Te Kau Fakamoʼoni ʼa Sehova ʼe Nātou Haʼele Ki Muʼa ʼAki He Tui Mālohi!

Te Fakatahi ʼAē ʼo Te Taʼu Fuli

ʼI TE ʼu temi ʼaenī, kua lotolotolua ai ia te hahaʼi, kae ki te kau Fakamoʼoni ʼa Sehova ʼe ko he kau Kilisitiano ʼe mālohi tanatou tui. Neʼe ʼiloga lelei ia te faʼahi ʼaia ʼi te fakatahi ʼaē ʼe fai ʼi te taʼu fuli e te Watch Tower Bible and Tract Society of Pennsylvania, ʼaē neʼe fai ʼi te Moeaki, ʼaho 7 ʼo ʼOketopeli 2000, ʼi te Fale Fakatahi ʼa te kau Fakamoʼoni ʼa Sehova ʼi te kolo ʼo Jersey, ʼi New Jersey.a

ʼI tana ʼu ʼuluaki palalau, neʼe ʼui fēnei e te pelesita ʼo te fakatahi, ia John E. Barr, ʼe kau ki te Kolesi Pule ʼo te kau Fakamoʼoni ʼa Sehova: “ ʼI te ʼu lauʼi miliale hahaʼi ʼo te malamanei, ʼe tou ʼiloʼi pea mo tou tui ko te ʼAlo ʼofaina ʼo Sehova, ia Sesu Kilisito, kua ʼafio nei ʼi selo, ʼo pule ʼi te lotolotoiga ʼo tona ʼu fili.” Ko te moʼoni ʼo te taʼi tui mālohi ʼaia neʼe ʼiloga ʼi te ʼu fakamatala fakaofoofo e ono neʼe fakahā ai te ʼu meʼa ʼaē neʼe hoko ʼi te malamanei.

ʼE Mālo Te Moʼoni Faka Tohi-Tapu ʼi Te Faifakalauʼakau ʼi Haïti

ʼE teitei maʼu te faifakalauʼakau ʼi te ʼu potu fuli ʼo Haïti. Neʼe fakamatala e te kootinatea ʼo te Komite ʼo te Filiale ia John Norman, “ ʼi te agamāhani, ʼe fai e te hahaʼi te ʼu meʼa faifakalauʼakau moʼo nātou puipui.” Neʼe kamata lotolotolua te tagata fai faitoʼo fakalauʼakau ʼi te fakaʼī neʼe motu ai tona vaʼe. Neʼe feʼekeʼaki fēnei, ‘Neʼe lava hoko feafeaʼi he meʼa feiā kia ʼau, mo kapau la ʼe puipui ia ʼau e te ʼu laumālie?’ Ohage ko te tokolahi, neʼe akoʼi e te kau Fakamoʼoni ʼa Sehova te moʼoni ki te tagata ʼaia, pea neʼe nātou tokoniʼi ke ʼāteaina mai te faifakalauʼakau. Ko te ʼu fealagia ke ʼi ai he tuputupu ʼi Haïti, neʼe hā lelei ʼi te ʼaho 19 ʼo ʼApelili 2000, heʼe ko te kaugamālie ʼo te hahaʼi ʼaē neʼe kau ki te Fakamanatu ʼo te mate ʼo Kilisito, neʼe tuʼa fā ʼi te kaugamālie ʼo te kau fai faka mafola ʼo te Puleʼaga.

Ko Te Faiga Mālohi ʼi Te Telituale Lahi ʼo Kolea

ʼI Kolea, ko te 40 ʼi te teau ʼo te kau Fakamoʼoni ʼa Sehova ʼe nātou gāue pionie. Neʼe ʼui fēnei e te kootinatea ʼo te Komite ʼo te Filiale, ko Milton Hamilton, “ ʼaki he kau fai faka mafola kaugamālie feiā, ʼe gāueʼi tuʼa tahi ʼi te māhina fuli tamatou telituale ʼaē ʼe nofoʼi e te toko 47 miliona tupu.” Neʼe maʼuhiga ʼaupito te tuputupu ʼo te ʼu kokelekasio ʼo te hahaʼi tuli. ʼI te tahi silikosikilipisio ʼo te kau tuli, ʼe fai ai te ʼu ako Tohi-Tapu e 800. ʼE fakafuafua ʼe takitahi te kaugā faka mafola mo tana ako Tohi-Tapu. Ko te meʼa ʼaē ʼe fakaʼofaʼofa, heʼe kei pilisoniʼi te ʼu tēhina tūpulaga ʼuhi ko tanatou mole fia solia. Kae ʼe felogoi lelei te kau Kilisitiano ʼaia ʼe pilisoniʼi mo te kau takitaki ʼo te fale pilisoni, pea ʼe tautau foaki age kia nātou te ʼu gāue ʼe tau mo he ʼu hahaʼi ʼe feala hanatou falala ki ai.

