Ko Te Manavaʼofa ʼo Sehova ʼe Ina Hāofaki Tatou Mai Te Heʼeʼamanaki
“Fakahā mai tou ʼofa, ê ʼAtua, ʼaki tou finegaloʼofa. ʼAki te lahi ʼaē ʼo tou ʼu manavaʼofa, molehi ʼaku ʼu talagataʼa.” — Pesalemo 51:1.
1, 2. Koteā te meʼa ʼe feala ke lave ki he kaugana ʼa Sehova neʼe ina fai he agahala mamafa?
ʼE MOLE feala ke maumauʼi te lao ʼa Sehova pea ʼe mole hoko he tautea ki ʼaē neʼe ina maumauʼi tana lao. ʼE ʼiloga la mo kapau ʼe tou fai he agahala mamafa ki te ʼAtua. Neʼe lagi kua fualoa tatatou gāue agatonu kia Sehova, pea lagi ko te maumauʼi ʼo tana lao ʼe feala ke fakatupu he toe loto tuʼania pea mo he lotomamahi lahi. ʼE feala ke tou manatu kua liaki tatou e Sehova pea ʼe mole kei ʼaoga hatatou gāue kia te ia. ʼE feala ke hage kia tatou ko tatatou agahala ko he toe ʼao ʼe ina fufū te mālama ʼo te ʼofa ʼo te ʼAtua.
2 Neʼe maʼu e te hau ko Tavite ʼo te Iselaele ʼāfea te taʼi manatu ʼaia. Neʼe feafeaʼi te tuputupu ʼo te ʼaluʼaga ʼaia?
Ko te ʼu aga ʼe kovi ʼe feala ke iku ki he ʼu agahala mamafa
3, 4. Koteā te meʼa neʼe hoko ki te hau ko Tavite lolotoga ʼo tona temi maʼu koloā?
3 Neʼe ʼofa Tavite ki te ʼAtua, kae neʼe ina fai te ʼu aga ʼe kovi ʼo iku ai ki te ʼu agahala mamafa (Vakaʼi ia Kalate 6:1). ʼE feala pe ke hoko te meʼa ʼaia ki te tagata fuli, tāfito mo kapau ʼe pule ki niʼihi. ʼI tona ʼuhiga hau, neʼe maʼu e Tavite te mālohi pea neʼe logona. Ko ai ʼe toʼa anai ʼo fakafihiʼi hana palalau? Ko te ʼu tagata lalahi neʼe kaugana kia te ia, pea ko meʼa fuli neʼe loto ki ai neʼe hoko. Kae, neʼe fai e Tavite te ʼu aga ʼe kovi: neʼe lahi tona ʼu ʼohoana pea neʼe ina lau te hahaʼi. — Teutalonome 17:14-20; 1 Fakamatala 21:1.
4 Neʼe ko te temi ʼaē neʼe maʼu meʼa ai Tavite, ʼaē neʼe ina fai ai te ʼu agahala mamafa ki te ʼAtua pea mo te tagata. ