Neʼe Fakanofo e Te ʼAtua Te ʼu Tagata Taupau Mo Te Kau Faifekau Faka Minisitelio
“Koutou tokakaga kia koutou totonu pea mo te faga ōvi fuli, ʼaē kua fakanofo koutou kiai e te laumālie maʼoniʼoni ko he kau tagata taupau.”—Gaue 20:28, MN.
1, 2. ʼE lolotoga hoko feafeaʼi ia Isaia 60:22?
TALU mai fualoa, neʼe fakakikite e Sehova ʼe hoko anai he meʼa fakatalakitupua ʼi te temi ʼo te fakaʼosi. ʼAki te polofeta ko Isaia, neʼe tala fēnei: “Ko te tokosiʼi ʼe liliu anai ko te lauʼi afe, pea ko ia ʼaē ʼe veliveli ʼe liliu anai ko te puleʼaga mālohi. Ko ʼau, Sehova, ʼe ʼau fakavaveʼi anai te faʼahi ʼaia ʼi tona temi totonu.”—Isaia 60:22.
2 ʼE lolotoga hoko moʼoni koa te lea faka polofeta ʼaia ʼi te temi nei? Ei! Lolotoga te ʼu taʼu 1870, neʼe fakatuʼu te kokelekasio ʼa te hahaʼi ʼa Sehova ʼi Allegheny, ʼi Pennsylvanie, ʼi Amelika. Talu mai te kiʼi kamataʼaga ʼaia, ko te lauʼi afe kokelekasio kua fakatuʼu pea mo mafola ʼi te malamanei katoa. Ko te lauʼi miliona kau fai faka mafola ʼo te Puleʼaga—te puleʼaga mālohi—ʼe nātou fakatahitahi ʼi te temi nei ʼi te ʼu kokelekasio e 91 000 tupu ia fenua e 235 ʼi te kele katoa. ʼE ko he fakamoʼoni lelei ʼaia, ko Sehova ʼe ina fakavaveʼi te fakatahiʼi ʼo te kau atolasio moʼoni, ʼi muʼa ʼo te “mamahi lahi,” ʼaē kua vave hoko mai.—Mateo 24:21; Apokalipesi 7:9-14.
3. Koteā te faka ʼuhiga ʼo te papitema “i te Huafa o te Tamai, mo te Alo, mo te Laumalie-Maonioni”?
3 ʼI tanatou ʼosi foaki takitokotahi tonatou maʼuli kia Sehova, pea ʼo mulimuli ki te ʼu fakatotonu ʼa Sesu, ko te lauʼi miliona hahaʼi ʼaia neʼe nātou papitema “i te Huafa o te Tamai, mo te Alo, mo te Laumalie-Maonioni.” (Mateo 28:19) Ko tanatou papitema “i te Huafa o te Tamai,” ko tona faka ʼuhiga ko nātou ʼaia ʼaē kua foaki tonatou maʼuli, ʼe nātou fakamoʼoni ko Sehova ko tanatou Tāmai ʼaē ʼi selo, ko te Tupuʼaga ʼo te Maʼuli, pea mo nātou fakalogo ki tona pule. Ko te papitema ‘ ʼi te huafa ʼo te ʼAlo,’ ko tona faka ʼuhiga ʼe nātou tui ko Sesu Kilisito ia Ia ʼaē neʼe ina totogi nātou, ko tonatou Tagata Takitaki pea mo tonatou Hau. ʼE nātou toe fakamoʼoni ʼe takitaki tonatou maʼuli e te laumālie maʼoniʼoni ʼa te ʼAtua, peʼe ko tona mālohi gāue. ʼE fakahā ʼaki kua nātou papitema ‘ ʼi te huafa ʼo te laumālie maʼoniʼoni.’
4. ʼE tou liliu feafeaʼi ko he ʼu minisi Kilisitiano?
