KAPITE 33
Te ʼu Gaue Ka Fai e Te Puleʼaga
ʼE kua pule te Puleʼaga ʼo te ʼAtua. Pea kua ina vave fai ni fetogi ʼi te kele. Tou vakaʼi pe kotea te ʼu gaue lelei ka ina fai.
1. ʼE ina fakatuʼu feafeaʼi anai te tokalelei mo te faitotonu ʼi te kele?
ʼE Hau Sesu ʼi te Puleʼaga ʼo te ʼAtua. Pea ʼe ina pulihi anai ia te hahaʼi agakovi mo te ʼu puleʼaga ʼi Alamaketone. (Apokalipesi 16:14, 16) ʼI te temi ʼaia, ʼe hoko moʼoni anai te fakapapau ʼaeni: “ʼE kei toe pe he ki’i temi, pea ʼe mole toe maʼu anai te kau agakovi.” (Pesalemo 37:10) Koia, ʼe fakaʼaogaʼi anai e Sesu ia te Puleʼaga ke maʼu te tokalelei mo te faitotonu ʼi te kele katoa.—Lau ia Esaia 11:4.
2. ʼE feafeaʼi anai te maʼuli ʼi te kele?
Ka pule anai te Puleʼaga ʼo te ʼAtua, “’e ma’u anai e te kau faitotonu te kele pea ʼe natou maʼuli ai anai ʼo heʼe gata.” (Pesalemo 37:29) Fakafuafua age muʼa koe pe feafeaʼi anai te maʼuli ʼi te kele. ʼE faitotonu anai te hahaʼi fuli, pea ʼe natou ʼoʼofa anai kia Sehova mo ʼonatou tatau. ʼE mole toe mahaki anai he tahi pea ʼe tou maʼuli anai ʼo heʼe gata.
3. Kotea ka hoko hili te pulihi ʼo te kau agakovi?
Hili te pulihi ʼo te kau agakovi, ʼe pule anai ia Sesu ia taʼu ʼe 1000. ʼI te temi ʼaia, ʼe tokoni anai mo te toko 144000 ki te hahaʼi ke natou haohaoa. Hili te ʼu taʼu ʼaia ʼe 1000, ʼe liliu anai te kele katoa ko he palatiso. Pea ʼe fiafia anai te hahaʼi fuli he ʼe natou fakalogo ki te ʼu lao ʼa Sehova. ʼE tuku anai e Sesu te Puleʼaga ki tana Tamai ko Sehova. Pea ʼe toe laka age anai te ‘fakatapuha ʼo tona huafa.’ (Mateo 6:9, 10) ʼE fakamoʼoni ai anai ko Sehova ʼe ko he Pule lelei he ʼe tokaga fakalelei ki tana hahaʼi. Hili ia, ʼe pulihi anai e Sehova ia Satana, mo te kau temonio pea mo natou ʼae ʼe agatuʼu ki Tana pule. (Apokalipesi 20:7-10) Koia, ʼe tuʼu anai ʼo heʼe gata ia te ʼu fakatuʼutuʼu ʼae ʼe fai e te Puleʼaga ʼo te ʼAtua.
TA FAKALOLOTO
Ta vakaʼi pe koʼe ʼe tou tui ʼe fakaʼaogaʼi anai e te ʼAtua tona Puleʼaga moʼo fakahoko ʼana fakapapau fuli.
4. ʼE ina pulihi anai te ʼu puleʼaga fakatagata
‘ʼE puleʼi e te tagata ia te tagata ki tona malaʼia.’ (Ekelesiasi 8:9) ʼE fakaʼaogaʼi anai e Sehova tona Puleʼaga moʼo fakagata te aluʼaga heʼe faitotonu ʼaia.
Lau ia Taniela 2:44 mo 2 Tesalonika 1:6-8, pea fai te ʼu fehuʼi ʼaeni:
Kotea ka fai e Sehova mo Sesu ki te ʼu puleʼaga fakatagata mo natou ʼe lagolago ki ai?
