Tou Taupau Te Logo Tahi ʼi Te ʼu ʼAho Fakamuli ʼAenī
“Koutou maʼu he aga ʼe tau mo te logo lelei . . . , ʼe koutou taupau maʼu ʼi he ʼatamai e tahi, ʼo koutou faiga ʼaki he nefesi e tahi ke koutou tau maʼa te tui ʼo te logo lelei.”—Filipe 1:27.
1. Koteā te kehekehe ʼa te kau Fakamoʼoni ʼa Sehova pea mo te mālama?
ʼE TOU maʼuʼuli nei ʼi “te ʼu ʼaho fakamuli.” ʼE mahino papau ia, kua hoko “te ʼu temi maʼuhiga ʼaupito mo faigataʼa.” (2 Timoteo 3:1-5) ʼI te ‘temi ʼaenī ʼo te fakaʼosi,’ pea mo te maveuveu ʼi te sosiete fakatagata, ʼe makehe te kau Fakamoʼoni ʼa Sehova, ʼuhi ko tanatou nofo tokalelei pea mo logo tahi. (Taniela 12:4) Kae ko te hahaʼi takitokotahi ʼo te famili katoa ʼo te kau atolasio ʼa Sehova, ʼe maʼua ke nātou gāue kinakina moʼo taupau te logo tahi ʼaia.
2. Koteā ʼaē neʼe ʼui e Paulo ʼo ʼuhiga mo te taupau ʼo te logo tahi, pea ko te fehuʼi fea ʼaē ka tou vakaʼi anai?
2 Neʼe fakatotonu e te ʼapositolo ko Paulo ki tona ʼu tēhina Kilisitiano ke nātou taupau te logo tahi. Neʼe ina tohi fēnei: “Koutou maʼu he aga ʼe tau mo te logo lelei ʼo ʼuhiga mo Kilisito, ke feala mo kapau ʼe ʼau ʼalu atu ʼo ʼaʼahi koutou peʼe ʼau puli ʼi henā, ke ʼau logo ki he ʼu meʼa ʼo ʼuhiga mo koutou, ʼe koutou taupau maʼu ʼi he ʼatamai e tahi, ʼo koutou faiga ʼaki he nefesi e tahi ke koutou tau maʼa te tui ʼo te logo lelei, ʼo mole koutou matataku ʼi ʼakotou ʼu fili. Ko te meʼa ʼaia ʼe ko he fakamoʼoni ʼo tonatou fakaʼauha, kae kia koutou ko he fakamoʼoni ki te maʼuli; pea ko te fakaʼiloga ʼaia ʼe haʼu mai te ʼAtua.” (Filipe 1:27, 28) ʼE fakahā lelei mai e te ʼu palalau ʼa Paulo, ʼe tonu ke tou gāue fakatahi ʼi totatou ʼuhiga Kilisitiano. Kae, koteā ʼaē ka tokoni anai kia tatou ke tou taupau tatatou logo tahi faka Kilisitiano ʼi te ʼu temi faigataʼa ʼaenī?
Tou Fakalogo Ki Te Finegalo Fakaʼatua
3. Ko te temi fea ʼaē neʼe liliu ai te kau ʼuluaki Senitile ʼaē neʼe mole silikosisio ko he ʼu tisipulo ʼa Kilisito, pea neʼe hoko feafeaʼi?
3 Ko te meʼa ʼaē ʼe ina taupau tatatou logo tahi, ʼe ko tatatou fakalogo ki te finegalo fakaʼatua ʼi te temi fuli pe. ʼE lagi tonu anai ke tou fakatonutonuʼi tatatou ʼu manatu. Koutou fakatokagaʼi te kau ʼuluaki tisipulo Sutea ʼa Sesu Kilisito. ʼI te temi ʼaē neʼe ʼuluaki fai faka mafola ai te ʼapositolo ko Petelo ki te kau Senitile ʼaē neʼe mole silikosisio, ʼi te taʼu 36 ʼo totatou temi, neʼe tuku ifo e te ʼAtua te laumālie maʼoniʼoni ki te ʼu hahaʼi ʼaia ʼo te ʼu puleʼaga, pea neʼe nātou papitema. (Gāue, kapite 10) ʼO aʼu ki te temi ʼaia, neʼe gata pe ki te kau Sutea, mo te kau poloselite ʼaē neʼe tafoki ki te lotu faka Sutea, pea mo te kau Samalitana, neʼe nātou liliu ko ni ʼu tisipulo ʼa Sesu Kilisito.—Gāue 8:4-8, 26-38.
