Te ʼu Fehuʼi ʼa Te Kau Lautohi
Ia 1 Petelo 4:3 (MN ), ʼe tou lau ko ʼihi Kilisitiano neʼe nātou kau ʼi muʼa atu ki te ʼu “tauhi fakalialia ki te ʼu tamapua.” ʼE mole koa la fakalialia fuli te ʼu tauhi tamapua, mo tauteaʼi pea mo tapuʼi e te ʼAtua?
Ei, kia mata ʼo te ʼAtua, ʼe fakalialia te tauhi tamapua fuli. ʼE mole feala ia kia nātou ʼaē ʼe nātou kumi te tapuakina ʼa te ʼAtua ke nātou tauhi tamapua.—1 Kolonito 5:11; Apokalipesi 21:8.
Kae, ʼe hage ia neʼe manatu Petelo ki he tahi faʼahi ʼi tana palalau ʼo ʼuhiga mo te tauhi tamapua. ʼUluaki, neʼe lahi te ʼu puleʼaga ʼāfea neʼe ko hanatou meʼa māhani te tauhi tamapua pea neʼe mole tāʼofi ia e te ʼu pule ʼo te fenua. Ko tona faka ʼuhiga, neʼe mole ʼi ai he lao ʼo te fenua neʼe ina tapuʼi te tauhi tamapua ʼaia. Neʼe ʼi ai ʼihi tauhi tamapua neʼe kau ki te ʼu meʼa faka puleʼaga. ʼAki te mahino leva ʼaia, ko ʼihi ʼi muʼa ʼo tanatou liliu ko he kau Kilisitiano neʼe nātou kau ki te ʼu ‘tauhi tamapua neʼe mole fakafeagai kiai te lao.’ (Traduction du monde nouveau, ʼaē neʼe tā ʼi te 1950) Ohage la, ʼe tou fakatokagaʼi neʼe fakatuʼu e te Hau ʼo Papiloni ko Nepukanesa te fakatātā aulo, kae neʼe mole fia tauhi kiai ia Satalake, Mesake mo Apeteneko.—Taniela 3:1-12.
ʼI te tahi leva ia manatu, neʼe lahi te ʼu naunau ʼo te tauhi tamapua neʼe ko te ʼu aga heʼeʼaoga pea mo fakafeagai ki te manatu māhani peʼe ko te aga ʼaē ʼe tonu ke fai neʼe kita maʼu mai tokita leʼo ʼo loto ʼaē neʼe kita tutupu ake mo ia. (Loma 2:14, 15) Neʼe faitohi te ʼapositolo ko Paulo ʼo ʼuhiga mo te ʼu aga kovi ʼaupito neʼe “fehagai mo te natula” pea mo “fakaufiufi,” pea neʼe tautau fai ʼi te ʼu toʼotoʼoga faka lotu. (Loma 1:26, 27) Ko te ʼu tagata mo te ʼu fafine ʼaē neʼe nātou fai te ʼu tauhi fakalialia ʼaia ki te ʼu tamapua neʼe mole nātou fakalogo ki te ʼu tuʼakoi ʼo te ʼu meʼa ʼaē neʼe nātou ʼiloʼi ʼe lelei pea mo kovi. Koia kia nātou ʼaē neʼe liliu ko te kau Kilisitiano, neʼe tonu tanatou līaki ʼaē ʼo te ʼu aga fakalialia ʼaia.
ʼO hilifaki atu ki te meʼa ʼaē neʼe hoki tou talanoa kiai, neʼe tauteaʼi e Sehova ʼAtua te ʼu tauhi tamapua ʼaia neʼe lahi tona mafola ʼi te hahaʼi ʼaē mole ko he kau Sutea. Koia, ko te ʼu aga ʼaia neʼe fakafeagai ki te lao.a—Kolose 3:5-7.
[Kiʼi nota]
a ʼI te koga tohi faka Keleka, ʼe lau feiā ia 1 Petelo 4:3 “te ʼu tauhi tamapua ʼaē ʼe fakafeagai ki te lao.” Neʼe fakaliliu fēnei te palalau ʼaia ʼi ʼihi Tohi-Tapu, “te tauhi fakalialia ki te ʼu tamapua,” pe ko “te tauhi tamapua ʼaē ʼe mole ʼalutahi mo te lao,” pea mo te “tauhi tamapua ʼaē ʼe tapu.”