio ki te tokaga age ʼa Sehova. (Mat. 6:​31-33) Neʼe toe malohi age ai ʼanatou felogoi mo te ʼu tehina mo tuagaʼane ʼae neʼe tokoni age. Pea ko natou ʼae neʼe foaki meʼa ʼofa ʼo feia mo natou ʼae neʼe natou ʼave te ʼu meʼa ʼofa ʼaia, neʼe fiafia ʼi tanatou foaki.—Gaue 20:35. w23.04 16 ¶12-13

ʼI ʼihi temi, ʼe tali Sehova ki te ʼu faikole ʼo ʼana kaugana ʼaki hana uga ni hahaʼi ʼe mole tauhi kia te ia ke tokoni kia natou. Ohage la neʼe ina uga te Hau ko Aletasese ke ina tuku age ia Neemia ke liliu ki Selusalemi ʼo toe laga te kolo. (Nee. 2:​3-6) ʼO toe feia ia ʼaho nei, ʼe feala ke uga e Sehova ni hahaʼi ʼe mole tauhi kia te ia ke tokoni mai kia tatou. ʼI te agamahani, ʼe mole tali Sehova ki ʼatatou faikole ʼi hona aluʼaga fakaofoofo. Kae ʼe tali moʼoni mai, ʼo ina foaki mai te tokoni ʼae ʼe ʼaoga ke tou nofo agatonu kia te ia. Koia, faiga ke ke mahino ki te faʼahiga tali atu ʼa Sehova ki ʼau faikole. Tou toʼo he temi ke tou fakakaukauʼi ai ki te faʼahiga tali ʼa Sehova ki ʼakotou faikole. (Pes. 66:​19, 20) ʼE tou fakaha tatatou tui moka tou faikole kia Sehova. Pea ʼe tou toe fakaha tatatou tui moka tou tali te faʼahiga tokoni mai ʼa Sehova.—Hep. 11:6. w23.05 11 ¶13; 12 ¶15-16

ʼI te ʼaho ʼae neʼe tou foaki ai totatou maʼuli kia Sehova, neʼe tou fakapapau ai ke tou tauhi kia te ia pea mo fai tona finegalo. ʼE tonu ke tou fakahoko tatatou fakapapau ʼaia. ʼE ko hotatou maʼua maʼuhiga ʼaia kae ʼe mole ko he kavega. ʼEi, ʼe mole faigataʼa tona fakahoko he neʼe fakatupu tatou e Sehova ke tou fai tona finegalo. (Fkha. 4:11) Neʼe ina ʼai ki ʼotatou loto te fia iloʼi ʼae pe ko ai ia ia pea mo tauhi kia te ia. Neʼe ina toe fakatupu foki tatou ki tona pāki. Koia, ʼe feala ai ke tou fakaovi kia te ia pea mo tou fiafia ʼi te fai ʼo tona finegalo. Tahi ʼae, ko te fai ʼo tona finegalo pea mo mulimuli ki tona ʼAlo, ʼe tou maʼu ai “he fakafimalie.” (Mat. 11:​28-30) Koia fakamalohi tou ʼofa ʼae kia Sehova ʼaki tau metitasio ki te ʼu meʼa lelei fuli ʼae neʼe fai e Sehova, mo ʼae ʼe ina fai pea mo ina fai anai maʼa koe. Ka tuputupu tou ʼofa ʼae ia Sehova, ʼe toe faigafua age anai tau fakalogo kia te ia. (1 Soa. 5:3) Neʼe lava fakahoko e Sesu te finegalo ʼo Sehova he neʼe kole tokoni kia te ia pea neʼe ina manatuʼi tuʼumaʼu tana fakapale. (Hep. 5:7; 12:2) Ohage ko Sesu, kole kia Sehova te malohi pea mo ke manatuʼi tuʼumaʼu te ʼamanaki, ia te maʼuli heʼe gata. w23.08 27-28 ¶4-5

ʼE tou leleiʼia fuli te hahaʼi ʼae ʼe kataki fualoa. ʼE tou fakaʼapaʼapa kia natou ʼae ʼe mole iita moka natou atalitali. ʼE tou fiafia moka ʼe kataki fualoa niʼihi kia tatou moka tou fai ni lakahala. Pea ʼe tou lotofakafetaʼi ki te kataki fualoa ʼa ia ʼae neʼe ina fai tatatou ako Tohi-Tapu. ʼE moʼoni tokolahi ia tatou neʼe faigataʼa hatatou mahino, mo tali pea mo maʼuliʼi ʼihi moʼoni ʼi te Tohi-Tapu. ʼE tou toe lotofakafetaʼi tafito ki te kataki fualoa ʼa Sehova kia tatou! Koia ʼe tou leleiʼia ke kataki fualoa mai ʼihi kia tatou. Kae ʼe faigataʼa koa kia tatou tatatou kataki fualoa? Ohage la, ʼe tou kamata ita koa moka ʼe maʼua ke tou fakaʼatu ʼo atalitali fualoa, tafito la moka kua tou tauhala? ʼE faigataʼa koa te lolomi ʼo tatatou ita moka ʼe mole agalelei mai he tahi? Peʼe ʼi ʼihi temi, ʼe lagi tou loto ke fakatuʼu la e Sehova te malama foʼou ʼae ʼe ina fakapapauʼi mai. Kae ʼi te ʼu aluʼaga fuli ʼaia, ʼe ʼaoga ke tou faʼa kataki. w23.08 20 ¶1-2

Neʼe ui age e Sehova kia Seteone ke ina toe fakaliliu kio natou teitei tana kau solia fuli. Neʼe lagi feʼekeʼaki fenei e Seteone: “ ʼE ʼaoga moʼoni koa te fetogi ʼaia? ʼE matou malo anai koa?” Kae neʼe fakalogo pe ia Seteone. ʼE faʼifaʼitakiʼi ia ʼaho nei e te kau tagata ʼafeā ia Seteone, ʼo natou fai te ʼu fetogi ʼae ʼe kole mai e te kautahi ʼa Sehova. (Hep. 13:17) Neʼe fakalogo ia Seteone kia Sehova logo la neʼe mataku pea neʼe feala ke mate ai. (Tfm. 9:17) ʼI te ʼosi fakaha age e Sehova kia Seteone ʼe malo anai, neʼe tui papau ai ʼe tokoni age anai te ʼAtua ke ina puipui tana hahaʼi. Ko te ʼu tagata ʼafeā ʼae ʼe maʼuʼuli ʼi te ʼu fenua ʼae ʼe tapuʼi ai tatatou gaue, ʼe natou faʼifaʼitakiʼi ia Seteone. ʼE natou lototoʼa ʼo fakahoko te ʼu fono pea mo te faifakamafola, logo la ʼe feala ke puke mo fakafehuʼi natou e te kau polisi, peʼe fakamavae natou ʼi tanatou gaue peʼe gaohi koviʼi natou. Lolotoga te mamahi lahi, ʼe ʼaoga anai ki te kau tagata ʼafeā te lototoʼa moʼo fakalogo ki te ʼu fakatotonu ka foaki kia natou, maʼia pe ʼe fakatupu tuʼutamaki. w23.06 5-6 ¶12-13