4. ʼI tana ʼosi fakamahino te meʼa ʼaē neʼe hoko kia Kolonelio, koteā ʼaē neʼe ʼui e Petelo, pea koteā te ʼahiʼahi ʼaē neʼe hoko ki te kau tisipulo Sutea ʼa Sesu ʼaki te faʼahi ʼaia?
4 ʼI te temi ʼaē neʼe logo ai te kau ʼapositolo pea mo ʼihi tēhina ʼi Selusalemi ʼo ʼuhiga mo te tafoki ʼa Kolonelio pea mo ʼihi kau Senitile, neʼe nātou fia ʼiloʼi te fakamatala ʼa Petelo. ʼI tana ʼosi fakamahino te meʼa ʼaē neʼe hoko kia Kolonelio pea mo ʼihi hahaʼi tui Senitile, neʼe fakaʼosi fēnei e te ʼapositolo: “Koia kapau neʼe foaki age e te ʼAtua te meʼa ʼofa ʼaia [te laumālie maʼoniʼoni] kia nātou [te kau Senitile ʼaia neʼe tui] ohage ko tana fai kia tatou [te kau Sutea] ʼaē neʼe tou tui ki te ʼAliki ko Sesu Kilisito, neʼe ko ai koa ia ʼau ke feala haku tāʼofi te ʼAtua?” (Gāue 11:1-17) Ko te faʼahi ʼaia neʼe ko he ʼahiʼahiʼi ʼo te kau tisipulo Sutea ʼa Sesu Kilisito. ʼE nātou fakalogo anai koa ki te finegalo ʼo te ʼAtua pea mo nātou tali te kau Senitile tui ko honatou ʼu tēhina ʼi te tui? ʼE fakatupu kovi anai koa ki te logo tahi ʼa te kau kaugana ʼa Sehova ʼi te kele?
5. Neʼe tali feafeaʼi e te kau ʼapositolo pea mo ʼihi ʼu tēhina, te tali ʼa te ʼAtua ki te fakahemala ʼa te kau Senitile, pea koteā ʼaē ʼe feala ke tou ako mai te aga ʼaia?
5 ʼE ʼui fēnei e te fakamatala: “ ʼI te temi ʼaē neʼe nātou [te kau ʼapositolo pea mo ʼihi ʼu tēhina] logo ai ki te ʼu meʼa ʼaia, neʼe nātou tali lelei, pea neʼe nātou faka kolōlia ki te ʼAtua, ʼo ʼui maʼa nātou: ‘Koia, kua toe tuku foki e te ʼAtua te fakahemala ʼo ʼuhiga mo te maʼuli ki te hahaʼi ʼo te ʼu puleʼaga.’ ” (Gāue 11:18) Ko te aga ʼaia neʼe ina taupau pea mo fakatuputupu te logo tahi ʼa te kau tisipulo ʼa Sesu. ʼI te kiʼi temi nounou, neʼe haʼele ki muʼa te gāue fai faka mafola ʼi te lotolotoiga ʼo te kau Senitile, peʼe ko te hahaʼi ʼo te ʼu puleʼaga, pea neʼe tapuakiʼi e Sehova te ʼu gāue ʼaia. ʼE tonu ke tou tali lelei mokā kole mai tatatou tokoni ʼo ʼuhiga mo te fakatuʼu ʼo he kokelekasio foʼou peʼe mokā hoko he ʼu fetogi faka teokalatike ʼaki te takitaki ʼa te laumālie maʼoniʼoni ʼa te ʼAtua. ʼE leleiʼia anai e Sehova tatatou tokoni ʼaki totatou loto katoa, pea ʼe tokoni anai kia tatou ke tou taupau tatatou logo tahi ʼi te ʼu ʼaho fakamuli ʼaenī.
Tou Pipiki Maʼu Ki Te Moʼoni
6. ʼE lave feafeaʼi te moʼoni ki te logo tahi ʼa te kau atolasio ʼa Sehova?
6 ʼI tatatou kau ki te famili ʼa te kau atolasio ʼa Sehova, ʼe tou taupau te logo tahi koteʼuhi ‘ ʼe akoʼi tatou fuli e Sehova’ pea ʼe tou pipiki maʼu ki tana ʼu moʼoni. (Soane 6:45; Pesalemo 43:3) Mai tona ʼuhiga ʼaē ko tatatou ʼu akonaki ʼe fakatafito ki te Folafola ʼa te ʼAtua, koia ʼe tou palalau fuli ai ʼi te tokalelei. ʼE tou tali ʼaki he loto fiafia te meʼa kai fakalaumālie ʼaē ʼe foaki mai e Sehova ʼaki te “tagata kaugana agatonu mo poto.” (Mateo 24:45-47) Ko te tatau ʼaia ʼo te ʼu akonaki ʼe tokoni kia tatou ke tou taupau tatatou logo tahi ʼi te malamanei.