4 ʼI tanatou papitema, ʼe liliu te ʼu tisipulo foʼou ʼaia ko he ʼu minisi ʼa Sehova ʼAtua. Ko ai ʼaē ʼe ina fakanofo nātou? ʼE feala ke faka ʼuhiga kia nātou te ʼu palalau ʼaenī ʼe tuʼu ia 2 Kolonito 3:5: “Ko tomatou feauga mo te gaue [ʼaē ko te kau minisi] e haù mai te Atua.” ʼE mole he tahi pilivilesio lahi age ʼe feala ke nātou holi kiai, ʼaē ke fili nātou e Sehova ʼAtua totonu! ʼI tanatou ʼosi papitema, ʼe hoko atu anai tanatou tuputupu ʼi te faʼahi fakalaumālie ʼi tonatou ʼuhiga minisi ʼo te “Logolelei,” mo kapau ʼe nātou tali te takitaki ʼa te laumālie ʼa te ʼAtua pea mo nātou haga maʼuliʼi tana Folafola.—Mateo 24:14; Gaue 9:31.
Te Fakanofo ʼo Te ʼu Tēhina: ʼE Teokalatike Kae Mole Temokalatike
5. ʼE fili faka temokalatike koa te kau tagata taupau Kilisitiano pea mo te kau tagata faifekau faka minisitelio? Koutou fakamahino.
5 ʼE tonu ke fai e te kau tagata taupau te leʼoleʼo fakapotopoto pea ke lagolago kia nātou te kau tagata faifekau faka minisitelio, ke feala hanatou tokaga lelei ki te ʼu faʼahi fakalaumālie ʼa te kau minisi ʼaē ʼe ʼāsili tuputupu ʼo kaugamālie. (Filipe 1:1) ʼE fakanofo feafeaʼi te ʼu tagata ʼaia ʼaē kua mālohi ʼi te faʼahi fakalaumālie? ʼE mole hage ko tona fai ʼi te Keletiate. Ohage la, ko te kau tagata taupau Kilisitiano ʼe mole fili faka temokalatike nātou, ko tona faka ʼuhiga ʼe mole vote te kokelekasio maʼa he tahi. Kae ʼe fakanofo nātou ʼo mulimuli ki te teokalasia. Koteā koa tona faka ʼuhiga?
6. (a) Koteā te teokalasia moʼoni? (b) He koʼe ʼe faka teokalatike te fakanofo ʼa te ʼu tagata taupau pea mo te kau tagata faifekau faka minisitelio?
6 ʼI tona fakanounou, ko te faka ʼuhiga ʼo te teokalasia moʼoni ʼe ko te pule ʼa te ʼAtua. ʼE lotolelei te kau Fakamoʼoni ʼa Sehova ke nātou fakalogo ki tona pule, pea mo nātou gāue fakatahi moʼo fakahoko ʼo te finegalo fakaʼatua. (Pesalemo 143:10; Mateo 6:9, 10) ʼE faka teokalatike te fakanofo ʼa te kau taupau Kilisitiano, peʼe ko te kau tagata ʼāfea, pea mo te kau tagata faifekau faka minisitelio, koteʼuhi ko te fili pea mo te fakanofo ʼo te ʼu tagata ʼaia, ʼe fai ʼo mulimuli ki te ʼu fakamaʼua ʼa te ʼAtua ʼaē ʼe tuʼu ʼi te Tohi-Tapu. Pea ʼi tona ʼuhiga “pule kia meʼa fuli,” ʼe ko Sehova ʼaē ʼe ina vakaʼi peʼe feafeaʼi anai te ʼu gāue ʼo tana kautahi ʼi te kele.—1 Fakamatala 29:11; Pesalemo 97:9.
7. ʼE takitaki feafeaʼi ia te kau Fakamoʼoni ʼa Sehova?