Neʼe tokaga e Sehova ke tohi te ʼu gaue lelei neʼe fai e te Pelepitelo Lahi ko Seosata moʼo akoʼi ʼo tatou. (Loma 15:4) Pea ʼi te mate ʼa Seosata, neʼe ʼavaifo fakaʼaliʼaliki “ ʼi te Kolo ʼo Tavite ohage ko te ʼu hau, he neʼe ina fai ni meʼa lelei ki te hahaʼi ʼo Iselaele, mo te ʼAtua moʼoni pea mo Tona fale.” (2 Klk. 24:​15, 16) ʼE tokoni mai te fakamatala ʼo Seosata ke tou manavasiʼi ki te ʼAtua. ʼE feala ke faʼifaʼitakiʼi e te ʼu tagata ʼafeā ia Seosata ʼo natou nonofo tokakaga pea mo puipui te faga ovi ʼo te ʼAtua. (Gaue 20:28) Ko te ako ʼaeni ʼe feala ke maʼu e te ʼu tehina mo tuagaʼane ʼae kua vaivai matuʼa mai ia Seosata: Kapau ʼe natou manavasiʼi ki te ʼAtua pea mo nonofo agatonu kia te ia, ʼe feala ke ina fakaʼaogaʼi natou moʼo fakahoko Tana fakatuʼutuʼu. ʼE feala ke faʼifaʼitakiʼi e te kau tupulaga te fakaʼapaʼapaʼi e Sehova ia Seosata, ʼo natou fakaʼapaʼapa ki te ʼu tehina mo tuagaʼane agatonu ʼae kua matuʼa, tafito ia natou ʼae kua fualoa tanatou tauhi agatonu kia Sehova. (Taag. 16:31) Ke tou lagolago agatonu kia ‘natou ʼae ʼe natou takitaki tatouʼ ʼo tou fakalogo kia natou.—Hep. 13:17. w23.06 17 ¶14-15

Tou fakapotopoto ʼo ʼuhiga mo te hiki ʼo totatou nima ʼi te ʼu fono. Kapau ʼe tou hiki tuʼumaʼu totatou nima, ʼe hage pe ʼe tou fakamaʼua ki te tehina ʼae ʼe ina taki te faipalalau ke ina hinoʼi tatou, kae heʼeki foaki te faigamalie ʼaia ki ʼihi. ʼE feala ke lotovaivai ai ʼihi ʼo mole kei hiki leva ʼonatou nima. (Ekl. 3:7) Ka tou ako he alatike, tokolahi ʼe natou hiki anai tonatou nima, pea ʼe lagi mole lahi anai te fai ʼo ni ʼatatou tali ohage ko te meʼa ʼae ʼe tou loto ki ai. Pea ʼi ʼihi temi, ʼe mole feala anai ki te tehina ke ina hinoʼi tatou ke tou tali. ʼE lagi tou lotovaivai anai, kae ʼaua naʼa tou iita ʼo tou manatu neʼe mole fia hinoʼi tatou e te tehina. (Ekl. 7:9) Kapau ʼe mole lahi tau fai he ʼu tali ohage ko te meʼa ʼae ʼe ke loto ki ai, ʼe lagi feala hau fakalogo lelei ki te ʼu tali ʼa ʼihi, pea hili te fono, ke ke fakamalo age ki ʼanatou tali. ʼE fakalotomalohiʼi ai ʼou tehina mo tuagaʼane, ohage pe ko tau fai hau tali. w23.04 23-24 ¶14-16

Ako te Folafola ʼa te ʼAtua pea ke metitasio ki ai. ʼE tuʼu tonu he fuʼu ʼakau moka ʼe tauaka loloto. ʼO toe feia pe, ke tou tutuʼu malohi ʼe tonu ke tauaka loloto tatatou tui ʼi te Folafola ʼa te ʼAtua. Pea ka tuputupu he fuʼu ʼakau, ʼe mafola ʼona aka pea ʼe ʼulu loloto ʼi te kele. ʼO toe feia pe, ka tou ako mo metitasio ʼe toe malohi ai tatatou tui, ʼo feia mo tatatou falala ʼae ʼe lelei ʼaupito te ʼu lao ʼa te ʼAtua. (Kol. 2:​6, 7) Manatuʼi pe neʼe tokoni feafeaʼi Sehova ki ʼana kaugana ʼi te temi muʼa ʼi tana foaki age he ʼu fakatotonu, mo he ʼu tokoni pea mo puipui natou. Ohage la, neʼe sioʼi fakalelei e Esekiele te haga ʼae ʼa he ʼaselo ʼo fakafuafua lelei te fale lotu ʼae neʼe ha kia ia. Neʼe toe malohi age ia Esekiele, pea ia ʼaho nei, ʼe tou ako mai te meʼa ʼaia neʼe sio ki ai Esekiele te maʼuhiga ʼae ke tou fakalogo ki te ʼu lao ʼa Sehova huʼu mo te tauhi maʼa. (Esk. 40:​1-4; 43:​10-12) Koia, ʼe toe fua lelei kia tatou moka tou toʼo he temi ke tou ako te ʼu manatu loloto ʼo te Folafola ʼa te ʼAtua pea mo metitasio ki ai. ʼE feala mo tatou ke malohi totatou loto, ko tona fakaʼuhiga ʼae ke tou falala katoa kia Sehova.—Pes. 112:7. w23.07 18 ¶15-16