7. Kapau ʼe faigataʼa kia tatou hatatou mahino ki he faʼahiga akonaki, koteā ʼaē ʼe tonu ke tou fai, pea koteā ʼaē ʼe mole tonu ke tou fai?
7 Koteā ʼaē ʼe tonu ke tou fai takitokotahi mo kapau ʼe faigataʼa kia tatou te mahino peʼe ko te tali ʼo he akonaki? ʼE tonu ke tou faikole ke tou maʼu te poto pea mo tou fai he ʼu kumi ʼi te Tohi-Tapu pea mo te ʼu tohi faka Kilisitiano. (Tāʼaga Lea 2:4, 5; Sake 1:5-8) Ko te fai palalau mo he tagata ʼāfea ʼe feala ke tokoni kia tatou. Kapau ʼe mole heʼeki tou mahino ki te puani, e lagi lelei age hatatou mole faʼa tokaga fau ki te faʼahi ʼaia. ʼE lagi toe ʼi ai anai he tahi ʼu fakamahino ʼi te ʼu nusipepa ʼo ʼuhiga mo te faʼahi ʼaia, pea ʼe lahi ai leva tatatou mahino. Kae ʼe mole lelei anai ke tou faiga ke manatu tahi ʼihi ʼi te kokelekasio mo tatou. Ko te faʼahi ʼaia ʼe ina fakatupu te maveuveu, kae mole ina taupau te logo tahi. ʼE lelei age hatatou ‘haʼele ʼi te moʼoni’ pea mo tou fakaloto mālohiʼi ʼihi ke nātou haga fai feiā!—3 Soane 4.
8. Koteā te aga ʼaē ʼe lelei ʼo ʼuhiga mo te moʼoni?
8 ʼI te ʼuluaki sēkulō, neʼe ʼui fēnei e Paulo: “ ʼI te temi nei, ʼe fakapōʼuli tatatou sio ʼi te sioʼata ukamea, kae, ʼe tou sio mata anai kiai. ʼI te temi nei, ʼe ʼau ʼiloʼi fakakoga pe, kae ʼe ʼau ʼiloʼi totonu anai ohage pe ko te ʼiloʼi totonu ʼoʼoku.” (1 Kolonito 13:12) Logope la neʼe mole mahino te kau ʼuluaki Kilisitiano ki te ʼu meʼa fuli, kae neʼe nātou logo tahi. ʼI te temi nei, kua lahi age tatatou mahino ki te fakatuʼutuʼu ʼa Sehova pea mo tana Folafola moʼoni. Koia, tou fakafetaʼi ki te moʼoni ʼaē neʼe tou maʼu ʼaki te ‘tagata kaugana agatonu.’ Pea mo tou fakamālo ki te takitaki ʼo tatou e Sehova ʼaki tana kautahi. Logope la neʼe mole tatau tuʼumaʼu tatatou mālama ki te moʼoni, kae neʼe mole tou hala ʼi te meʼa kai pea mo te meʼa ʼinu ʼi te faʼahi fakalaumālie. Kae, ko tatatou Tagata Tauhi Ōvi, ia Sehova, neʼe ina taupau tatou ke tou logo tahi pea mo tokaga lelei kia tatou.—Pesalemo 23:1-3.
Tou Fakaʼaogaʼi Lelei Totatou ʼAlelo!
9. ʼE feala ke fakaʼaogaʼi feafeaʼi te ʼalelo moʼo fakatuputupu te logo tahi?
