Koteā ʼAē ʼe Feala Ke Tou Ako Mai Te ʼu Manu ʼAē Neʼe “Tutupu ʼAki He Faʼahiga Poto”

KO TE masini fakamokomoko, mo te meʼa ʼaē ʼe ina fakasiʼisiʼi te momoko, mo te fakaoʼo ʼo te vai ke toʼo kehe te māsima, pea mo te meʼa ʼaē ʼe fakaʼaogaʼi e te ʼu vaka uku moʼo takitaki ʼo nātou ʼi te lalo tai, ko te ʼu meʼa ʼaia neʼe hoki ʼiloʼi lelei e te tagata ʼi te 20 sēkulō. Kae, ko te ʼu meʼa ʼaia neʼe kua ʼosi maʼu e te ʼu manu ia taʼu ʼe lauʼi afe ki muʼa atu. Ei, ʼe maʼu e te malamanei te ʼu lelei ʼaki te akoʼi ʼo te ʼu faʼahiga manu ʼaia ʼaē neʼe “tutupu ʼaki he faʼahiga poto.” (Tāʼaga Lea 30:24-28; Sopo 12:​7-9) ʼE hage neʼe liliu ʼihi ʼu manu ko he kau takitaki fakalogologo ʼo te malamanei, pea ʼe ko he meʼa lelei anai te vakavakaʼi ʼo te ʼu manu ʼaia.

ʼE feala koa ke ʼaoga kia tatou hatatou vakavakaʼi te ʼu agaaga ʼo ʼihi ʼu manu? Neʼe fakatatau e Sesu Kilisito tana ʼu tisipulo ki he ʼu ōvi, ki he ʼu gata, ki he ʼu lupe, pea ki he ʼu heʼe. Koteā te meʼa ʼaē neʼe manatu kiai ʼi tana fakatatau tana ʼu tisipulo ki te ʼu manu ʼaia? Tou vakaʼi te faʼahi ʼaia.

“ ʼE Fakalogo Taku ʼu Ōvi Ki Toku Leʼo”

ʼE tuʼa 200 tupu te palalau ʼa te Tohi-Tapu ki te ʼu ōvi. Ohage ko tona fakamahino e te tikisionalio Smith’s Bible Dictionary, “ko te ʼu ōvi ʼe ko te fakatā ʼaia ʼo te agavaivai, mo te loto kātaki, pea mo te fakalogo.” Ia Isaia kapite 53, neʼe talanoa te lea faka polofeta ʼo ʼuhiga mo Sesu, ʼo ina fakatatau ia ia ki he ōvi. ʼE tau mo feʼauga tana fakatatau ia tana ʼu tisipulo ki te manu ʼaia! Kae koteā te ʼu agaaga tāfito ʼo te ʼu ōvi neʼe manatu kiai ia Sesu?

Neʼe ʼui fēnei e Sesu: “ ʼE fakalogo taku ʼu ōvi ki toku leʼo, pea ʼe ʼau ʼiloʼi ia nātou, pea ʼe nātou mulimuli ia te ʼau.” (Soane 10:27) Neʼe ina faka maʼuhigaʼi te agavaivai ʼo tana ʼu tisipulo pea mo tanatou loto ʼaē ke nātou mulimuli ia te ia. ʼE fakalogo te ʼu ōvi ki tonatou tagata taupau ōvi pea ʼe nātou muliʼi lelei ia ia. Tahi ʼaē meʼa, ko te tagata tauhi ōvi ʼe ʼofa ki tana faga ōvi.

ʼI he koga meʼa ʼe lunaʼia, ʼe feala ke mavetevete ai te ʼu ōvi mokā nātou kakai, kae ʼe nātou felogoi tuʼumaʼu ʼi tonatou ʼuhiga faga ōvi. Koia, mokā logoʼi e te ʼu manu he tuʼutāmaki peʼe nātou matataku, ʼe ʼui e te tohi Alles für das Schaf (Ia meʼa fuli ʼo ʼuhiga mo te faga ōvi): “ ʼE feala ke nātou fakatahitahi vave.” Kapau ʼe feholaki te ʼu ōvi ke nātou hāo ʼi he tuʼutāmaki, ʼe nātou feholaki fakatahi, ʼo nātou tutuʼu ʼi ʼihi temi moʼo vakaʼi peʼe kua feafeaʼi te ʼaluʼaga ʼo te meʼa fakatupu tuʼutāmakiʼia. “Ko tanatou tutuʼu ʼaia, ʼe faka fealagia ai ki te ʼu akeno pea mo te ʼu manu ʼaē kua vaivavai ke mole nātou gaʼegaʼe. Neʼe puipui e te faga ōvi te ʼu manu ʼaia.” Koteā ʼaē ʼe feala ke tou ako ʼaki te aga ʼaia ʼa te ʼu manu?