ʼE lahi te ʼu tupulaga ʼe palalau ki ai te Tohi-Tapu ʼe feala ke ke faʼifaʼitakiʼi. Neʼe ʼoʼofa te ʼu tupulaga ʼaia ki te ʼAtua pea mo natou tokakaga ki tana hahaʼi ʼi ni aluʼaga kehekehe. ʼE ke toe maʼu anai ʼi tou famili peʼe ʼi tau kokelekasio ni tehina kua fotufotuʼa ʼe feala hau faʼifaʼitakiʼi. (Hep. 13:7) Pea ko te faʼifaʼitaki ʼae ʼe lelei tukupau, ko ʼae ʼa Sesu Kilisito. (1 Pet. 2:21) Ka ke toʼo he temi ʼo ako te maʼuli ʼo te ʼu tagata ʼaia, tokagaʼi mo ʼonatou kalitate. (Hep. 12:​1, 2) Pea ke ke faʼifaʼitakiʼi leva natou. ʼE fakaʼuhiga ia te faʼahi ʼaia ke mole ke hoko ʼoho ʼo fai he koga, kae ke ke fakakaukauʼi muʼa te meʼa ʼae ka ke fai. Ke ke lava fai te faʼahi ʼaia, ʼe tonu anai ke ke faiga malohi. Faiga muʼa ke ke iloʼi te ʼu tokoni ʼae ʼi te Tohi-Tapu pea mo fakakaukauʼi pe koʼe ʼe lelei ke ke mulimuli ki ai. Pea fakaʼaogaʼi leva te ʼu tokoni ʼaia ke ke fai ai he ʼu tonu ʼe leleiʼia e Sehova. (Pes. 119:9) ʼE tokoni atu anai ke ke liliu ʼo fotufotuʼa ʼi te faʼahi fakalaumalie.—Taag. 2:​11, 12; Hep. 5:14. w23.12 24-25 ¶4-5

ʼE feala ke akoʼi e te ʼu matuʼā ʼanatou fanau ke natou tali ʼaki he agamalū moka fakafifihi he tahi ki te ʼu akonaki ʼae ʼe natou tui ki ai. (Sakp. 3:13) ʼE fakatuʼutuʼu e ʼihi matuʼā he temi ʼi tanatou ako fakafamili ke natou akoako pe ʼe feafeaʼi hanatou fai te faʼahi ʼaia. ʼE natou manatu ki he ʼu palalau ʼe feala ke fai age ʼi te fale ako, mo natou vakaʼi mo ʼanatou fanau pea mo faʼifaʼitakiʼi tanatou tali ki ai. ʼE natou fia akoʼi age ke natou palalau ʼaki he agamalū mo he fakaʼapaʼapa. ʼE ʼaoga ʼaupito ki ʼatatou tupulaga te akoako ʼaia. ʼE natou falala anai ki te ʼu akonaki ʼae ʼe natou tui ki ai pea feala anai ke natou fakamahino ki ʼanatou kaugā ako. Ko te ʼu alatike ʼae ʼe maʼu ʼi tatatou tuʼasila jw.org ʼi te kupu taki “Te ʼu Fehuʼi ʼe Fai e Te Kau Tupulaga” ʼe tokoni anai ki te kau tupulaga ke malohi age tanatou tui. Ka vakavakaʼi e te kiʼi famili te ʼu alatike ʼaia, ʼe natou ako ai pe ʼe feafeaʼi hanatou palalau ki tanatou tui ʼaki he agamalū mo he agalelei. w23.09 17 ¶10; 18 ¶15-16

Neʼe kua faigataʼa koa kia koe tau fakahoko hau fakatuʼutuʼu fakalaumalie? Kapau koia, ʼe mole ko koe tokotahi pe. Ohage la ko Philip neʼe ina fakatuʼutuʼu ke lelei mo lahi age tana faikole. Kae neʼe faigataʼa tana maʼu he temi ke faikole ai. Neʼe fakatuʼutuʼu e Erika ke tautonu ki te ʼu fono vahe gaue. Kae neʼe tauhala tuʼumaʼu pe ia. Kapau heʼeki ke fakahoko hau fakatuʼutuʼu fakalaumalie, ʼaua naʼa ke lotovaivai. Ke ke iloʼi, maʼia mo he fakatuʼutuʼu ʼe faigafua, ʼe maʼua ki ai he temi mo ni faiga. Ko tau fia fakahoko tau fakatuʼutuʼu ʼaia ʼe ha ai ʼe maʼuhiga kia koe tau felogoi mo Sehova pea ʼe ke fia foaki kia te ia te meʼa ʼae ʼe lelei tukupau. ʼE maʼuhiga kia Sehova ʼau faiga. ʼE mahino ia, ʼe mole loto e te ʼAtua ke ke fakahoko he meʼa ʼe mole ke lavaʼi. (Pes. 103:14; Mik. 6:8) Koia, vakaʼi he fakatuʼutuʼu ʼe fakapotopoto pea ʼe mulimuli ki tou aluʼaga. w23.05 26 ¶1-2

Ko Taniela neʼe ko he tupulaga lototoʼa. Neʼe ina ako te ʼu tohi ʼa te kau polofeta ʼa te ʼAtua, ohage ko ʼae ʼa Selemia. ʼAki tana ako ʼaia, neʼe mahino leva Taniela kua vave ʼosi pe te nofo popula ʼa te kau Sutea ʼi Papiloni. (Tan. 9:2) ʼE mahino papau ia, ʼi te sio ʼa Taniela ki te fakahoko ʼo te ʼu lea fakapolofeta, neʼe toe malohi age tana falala kia Sehova. Pea ʼe tou iloʼi, ko natou ʼae ʼe falala katoa kia Sehova ʼe natou liliu ʼo lototoʼa. (Vakaʼi mo Loma 8:​31, 32, 37-39.) Ko te tahi faʼahi maʼuhiga neʼe fai e Taniela, ko te faikole tuʼumaʼu ki tana Tama ʼae ʼi selo. (Tan. 6:10) Neʼe ina vete ʼana agahala kia Sehova, mo ina avahi tona loto pea mo kole age tana tokoni. (Tan. 9:​4, 5, 19) Neʼe hage pe ia Taniela ko tatou. Koia neʼe mole tupu ake mo he lototoʼa. Kae neʼe ina maʼu te lototoʼa he neʼe ako, mo faikole pea mo falala kia Sehova. w23.08 3 ¶4; 4 ¶7