9 Ko te fakaʼaogaʼi ʼo te ʼalelo moʼo fakaloto mālohiʼi ʼo ʼihi, ʼe ko he faʼahiga fai maʼuhiga ʼaia moʼo fakatuputupu te logo tahi pea mo te manatu fakatautehina. Neʼe fakaloto mālohi te tohi ʼaē neʼe fai moʼo fakatokatoka ʼo te fihi ʼo ʼuhiga mo te silikosisio, te tohi neʼe momoli e te kolesi pule ʼo te ʼuluaki sēkulō. ʼI te ʼosi lau ʼo te tohi, ko te kau tisipulo Senitile ʼo Atiokia, neʼe nātou “fiafia ʼo ʼuhiga mo te fakaloto mālohi ʼaia.” Ko Sutasi pea mo Silasi, ʼaē neʼe fekauʼi mai Selusalemi ʼaki te tohi ʼaia, neʼe nā “tokoniʼi te ʼu tēhina ʼaki te tuʼuga akonaki pea neʼe nā fakaloto mālohiʼi nātou.” ʼE mahino papau ia, neʼe toe tokoni pea mo fakaloto mālohiʼi e Paulo pea mo Palanapasi tonatou ʼu tēhina ʼi te tui ʼo Atiokia. (Gāue 15:1-3, 23-32) ʼE feala ke tou fai feiā mo tatou, mokā tou fakatahi ki te ʼu fono faka Kilisitiano pea mo “fefakaloto mālohiʼaki” ʼaki tatatou kau ki te ʼu fono pea mo tatatou fai he ʼu tali ʼe fakaloto mālohi.—Hepeleo 10:24, 25.
10. Moʼo taupau te logo tahi, koteā ʼaē ʼe tonu ke fai mo kapau ʼe leakoviʼi he tahi?
10 Kae, ko te fakaʼaogaʼi kovi ʼo te ʼalelo ʼe feala ke fakatupu tuʼutāmaki ki te logo tahi. Neʼe tohi fēnei e te tisipulo ko Sake: “Ko te ʼalelo ʼe ko he kiʼi koga veliveli, kae ʼe laupisi ki he ʼu meʼa lalahi. Koutou fakatokagaʼi ko he kiʼi afi ʼe feʼauga moʼo tutu he toe vao matuʼa!” (Sake 3:5) ʼE fehiʼa Sehova kia nātou ʼaē ʼe fakatupu kē. (Tāʼaga Lea 6:16-19) ʼE feala ke fakatupu maveuveu te ʼu taʼi fai palalau ʼaia. Kae, koteā ʼaē ʼe tonu ke fai mo kapau ʼe leakoviʼi he tahi, pea mo fai ki ai he ʼu palalau moʼona fakamālaloʼi? ʼE faiga anai te kau tagata ʼāfea ke nātou tokoni kia ia ʼaē neʼe ina fai te meʼa kovi ʼaia. Kae, ko he tahi neʼe leakovi kae mole fakahemala, ʼe tonu ke fakamavae moʼo taupau te tokalelei, te fakaʼaluʼalu lelei pea mo te logo tahi ʼa te kokelekasio. Neʼe tohi fēnei e Paulo: “ ʼAua naʼa koutou fakatahi mo he tahi ʼe fakahigoaʼi ko he tēhina kae ʼe ko . . . he tagata leakovi . . . , ʼo mole koutou kakai mo te faʼahiga tagata ʼaia.”—1 Kolonito 5:11.
11. He koʼe ʼe maʼuhiga te agavaivai mo kapau neʼe tou fai he palalau neʼe fakatupu ʼaki ai he tokakovi ʼo kita mo he tēhina?
11 Ko te tāʼofi ʼo te ʼalelo, ʼe tokoni ke tou taupau te logo tahi. (Sake 3:10-18) Kae, tou fakakaukauʼi age muʼa mo kapau neʼe tou fai he palalau neʼe tupu ʼaki ai he tokakovi ʼo kita mo he tēhina. ʼE mole lelei age koa la hakita ʼuluaki ʼalu ʼo fakatokatoka mo tokita tēhina, ʼo fai fakalelei ki ai? (Mateo 5:23, 24) ʼE moʼoni, ʼe tonu ke kita agavaivai moʼo fai ʼo te faʼahi ʼaia, kae neʼe tohi fēnei e Petelo: “Koutou noʼo te loto agavaivai, he ko te ʼAtua ʼe fakafeagai kia nātou ʼaē ʼe fialalahi, kae ʼe ina tuku tona ʼofa makehe ki te kau agavaivai.” (1 Petelo 5:5) ʼE tokoni anai te agavaivai kia tatou ke tou ‘kumi te tokalelei’ mo totatou ʼu tēhina, ʼo tou tali tatatou ʼu hala pea mo tou faifakalelei mo kapau neʼe tou hala. ʼE tokoni te faʼahi ʼaia ke tou taupau te logo tahi ʼi te famili ʼa Sehova.—1 Petelo 3:10, 11.
12. ʼE feala ke tou fakaʼaogaʼi feafeaʼi te ʼalelo moʼo fakatuputupu pea mo taupau te logo tahi ʼi te hahaʼi ʼa Sehova?