7 ʼO mole hage ko te ʼu kūtuga faka lotu kehekehe ʼi te Keletiate, ko te kau Fakamoʼoni ʼa Sehova ʼe mole fai e nātou totonu he tonu ʼo ʼuhiga mo te faʼahiga fakatuʼutuʼu faka lotu ʼaē ka nātou fakalogo kiai. Ko te kau Kilisitiano moʼoni ʼaia ʼe nātou faiga ke nātou pipiki ki te ʼu lekula ʼa Sehova. Ko tonatou ʼu tagata taupau ʼe mole fakanofo nātou e he ʼēkelesia, peʼe ko he ʼu pule, peʼe ko he kau takitaki lotu ʼo te puleʼaga. Kapau ʼe faiga e ʼihi ʼo te mālama ke nātou tāʼofi te ʼu fai fakanofo ʼaia, pea ʼe mole fakalogo anai kiai ia te hahaʼi ʼa Sehova. ʼAki he lototoʼa, ʼe nātou taupau te aga ʼaē neʼe fakahā lelei e te kau ʼapositolo ʼi te ʼuluaki sēkulō ʼi tanatou ʼui fēnei: “E maua ke fakalogo ki te Atua i te fakalogo ki te tagata.” (Gaue 5:29) ʼE fakalogo ai te kau Fakamoʼoni ki te ʼAtua ia meʼa fuli pe. (Hepeleo 12:9; Sakopo 4:7) ʼE tapuakina anai tatou e te ʼAtua mo kapau ʼe tou mulimuli ki te ʼu fakatuʼutuʼu faka teokalatike.
8. Koteā te kehekehe ʼo te ʼu fakatuʼutuʼu faka temokalatike pea mo faka teokalatike?
8 ʼI totatou ʼuhiga kaugana ʼaē ki te Teokalate Lahi, ko Sehova, ʼe lelei hatatou manatuʼi te kehekehe ʼo te ʼu fakatuʼutuʼu faka temokalatike pea mo faka teokalatike. ʼI te ʼu fakatuʼutuʼu faka temokalatike, ʼe tahi fakafofoga e te ʼu tagata te ʼu kūtuga ʼaē ʼe lagolago kia ia, pea ʼe nātou tautau faiga ke nātou maʼu he tuʼulaga pea ʼe fili leva nātou mo kapau ʼe lahi te hahaʼi ʼaē ʼe vote maʼa nātou. ʼE mole fai te ʼu fakatuʼutuʼu ʼaia mokā fakafono faka teokalatike he ʼu tēhina. ʼE mole fai te ʼu fakatuʼutuʼu ʼaia e he tagata, peʼe ko te lao ʼo te puleʼaga. Neʼe lagi manatu Paulo ki tona fakanofo e Sesu pea mo Sehova ke liliu ko “te ʼapositolo ʼo te ʼu puleʼaga,” ʼi tana ʼui ki te kau Kalate neʼe fakafono “mole . . . uhi ko he u tagata, pe mai he tagata, kae aki Sesu Kilisito mo te Atua te Tamai ae nee ina fakatuuake iaʼia mai te mate.”—Loma 11:13, MN; Kalate 1:1.
ʼE Fakanofo Nātou e Te Laumālie Maʼoniʼoni
9. Koteā ʼaē ʼe ʼui ia Gaue 20:28 ʼo ʼuhiga mo te fakanofo ʼa te kau tagata taupau Kilisitiano?
9 Neʼe fakamanatuʼi e Paulo ki te ʼu tēhina taupau ʼi Efeso, neʼe fakanofo nātou e te ʼAtua ʼaki te laumālie maʼoniʼoni. Neʼe ina ʼui fēnei: “Koutou tokakaga kia koutou totonu pea mo te faga ōvi fuli, ʼaē kua fakanofo koutou kiai e te laumālie maʼoniʼoni ko he kau tagata taupau, moʼo fafaga ʼo te kokelekasio ʼa te ʼAtua, ʼaē neʼe ina maʼu ʼaki te taʼataʼa ʼo tona ʼAlo totonu.” (Gaue 20:28, MN ) Ko te kau tagata taupau Kilisitiano ʼaia, neʼe tonu ke haga takitaki nātou e te laumālie maʼoniʼoni ʼi tanatou fakahoko tonatou ʼu maʼua tagata tauhi ōvi ʼa te ʼAtua. Kapau ko he tahi neʼe fakanofo ki he gāue ʼi te kokelekasio ʼe mole kei mulimuli ki te ʼu lekula fakaʼatua, pea ʼi tona temi totonu, ko te laumālie maʼoniʼoni ʼe ina fakahifo anai ia ia mai tona tuʼulaga.