Ka tou fakalogo ki te ʼu pule maʼoluga, ʼe fua lelei kia tatou ʼo feia mo ʼotatou tehina mo tuagaʼane. Kotea tona tupuʼaga? ʼE mole fakatuʼā tatou e te puleʼaga. (Loma 13:​1, 4) Pea ʼaki tatatou fakalogo ki te ʼu pule maʼoluga, ʼe feala pe ke natou maʼu ni manatu lelei ʼo ʼuhiga mo te kau Fakamoʼoni ʼa Sehova. Ohage la, kua hili ki ai ni taʼu, ʼi Nigéria, neʼe hufi te Fale Fono e te kau solia kae lolotoga fono te ʼu tehina mo tuagaʼane. Neʼe natou kumi te hahaʼi agatuʼu ʼae neʼe mole natou fia totogi te ʼu tukuhau. Kae neʼe ui e te pule ki te kau solia ke natou mavae ʼi te Fale Fono. Neʼe ina ui fenei: “Ko te kau Fakamoʼoni ʼa Sehova ʼe natou totogi tuʼumaʼu pe tanatou ʼu tukuhau.” Ka ke talagafua ki he lao, ʼe matagafua lelei ai te hahaʼi ʼa Sehova, pea ʼe feala anai ʼi he ʼaho ke puipui ai ʼou tehina mo tuagaʼane. w23.10 9 ¶13

Kua fualoa te atali ʼa ʼihi kaugana ʼa Sehova ki te fakaʼosi ʼo te malama ʼaeni. ʼI te sio fakatagata, ʼe hage ʼe tuai mai te fakahoko ʼo te fakapapau ʼa te ʼAtua. Kae ʼe mahino ia Sehova ki te ʼu meʼa ʼae ʼe logoʼi e ʼana kaugana, pea neʼe ina ui fenei ki te polofeta ko Hapakuke: “ ʼE hoko anai te meʼa ʼaeni ʼe ha atu ʼi te temi ʼae kua fakatuʼutuʼu ki ai, ʼe hoko fakavilivili mai anai, pea ʼe mole loi anai ia. Ke ke haga atalitali ki ai, tatau aipe pe ʼe tuai mai! Koteʼuhi ʼe hoko moʼoni anai. Pea ʼe mole tauhala anai.” (Hap. 2:3) Neʼe fai pe koa e te ʼAtua te ʼu palalau ʼaia maʼa Hapakuke? Peʼe neʼe ina toe fai koa maʼa tatou ia ʼaho nei? ʼAki te takitaki ʼa te ʼAtua, neʼe toe fai e te apositolo ko Paulo te ʼu palalau ʼaia ki te kau Kilisitiano, ʼae ʼe natou fakaʼamu lahi ke hoko mai la te malama foʼou. (Hep. 10:37) ʼE feala ke tou tui, tatau aipe pe ʼe hage ʼe tuai mai te fakahoko ʼo te fakapapau ʼa Sehova ke ina haofaki tatou, kae “ ʼe hoko moʼoni anai. Pea ʼe mole tauhala anai.” w23.04 30 ¶16

Ko te kau Iselaele neʼe natou liʼaki te fakamoʼoni ʼae neʼe fakaʼaogaʼi e Sehova ia Moisese ko Hona fakafofoga. (Num. 14:​10, 11) Neʼe natou fakafisi liuliuga ki te tuʼulaga takitaki ʼa Moisese. Pea ko ʼona fua kovi, neʼe mole tali e Sehova ki te taʼiake ʼaia ʼo te kau Iselaele ke hu ki te Kele ʼo Te Fakapapau. (Num. 14:30) Kae, neʼe ʼi ai pe ʼihi Iselaele neʼe natou muliʼi te takitaki ʼa Sehova. Ohage la, neʼe ui e Sehova ʼo ʼuhiga mo Kalepo, neʼe haga fakalogo pe kia te ia ʼaki tona loto katoa. (Num. 14:24) Neʼe fakapale e te ʼAtua ia Kalepo, maʼia neʼe ina tuku pe ke ina filifili te moʼi kele ʼae neʼe loto ki ai ʼi Kanaane. (Sos. 14:​12-14) Neʼe toe feia pe mo te taʼiake foʼou neʼe natou muliʼi te takitaki ʼa Sehova. Ohage la, ʼi te fetogi e Sosue ia Moisese ʼi tona ʼuhiga takitaki, neʼe natou “fakaʼapaʼapa kia ia ʼi te temi ʼae neʼe kei maʼuli ai.” (Sos. 4:14) Koia, neʼe tapuakiʼi ai natou e Sehova ʼaki tana fakahu natou ki te Kele ʼo Te Fakapapau.—Sos. 21:​43, 44. w24.02 21 ¶6-7

Ka fua e he toketa ʼi totatou nima te ta ʼo totatou mafu, ʼe ina toe iloʼi ai pe ʼe haohaoa totatou mafu. ʼO toe feia pe, ʼe feala ke tou iloʼi pe ʼe malohi totatou ʼofa ki te ʼAtua moka tou tokagaʼi pe ʼe feafeaʼi totatou ʼofa ki ʼotatou tehina mo tuagaʼane. Kapau ʼe tou tokagaʼi ʼe mole kei lahi totatou ʼoʼofa kia natou, ʼe lagi kua toe siʼisiʼi ai mo totatou ʼoʼofa ki te ʼAtua. Kae kapau ʼe kei tou ʼoʼofa tuʼumaʼu ki ʼotatou tehina mo tuagaʼane, ʼe tou iloʼi ai ʼe kei malohi pe totatou ʼoʼofa ki te ʼAtua. ʼE tonu ke tou foimo fai he puleʼaki moka ʼe tou tokagaʼi ʼe mole kei malohi totatou ʼoʼofa ki ʼotatou tehina mo tuagaʼane. Kotea tona tupuʼaga? He ʼe feala ke fua kovi ki ʼatatou felogoi mo Sehova. ʼE ha lelei te faʼahi ʼaia ʼi te ʼu palalau ʼaeni ʼa te apositolo ko Soane: “Ko ia ʼae ʼe mole ʼofa ki tona tehina ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.” (1 Soa. 4:20) Kotea te ako maʼa tatou? Ke leleiʼia tatou e Sehova ʼe tonu ke tou “feʼofaʼaki.”—1 Soa. 4:​7-9, 11. w23.11 8 ¶3; 9 ¶5-6

ʼI tana kei tupulaga, neʼe fai e te Hau ko Seoasi he tonu ʼe lelei. Neʼe kua mate tana tamai, koia neʼe fakalogo ai ki te takitaki ʼa te Pelepitelo Lahi mo agatonu ko Seosata. Neʼe akoʼi ia ia e te pelepitelo ʼaia ohage pe ko hona foha. Pea neʼe fai leva e Seoasi te tonu ʼae ke tauhi kia Sehova ʼuhi ko te faʼifaʼitaki lelei ʼa Seosata. Pea neʼe toe tokoni te Hau ʼaia ki tana hahaʼi ke natou tauhi kia Sehova. Neʼe ina toe gaohi pe la te ʼu faʼahi ʼae neʼe kua maumau ʼo te fale lotu. (2 Klk. 24:​1, 2, 4, 13, 14) Kapau ʼe akoʼi koe e ʼau matuʼā peʼe ko he tahi age ke ke ʼofa kia Sehova mo ke fakalogo ki ʼana lekula, ʼe ko he meʼa ʼofa maʼuhiga ʼaia ʼe natou foaki atu kia koe. (Taag. 2:​1, 10-12) ʼE feala ke kehekehe te faʼahiga akoʼi ʼae ʼe fai e te ʼu matuʼā. Kapau ʼe ke mulimuli ki te ʼu tokoni ʼae ʼe foaki atu e ʼau matuʼā mai te Tohi-Tapu, ʼe nā fiafia anai. Pea ko te faʼahi ʼae ʼe maʼuhiga age, ʼe ke fakafiafiaʼi anai te loto ʼo Sehova pea mo kolua fakakaumeʼa anai ʼo talu ai. (Taag. 22:6; 23:​15, 24) ʼE mahino papau ʼe ke fia faʼifaʼitakiʼi anai ia te tupulaga ko Seoasi ʼuhi ko te ʼu aluʼaga fakafiafia ʼaia. w23.09 8-9 ¶3-5

ʼE fakapapau mai e Sehova ʼe fagono ki ʼatatou faikole. ʼE ʼofa ia Sehova ia tatou he ʼe tou tauhi agatonu kia te ia. Koia ʼe fagono tuʼumaʼu ai ki ʼatatou faikole. (Pes. 10:17; 37:28) Kae ʼe mole fakaʼuhiga leva ʼe ina foaki mai te ʼu meʼa fuli ʼae ʼe tou kole age. ʼE lagi tali mai anai ʼi te malama foʼou ki ʼihi faʼahi ʼe tou kole age. ʼE manatuʼi e Sehova tana fakatuʼutuʼu moka fagono ki ʼatatou faikole. (Esa. 55:​8, 9) ʼE kau ki tana fakatuʼutuʼu te fakahahaʼi ʼo te kele ʼaki ni tagata mo fafine ʼe fiafia mo logo tahi, ʼe natou fakalogo ki tana pule. Kae neʼe ui ia e Satana ʼe maʼuli fiafia age anai te tagata mo kapau ʼe pule pe e ia totonu. (Sen. 3:​1-5) Neʼe tuku ai e te ʼAtua ke haga pule te tagata ke fakamoʼoni ai te gutuloi ʼa te Tevolo. ʼE lahi te ʼu fihifihia ʼe tou tau mo ia ia ʼaho nei ʼe tupu mai te pule ʼa te tagata. (Ekl. 8:9) Kae ʼe tou iloʼi kua fakatuʼutuʼu e Sehova he temi ke ina pulihi ai te ʼu fihifihia fuli ʼaia. w23.11 21 ¶4-5

Neʼe fakapapauʼi e Sehova kia Apalahamo ʼe tapuakinaʼi anai te ʼatu puleʼaga ʼuhi ko ia. Kae ʼi te taʼu 100 ʼa Apalahamo pea mo taʼu 90 ia Sala, neʼe heʼeki tupu tona foha ʼae neʼe fakapapauʼi age e Sehova. ʼI te sio fakatagata, neʼe mole feala ke maʼu e te taumatuʼa hanā fanau. Neʼe ʼahiʼahiʼi ai te tui ʼa Apalahamo. “[Kae] ʼuhi ko tana ʼamanaki, . . . neʼe tui ia ʼe liliu anai ko te tamai ʼa te ʼatu puleʼaga.” (Loma 4:​18, 19) Pea ki muli age, neʼe hoko moʼoni leva te meʼa ʼae neʼe ʼamanaki ki ai. Neʼe tupu tona foha ʼae neʼe fakatalitali ki ai, ia Isaake. (Loma 4:​20-22) Koia, ʼe feala ke leleiʼia tatou e te ʼAtua, mo tou faitotonu ʼi ʼona muʼa, pea ke tou kaumeʼa mo ia, ohage pe ko Apalahamo. Ko te faʼahi ʼaia neʼe fakaha lelei e Paulo ʼi tana tohi fenei: “Ko te ʼu palalau ʼaeni ‘neʼe faitotonu ai ia muʼa ʼo te ʼAtua ʼuhi ko tana tui’ neʼe mole tohi pe ia maʼa [Apalahamo], kae neʼe toe tohi foki maʼa tatou. Pea mo tatou foki, ʼe tou faitotonu anai ia muʼa ʼo te ʼAtua ʼuhi ko tatatou tui kia Ia ʼae neʼe ina fakatuʼuake ia Sesu totatou ʼAliki mai te kau mate.” (Loma 4:​23, 24) Ohage ko Apalahamo, ʼe tonu ke tou tui kia Sehova mo fakaha tatatou tui ʼaki ni gaue. Pea ke tou manatuʼi tuʼumaʼu tatatou ʼamanaki. w23.12 7 ¶16-17

Ka ke tau mo he fihifihia ʼe ke mataku ai, manatuʼi ʼe iloʼi e Sehova te aluʼaga ʼae ʼe ke fakalaka ai pea mo te ʼu meʼa ʼae ʼe ke logoʼi. Ohage la, neʼe mole sio pe Sehova ki te gaohi koviʼi ʼo te kau Iselaele ʼi Esipito, kae neʼe toe sio ki “ ʼonatou mamahi.” (Eke. 3:7) Kae kotea ʼe feala ke ke fai mo kapau ʼe mole ke sio ki te tokoni atu ʼa Sehova ʼi te aluʼaga fakamataku ʼae ʼe ke tau mo ia? Kole kia Sehova ke ke sio ki te ʼu meʼa ʼae ʼe ina fai moʼo tokoni atu. (2 Hau 6:​15-17) Pea ke fakakaukauʼi te ʼu fehuʼi ʼaeni: Neʼe ʼi ai koa he akonaki peʼe ko he tali ʼi te fono neʼe ke lotomalohi ai? Peʼe neʼe ʼi ai koa he tohi peʼe ko he ʼata viteo, peʼe ko he hiva neʼe ina fakalotomalohiʼi koe? Neʼe ʼi ai koa he tahi neʼe ina fakalotofimalieʼi koe ʼaki he vaega, peʼe ko he manatu Fakatohi-tapu? ʼAua naʼa tou meʼa noaʼi te ʼofa lahi ʼo ʼotatou tehina mo tuagaʼane mo te ʼu fakalotomalohi ʼae ʼe tou maʼu ʼi te Folafola ʼa te ʼAtua, he ʼe ko he ʼu tokoni taulekaleka ʼaia mai ia Sehova. (Esa. 65:13; Mko. 10:​29, 30) Ko te ʼu meʼa ʼofa ʼaia ʼe natou fakamoʼoni ai ʼe tokaga Sehova kia koe pea ʼe tuha ke ke falala kia te ia.—Esa. 49:​14-16. w24.01 4-5 ¶9-10