Ia ʼaho nei, ʼe mole mavetevete te kau Kilisitiano moʼoni ʼi te ʼu tauhi pe ko te ʼu magaʼi lotu ʼo te Keletiate. Kae, ʼe nātou faʼufaʼu te faga ōvi e tahi. ʼE logoʼi e te Kilisitiano takitokotahi ʼe pipiki ki te faga ōvi ʼaia ʼa te ʼAtua, pea ʼe tokoni te faʼahi ʼaia ki te logo tahi ʼo te kautahi ʼa te kau Fakamoʼoni ʼa Sehova. Ka hoko ai he fihifihia​—ohage ko he mahaki kovi, he tau, peʼe ko he tuʼutāmaki—​kofea koa ʼaē ʼe kumi kiai e te kau atolasio he takitaki pea mo he puipui? ʼE nātou kumi ʼi te kautahi ʼa Sehova, ʼaē ʼe ina foaki he puipui ʼi te faʼahi fakalaumālie.

E feafeaʼi te foaki tokoni ʼa te Tohi-Tapu? ʼI te ʼu tohi, ohage ko Te Tule Leʼo pea mo te nusipepa ʼaē ʼe na ʼalutahi, te Réveillez-vous! Ko te ʼu nusipepa ʼaia pea mo te ʼu fono faka Kilisitiano, ʼe nātou foaki he tokoni makehe kia nātou ʼaē ʼe ʼaoga tāfito kiai, ohage ko te ʼu akeno pea mo te ʼu ōvi vaivavai ʼo te faga ōvi. Ohage la, ʼe foaki he tokoni ki te ʼu tāmai pe ko te ʼu faʼe ʼaē ʼe nātou taupau tokotahi tanatou fānau, pea mo nātou ʼaē ʼe tau mo he lotomamahi. Koia, ʼe ko he meʼa lelei ke tou lau te ʼu nusipepa fuli, ke tou kau ki te ʼu fono fuli ʼo te kokelekasio, pea ke tou maʼuliʼi te ʼu meʼa ʼaē ʼe tou ako! Kapau ʼe tou fai te faʼahi ʼaia, pea ʼe tou fakahā ai anai ʼe tou agavaivai pea ʼe tou ʼofa mālohi ki te faga ōvi ʼa te ʼAtua.​—1 Petelo 5:2.

“Ke Koutou Fakaʼeteʼete Ohage He ʼu Gata, Ka Ke Koutou Maʼa Ohage Ni Lupe Hina”

ʼE ʼui fēnei e te tikisionalio Smith’s Bible Dictionary: “ ʼI te Potu Hahake neʼe fakaʼaogaʼi te gata moʼo fakatātā te kovi, te laumālie ʼo te talagataʼa.” Kae, ko te kupuʼi palalau “taku lupe hina” neʼe fakaʼaogaʼi moʼo fakahā te ʼofa. (Katiko ʼo Te ʼu Katiko 5:2) Kae, koteā ʼaē neʼe manatu kiai ia Sesu ʼi tana fakaloto mālohiʼi tana ʼu tisipulo ke nātou ‘fakaʼeteʼete ohage he ʼu gata, ka ke nātou maʼa ohage ni lupe hina’?​—Mateo 10:16.

Neʼe foaki e Sesu he ʼu fakatotonu ʼo ʼuhiga mo te fai faka mafola pea mo te faiako. Neʼe kua ʼiloʼi e tana ʼu tisipulo ʼe tali leleiʼi anai nātou peʼe kailoa ʼi tanatou fai faka mafola. ʼE tokosiʼi anai ia nātou ʼaē ka nātou fia logo ki te fai faka mafola ʼaia, pea ko ʼihi ʼe nātou fakafisi anai ki te logo lelei. Māʼiape la mo ʼihi, ʼe nātou fakatagaʼi anai te kau kaugana moʼoni ʼaia ʼa te ʼAtua. (Mateo 10:17-​23) Neʼe tonu ke feafeaʼi te aga ʼa te kau tisipulo mokā fakatagaʼi nātou?

