Koteā Te ʼAho ʼo Te Fakamāu?

KOTEĀ takotou mahino ki te ʼAho ʼo Te Fakamāu? Tokolahi ʼe nātou ʼui, ko te ʼu lauʼi miliona hahaʼi ʼe nātou fakahoahoa takitokotahi iā muʼa ʼo te Hekaʼaga Faka Hau ʼo te ʼAtua. ʼI te temi ʼaia ʼe fai anai ia te fakamāu ki te hahaʼi takitokotahi. ʼE fakapale anai ʼihi ke nātou māʼuʼuli ʼi te palatiso ʼi te lagi, pea ko ʼihi ʼe tauteaʼi anai ke ʼolo ki te ʼifeli kakaha. Kae ʼi te Tohi-Tapu ʼe mole feiā te ʼAho ʼo Te Fakamāu. ʼE fakamatala ʼi te Folafola ʼa te ʼAtua ia te ʼaho ʼaia, ohage ko he temi ʼo te ʼamanaki pea mo te fakafoʼou, kae ʼe mole ko he temi fakamataku.

Iā Apokalipesi 20:​11, 12 (MN ), ʼe tou lau ai te fakamatalatala ʼa te ʼapositolo ko Soane ʼo ʼuhiga mo te ʼAho ʼo Te Fakamāu: “Neʼe au sio ki te hekaʼaga faka hau lahi e lanu hina, pea mo ia ʼaē neʼe heka ʼi ai. ʼI ʼona muʼa neʼe feholaki mai ai te kele pea mo te lagi, pea neʼe mole maʼu he nofoʼaga moʼo nāua. Pea neʼe au sio ki te kau mate, ia nātou lalahi pea mo nātou liliki, ʼe nātou tutuʼu iā muʼa ʼo te hekaʼaga faka hau, pea neʼe avahi te ʼu takaiga tohi. Kae neʼe avahi te tahi takaiga tohi; ko te takaiga tohi ʼo te maʼuli. Pea neʼe fakamāuʼi te kau mate ʼo mulimuli ki te ʼu meʼa ʼaē neʼe tohi ʼi te takaiga tohi, ʼo mulimuli ki tanatou ʼu gāue.” Ko ai te Tuʼi Fakamāu ʼaia?

Ko Sehova ʼAtua ia te Tuʼi Fakamāu Lahi ʼo te malamanei. Kae neʼe ina tuku ki te tahi kehe ke ina fai ia te fakamāu ʼaia. Iā Gaue 17:31 (MN ), neʼe ʼui ai e te ʼapositolo ko Paulo ko te ʼAtua “kua ina fakakatofa he ʼaho ʼe tonu ke ina fakamāuʼi ai te kele kātoa ʼi te faitotonu, ʼaki he tagata neʼe kua ina fakanofo.” Ko te Tuʼi Fakamāu ʼaia ʼe ko Sesu Kilisito ʼaē kua fakatuʼuake. (Soane 5:22) Kae ʼe kamata ʼafea te ʼAho ʼo Te Fakamāu? Pea ʼe fai ʼo aʼu ki ʼāfea?

ʼI te tohi ʼo Apokalipesi ʼe fakahā ai ko te ʼAho ʼo Te Fakamāu ʼe kamata ʼi te hili ʼo te tau ʼo Halamaketone, mokā fakaʼauha anai te tuʼu ʼa Satana.a (Apokalipesi 16:​14, 16; 19:19–20:3) ʼI te hili ʼo Halamaketone, ʼe pilisoniʼi anai ia Satana mo tana kau temonio ʼi te vanu ia taʼu e afe. Lolotoga te temi ʼaia, ko te toko 144 000 kaugā maʼu tofiʼa ʼi selo ʼe nātou liliu anai ko te kau tuʼi fakamāu pea ʼe nātou “hau [anai] mo Kilisito lolotoga ia taʼu e afe.” (Apokalipesi 14:​1-3; 20:​1-4; Loma 8:17) Ko te ʼAho ʼo Te Fakamāu ʼe mole fai pe anai ʼi te ʼaho e tahi, kae ia taʼu e afe.

Lolotoga te ʼu taʼu ʼaia e afe, ko Sesu Kilisito ʼe ina “fakamauʼi anai te hahai mauli mo te hahai mate.” (2 Timoteo 4:1) Ko “te hahai mauli” ʼe ko “te toe hahaʼi tokolahi” ʼaē ka māʼuʼuli ʼi Halamaketone. (Apokalipesi 7:​9-17, MN ) Neʼe toe sio ia te ʼapositolo ko Soane ki “te kau mate . . . ʼe nātou tutuʼu iā muʼa ʼo te hekaʼaga faka hau” ʼo te fakamāu. Ohage ko tona fakapapau e Sesu, ka hoko anai te fakatuʼuake, “ko nātou . . . ʼe nonofo ʼi te ʼu falemaka fakamanatu ʼe nātou logo anai ki [te] leʼo [ʼo Kilisito] pea ʼe nātou hū mai anai ki tuʼa.” (Soane 5:​28, 29, MN; Gaue 24:15) ʼE feafeaʼi anai tonatou fakamāuʼi?