ʼI muʼa ʼo tana hake ki selo, neʼe fakamanatuʼi age e Sesu ki ʼana tisipulo te gaue ʼae neʼe tonu ke natou fakahoko. Neʼe tonu ke natou liliu ko ʼana “fakamoʼoni ʼi Selusalemi, mo Sutea katoa pea mo Samalia, ʼo kaku ki te ʼu potu taupotu ʼo te kele.” (Gaue 1:8; Luka 24:​46-48) Kae mole faʼa fualoa, ki muli age, neʼe puke e te kau takitaki lotu Sutea te ʼu apositolo ko Petelo mo Soane, ʼo ʼave naua ki te Sanetualio. Neʼe fakatotonu age ke nā fakagata tanā faifakamafola, pea neʼe natou fakamatakuʼi ia naua. (Gaue 4:​18, 21) Neʼe tali fenei age e Petelo mo Soane: “ ʼA koutou pe tona vakaʼi pe ʼe totonu ia muʼa ʼo te ʼAtua ke ma fakalogo atu, ʼi hamā fakalogo ki te ʼAtua. Kae kia maua, ʼe mole feala ke ma tuku tamā palalau ki te ʼu meʼa ʼae neʼe ma sisio mo logo ki ai.” (Gaue 4:​19, 20) Hili tonā fakaʼateaina, neʼe faikole ia Petelo, mo Soane pea mo te tahi ʼu tisipulo kia Sehova, ʼo fakaha age tonatou loto ʼae ke natou fakahoko tona finegalo. Neʼe tali e Sehova ki tanatou faikole fakamalotoloto ʼaia.—Gaue 4:31. w23.05 5 ¶11-12

Neʼe fualoa ʼaupito te maʼuli fakatahi ʼa Sehova pea mo Sesu, ʼi ni lauʼi taʼu, ʼi tanā maʼuʼuli ʼi selo. Neʼe malohi ai tanā ʼu felogoi mo tanā feʼofaʼaki ohage ko tona ui mai ʼi te koga tohi ʼo te ʼaho nei. Neʼe fakaha lelei e Sehova tona ʼofa ʼae ia Sesu. Neʼe feala pe ke ina ui ‘Ko ia ʼaeni ko toku ʼofaina’ Kae ʼi tana loto ʼae ke tou iloʼi tona ʼofa mamahi ʼae ia te ia, neʼe ina ui fenei: “Ko toku ʼAlo ʼaeni, toku ʼofaina ʼae ʼe au fiafia ai.” Neʼe fiafia ia Sehova kia ia ʼi tana lotolelei ʼae ke ina foaki tona maʼuli ko he sakilifisio. (Efe. 1:7) Neʼe mole lotolotolua ia Sesu ʼo ʼuhiga mo te ʼofa ʼae ʼo tana Tamai. Neʼe tui papau ki te ʼofa moʼoni ʼo tana Tamai ʼo ina logoʼi ai ʼi tona loto. Neʼe ina ui tuʼumaʼu pe ʼe ʼofa tana Tamai ia ia.—Soa. 3:35; 10:17; 17:24. w24.01 28 ¶8

Fakakaukauʼi age muʼa te faʼifaʼitaki ʼaeni: Ko he tahi ʼe ke ʼofa mamahi ai ʼe ina fakamatala he ʼu meʼa ʼe kovi ʼo ʼuhiga mo koe. ʼE ke iloʼi ʼe ko he loi, kae ko ʼihi ʼe natou tui pe ki ai. Kae ko te meʼa ʼae kovi, he kua mafola te logo pea kua tui ki ai te tokolahi. Kotea leva ʼae ʼe ke logoʼi? ʼE lagi mahino ia, ko te fasituʼu ʼaia ʼae neʼe fai kia koe, ʼe ke lotomamahi ʼaupito ai. ʼE tokoni mai te faʼifaʼitaki ʼaeni ke tou mahino pe kotea ʼae neʼe logoʼi e Sehova ʼi te ʼulihi ʼo tona huafa. Ko he tahi ʼi ʼona foha fakalaumalie neʼe ina fakamatala he loi ʼo ʼuhiga mo ia ki te ʼuluaki fafine ko Eva. Pea neʼe tui ai te fafine ki te loi ʼaia. Ko te loi ʼaia neʼe ina uga ai te ʼuluaki taumatuʼa ke nā talagataʼa kia Sehova. Koia ʼae, neʼe agahala fuli ai te malamanei katoa pea mo mamate. (Sen. 3:​1-6; Loma 5:12) Ko te ʼu malaʼia fuli ʼae ʼe tau mo te tagata, ohage la ko te mate, mo te tau pea mo te ʼu mamahi, ʼe tupu mai te ʼu loi ʼae neʼe fakamafola e Satana ʼi te ʼoloto ʼo Eteni. Neʼe mamahi koa ia Sehova ʼi te ʼu fasituʼu ʼae neʼe fai kia te ia mo ʼona nunuʼa kovi? ʼE mahino papau ia neʼe lotomamahi ʼaupito ai. Kae ʼe mole taupau ia e Sehova he loto ʼe kovi, koteʼuhi ko ia te “ ʼAtua fiafia.”—1 Tim. 1:11. w24.02 8 ¶1-2

