Kei Koutou Manatuʼi Koa?

Neʼe koutou leleiʼia koa takotou lau te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• Koteā te polokalama ʼe pipiki kiai te Akonaki ʼi te Moʼuga ʼe feala ke koutou fai moʼo fakafimālie te lotohoha?

ʼI te ʼaho fuli, ʼe feala ke koutou lau he manatu tāfito e tahi neʼe fai e Sesu peʼe tuʼu ʼi te Akonaki ʼaia peʼe ʼi te tahi ʼu koga ʼo te ʼu Evaselio. Kapau ʼe koutou metitasio ki te manatu ʼaia pea mo koutou maʼuliʼi, pea ʼe mahino ia ʼe koutou maʼu anai he fiafia lahi pea mo siʼisiʼi ai tokotou lotohoha.—15/12, pasina 12 ki te 14.

• Koteā te ʼu tupuʼaga lelei e tolu ʼaē ʼe tonu ai ke akoʼi e te ʼu tagata ʼāfea te ʼu tagata faifekau faka minisitelio ke nātou fakahoko he ʼu maʼua?

ʼUhi ko te tuputupu ʼa te kau Fakamoʼoni ʼa Sehova, ʼe ʼaoga ai he tahi ʼu tagata ʼe nātou fai tonatou maʼua, moʼo tokoni ki te hahaʼi ʼaē neʼe hoki papitema ke nātou tuputupu. ʼI te temi nei, ko ʼihi ʼaē kua tagata ʼāfea talu mai fualoa, kua siʼisiʼi tanatou gāue, heʼe kua matutuʼa peʼe mahahaki. Pea ko ʼihi tagata ʼāfea faiva ʼe lahi tonatou ʼu maʼua ʼi tuʼa atu ʼo tonatou kokelekasio, koia ʼe mole feala ai ke lahi tanatou gāue ʼi te kokelekasio.—1/1, pasina 29.

• E feafeaʼi te falala ʼa te hahaʼi ki he ʼu ʼatua ʼe mole moʼoni?

Tokolahi ʼe nātou tauhi ki te ʼu ʼatua ʼo tanatou lotu, kae ʼe ko he ʼu ʼatua ʼe mole maʼuʼuli moʼo hāofaki nātou, ohage pe ko tona mole lava fai e Paale ʼi te temi ʼo Elia. (1 Hau 18:26, 29; Pesalemo 135:15-17) Ko ʼihi ʼe nātou tauhi ki te ʼu hahaʼi ʼiloa ʼo te televisio peʼe ko te ʼu hahaʼi faigaoʼi, ʼaē ʼe mole feala ke nātou foaki he ʼamanaki moʼoni ki te ka haʼu. Kae ko Sehova ʼe maʼuli moʼoni pea ʼe ina fakahoko tana ʼu fakatuʼutuʼu.—15/1, pasina 3 ki te 5.

• Koteā ʼaē ʼe feala ke tou ako mai te aga ʼa Kaino ki te fakatokaga neʼe fai age e te ʼAtua?

Neʼe foaki mai e te ʼAtua te loto faʼifaʼitaliha, pea ʼe feala ke tou fili ke tou fai peʼe tou fakafisi ki te meʼa ʼaē ʼe lelei, pea ko te meʼa ʼaia neʼe fai e Kaino. ʼE toe fakahā mai e te Tohi-Tapu ʼe fakahoko anai e Sehova tana fakamāu kia ia ʼaē ʼe mole fakahemala.—15/1, pasina 22 ki te 23.

• He koʼe ʼe maʼuhiga tāfito ia ʼaho nei te aga maʼa?

ʼAki te fetogi ʼo te maʼuli, tokolahi ʼe mole kei nātou fakaʼaogaʼi he temi lahi moʼo fakamaʼa tonatou loto fale ohage ko te agamāhani. Kapau ʼe mole maʼa tatatou meʼa kai pea mo te vai, pea ʼe feala ke tou mahahaki ai. ʼO hilifaki ki te maʼa fakasino, ʼe fakahā lelei e te Tohi-Tapu ke tou tokakaga ke tou maʼa ʼi te faʼahi fakalaumālie, ʼi te ʼu aga ʼaē ʼe tonu ke fai, pea mo totatou ʼatamai.—1/2, pasina 3 ki te 6.