10. Koteā te gāue maʼuhiga ʼaē ʼe fakahoko e te laumālie maʼoniʼoni moʼo fakanofo ʼo he ʼu tēhina ʼo mulimuli ki te teokalasia?
10 ʼE fakahoko feafeaʼi koa e te laumālie maʼoniʼoni te faʼahi maʼuhiga ʼaia? ʼUluaki, neʼe tohi ʼaki te laumālie maʼoniʼoni te ʼu fakamaʼua ʼaē moʼo fakanofo ʼo he tagata ko he tagata taupau. ʼI tana ʼu tohi ʼaē neʼe ina fai kia Timoteo pea mo Tito, neʼe fakahā lelei e Paulo te ʼu lekula ʼaē ʼe tonu ke mulimuli kiai te kau tagata taupau pea mo te kau tagata faifekau faka minisitelio. Neʼe ina fakahā he ʼu fakamaʼua kehekehe e 16. Ohage la, ko te ʼu tagata taupau ʼe tonu ke mole ʼi ai honatou mele, ke nātou aga fakapotopoto, ke lelei tanatou fakakaukau, ke nātou aga fakatokatoka, ke nātou aga fakakāiga, ke nātou poto ʼi te fai akonaki, pea ke nātou liliu ko he ʼu faʼifaʼitaki ʼi tonatou ʼuhiga pule famili. Neʼe tonu ke nātou fakapotopoto mokā nātou ʼinu te kava, ke mole nātou manako ki te paʼaga, pea ke nātou loto lolomi. Neʼe toe tatau te ʼu lekula māʼoluga ʼaē neʼe fai maʼa te ʼu tēhina ʼaē neʼe fia liliu ko he ʼu tagata faifekau faka minisitelio.—1 Timoteo 3:1-10, 12, 13; Tito 1:5-9.
11. Koteā he ʼu maʼua ʼe tonu ke mulimuli kiai te ʼu tagata ʼaē ʼe fia tauhi ʼi te kokelekasio?
11 Ko te toe vakaʼi ʼo te ʼu maʼua ʼaia ʼe ina fakahā mai ko te ʼu tēhina takitaki ʼi te tauhi ʼaē kia Sehova, ʼe tonu ke nātou tuku he faʼifaʼitaki lelei ʼi te aga faka Kilisitiano. Ko te ʼu tēhina ʼaē ʼe nātou fia fai he ʼu gāue ʼi te kokelekasio ʼe tonu ke nātou fakamoʼoni ʼe gāue te laumālie maʼoniʼoni ia nātou. (2 Timoteo 1:14) ʼE tonu ke hā ʼi te ʼu tagata ʼaia ko te laumālie ʼa te ʼAtua ʼe ina fakatupu ia nātou te fua ʼo “te ofa, te fiafia, te tokalelei, te kataki, te agalelei, te agaofa, te agatonu, te agamalu, te agalolomi.” (Kalate 5:22, 23) ʼE hā anai te fua ʼaia ʼi tanatou ʼu felogoi mo tonatou ʼu tēhina pea mo te tahi ʼu hahaʼi. ʼE moʼoni, ʼe lagi maʼu ʼaupito e ʼihi te ʼu kalitate ʼa te laumālie, kae lagi popoto ʼaupito ʼihi ʼi te gāue taupau. Kae ʼi te ʼu faʼahi fuli ʼo tonatou maʼuli, ko nātou fuli ʼaē ʼe holi ke nātou liliu ko he ʼu tagata taupau peʼe ko he ʼu tagata faifekau faka minisitelio, ʼe tonu ke nātou fakahā ʼe ko he ʼu tagata kua fakapotopoto ʼi te faʼahi fakalaumālie, ʼe nātou mulimuli lelei ki te ʼu fakamaʼua ʼa te Folafola ʼa te ʼAtua.