ʼE feafeaʼi hau toe faʼifaʼitakiʼi ia Sosefo? ʼAki hau filifili ʼi te temi nei pe kotea ka ke fai moka fakahalaʼi koe. Ke ke ako ke ke foimo liʼaki ia te ʼu meʼa ʼae ʼe fehiʼa ki ai ia Sehova pea mo faiga ke ʼaua naʼa ke manatu ki te ʼu fahaʼi ʼaia. (Pes. 97:10; 119:165) Kapau ʼe ke fai feia, ʼe mole ke lotolotolua anai moka fakahalaʼi koe. ʼE feafeaʼi kia koe? Kotea ʼe ina taʼofi koe ke ke foaki tou maʼuli kia Sehova pea mo papitema, kae kua ke iloʼi kua ke maʼu te moʼoni pea mo ke fia tauhi kia te ia mo tou loto katoa? Kapau koia, muliʼi te faʼifaʼitaki lelei ʼa te Hau ko Tavite mo kole mamahi fenei kia Sehova: “ ʼAtua e, sivisivi au mo iloʼi toku loto. ʼEi, sivisivi au mo iloʼi ʼoku tuʼania. Vakaʼi pe ʼe mole ʼi ai he aga ʼe kovi ia au, pea mo takitaki au ʼi te ala ʼo te heʼe gata.” (Pes. 139:​23, 24) ʼE tapuakiʼi e Sehova ia natou ʼae ʼe natou “kumi fakamalotoloto ia ia.” Pea ʼe ke fakaha kia te ia ʼe ko te aluʼaga ʼaia ʼe ke fai. ʼEi, ʼe ke faiga ke ke fakahoko tau fakatuʼutuʼu ʼae ke ke foaki tou maʼuli kia te ia pea mo papitema.—Hep. 11:6. w24.03 6 ¶13-15

Neʼe fakafofoga e te pelepitelo lahi ia te hahaʼi ia muʼa ʼo te ʼAtua. Neʼe fakanofo e Sehova te ʼuluaki pelepitelo lahi ʼi Iselaele, ia Alone, ʼi te temi ʼae neʼe fakatapuʼi ai te tapenakulo. Kae ohage ko tona fakamahino e te apositolo ko Paulo “tokolahi te kau pelepitelo neʼe mole feala ke natou hoko atu tanatou gaue ʼuhi ko te mate, koia neʼe fetogi natou e ʼihi ke natou hoko atu te gaue.” (Hep. 7:​23-26) Pea ʼuhi ʼae neʼe ko ni tagata agahala, neʼe tonu ke momoli e te ʼu pelepitelo lahi ʼaia ni sakilifisio moʼo fakamolemole ʼanatou agahala. Neʼe kehekehe ʼaupito ai te ʼu pelepitelo lahi ʼi Iselaele pea mo te Pelepitelo Lahi mo maʼoluga, ʼae ko Sesu Kilisito. Ko Sesu Kilisito, totatou Pelepitelo Lahi, “ ʼe ko he tagata faifekau ʼo . . . te fale la moʼoni, ʼae neʼe fakatuʼu e Sehova kae mole ko te tagata.” (Hep. 8:​1, 2) Neʼe fakamahino e Paulo “ ʼuhi ko te maʼuli ʼa Sesu ʼo talu ai, ʼe mole ʼaoga ke fetogi e he tahi tana gaue fakapelepitelo.” Pea neʼe toe ui e Paulo ko Sesu “ ʼe heʼe mele, ʼe mavae kehe mai te kau agahala” pea “ ʼe mole ʼaoga ia ke ina momoli he ʼu sakilifisio ʼi te ʼaho fuli” ʼuhi ko ʼana agahala, ohage ko tona fai e te ʼu pelepitelo lahi ʼo Iselaele. w23.10 26 ¶8-9

Ko “te lagi ʼafeā” ʼe ko te ʼu puleʼaga fakapolitike ʼae ʼe fakaneke e Satana mo ʼana temonio. (Mat. 4:​8, 9; 1 Soa. 5:19) ʼI te Tohi-Tapu, ko te kupu “kele” ʼe feala ke fakaʼuhiga ki te hahaʼi ʼo te kele. (Pes. 97:1; Tet. 32:1) Koia, ko “te kele ʼafeā ʼe fakaʼuhiga ki te hahaʼi agakovi ia ʼaho nei. ʼE mole faigaʼi anai e Sehova ke toe lelei age “te lagi” pea mo “te kele” ʼo te temi ʼaeni. Kailoa, kae ʼe ina maumauʼi anai pea mo ina fetogi. ʼE ina fetogi anai ʼaki “he lagi foʼou mo he kele foʼou” ko tona fakaʼuhiga ʼaki he puleʼaga foʼou ka pule anai ki ni hahaʼi faitotonu. ʼE tokaga anai ia Sehova ke liliu te kele mo te hahaʼi ʼo haohaoa. Ohage ko tona fakakikite e Esaia, ʼe fakaliliu anai e Sehova te kele katoa ko he ʼoloto matalelei, ohage ko te ʼoloto ʼo Eteni. Pea ʼe ina fakafoʼou anai mo tatou, ko tona fakaʼuhiga ʼe ina fakamalolo katoa anai ia tatou takitokotahi. ʼE mole kei ʼi ai anai he tahi ʼe ketu, peʼe kivi, peʼe tuli, pea maʼia mo natou ʼae kua mamate, ʼe toe fakatuʼuake anai mo natou.—Esa. 25:8; 35:​1-7. w23.11 4 ¶9-10

ʼE hoko fakapunamaʼuli anai te mamahi lahi. (Mat. 24:21) Kae ʼe kehekehe ia mo ʼihi tuʼutamaki, he ʼe tou iloʼi ʼe hoko moʼoni anai. Kua hili ki ai taʼu ʼe 2 000, neʼe fakatokaga e Sesu ʼana tisipulo ke natou teuteu ki te ʼaho ʼaia. Ka tou teuteu fakatomuʼa, ʼe faigafua ai hatatou faʼa kataki ʼi te temi faigataʼa ʼaupito ʼaia pea mo tokoni ki ʼihi ke natou fai feia. (Luka 21:36) ʼE ʼaoga mai anai ke tou faʼa kataki ke tou fakalogo ai kia Sehova pea ke tou falala ʼe ina puipui tatou. Kotea ʼae ka tou fai anai moka puli fuli pe ʼe ko ʼihi koloa ʼo ʼotatou tehina mo tuagaʼane? (Hap. 3:​17, 18) ʼE ʼaoga anai ke tou manavaʼofa ke tou fia tokoni ai kia natou. Kotea ʼae ka tou fai moka ʼe tonu ke tou maʼuli fakatahi mo ʼotatou tehina mo tuagaʼane hili totatou ʼohofi e te ʼu puleʼaga ʼae ka fakatahi? (Esk. 38:​10-12) ʼE ʼaoga anai ke tou ʼofa lahi kia natou ke tou faʼa kataki ai ʼi te temi faigataʼa ʼaia. w23.07 2 ¶2-3