ʼI te meʼa ʼaē neʼe hā ki te ʼapositolo ko Soane, “neʼe avahi te ʼu takaiga tohi” pea “neʼe fakamāuʼi te kau mate ʼo mulimuli ki te ʼu meʼa ʼaē neʼe tohi ʼi te takaiga tohi, ʼo mulimuli ki tanatou ʼu gāue.” ʼE tuʼu koa ʼi te ʼu takaiga tohi ʼaia te ʼu aga ʼaē neʼe fai e te hahaʼi ʼi tanatou kei māʼuʼuli? Kailoa, ʼe mole fakamāuʼi anai nātou ʼo mulimuli ki tanatou ʼu aga ʼaē neʼe nātou fai ʼi muʼa ʼo tonatou mamate. ʼE tou ʼiloʼi feafeaʼi ia te faʼahi ʼaia? ʼE ʼui fēnei ʼi te Tohi-Tapu: “He ko ae kua mate, kua fakaʼateaina mai te agahala.” (Loma 6:7) Koia ko te kau fakatuʼuake ʼaia ʼe nātou toe māʼuʼuli ake anai kae kua molehi tanatou ʼu agahala ʼāfea. Ko te ʼu takaiga tohi ʼe ko te ʼu fakatotonu ʼa te ʼAtua. Ke feala hanatou māʼuʼuli ʼo talu ai, ʼe tonu anai ki te hahaʼi ʼaē neʼe hāo ʼi Halamaketone pea mo te kau fakatuʼuake, ke nātou fakalogo ki te ʼu fakatotonu ʼa te ʼAtua, ʼo feiā mo te ʼu fakamaʼua foʼou ʼaē ka fakahā mai e Sehova lolotoga te ʼu taʼu e afe. Koia, ʼe fakamāu anai te hahaʼi ʼo mulimuli pe ki te ʼu meʼa ʼaē ka nātou fai lolotoga te ʼAho ʼo Te Fakamāu.

ʼI te ʼAho ʼo Te Fakamāu ʼe feala anai ki te ʼu lauʼi miliona hahaʼi ke nātou maʼu te ʼuluaki faigamālie ʼaia ke nātou ako ia te finegalo ʼo te ʼAtua pea mo faka ʼalutahi kiai tonatou maʼuli. Ko tona faka ʼuhiga ʼe akoʼi anai te tokolahi. ʼIo, “ ʼe ko te faitotonu ʼaē ka ako moʼoni anai e te ʼu hahaʼi ʼo te kele maʼuli.” (Isaia 26:9) Kae ʼe mole ko te hahaʼi fuli ʼaē ka fakalogo anai ki te finegalo ʼo te ʼAtua. ʼE ʼui iā Isaia 26:10: “Tatau aipe peʼe kita ʼofa ki te tagata agakovi, kae ʼe mole ina ako anai ia te faitotonu. ʼI te fenua ʼo te faitotonu ʼe ina fai anai he aga heʼe faitotonu, pea ʼe mole sio anai ki te māʼoluga ʼo Sehova.” ʼE matehi anai ʼo talu ai ia te kau agakovi ʼaia ʼi te lolotoga ʼo te ʼAho ʼo Te Fakamāu.​—Isaia 65:20.

ʼI te fakaʼosi ʼo te ʼAho ʼo Te Fakamāu, ko te hahaʼi ʼaē ka hāo, ʼe nātou maʼu kātoa anai ia ‘te maʼuli,’ heʼe kua nātou haohaoa. (Apokalipesi 20:5) Koia, ʼi te ʼAho ʼo Te Fakamāu ʼe toe liliu anai te malamanei ʼo maʼuli haohaoa ohage ko te kamataʼaga. (1 Kolonito 15:​24-28) Pea ʼe fai anai te ʼahiʼahi fakaʼosi, heʼe toe tuku mai anai ia Satana mai te pilisoni pea ʼe fakagafua age anai ke ina fakahēʼi fakaʼosi ia te malamanei. (Apokalipesi 20:​3, 7-10) Ko nātou ʼaē ka fakafeagai kiā te ia, ʼe nātou sio anai ki te fakahoko kātoa ʼo te fakapapau faka Tohi-Tapu ʼaenī: “ ʼE maʼu anai te kele e te kau faitotonu, pea ʼe nātou nonofo ai anai ʼo talu ai.” (Pesalemo 37:29) Ei, ko te ʼAho ʼo Te Fakamāu ʼe ko he tapuakina anai ki te kau agatonu fuli!