12. Ko ai ʼaē ʼe feala ke tou ʼui neʼe fakanofo ʼaki te laumālie maʼoniʼoni?
12 ʼI te temi ʼaē neʼe fakaloto mālohiʼi ai e Paulo ia ʼihi ke nātou faʼifaʼitakiʼi ia ia, neʼe faigafua tana fai te ʼu palalau ʼaia he neʼe ina faʼifaʼitakiʼi ia Sesu Kilisito, ʼaē neʼe ina ‘tuku kia tatou he faʼifaʼitakiʼaga ke tou mulimuli ʼi ʼona ʼaluʼaga.’ (1 Petelo 2:21; 1 Kolonito 11:1) Ko nātou ʼaē ʼe nātou mulimuli ki te ʼu fakamaʼua faka Tohi-Tapu ʼi te temi ʼaē ʼe fakanofo ai nātou ko te ʼu tagata taupau peʼe ko te ʼu tagata faifekau faka minisitelio, ʼe feala ke tou ʼui neʼe fakanofo nātou ʼaki te laumālie maʼoniʼoni.
13. ʼE tokoni feafeaʼi ia te laumālie maʼoniʼoni kia nātou ʼaē ʼe nātou filifili he ʼu tagata ke nātou tauhi ʼi te kokelekasio?
13 ʼE ʼi ai te tahi faʼahi ʼe ina fakahā ai ʼe kau te laumālie maʼoniʼoni ʼi te filifili pea mo te fakanofo ʼo te ʼu tagata taupau. Neʼe ʼui e Sesu ʼe “foaki e te Tamai i Selo ia te Laumalie-Maonioni kia ia e ina kole kia te ia.” (Luka 11:13) Koia ka fakatahi te ʼu tagata ʼāfea ʼo te kokelekasio moʼo filifili ʼo he ʼu tēhina ki he ʼu maʼua ʼo te kokelekasio, ʼe nātou faikole ke takitaki nātou e te laumālie ʼa te ʼAtua. ʼE nātou fakatafito tanatou filifili ki te meʼa ʼaē ʼe tuʼu ʼi te Folafola ʼa te ʼAtua, pea ʼe foaki e te laumālie kia nātou te fealagia ʼaē ke nātou sio peʼe mulimuli koa te tēhina ki te ʼu fakamaʼua ʼa te Tohi-Tapu. Ko nātou ʼaē ʼe nātou filifili te ʼu tēhina, ʼe mole tonu ke nātou tokagaʼi fau te ʼu meʼa ʼaē ʼe hā ki tuʼa, ohage ko te ako ʼa te tēhina, peʼe ko te ʼu meʼa ʼaē ʼe poto ai. ʼE nātou ʼuluaki fakatokagaʼi peʼe ko he tahi ʼe fakapotopoto ʼi te faʼahi fakalaumālie, peʼe ko he tahi ʼe fakaōvi gafua te kokelekasio kia te ia moʼo kumi tokoni.
14. Koteā ʼaē ʼe tou ako mai te vaega ʼo Gaue 6:1-3?
14 Logola ko te ʼu kolesi ʼo te kau tagata ʼāfea ʼaē ʼe nātou fakahā ki te ʼu tagata taupau feʼoloʼaki tanatou filifili he ʼu tēhina ke fakanofo nātou ko he ʼu tagata ʼāfea pea mo he ʼu tagata faifekau faka minisitelio, kae ko te ʼu fakanofo ʼaē ʼe fai, ʼe mulimuli ki te faʼifaʼitaki ʼaē neʼe tuku mai ʼi te ʼuluaki sēkulō. ʼI te tahi lakaga, neʼe ʼaoga ke ʼi ai he ʼu tagata kua popoto ʼi te faʼahi fakalaumālie moʼo fai ʼo he gāue maʼuhiga. Neʼe foaki e te kolesi pule te fakatotonu ʼaenī: “Koutou vakai ia koutou ni tagata fakaapaapaʼia e fitu, e natou fonu i te Laumalie-Maonioni mo te poto pea e matou fakanofo anai natou ki te tuulaga aia.” (Gaue 6:1-3) Logola neʼe ko te ʼu tagata ʼaē neʼe nātou filifili te ʼu tēhina ʼaia, kae ko tanatou fakanofo neʼe fai e te ʼu tagata neʼe nātou maʼu te tuʼulaga ke nātou fai te faʼahi ʼaia ʼi Selusalemi. ʼE tou mulimuli ia ʼaho nei ki te faʼifaʼitaki ʼaia.