• ʼO ʼuhiga mo te kau fakamoʼoni ʼi muʼa ʼo te temi ʼa te kau Kilisitiano, neʼe ʼui e Paulo ʼe mole feala ke nātou “kaku ki te haohaoa, kae mole tou kau ai.” ʼO feafeaʼi? (Hepeleo 11:40, MN )

ʼI te ʼu Taʼu e Afe, ko Kilisito pea mo tona ʼu tēhina fakanofo e toko 144 000 ʼi selo, ʼe nātou fakahoko anai tonatou tuʼulaga hau pea mo pelepitelo, pea mo nātou foaki anai te ʼu lelei ʼo te sakilifisio faitotogi ki te hahaʼi ka fakatuʼuake. ʼE liliu anai ʼo “haohaoa” te hahaʼi agatonu ʼaia ʼaē ʼe talanoa kiai ia Hepeleo kapite 11.—1/2, pasina 23.

• Koteā ʼaē neʼe fia fakahā e Paulo ʼi tana ʼui fēnei ki te kau Hepeleo: “Nee heeki koutou tatali o kaku ki te ligitoto”? (Hepeleo 12:4)

Neʼe fia talanoa ki hanatou ʼutaki ʼo aʼu ki tanatou mamate. ʼE ʼi ai te ʼu faʼifaʼitaki ʼo te ʼu hahaʼi neʼe nātou agatonu ʼo aʼu ki te mate. Ko te kau Hepeleo ʼaē neʼe faitohi ki ai ia Paulo neʼe mole ʼahiʼahiʼi nātou ʼo kaku ki te faʼahi ʼaia, kae neʼe tonu ke nātou tuputupu ki te ʼuhiga fakapotopoto, ʼo fakamālohiʼi tanatou tui ke feala hanatou kātakiʼi ia meʼa fuli pe ʼe feala ke hoko.—15/2, pasina 29.

• He koʼe ʼe lelei age ke mole tou ʼui ko te manavaʼofa ʼo Sehova ʼe ina fakamalu tana faitotonu?

ʼI ʼihi ʼu lea, ko te kupu “fakamalu” ʼe feala ke faka ʼuhiga ki te fakasiʼisiʼi peʼe ko te tāʼofi. Ko Sehova ʼe ko te ʼAtua ʼe faitotonu pea mo manavaʼofa, pea ka ina fakahā te ʼu kalitate ʼaia e lua, pea ʼe nā fefakafuafua leleiʼaki. (Ekesote 34:6, 7; Teutalonome 32:4; Pesalemo 116:5; 145:9) ʼE mole ʼaoga ke fakamalu peʼe fakasiʼisiʼi e te manavaʼofa ʼo Sehova tana faitotonu.—1/3, pasina 30.

• ʼE lelei koa ki he Kilisitiano ke ina fakatologa te sino mate ʼo he tahi neʼe ʼofa ai?

ʼI te temi muʼa, neʼe fai e ʼihi te faʼahi ʼaia ʼuhi ko te lotu. Kae neʼe mole feiā te kau atolasio moʼoni. (Tagata Tānaki 9:5; Gaue 24:15) Ko te fakatologa ʼo te sino ʼe ina fakatuai pe te liliu ʼo te sino ʼo efu. (Senesi 3:19) Kae ʼe mole ʼaoga ke kita tuʼania mo kapau ʼe fakamaʼua e te lao ke fakatologa te sino, peʼe loto kiai ʼihi ʼo te famili, peʼe fai ʼuhi heʼe ʼōmai ʼihi mai mamaʼo ki te ʼavaifo.—15/3, pasina 29 ki te 31.

• Koteā te ʼu faʼifaʼitaki faka Tohi-Tapu ʼe tou ako mai ai ko te ʼAtua ʼe ina tali te hahaʼi ʼo te ʼu fenua fuli?

Neʼe fekauʼi e Sehova ia Sonasi ke ʼalu ʼo fakatokaga ki te kau Ninive, pea uga e te ʼAtua ia Sonasi ke ina tali tanatou fakahemala. ʼAki tana ʼu palalau pea mo tana faʼifaʼitaki, neʼe fakaloto mālohiʼi e Sesu ke fakahā te ʼofa ki te kau Samalitana. Ko te ʼu ʼapositolo ko Petelo pea mo Paulo neʼe nā ʼave te logo lelei ki te hahaʼi ʼaē neʼe mole Sutea. ʼAki te ʼu faʼifaʼitaki ʼaia, ʼe tou mahino ai ki te ʼaoga ʼaē ke tou tokoni ki te hahaʼi ʼo te ʼu fenua fuli pe.—1/4, pasina 21 ki te 24.