ʼE feala ke maʼu e te ʼu taumatuʼa he ako mai te faʼifaʼitaki ʼo Akila mo Pilisila. Neʼe ʼofainaʼi te taumatuʼa ʼaia e te ʼu ʼuluaki Kilisitiano. (Loma 16:​3, 4) Neʼe nā gaue fakatahi, mo tanā faifakamafola, pea mo tanā tokoni ʼae ki ʼihi. (Gaue 18:​2, 3, 24-26) ʼEi, ka palalau te Tohi-Tapu kia Akila mo Pilisila, ʼe toʼo fakatahi tuʼumaʼu pe ia naua. ʼE lava faʼifaʼitakiʼi feafeaʼi e te ʼu taumatuʼa ia naua? Fakakaukauʼi te ʼu gaue fuli ʼae ʼe tonu ke ke fai pea mo ʼae ʼo tou ʼohoana. ʼE ʼi ai koa ni gaue ʼe feala ke kolua fakahoko fakatahi? Ohage la, neʼe faifakamafola fakatahi ia Akila mo Pilisila. ʼE kolua tau fakatuʼutuʼu koa ke kolua faifakamafola fakatahi? Neʼe toe gaue fakatahi ia Akila mo Pilisila. ʼE lagi mole tatau takolua gaue, kae ʼe feala koa ke kolua fai fakatahi te ʼu gaue ʼo te loto fale? (Ekl. 4:9) Ka kolua fetokoniʼaki feia, ʼe kolua faifaitahi ai mo maʼu hakolua temi faipalalau. w23.05 22-23 ¶10-12

ʼE maʼu ia tatou fuli te mataku. Ohage la, ʼi te tuli ʼo Tavite e te Hau ko Saulo ke ina matehi, neʼe hola ia ia ki te kolo Filisitini ko Kiete. Kae neʼe mole faʼa fualoa, pea neʼe iloʼi e te Hau ʼo Kiete, ʼae ko Akise, ko Tavite neʼe ko te tagata tau malohi, neʼe iloa ʼi tana matehi te “toko lauʼi hogofulu afe” kau Filisitini pea neʼe hivaʼi ʼana malo. Neʼe mataku ʼosi ia Tavite. (1 Sam. 21:​10-12) Neʼe tuʼania ki te meʼa ʼae ka fai e Akise kia ia. Kotea ʼae neʼe ina lava tauʼi ai tona mataku? ʼI te Pesalemo 56, ʼe fakaha ai e Tavite te meʼa ʼae neʼe ina logo ʼi tana ʼi Kiete. ʼE fakaha lelei ʼi te pesalemo ʼaia, te ʼu mataku ʼae neʼe maʼu e Tavite, pea neʼe feafeaʼi tana lava tauʼi. Moka mataku ia Tavite pea neʼe ina tuku tana falala kia Sehova. (Pes. 56:​1-3, 11) Pea neʼe tonu pe tana falala ʼaia kia Sehova. Kote ʼuhi ʼaki te tokoni ʼo tona ʼAtua, neʼe fakakaukau ai ia Tavite ki he puleʼaki ʼe fakaofoofo mo lelei: Neʼe faiga ke ui kua ʼulu vale. Pea ʼi te sio ʼa Akise ki te aluʼaga ʼo Tavite, neʼe mole ina fia matehi, kae neʼe loto ia ke fakamavae ia ia. Koia ʼae neʼe hoko atu ai e Tavite tana hola.—1 Sam. 21:13–22:1. w24.01 2 ¶1-3

Ko ai ia natou ʼae ʼe talanoa ʼi te koga tohi ʼo te ʼaho nei? Ko te ʼu tehina mo tuagaʼane fakanofo ʼae kua fakatuʼuake! Koia, ʼi te kua ovi ki te fakaʼosi ʼo te mamahi lahi, ʼi te temi ʼae ka hake fuli ai te kau fakanofo ki selo, ko te ʼuluaki gaue ʼae ka natou fai, ko te tau. ʼI tonatou kua fakatuʼuake ki selo, ʼe natou kaugā gaue anai mo Kilisito pea mo te ʼu ʼaselo maʼoniʼoni ʼo tauʼi te ʼu fili ʼo te ʼAtua. Fakakaukauʼi age muʼa, ʼi tanatou ʼi te kele, ko te kau fakanofo neʼe natou matutuʼa mo vaivavai. Kae ʼi tonatou kua fakatuʼuake ki selo, kua natou liliu leva ko ni laumalie malolohi mo tuputupua. Ko tanatou ʼuluaki gaue, ʼe natou tau fakatahi mo tonatou Hau ko Sesu Kilisito. Hili te tau ko Alamaketone, ʼe natou gaue tahi anai mo Sesu ʼo natou taki ai te malamanei katoa ki te maʼuli haohaoa. ʼE mahino ia, ʼi tanatou kua ʼi selo, kua natou lavaʼi leva hanatou tokoni ki ʼonatou tehina mo tuagaʼane ʼi te kele ʼo lahi age ia ʼi ʼae ʼi tanatou kei agahala! w24.02 6-7 ¶15-16

ʼE tokalelei ʼihi ke natou foaki ʼonatou maʼuli kia Sehova mo papitema kae ʼe natou lotolotolua aipe. ʼE natou tau feuiʼaki: ‘Kapau ʼe au fai te faʼahi ʼaia, ʼe au fai anai he agahala mamafa pea mo fakamavae au?’ Kapau ʼe ke tuʼania te faʼahi ʼaia, manatuʼi ʼe foaki atu anai e Sehova ia meʼa fuli ʼe ʼaoga atu ke ke ‘fai te ʼu meʼa ʼae ʼe tuha mo ia pea mo fakafiafiaʼi ai tona loto.’ (Kol. 1:10) ʼE ina toe foaki atu anai te malohi ke ke fakahoko lelei te faʼahi ʼaia. Neʼe ina fakaha ʼe ina lava fakahoko he neʼe kua ina fai maʼa te tokolahi. (1 Ko. 10:13) Koia ʼae ʼe mole hahaʼi ai ia natou ʼe fakamavae. ʼE foaki mai e Sehova ia meʼa fuli ʼe ʼaoga mai ke tou nofo agatonu. ʼE fakaneke tatou fuli ke tou fai he ʼu meʼa ʼe kovi ʼuhi pe ko totatou ʼuhiga agahala. (Sakp. 1:14) Kae, ʼe ke filifili pe ʼe ke tali peʼe kailoa ia te fakahala. ʼEi, ʼe ko koe ʼae ʼe ke filifili ia tou faʼahiga maʼuli. Kae, ʼe ui ia e ʼihi ʼe feala hau ako ke ke lolomi ʼou holi ʼae ʼe kovi. w24.03 5 ¶11-12