15. Koteā te gāue ʼaē ʼe fai e te Kolesi Pule ʼo ʼuhiga mo te fakanofo ʼo he ʼu tagata?
15 Ko te Kolesi Pule ʼa te kau Fakamoʼoni ʼa Sehova ʼe ina fakanofo ia nātou fuli ʼaē ʼe nātou faʼufaʼu te ʼu Komite ʼo te Filiale. Ka fai he tonu ʼo ʼuhiga mo ia ʼaē ka ina maʼu anai te maʼua mamafa ʼaia, pea ʼe manatuʼi e te Kolesi Pule te ʼui fēnei ʼa Sesu: “Ko ia ʼaē neʼe foaki lahi ki ai, ʼe fakamaʼua lahi anai kia te ia; pea ko ia ʼaē neʼe lahi te ʼu meʼa ʼaē neʼe tuku age ki ai, ʼe lahi anai te fakamaʼua ʼaē ki ai ʼo laka age ʼi te fua māhani.” (Luka 12:48, MN ) ʼO hilifaki ki tana fakanofo ia te kau faʼufaʼu ʼo te Komite ʼo te Filiale, ʼe toe fakanofo foki e te Kolesi Pule te ʼu tagata ʼāfea ʼo te ʼu Petele pea mo te ʼu tagata taupau feʼoloʼaki. Kae ʼe ina tuku ki ʼihi tēhina ʼe tāu mo te falala ke nātou fakanofo ʼihi tēhina. ʼE fakahā mai e te Tohi-Tapu, neʼe fai feiā ʼi te temi muʼa.
‘Ke Fakanofo He ʼu Tagata ʼĀfea Ohage Ko Tana Fakatotonu Mai’
16. He koʼe neʼe tuku e Paulo ia Tito ʼi Kelete, pea koteā ʼaē ʼe hā ʼaki ai ʼo ʼuhiga mo te ʼu fakanofo faka teokalatike ʼaē ʼe fai ia ʼaho nei?
16 Neʼe ʼui fēnei e Paulo kia Tito ʼaē neʼe kaugā gāue mo ia: “Ko te tupuʼaga la ʼaia ʼo taku tuku koe ʼi Kelete, ke feala ai hau fakatokatoka te ʼu meʼa ʼaē neʼe kei toe ke fakatokatoka pea mo ke fakanofo he kau tagata ʼāfea ʼi he kolo ki he tahi age kolo, ohage pe ko te ʼu meʼa ʼaē neʼe ʼau fakatotonu atu.” (Tito 1:5, MN ) Pea neʼe fakahā lelei e Paulo kia Tito te ʼu aga ʼaē neʼe tonu ke maʼu e te ʼu tagata ʼaē neʼe feala ke nātou tagata ʼāfea. Koia, ia ʼaho nei ʼe fakanofo e te Kolesi Pule he ʼu tēhina ʼi te ʼu filiale moʼona fakafofoga ʼi te fakanofo ʼo he ʼu tagata ʼāfea pea mo he kau tagata faifekau faka minisitelio. ʼO ʼuhiga mo nātou ʼaē ʼe nātou fakafofoga ia te Kolesi Pule, ʼe tonu ke nātou mahino lelei pea mo mulimuli ki te ʼu fakatotonu ʼa te Tohi-Tapu moʼo fakanofo ʼo te ʼu tēhina. Kae ʼe fakalogo ki te Kolesi Pule te fakanofo ʼo te ʼu tēhina lelei ʼaia ke nātou tauhi ʼi te ʼu kokelekasio ʼa te kau Fakamoʼoni ʼa Sehova ʼi te malamanei katoa.