12 ʼE feala hatatou fakatuputupu te manatu faka famili ia nātou ʼaē ʼe ʼi te hahaʼi ʼa Sehova mo kapau ʼe tou fakaʼaogaʼi fakalelei totatou ʼalelo. Neʼe fai e Paulo te meʼa ʼaia, koia neʼe feala ai ke ina fakamanatuʼi fēnei ki te kau Tesalonika: “ ʼE koutou ʼiloʼi lelei, ohage ko he tāmai ki tana ʼu fānau, neʼe mātou fakaloto mālohiʼi tuʼumaʼu pe koutou takitokotahi, neʼe mātou fakapelepeleʼi koutou pea mo mātou fagonogono kia koutou, koteʼuhi ke koutou haga haʼele ʼaki he aga ʼe tāu mo te ʼAtua.” (1 Tesalonika 2:11, 12) Neʼe tuku e Paulo he faʼifaʼitaki lelei ʼi te faʼahi ʼaia, koia neʼe feala ai kia ia ke ina fakaloto mālohiʼi te kau Kilisitiano ke nātou “fai he ʼu palalau fakaloto fīmālie ki te ʼu nefesi lotomamahi.” (1 Tesalonika 5:14) Koutou fakakaukauʼi muʼa te meʼa lelei ʼaē ʼe feala ke tou fai ʼi tatatou fakaʼaogaʼi te ʼalelo moʼo fakaloto fīmālie, pea mo fakaloto mālohiʼi niʼihi. Ei, “ ʼe ko he meʼa lelei te fai ʼo he palalau ʼi tona temi totonu!” (Tāʼaga Lea 15:23) Pea tahi ʼaē meʼa, ʼe tokoni te taʼi palalau ʼaia ki te fakatuputupu pea mo te taupau ʼo te logo tahi ʼa te hahaʼi ʼa Sehova.
Koutou Loto Fakamolemole!
13. He koʼe ʼe tonu ke tou loto fakamolemole?
13 Ko te fakamolemole ki he tahi neʼe hala mai kia kita, ʼe maʼuhiga mo kapau ʼe tou fia taupau te logo tahi faka Kilisitiano. Pea ʼe tonu ke tou fakamolemole tuʼa fia? Neʼe ʼui fēnei e Sesu kia Petelo: “ ʼE mole kaku ki te tuʼa fitu, kaʼe ki te tuʼa fitugofulu-ma-fitu.” (Mateo 18:22) Kapau ʼe mole tou loto fakamolemole, ʼe mole fua lelei anai kia tatou. ʼO feafeaʼi? ʼE mole tokalelei anai tatatou fakakaukau mo kapau ʼe tou loto fehiʼa pea mo lotokovi. Pea, kapau ʼe ʼiloʼi ko kita ʼe ko he tahi ʼe aga fefeka pea mole fakamolemole gafua, ʼe feala ke mole ʼofa ai he tahi kia kita. (Tāʼaga Lea 11:17) ʼE mole leleiʼia e te ʼAtua te taupau ʼo he lotokovi, pea ʼe feala ke iku ai ki he agahala mamafa. (Levitike 19:18) Koutou manatuʼi neʼe tuʼusi te ʼulu ʼo Soane Patita ʼuhi ko te fakatuʼutuʼu neʼe fai e te fafine agakovi ko Helotiate, ʼaē neʼe “lotokovi” kia ia.—Maleko 6:19-28.
14. (a) Koteā ʼaē ʼe akoʼi mai kia tatou ia Mateo 6:14, 15 ʼo ʼuhiga mo te loto fakamolemole? (b) ʼE tonu koa ke tou atali tuʼumaʼu ke faifakalelei mai he tahi ʼi muʼa ʼo hatatou fakamolemole ki ai?
14 ʼE kau ki te faikole faʼifaʼitaki ʼa Sesu te ʼu palalau ʼaenī: “Ke fakamolemole ʼamatou ʼu agahala, heʼe mātou toe fakamolemole foki mo mātou kia nātou ʼaē ʼe nātou maʼua mai kia mātou.” (Luka 11:4) Kapau ʼe mole tou fakamolemole, pea ʼe feala ke mole toe fakamolemole ia Sehova ki ʼatatou ʼu agahala, he neʼe ʼui fēnei e Sesu: “Kapau ʼe koutou fakamolemole ki te hahaʼi, ʼanatou hala, pea ʼe toe fakamolemole anai mo takotou Tāmai kia koutou; kaʼe kapau ʼe mole koutou fakamolemole ki te hahaʼi, ʼanatou hala, pea ʼe mole fakamolemole anai e takotou Tāmai kia koutou takotou ʼu hala.” (Mateo 6:14, 15) Koia, kapau ʼe tou loto moʼoni ke tou fai he meʼa moʼo taupau te logo tahi ʼa te famili ʼo te kau atolasio ʼa Sehova, ʼe tou loto fakamolemole anai, ʼo tou galoʼi te hala ʼaē neʼe fai mai e he tahi kae neʼe mole manatu kiai, pe neʼe mole fakatuʼutuʼu ke ina fai mai he meʼa ʼe kovi. Neʼe ʼui fēnei e Paulo: “Koutou haga fekātakiʼaki pea mo fefakamolemoleʼaki ʼaki he lotolelei, mo kapau ʼe ʼi ai he tahi ʼe ina koviʼia he meʼa ʼa he tahi age. Ohage ko te lotolelei ʼa Sehova ke ina fakamolemole kia koutou, ke koutou toe fai feiā pe mo koutou.” (Kolose 3:13) Kapau ʼe tou loto fakamolemole, pea ʼe tou tokoni ki te taupau ʼo te logo tahi maʼuhiga ʼo te kautahi ʼa Sehova.
Ko Te Logo Tahi Pea Mo Te ʼu Tonu ʼAē ʼe Tou Fai Takitokotahi
15. Koteā ʼaē ʼe tokoni ki te hahaʼi ʼa Sehova ke nātou taupau te logo tahi mokā nātou fai he ʼu tonu?
15 Neʼe faʼu tatou e te ʼAtua ʼaki te loto faʼitaliha, ke tou fili te meʼa ʼaē ʼe tou fia fai, ʼo ina foaki mai mo te pilivilesio pea mo te maʼua ʼaē ke tou fai he ʼu tonu takitokotahi. (Teutalonome 30:19, 20; Kalate 6:5) Kae, ʼe feala ke tou taupau tatatou logo tahi heʼe tou mulimuli ki te ʼu lao pea mo te ʼu pelesepeto ʼa te Tohi-Tapu. ʼE tou tokagaʼi te ʼu meʼa ʼaia, mokā ʼe tou fai he ʼu tonu takitokotahi. (Gāue 5:29; 1 Soane 5:3) Kapau la ʼe lagaʼi he fehuʼi ʼo ʼuhiga mo tatatou mole kau ki te tau. ʼE feala ke tou fai he tonu kua ʼosi tou fakakaukau kiai, ʼo tou manatuʼi ʼe mole tou “kau ʼi te malamanei” pea kua tou ‘tuki tatatou ʼu heletā ko he ʼu huo fuli kele.’ (Soane 17:16; Isaia 2:2-4) ʼO toe feiā aipe, kapau ʼe tonu ke tou fai he tonu ʼo ʼuhiga mo tatatou felogoi mo te Puleʼaga, ʼe tou tokagaʼi anai te meʼa ʼaē ʼe ʼui e te Tohi-Tapu ʼo ʼuhiga mo te liufaki ʼo “te ʼu meʼa ʼa te ʼAtua ki te ʼAtua,” ʼo tou fakalogo ki “te ʼu pule māʼoluga” ʼi te ʼu meʼa fakamālama. (Luka 20:25; Loma 13:1-7; Tito 3:1, 2) Ei, tou tokagaʼi te ʼu lao pea mo te ʼu pelesepeto ʼo te Tohi-Tapu, mokā tou fai he ʼu tonu takitokotahi, ke tokoni kia tatou ke tou taupau tatatou logo tahi faka Kilisitiano.
16. ʼE lava feafeaʼi hatatou tokoni ki te taupau ʼo te logo tahi, mokā tou fai he tonu ʼe mole ʼi ai he lao peʼe ko he pelesepeto faka Tohi-Tapu ki te faʼahi ʼaia? Koutou fakahā he faʼifaʼitaki.