Kotea neʼe ke ako ʼo ʼuhiga mo Sehova mo Sesu? Pea he koʼe ʼe ke tui papau ʼe faitotonu anai ʼanā gaue?
5. Ko Sesu ʼe ko te Hau ʼae ʼe lelei tokotahi
ʼE tokoni anai ia Sesu ki te hahaʼi fuli ia aluʼaga kehekehe. Vakaʼi te ʼATA VITEO ʼae ʼe fakaha ai ʼe fia tokoni ia Sesu ki te hahaʼi pea neʼe foaki age e te ʼAtua te malohi.
Neʼe fakaha e Sesu ʼi te ʼu gaue ʼae neʼe ina fai ʼi te kele ia te ʼu gaue ka fakahoko e te Puleʼaga. ʼI te ʼu manatu ʼae ʼe hoa mai, ko te fakapapau fea la ʼe kua ke fakaʼamu ke hoko? Lau te ʼu vaega ʼae ʼe tuʼu ai.
ʼI TE KELE, NEʼE . . . |
MAI TE LAGI, ʼE . . . |
|---|---|
|
|
|
|
|
|
|
|
6. He ka haʼu taulekaleka
Neʼe ʼi ai te fakatuʼutuʼu ʼa Sehova ʼi te kamata maʼa te tagata. Pea ʼe ko ia ʼae ka fakahoko anai e tona Puleʼaga. ʼE maʼuli anai te tagata ʼo heʼe gata ʼi te palatiso. Vakaʼi te ʼATA VITEO pe ʼe fakaʼaogaʼi feafeaʼi e Sehova ia tona ʼAlo ko Sesu ki te fakahoko ʼo Tana fakatuʼutuʼu.
Lau ia Pesalemo 145:16, pea fai te fehuʼi ʼaeni:
Kotea ʼe ke logoʼi ʼi tau iloʼi ʼae ʼe ‘fakafimalieʼi anai e Sehova te loto ʼo meʼa maʼuli fuli pe’?
ʼE UI E ʼIHI: “Ka tou gaue fakatahi pea ʼe tou lava fakatokatoka te ʼu fihifihia ʼo te malamanei.”
Kotea te ʼu fihifihia ka fakatokatoka e te Puleʼaga ʼo te ʼAtua kae mole lavaʼi e te ʼu puleʼaga fakatagata?
MANATU TAFITO
ʼE fakahoko anai e te Puleʼaga ʼo te ʼAtua ia te finegalo ʼo Sehova. ʼE ina fakaliliu anai te kele katoa ko he palatiso. Pea ʼe maʼuʼuli ai anai te ʼu kaugana ʼa Sehova ʼo heʼe gata.
Fehuʼi Fakamanatu
ʼE fakatapuha feafeaʼi anai e te Puleʼaga ʼo te ʼAtua te huafa ʼo Sehova?
He koʼe ʼe tou tui ʼe fakahoko anai e te Puleʼaga ʼo te ʼAtua te ʼu fakapapau fuli ʼi te Tohi-Tapu?
Kotea la ʼae ʼe ke fakaʼamu ke fakahoko e te Puleʼaga ʼo te ʼAtua?
TE TAHI ʼU MANATU
Kotea te fakaʼuhiga ʼo te kupu Alamaketone?
Te ʼu aluʼaga ka hoko lolotoga te pule ʼa Sesu ia taʼu ʼe 1000 pea mo hili te ʼu taʼu ʼaia.
“Koteā ʼAē Kā Hoko Anai ʼi Te ʼAho ʼo Te Fakamāu?” (Ko Te Tule Leʼo ʼaho 1 ʼo Oketopeli 2012)
Ko he kiʼi famili ʼe natou fakakaukauʼi tonatou maʼuli ʼi te malama foʼou.
ʼI te alatike “J’étais tourmenté par de nombreuses questions,” ʼe fakamahino ai neʼe maʼu e he tagata faipolitike he ʼu tali ki ʼana fehuʼi.
“La Bible transforme des vies” (Ko Te Tule Leʼo (Fakafalani) ʼaho 1 ʼo Sanualio 2012)