Ko Te Fai Puleʼaki Ki Te Tuputupu ʼi Mekesike

ʼI Mekesike, ʼi te tānaki gāue ʼaē neʼe fai ʼi ʼAukusito 2000, neʼe maʼu te toko 533 665 kau fai faka mafola ʼo te Puleʼaga. Ko nātou ʼaē neʼe kau ki te Fakamanatu neʼe nātou tuʼa tolu age ʼi te kaugamālie ʼo te kau fai faka mafola. Neʼe ʼui fēnei e te kootinatea ʼo te Komite ʼo te Filiale, ko Robert Tracy, “ ʼe mātou fakatuʼutuʼu ki te taʼu ʼaenī ke mātou laga he ʼu fale ʼo te puleʼaga e 240 tupu.” Neʼe ina toe ʼui fēnei: “Kae ʼe ʼaoga ke ʼi ai he tahi ʼu fale.”

ʼI Mekesike, ʼe tuku he faʼifaʼitaki lelei e te kau tūpulaga ʼo te kau Fakamoʼoni ʼa Sehova. Ko te patele Katolika neʼe ina tokagaʼi te tūpulaga feiā, pea neʼe ina ʼui fēnei: “ ʼE ʼau fakaʼamu ke ʼi ai ʼi taku ʼu hahaʼi, he tahi ohage ko ia ʼaenī. ʼE ʼau vikiʼi te ʼu hahaʼi ʼaia ʼi tanatou faiga mālohi pea mo tanatou poto ʼi te fakaʼaogaʼi ʼo te Tohi-Tapu. ʼE nātou lagolago mālohi ki te ʼAtua, tatau aipe peʼe fakatupu tuʼutāmaki ki tonatou maʼuli.”

ʼE Nātou Agatonu ʼi Te ʼu Maveuveu ʼi Sierra Leone

Talu mai ʼApelili 1991, ʼi te temi ʼaē neʼe kamata ai te tau ʼi te loto fenua ʼo Sierra Leone, ko te lauʼi afe hahaʼi neʼe fakapogi, ko ʼihi neʼe lāvevea, peʼe ko ʼihi kua nātou māʼimoa. Neʼe ʼui fēnei e Bill Cowan te kootinatea ʼo te Komite ʼo te Filiale, “neʼe malave ʼaupito te tau pea mo te ʼu mamahi ki te maʼuli ʼo te hahaʼi. Tokolahi te hahaʼi ki muʼa atu neʼe mole nātou fia tokagaʼi te logo, pea ʼi te temi nei kua nātou fagono fakalelei. Kua māhani ʼi te temi nei ia te ʼōmai ʼa te hahaʼi ki tamatou ʼu Fale ʼo Te Puleʼaga ke nātou kau ki tanatou ʼuluaki fono. ʼE tautau fakatuʼu e te hahaʼi te ʼu tēhina ʼi te ala pea mo kole age kia nātou he ako Tohi-Tapu.” Logope te hoholo atu ʼo te maveuveu ʼo te fenua, kae ʼe lolotoga fua te gāue fai faka mafola ʼo te Puleʼaga ʼi Sierra Leone.