16 ʼE feala pe ke tou tokoni ki te taupau ʼo te logo tahi faka Kilisitiano, māʼiape la mokā ʼe tou fai he tonu ʼe mole he lao peʼe ko he pelesepeto faka Tohi-Tapu kiai. ʼO feafeaʼi? ʼI tatatou fakahā ʼe tou ʼofa ki totatou ʼu tēhina ʼaē ʼe feala ke lotomamahi ʼi te tonu ʼaē ka tou fai. Koʼeni tona faʼifaʼitaki: ʼI te kokelekasio ʼo Kolonito ʼi te temi muʼa, neʼe lagaʼi te fehuʼi ʼo ʼuhiga mo te ʼu kanoʼi manu ʼaē neʼe sakilifisioʼi ki te ʼu tamapua. ʼE mahino papau ia, neʼe mole kau he Kilisitiano ki te ʼu toʼotoʼoga ʼaē neʼe fai ki te ʼu tamapua. Kae, neʼe mole ko he agahala te kai ʼo te toe ʼo te kanoʼi manu ʼaia neʼe fakahali lelei tona toto, pea mo fakatau ʼi te fakatauʼaga meʼa. (Gāue 15:28, 29; 1 Kolonito 10:25) Kae, neʼe hoha te leʼo ʼo loto ʼo ʼihi kau Kilisitiano ʼo ʼuhiga mo te kai ʼo te ʼu kanoʼi manu ʼaia. Koia, neʼe uga ai e Paulo te kau Kilisitiano, ke ʼaua naʼa nātou fakatupu tūkia ki te kau Kilisitiano ʼaia. ʼI tona fakahagatonu, neʼe ina tohi fēnei: “Kapau ʼe fakatupu tūkia he meʼa kai ki toku tēhina, ʼe mole ʼau toe kai anai ki he kanoʼi manu, ke mole ʼau fakatupu tūkia ki toku tēhina.” (1 Kolonito 8:13) Koia, tatau aipe pe tou fai he meʼa kae mole ʼi ai he lao pe ko he pelesepeto ʼo te Tohi-Tapu ʼe pipiki kiai, ʼe tou fakahā anai tatatou ʼofa ʼo tou tokagaʼi ʼihi mo kapau ʼe tou fai he ʼu tonu ʼe feala ke lave kovi ki te logo tahi ʼo te famili ʼa te ʼAtua!
17. Koteā ʼaē ʼe lelei ke tou fai mo kapau ʼe tonu ke tou fai he tonu?
17 Kapau ʼe mole tou ʼiloʼi papau te meʼa ʼaē ʼe tonu ke tou fai, pea ʼe ko he aga poto anai hatatou fai he tonu ʼe mole fakatupu kovi ki totatou leʼo ʼo loto, pea ʼe tonu ke fakaʼapaʼapa te hahaʼi ki te tonu ʼaē neʼe tou fai. (Loma 14:10-12) ʼE mahino papau ia, kapau ʼe tonu ke tou fai he tonu, pea ʼe tonu ke tou kumi te takitaki ʼa Sehova ʼi te faikole. Ohage ko te tagata fai pesalemo, ʼe feala ke tou faikole fēnei ʼaki he loto falala: “Falele mai tou taliga kia te ʼau. . . . Heʼe ko koe ko toku maka pea mo toku tule mālohi; pea ʼe ke ʼaveʼave anai ʼau pea mo taki anai ʼau ʼuhi ko tou huafa.”—Pesalemo 31:2, 3.
Tou Taupau Tuʼumaʼu Te Logo Tahi Faka Kilisitiano
18. Koteā te meʼa neʼe fakaʼaogaʼi e Paulo moʼo fakatā te logo tahi ʼa te kokelekasio Kilisitiano?
18 Ia 1 Kolonito kapite 12, neʼe fakaʼaogaʼi e Paulo te sino ʼo te tagata moʼo fakatā te logo tahi ʼa te kokelekasio faka Kilisitiano. Neʼe ina fakahā te ʼaoga ʼo te ʼu koga kehekehe ʼo te sino pea mo te maʼuhiga ʼo te ʼu koga fuli ʼaia. Neʼe fehuʼi fēnei e Paulo: “Kapau ko nātou fuli neʼe ko he koga e tahi, ʼe ʼifea anai te sino? Kae ʼi te temi nei ʼe lahi te ʼu koga, kae ʼe ko he sino e tahi. ʼE mole feala ke ʼui e te mata ki te nima: ‘ ʼE mole ke ʼaoga koe kia ʼau’; pea mole toe feala ke ʼui e te ʼulu ki te ʼu vaʼe: ‘ ʼE mole koulua ʼaoga koulua kia ʼau.’ ” (1 Kolonito 12:19-21) ʼO toe feiā aipe, ʼe kehekehe te ʼu gāue ʼaē ʼe tou fai ʼi te famili ʼo te kau atolasio ʼa Sehova, kae ʼe tou logo tahi, pea ʼe ʼaoga kia tatou tatatou ʼu tēhina mo tuagaʼane, ohage pe ko tatatou ʼaoga ʼaē kia nātou.
