Te ʼu Fehuʼi ʼa Te Kau Lautohi
Ko te ʼu fuakava ʼaē ʼe fai ki te ʼAtua kua haʼi ia ʼo talu ai?
ʼI te Tohi-Tapu, ko he fuakava ʼe ko he fakapapau neʼe fai ki te ʼAtua ʼo ʼuhiga mo he fakahoko ʼo he meʼa, pe ko he fai ʼo he mōlaga, peʼe ko he hū ki he faʼahiga gāue peʼe ko he faʼahiga maʼuli, peʼe ko te fakamamaʼo mai he ʼu faʼahiga meʼa ʼe mole ʼalutahi mo te lao. ʼE tuʼu ʼi te Tohi-Tapu ia te ʼu fakamatala ʼo te ʼu fakapapau, neʼe fakapapau ai ke fai he meʼa mo kapau ʼe ʼuluaki fakahoko muʼa e te ʼAtua ia te kole ʼaia. Ohage foki la, ko Ana, te faʼe ʼa te polofeta ko Samuele, “neʼe ina fai te fakapapau pea neʼe ina ʼui fēnei: ‘Ê Sehova ʼo te atu kautau, kapau . . . ʼe mole galo ia te koe ia tau fafine kaugana, pea kapau ʼe ke foaki moʼoni ki tau fafine kaugana he tamasiʼi tagata, pea ʼe ʼau foaki anai ia ia kia Sehova ʼi te ʼaho fuli ʼo tona maʼuli, pea ʼe mole haʼu anai te tele ki tona ʼulu.’ ” (1 Samuele 1:11) ʼE toe fakamatala foki e te Tohi-Tapu ko te ʼu fakapapau ʼe fai ʼaki he lotolelei. ʼE haʼi feafeaʼi te ʼu fakapapau ʼi te Tohi-Tapu?
ʼE ʼui fēnei e te Hau ko Salomone ʼo te Iselaele ʼāfea: “Ka ke fai he fakapapau ki te ʼAtua, ʼaua naʼa ke lotolotolua ʼi tona fakahoko.” ʼE ina toe ʼui fēnei: “Ko te fakapapau ʼaē ʼe ke fai, ke ke fakahoko. ʼE lelei age kia te koe hau mole fai hau fakapapau, ʼi hau fai he fakapapau ka mole ke fakahoko.” (Tagata Tānaki 5:4, 5) ʼE tohi fēnei ʼi te Lao ʼaē neʼe foaki ki Iselaele mai ia Moisese: “Kapau ʼe ke fai he fakapapau kia Sehova, tou ʼAtua, ʼaua naʼa ke tuai ʼi tona fakahoko; koteʼuhi ʼe fakamaʼua moʼoni atu anai e Sehova tou ʼAtua, pea ʼe mahino ia ʼe liliu anai te faʼahi ʼaia ko he agahala kia te koe.” (Teutalonome 23:21) ʼE mahino mai ia, ko te fai ʼo he fakapapau ki te ʼAtua ʼe mole ko he meʼa ʼe hoko fai. ʼE tonu ke ʼi ai hona ʼu tupuʼaga tāfito, pea ko ia ʼaē neʼe ina fai te fakapapau ʼe tonu ke ina fakahoko te fakapapau. Kapau leva ʼe mole ina lava fakahoko, pea ʼe lelei hana mole fai he fakapapau. ʼE faka ʼuhiga koa, mokā ʼosi fai he fakapapau, ʼe mole kei feala hona veteki?
Kae e feafeaʼi mo kapau ko te fakapapau ʼaē neʼe fai e he tahi ʼe ina fakatokagaʼi ki muli age ʼe mole ʼalutahi ia mo te finegalo ʼo te ʼAtua? Koutou fakafuafua age neʼe ko he fakapapau ʼe ina fakapipiki he faʼahiga aga heʼeʼaoga mo te tauhi moʼoni? (Teutalonome 23:18) ʼE mahino ia ko te taʼi fakapapau ʼaia ʼe mole feala ke ʼui kua tukupau. ʼI te Lao ʼa Moisese, ko he fakapapau neʼe fai e he fafine neʼe feala pe hona molehi e tana tāmai peʼe ko tona ʼohoana.—Faka au 30:3-15.