Ko He Toe Polokalama Laga Fale ʼi Te Potu Saute ʼo Afelika

ʼI te temi nei, ʼe ʼaoga ke ʼi ai he ʼu Fale ʼo Te Puleʼaga ʼe lauʼi afe ʼi te telituale ʼaē ʼe gāueʼi e te filiale ʼo te Potu Saute ʼo Afelika. Kua ʼosi laga te ʼu Fale ʼo Te Puleʼaga ʼe teau tupu. Neʼe ʼui fēnei e John Kikot, ʼe kau ki te Komite ʼo te Filiale, “ ʼe mole kei fakatahi totatou ʼu tēhina ʼi he fale lau peʼe ʼi he lalo fuʼu ʼakau, ohage ko tona fai ʼi te temi muʼa, kae kua nātou lava fakatahi ʼi he koga meʼa maʼa pea mo heheka ʼi he ʼu hekaʼaga lelei. Logope ko te ʼu Fale ʼaia ʼo Te Puleʼaga ʼe ko he ʼu fale ʼe mole matalelei feafeaʼi, kae ʼe ko te ʼu fale ʼaē ʼe matalelei ʼaupito ʼo te koga meʼa. ʼI ʼihi koga meʼa, ʼe fakatokagaʼi ʼi te ʼosi pe ʼo te laga ʼo he Fale ʼo Te Puleʼaga, ʼe tuʼa lua age anai te kaugamālie ʼo te hahaʼi ʼo te kokelekasio ʼi te taʼu ʼaē ka hoko mai.”

Ko He Taʼiake Foʼou ʼo Te Kau Fakamoʼoni ʼi Ukraine

Lolotoga te taʼu gāue 2000, neʼe aʼu te lahi ʼa te kau faka mafola ʼo te fenua ʼaia ki te toko 112 720. Ko te toko 50 000 tupu ʼo nātou ʼaia neʼe hoki nātou ako pe te moʼoni faka Tohi-Tapu ʼi te ʼu taʼu e nima kua hili. Neʼe ʼui fēnei e John Didur, te kootinatea ʼo te Komite ʼo te Filiale, “ ʼe mahino ia, neʼe lagaʼi ake e Sehova he taʼiake foʼou ʼo te kau Fakamoʼoni moʼo tala ʼo tona huafa!” Neʼe ina toe ʼui fēnei, “ ʼi te ʼu taʼu e lua kua hili, neʼe mātou tufa te ʼu nusipepa e 50 miliona tupu, ko tona fakatatau ko te hahaʼi fuli ʼo te fenua. ʼE fakafuafua ʼi te māhina fuli, ʼe mātou maʼu te ʼu tohi ʼe lauʼi afe mai te hahaʼi ʼe nātou fia logo pea mo fia ʼiloʼi he tahi ʼu meʼa.”

Ko He Tahi ʼu Koga Maʼuhiga ʼo Te Polokalama

Neʼe fai leva te akonaki e Daniel Sydlik, ʼaē ʼe kau ki te Kolesi Pule, pea neʼe malave ʼaupito ki te hahaʼi. Ko te alatike “ ʼE Kehekehe Te Kolesi Pule Mo He Sosiete Kua Fakamoʼoni,” ʼaē ʼe tuʼu ʼi te nusipepa ʼaenī, ʼe fakatafito kiai te akonaki ʼaia.

Neʼe fai e Theodore Jaracz, ʼe kau ki te Kolesi Pule, te akonaki fakatupu fakakaukau ko tona kupu tāfito “Neʼe Fakanofo e Te ʼAtua Te ʼu Tagata Taupau Mo Te Kau Faifekau Faka Minisitelio.” ʼE ʼi ai te alatike ʼo te nusipepa ʼaenī neʼe fakatafito ki te akonaki ʼaia.

ʼI te fakatahi ʼaē ʼe fai ʼi te taʼu fuli, neʼe fai ai mo te akonaki maʼuhiga e David Splane, ʼe kau ʼi te Kolesi Pule, ʼo ʼuhiga mo te vaega faka Tohi-Tapu ki te taʼu 2001. Neʼe fakatafito ki te ʼu palalau ʼaenī ʼa te ʼapositolo ko Paulo: “Koutou katoa pea mo koutou tui mālohi ʼo ʼuhiga mo te finegalo katoa ʼo te ʼAtua.” (Kolose 4:12, MN ) ʼE faigaʼi e te kau Fakamoʼoni ʼa Sehova ke nātou fakahoko te faʼahi ʼaia, ʼo nātou tala ʼaki he agatonu te logo lelei ʼo te Puleʼaga ʼo te ʼAtua ʼi te kele katoa.—Mateo 24:14.

[Kiʼi nota]