Ko Te Tohi-Tapu ʼe Ko Te Folafola Koa ʼa Te ʼAtua?
“Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke faiva ia te tagata ʼa te ʼAtua, pea mo kātoa ki te ʼu gāue lelei fuli pē.”—2 TIMOTEO 3:16, 17.
ʼE KO he ʼu palalau ʼe malave mālohi ʼaē neʼe fai e te ʼapositolo ko Paulo ʼo ʼuhiga mo te maʼuhiga ʼaupitō ʼo te Tohi-Tapu! ʼE mahino ia, neʼe talanoa tāfito ʼo ʼuhiga mo te ʼu koga ʼo te Tohi-Tapu ʼaē neʼe maʼu ʼi tona temi, ko te ʼu tohi ʼaē ʼe fakahigoaʼi e te hahaʼi ʼe ko te Tauhi ʼĀfea. Kae ko te ʼu palalau ʼaē neʼe fai e Paulo ʼe fakaʼuhiga tatau ki te ʼu tohi fuli ʼaē ʼe 66 ʼo te Tohi-Tapu, ʼo kau kiai te ʼu tohi ʼaē neʼe fai e te ʼu tisipulo agatonu ʼa Sesu ʼi te ʼuluaki sēkulō ʼo totatou temi.
ʼE maʼuhiga ʼaupitō koa kiā koutou ia te Tohi-Tapu ohagē ko tona maʼuhiga kiā Paulo? ʼE kotou manatu koa ko te ʼu tagata ʼaē neʼe natou tohi ia te Tohi-Tapu neʼe takitaki moʼoni nātou e te ʼAtua? Neʼe fakatui kiai ia te ʼu Kilisitiano ʼo te ʼuluaki sēkulō. Neʼe mole puli ia te tui ʼaia lolotoga ia te ʼu sēkulō ki muli age. Ohagē ko John Wycliffe, te tagata Pilitānia takitaki lotu ʼo te hogofulu-mā-fā sēkulō, kiā ia ko te Tohi-Tapu ʼe ko “te lao ʼo te moʼoni ʼe mole feala ke faihala.” Ko te tohi The New Bible Dictionary, ʼaē ʼe talanoa ki te ʼu palalau ʼa Paulo ʼaē ʼe tohi ʼi te kamata, ʼe ʼui ai ko te ‘takitaki ʼaia ʼa te ʼAtua ʼe ina fakamoʼoni ki te moʼoni ʼo te ʼu meʼa fuli ʼaē ʼe ʼui ʼi te Tohi-Tapu.’
Te Fetogi ʼo Te ʼu Manatu ʼo ʼUhiga Mo Te Tohi-Tapu
Kae ʼi te ʼu taʼu pē ʼaenī, kua tahitahiga te falala ʼa te hahaʼi ki te mālohi ʼo te Tohi-Tapu. ʼE ʼui fēnei ʼi te tohi The World’s Religions: “ ʼE lau e te kau Kilisitiano fuli ʼe [kei] natou tali ia te Tohi-Tapu ohagē ko honatou pule, ʼe ina takitaki tanatou ʼu gāue pea mo fakatafito kiai ia te ʼu akonaki ʼaē ʼe natou tui kiai.” Kae ʼe mole ʼiloga ia te ʼu palalau ʼaia ʼi tonatou maʼuli ʼo te ʼaho fuli. Iā ʼaho nei, maʼa te hahaʼi tokolahi, ko te Tohi-Tapu ʼe ko he “talatisio fakatagata [pē ia] ʼe mole feala ke kita falala kiai.” ʼE mole natou tui ko te ʼu tagata faitohi ʼo te Tohi-Tapu neʼe ko he ʼu tagata neʼe mālohi tanatou tui, kae kiā nātou, neʼe ko he ʼu tagata agahala neʼe natou faiga ke natou fakamahino ia te ʼu moʼoni fakalaumālie loloto, kae neʼe mole natou maʼu ia te ʼatamai mālama pea mo te mahino ʼaē ʼe tou maʼu iā ʼaho nei.
ʼI tona fakahagatonu, kua tokosiʼi iā ʼaho nei te hahaʼi ʼaē ʼe natou tuku ia te Tohi-Tapu ke ina takitaki tanatou ʼu manatu pea mo tanatou ʼu gāue. Ohagē lā, neʼe tuʼa fia takotou logo ʼaē ki te ʼui ʼa te hahaʼi ko te ʼu lēkula ʼa te Tohi-Tapu ʼo ʼuhiga mo te aga ʼaē ʼe tonu ke fai kua ʼāfea ia pea mole kei hona ʼaoga? Tokolahi ʼe natou fakafisi ki te ʼu lao pea mo te ʼu pelesepeto ʼo te Tohi-Tapu, peʼe mole natou tokagaʼi pē lā mokā ʼe mole ʼalutahi mo te meʼa ʼaē ʼe natou loto kiai. Ko ʼihi hahaʼi ʼe natou ʼui ʼe natou Kilisitiano, kae ʼe mole natou fia ʼiloʼi peʼe koteā ʼaē ʼe ʼui ʼi te Tohi-Tapu ʼo ʼuhiga mo te fai folonikāsio, te tono, te aga fakakākā, pea mo te ʼinu fakavale.—1 Kolonito 6:9, 10.
Koteā tona tupuʼaga? ʼI te kamata ʼo te ʼu taʼu 1900, ko te tagata fai ʼalekeolosia ko Charles Marston neʼe ina fakahā ia te tupuʼaga ʼo tanatou mole fia ʼiloʼi ia te manatu ʼa te Tohi-Tapu ʼo ʼuhiga mo te ʼu faʼahi ʼaia, ʼi tana tohi The Bible Is True (Ko Te Tohi-Tapu ʼe Moʼoni). Neʼe ina ʼui ko te hahaʼi neʼe natou “tali fakavilivili ia te ʼu tuʼuga fakamahino fakaʼapē lua ʼaē neʼe fai e te ʼu hahaʼi faitohi ʼo totatou temi kae ʼe mole natou fakafihiʼi,” ʼaē ko he ʼu fakamahino neʼe fakafeagai ki te moʼoni ʼo te Tohi-Tapu. ʼE kei moʼoni koa ia te faʼahi ʼaia iā ʼaho nei? Koteā takotou manatu ʼo ʼuhiga mo te ʼu manatu pea mo te ʼu meʼa ʼe lau e te hahaʼi sivi Tohi-Tapu ʼaē ʼe natou haga ʼo pulihi ia te falala ʼa te hahaʼi ki te Tohi-Tapu? Kotou vakaʼi pe koteā ʼaē ʼe ʼui ʼi te ʼalatike ʼaē ʼe hoa mai ʼo ʼuhiga mo te faʼahi ʼaia?