ʼI te Das Evangelium des Matthäus (Te Evaselio ʼo Mateo), ʼe ʼui e Fritz Rienecker ʼo ʼuhiga mo Mateo 10:16: “Ko te fakasiosio poto . . . ʼe tonu ke fakatahiʼi mo te agatonu, mo te fakamalotoloto, pea mo te fakahagatonu, talia naʼa maʼu e te ʼu fili he tupuʼaga lelei ke nātou meo. Ko nātou ʼaē ʼe nātou fakafofoga ia Sesu ʼe nātou nonofo ʼi te lotolotoiga ʼo te ʼu fili ʼe aga fekai, ʼe mole nātou fakaʼapaʼapa ki te ʼu ʼapositolo pea ʼaki he loto heʼe manavaʼofa, ʼe nātou tauʼi ʼi te ʼu faigamālie fuli pe ʼaē ʼe nātou maʼu. Koia, ohage ko he ʼu gata, ʼe tonu ke nātou nonofo tokaga ki te ʼu fili, pea ke nātou vakaʼi te ʼaluʼaga ʼo nātou nofo ʼalaʼala; ke vakavakaʼi te ʼaluʼaga, kae mole fai ʼaki he aga fakakākā, mo nātou nonofo maʼa pea mo agatonu ʼi tanatou ʼu palalau pea mo tanatou ʼu gāue, ohage ko he ʼu lupe hina.”

Koteā ʼaē ʼe feala ke ako e te kau kaugana ʼa te ʼAtua ʼo totatou temi, ʼi te ʼu palalau ʼa Sesu ʼaē ʼe tou maʼu ia Mateo 10:16? Ia ʼaho nei, ko te tali ʼa te hahaʼi ia te logo lelei ʼe tatau mo te tali ʼa te hahaʼi ʼi te ʼuluaki sēkulō. Ka hoko kia nātou he ʼu fakataga, pea ʼe tonu ke fakatahiʼi e te kau Kilisitiano te fakasiosio poto ʼa te gata mo te ʼuhiga maʼa ʼo te lupe. ʼE mole he temi ʼe fakaʼaogaʼi ai e te kau Kilisitiano he aga fakakākā peʼe ko he aga heʼe agatonu, kae ʼe nātou heʼe mele, mo moʼoni, pea mo agatonu ʼi tanatou tala te logo ʼo te Puleʼaga ki te hahaʼi.

Koʼeni tona faʼifaʼitaki: Ko te kau kaugā gāue, ko te kau tūpulaga ʼi te faleako, peʼe ko te ʼu hahaʼi ʼo tokotou famili, e lagi nātou fai atu kia koutou he ʼu palalau kovi ʼo ʼuhiga mo te ʼu meʼa ʼaē ʼe koutou tui kiai, ʼi tokotou ʼuhiga Fakamoʼoni ʼa Sehova. ʼE koutou lagi tali anai te kovi ʼaki te kovi, ʼo koutou laukoviʼi te ʼu meʼa ʼaē ʼe nātou tui kiai. Kae ʼe lelei koa takotou aga ʼaia? Kailoa. Kapau ʼe fakatokagaʼi e nātou ʼaē ʼe fakafeagai kia koutou, ko te ʼu meʼa ʼaē ʼe nātou lau ʼe mole ina fetogi ia takotou aga, pea e lagi feala ke nātou fakagata tanatou ʼu palalau kovi ʼaia. Koia, ʼe koutou liliu anai ʼo fakasiosio poto pea mo heʼe mele​—ʼo ‘fakaʼeteʼete ohage he ʼu gata, kae maʼa ohage he ʼu lupe hina.’

“Ko Te ʼu Heʼe Neʼe Hage Ko Te ʼu Hōsi ʼAē Neʼe Teuteuʼi Ki Te Tau”

ʼE fakamatala fēnei e te nusipepa GEO, ʼi te taʼu 1784, neʼe maumauʼi te Potu Toga ʼo Afelika “e te ʼu tuʼuga [heʼe] pea neʼe mole heʼeki hoko he meʼa feiā ʼi te hisitolia.” Neʼe ʼaofi e te ʼu tuʼuga heʼe te koga meʼa ʼaia ia kilometa kale e 5 200, ʼaē ʼe teitei pe ke tuʼa nima tona lahi ʼi Hong Kong. ʼE ʼui fēnei e te tikisionalio faka Tohi-Tapu Smith’s Bible Dictionary, ko te heʼe “ ʼe lahi te ʼu maumau ʼaē ʼe ina fai ki te ʼu ʼulu ʼakau pea mo te ʼu fuʼu ʼakau ʼo te ʼu fenua ʼaē ʼe fakalaka ai.”

ʼI tana fakahā te ʼu meʼa ʼaē neʼe foaki e te ʼAtua, te ʼu meʼa ka hoko anai lolotoga “te ʼaho ʼo te ʼAliki,” neʼe fakaʼaogaʼi e Sesu te meʼa neʼe hā ai te ʼu tuʼuga heʼe. ʼO ʼuhiga mo te ʼu heʼe ʼaia, neʼe ina ʼui fēnei: “Ko te ʼu fofoga ʼo te ʼu heʼe neʼe hage ko te ʼu hōsi ʼaē neʼe teuteuʼi ki te tau.” (Fakahā 1:​1, 10; 9:​3-7) Neʼe koteā te faka ʼuhiga ʼo te fakatā ʼaia?