17. ʼE fakahoko feafeaʼi e te filiale te fakanofo ʼo he ʼu tagata taupau pea mo he kau tagata faifekau faka minisitelio neʼe filifili?
17 Ka fakahā ki te filiale ʼo te Sosiete te filifili ʼo he ʼu tēhina ke fakanofo ko he ʼu tagata ʼāfea pea mo he ʼu tagata faifekau faka minisitelio, pea ko te ʼu tagata ʼaē kua fakapotopoto ʼe nātou falala ki te laumālie ʼa te ʼAtua moʼo fakanofo te ʼu tēhina ʼaia. Ko te ʼu tagata ʼaia ʼe nātou ʼiloʼi ʼe nātou huʼi maʼua anai, pea mo nātou ʼiloʼi ʼe mole tonu ke nātou foimo fakanofo he tēhina, naʼa nātou kau mo ia ki tana ʼu agahala.—1 Timoteo 5:22.
18, 19. (a) ʼE fakahā feafeaʼi ʼihi fakanofo ʼo he ʼu tēhina? (b) ʼE fakahoko feafeaʼi ia te filifili pea mo te fakanofo ʼo te ʼu tēhina?
18 ʼE feala ke fakahā te fakanofo ʼa ʼihi tēhina ʼi te ʼu tohi ʼaē ʼe tuʼu ai te fakaʼiloga ʼa te Sosiete. ʼE feala ke fakaʼaogaʼi te faʼahiga tohi ʼaia moʼo fakanofo he ʼu tēhina ʼe tokolahi ʼi te kokelekasio.
19 Ko te ʼu fakanofo faka teokalatike ʼe haʼu mai ia Sehova ʼaki tona ʼAlo, pea mo te kūtuga gāue ʼa te ʼAtua ʼi te kele, “te kaugana agatonu mo fakapotopoto” pea mo tana Kolesi Pule. (Mateo 24:45-47) Ko te ʼu faʼahi fuli ʼaē ʼe pipiki ki te fili pea mo te fakanofo ʼa he ʼu tēhina, ʼe takitaki e te laumālie maʼoniʼoni. ʼE hoko feiā koteʼuhi ko te ʼu meʼa ʼaē ʼe fakamaʼua moʼo fakanofo ʼo he tahi, ʼe tuʼu ʼi te Folafola ʼa te ʼAtua, ʼaē neʼe tohi ʼaki te takitaki ʼa te laumālie maʼoniʼoni, pea ko ia ʼaē neʼe fakanofo ʼe ina fakahā te fua ʼo te laumālie ʼaia. Koia ʼe tonu ke mahino kia tatou neʼe fakanofo ia te ʼu tēhina ʼaki te laumālie maʼoniʼoni. Ohage pe ko te fakanofo ʼi te ʼuluaki sēkulō ʼo te kau tagata taupau pea mo te kau tagata faifekau faka minisitelio ʼo mulimuli ki te teokalasia, ʼe toe hoko feiā ia ʼaho nei.
Tou Loto Fakafetaʼi Ki Te Takitaki ʼa Sehova
20. He koʼe ʼe tonu ke tou maʼu te manatu ʼa Tavite ʼaē neʼe ina tohi ia Pesalemo 133:1?
20 ʼI te temi ʼaenī ʼo te mahu ʼi te faʼahi fakalaumālie pea mo te tuputupu faka teokalatike ʼo te gāue fai faka mafola ʼo te Puleʼaga, ʼe tou fakafetaʼi ki te tokaga tāfito ʼa Sehova ke ina fakanofo he ʼu tagata taupau pea mo he kau tagata faifekau faka minisitelio. ʼI totatou ʼuhiga kau Fakamoʼoni ʼa Sehova, ko te fakatuʼutuʼu faka Tohi-Tapu ʼaia ʼe tokoni mai ke tou taupau te ʼu lekula māʼoluga ʼa te ʼAtua ʼo te faitotonu ʼi te lotolotoiga ʼo tatou. Tahi ʼaē meʼa, ko te manatu faka Kilisitiano pea mo te faiga fakamalotoloto ʼa te ʼu tagata ʼaia, ʼe lagolago ʼaupito ki totatou tokalelei taulekaleka pea mo totatou logo tahi ʼi totatou ʼuhiga kaugana ʼa Sehova. Ohage ko te tagata fai pesalemo ko Tavite, ʼe uga totatou loto ke tou ʼui fēnei: “Koutou sisio! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!”—Pesalemo 133:1.