Koutou toe fakatokagaʼi mo he fakapapau neʼe fai e he tahi ki te ʼAtua ke nofo selipatea, pea kua faigataʼa leva kia ia ʼi te temi nei hana taupau ia te koga ʼaia. Kua hage kia ia kapau ʼe hoko atu tana fakapapau ʼi te temi nei ʼe feala ia ke ina maumauʼi te pelesepeto fakaʼatua ʼo ʼuhiga mo te aga ʼaē ʼe tonu ke fai. ʼE tonu koa ke hoholo atu te fakahoko ʼo tana fakapapau? ʼE lagi lelei age kia ia hana puipui ʼo ia mai te fai ʼo he aga heʼeʼaoga ʼo mole ina fakahoko tana fakapapau, ʼi hana kole mamahi leva te loto manavaʼofa ʼo te ʼAtua ke fakamolemole age ki ai ʼi tana kua ʼosi hala. Ko ia tokotahi ʼe feala ke ina fai he tonu ki te faʼahi ʼaia. ʼE mole feala ki he tahi tagata ke ina fai he tonu maʼa ia.
E feafeaʼi mo kapau ʼe fai e he tahi ia he fakapapau pea ki muli age ʼe ina tokagaʼi ʼe faigataʼa ʼaupito? ʼE tonu koa ke ina fakahoko aipe ia te fakapapau? Neʼe mole faigafua kia Sefeteo ia te fakahoko ʼo te fakapapau ʼaē neʼe ina fai ki te ʼAtua, kae neʼe ina fai fakaleleiʼi. (Fakamāu 11:30-40) Ko te mole fakahoko e he tahi ia tana fakapapau ʼe feala ke “ ʼita” mai kiai te ʼAtua pea mo faka ʼalunoa te meʼa ʼaē kua ina fai. (Tagata Tānaki 5:6) Ko te mole faʼa faka maʼuhigaʼi ʼo te fakahoko ʼo he fakapapau ʼe feala ke iku ki he toʼo e te ʼAtua ia tana tapuakina.
Neʼe ʼui fēnei e Sesu Kilisito: “Kae ke pauga tau lea, kapau e ke ‘io’, pea e ‘io’, pea kapau e ‘kailoa’, pea e ‘kailoa’, ko tona hoko atu, e hau ia mai te Tevolo.” (Mateo 5:37) ʼE mole tonu pe ki te Kilisitiano ke tokaga ʼo fakahoko te ʼu fakapapau ki te ʼAtua kae ʼe tonu foki ke feala ke ina fakamoʼoni ki tana ʼu palalau fuli—ʼaē ʼe ina fai ki te ʼAtua mo te tagata. Kae e feafeaʼi la mokā tau mo he faigataʼaʼia ʼi tana kua ʼio mo he tahi tagata ki he meʼa neʼe ʼi te kamata neʼe hage ʼe lelei, pea ʼaki he fakasiosio fakalelei ʼe hā ia ʼe mole faʼa lelei? ʼE mole tonu ke ina faka vaʼiganoaʼi te ʼu meʼa ʼaia. Kae ʼaki he felogoi fakamalotoloto, ʼe feala pe ke fakatotonu e te lua tagata ke fakamaʼamaʼa te Kilisitiano mai tona maʼua.—Pesalemo 15:4; Tāʼaga Lea 6:2, 3.
ʼAki tatatou vakaʼi te ʼu fakapapau pea mo te ʼu meʼa fuli ʼaē ʼe pipiki mai kiai, koteā ʼaē ʼe tonu ke tou tokakaga kiai? Tou faiga tuʼumaʼu ke tou taupau he felogoi lelei mo Sehova ʼAtua.
[Paki ʼo te pasina 30, 31]
Neʼe mole lotolotolua ia Ana ki te fakahoko ʼo tana fakapapau
[Paki ʼo te pasina 30, 31]
Logope neʼe faigataʼa tana fakapapau, kae neʼe fakahoko pe e Sefeteo