Kua fualoa te mahino ʼa te kau Fakamoʼoni ʼa Sehova ko te ʼu heʼe ʼo te Fakahā kapite 9, ʼe nātou fakatātā te kau kaugana fakanofo ʼa te ʼAtua ʼi te kele ʼi te sēkulō ʼaenī.a Neʼe hinoʼi ki te kau Kilisitiano ʼaia te gāue makehe​—ke nātou faka mafola te logo ʼo te Puleʼaga ʼi te kele katoa pea mo fai he ʼu tisipulo. (Mateo 24:14; 28:19, 20) Ko tona faka ʼuhiga, ʼe tonu ke nātou tauʼi te ʼu fihifihia ʼaē ʼe hoko kia nātou, pea ke nātou haga hoko atu tanatou gāue. ʼE ʼi ai koa la he tahi meʼa ʼe lelei age moʼo fakatā ʼo te faʼahi ʼaia ʼaki te ʼu heʼe lototoʼa?

Logope la ʼe mole lahi age ia satimeta e 5, kae ʼe folau te heʼe ia kilometa e 100 peʼe 200 ʼi te ʼaho fuli. Ko te heʼe ʼo te toafa ʼe feala ke ina fai ia kilometa e 1 000. ʼE fakamahino fēnei mai e te nusipepa GEO, “ ʼe ina tā tona ʼu kapakau ʼo tuʼa 18 ʼi te sekonita, pea ʼe ina fai te faʼahi ʼaia lolotoga ia hola e 17 ʼi te ʼaho e tahi​—pea ʼe mole he tahi kiʼi manu ʼe feala ke ina fai te meʼa ʼaia.” ʼE ko he toe gāue lahi ʼaē ʼe fai e te kiʼi manu veliveli ʼaia!

ʼI tonatou ʼuhiga kūtuga, ʼe haga fai e te kau Fakamoʼoni ʼa Sehova te faka mafola ʼo te logo lelei ʼo te Puleʼaga. ʼI te temi nei, ʼe nātou fai faka mafola ia fenua e 230 tupu. ʼE tauʼi e te ʼu kaugana ʼaia ʼa te ʼAtua te ʼu fihifihia kehekehe ke feala hanatou kau ki te fakahoko ʼo te gāue. Koteā koa te ʼu faʼahiga fihifihia ʼe felāveʼi mo nātou? ʼI te ʼu fihifihia ʼaia ʼe kau kiai te fakapalatahi, te ʼu faka tuʼakoi ʼaē ʼe fai e te ʼu puleʼaga ʼo ʼuhiga mo tanatou gāue, te mahaki, te lotovaivai, pea mo te fakafeagai ʼo te ʼu kāiga. Kae ʼe mole he meʼa ʼe ina fakagata tanatou haʼele ki muʼa. ʼE nātou pipiki ki tanatou gāue ʼaē neʼe foaki age e te ʼAtua.

Tou Haga Fakahā Te ʼu Kalitate Faka Kilisitiano

Ei, neʼe fakatatau e Sesu tana ʼu tisipulo ki he ʼu ōvi, ki he ʼu gata, ki he ʼu lupe pea ki he ʼu heʼe. ʼE ko he meʼa ʼe tau mo feʼauga ʼi totatou temi. Koteā tona tupuʼaga? Koteʼuhi kua ōvi mai te fakaʼosi ʼo te tuʼu ʼo te ʼu faʼahiga meʼa ʼaenī, pea kua fakaʼāsili age te lahi ʼo te ʼu fihifihia.

ʼI tanatou manatuʼi te ʼu palalau fakatātā ʼa Sesu, ʼe pipiki maʼu te kau Kilisitiano ki te faga ōvi ʼa te ʼAtua, pea mo nātou tali ʼaki he agavaivai te ʼu tokoni ʼaē ʼe haʼu mai te kautahi ʼa Sehova. ʼE nātou tokakaga pea mo nātou siosioʼi te ʼu ʼaluʼaga ʼaē ʼe feala ke fakatupu kovi ki tanatou ʼu gāue faka Kilisitiano, ʼo nātou nofo maʼa ia meʼa fuli. Pea tahi ʼaē, ʼe haga hoko atu aipe tanatou fai te finegalo ʼo te ʼAtua logope la te ʼu fihifihia ʼaē ʼe tau mo nātou. Pea ʼe hoko atu pe tanatou ako mai te ʼu manu ʼaē neʼe “tutupu ʼaki he faʼahiga poto.”

[Kiʼi nota ʼi te lalo pasina]