19. ʼE lava feafeaʼi ke tou maʼu te meʼa kai fakalaumālie mai te ʼAtua, pea koteā ʼaē neʼe ʼui e te tēhina kua matuʼa ʼo ʼuhiga mo te faʼahi ʼaia?
19 Ohage pe ko te ʼaoga ʼaē ke fafaga te sino, ke gaohi leleiʼi, pea mo takitaki, koia ʼe ʼaoga kia tatou te meʼa kai fakalaumālie ʼaē ʼe foaki mai e te ʼAtua ʼaki tana Folafola, mo tana laumālie, pea mo tana kautahi. Kapau ʼe tou fia maʼu te ʼu meʼa kai ʼaia, pea ʼe tonu ke tou kau ki te famili ʼa Sehova ʼi te kele. Hili kiai ni ʼu taʼu ʼi tana gāue kia Sehova, neʼe tohi fēnei e te tēhina: “ ʼE ʼau loto fakafetaʼi ʼaupito ʼi taku kua mahino ki te ʼu fakatuʼutuʼu ʼa Sehova talu mai te ʼu ʼuluaki ʼaho, ʼi muʼa ʼo te taʼu 1914, ʼaē neʼe mole tou mahino lelei ai ki te moʼoni . . . ʼo aʼu ki te temi ʼaenī, ʼaē kua tou mālama lelei ai kiai. Ko te meʼa ʼaē neʼe maʼuhiga tāfito kia ʼau, ko taku pipiki lelei ki te kautahi ʼa Sehova ʼaē ʼi te kele. Ko te meʼa ʼaē neʼe hoko kia ʼau ʼi te kamata, neʼe ina akoʼi mai kia ʼau ʼe mole ko he aga fakapoto hakita falala ki te fakakaukau fakatagata. ʼI te temi ʼaē neʼe ʼau mahino ai ki te faʼahi ʼaia, neʼe ʼau fakatotonu ai leva ke ʼau nofo ʼi te kautahi agatonu. Koteā te tahi age meʼa ʼe feala ke tou maʼu ai te ʼofa pea mo te tapuakina ʼa Sehova?”
20. Koteā ʼaē ʼe tonu ke tou fakatotonu ke tou fai ʼo ʼuhiga mo tatatou logo tahi ʼi te lotolotoiga ʼo te hahaʼi ʼa Sehova?
20 Neʼe pāui e Sehova tana hahaʼi ke nātou mavae mai te fakapōʼuli pea mai te maveuveu ʼo te malamanei. (1 Petelo 2:9) Neʼe ina tapuakina tatou ʼaki tatatou logo tahi ʼaē mo ia pea mo ʼotatou ʼu tēhina ʼi te tui. ʼE maʼu anai te logo tahi ʼaia ʼi te tuʼu ʼo te ʼu meʼa foʼou ʼaē kua fakaōvi mai. Koia, ʼi te ʼu ʼaho fakamuli maʼuhiga ʼaenī, tou haga ‘kofuʼi tatou ʼaki te ʼofa’ pea mo tou fai ia meʼa fuli ke tou fakatuputupu pea mo tou taupau tatatou logo tahi maʼuhiga.—Kolose 3:14.
ʼE Koutou Tali Feafeaʼi Anai?
◻ He koʼe ko te fai ʼo te finegalo ʼo te ʼAtua pea mo te pipiki ki te moʼoni ʼe tokoni mai kia tatou ke tou taupau te logo tahi?
◻ ʼE pipiki feafeaʼi te logo tahi mo te fakaʼaogaʼi lelei ʼo te ʼalelo?
◻ Koteā te faka ʼuhiga ʼo te loto fakamolemole?
◻ ʼE lava feafeaʼi hatatou taupau te logo tahi mokā tou fai he ʼu tonu?
◻ He koʼe ʼe tonu ke tou taupau te logo tahi faka Kilisitiano?
[Paki ʼo te pasina 16]
Ohage ko te fakatahiʼi e te tagata tauhi ōvi ʼaia tana faga ōvi, ʼe toe feiā mo Sehova, ʼe ina taupau tana hahaʼi ke nātou logo tahi
[Paki ʼo te pasina 18]
ʼE tou fakatuputupu anai te logo tahi, mo kapau ʼe tou faifakalelei, ʼaki he agavaivai, ki he tahi neʼe kita hala ki ai