21. Ia ʼaho nei, ʼe hoko feafeaʼi te vaega ʼo Isaia 60:17?
21 ʼE tou loto fakafetaʼi lahi ki te takitaki ʼaē ʼe fai e Sehova ʼaki tana Folafola pea mo tona laumālie maʼoniʼoni! Pea ʼe tou mahino lelei age ki te ʼu palalau ʼaenī ʼe tuʼu ia Isaia 60:17: “ ʼE mole ʼau ʼaumai anai te kapa, kae ko te aulo, ʼe mole ʼau ʼaumai anai te ukamea kae ko te siliva, ʼe mole ʼau ʼaumai anai te ʼakau kae ko te kapa, ʼe mole ʼau ʼaumai anai te maka, kae ko te ukamea; pea ʼe ʼau fakatuʼu anai te tokalelei ohage ko hau ʼu tagata taupau, pea ko te faitotonu ohage ko hau ʼu hahaʼi tufa gāue.” ʼAki te temi, ʼi te fakaʼaogaʼi e te kau Fakamoʼoni ʼa Sehova te ʼu fakatuʼutuʼu faka teokalatike, neʼe hoko ai te ʼu tapuakina ʼaia ʼi te kautahi ʼa te ʼAtua ʼi te kele.
22. ʼE tonu ke tou loto fakafetaʼi ʼo ʼuhiga mo teā, pea koteā ʼaē ʼe tonu ke tou fakatotonu ke tou fai?
22 ʼE tou loto fakafetaʼi lahi ki te ʼu fakatuʼutuʼu faka teokalatike ʼaē neʼe fai ia tatou. Pea ʼe tou leleiʼia ʼaupito te gāue kinakina pea mo fakafiafia ʼaē neʼe fai e te ʼu tagata taupau pea mo te kau tagata faifekau faka minisitelio ʼaē neʼe fakanofo ʼo mulimuli ki te teokalasia. ʼAki totatou loto katoa, ʼe tou fakavikiviki lahi tatatou Tāmai ʼofa ʼaē ʼi selo, ʼaē neʼe ina fakagafua ke tou mahu ʼi te faʼahi fakalaumālie pea mo ina tapuakina lahi tatou. (Tāʼaga Lea 10:22) Koia tou fakatotonu ke tou fakalogo ki te kautahi ʼa Sehova. Ia meʼa fuli, tou haga tauhi fakatahi ʼi te logo tahi ʼo tou fakaʼapaʼapa, mo fakavikiviki, pea mo faka kolōliaʼi te huafa lahi pea mo maʼoniʼoni ʼo Sehova.
ʼE Koutou Tali Feafeaʼi Anai?
• He koʼe ʼe feala ke tou ʼui ko te fakanofo ʼo te ʼu tagata taupau pea mo te kau tagata faifekau faka minisitelio ʼe faka teokalatike kae mole temokalatike?
• E feafeaʼi ia te fakanofo ʼo te ʼu tēhina ʼaki te laumālie maʼoniʼoni?
• Koteā te gāue ʼa te Kolesi Pule ʼo ʼuhiga mo te fakanofo ʼo he ʼu tagata taupau pea mo he kau tagata faifekau faka minisitelio?
• He koʼe ʼe tonu ke tou loto fakafetaʼi kia Sehova ʼo ʼuhiga mo te fakanofo faka teokalatike ʼo te ʼu tēhina?
[Paki ʼo te pasina 15]
ʼE faka teokalatike te fakanofo ʼo te kau tagata ʼāfea pea mo te kau tagata faifekau faka minisitelio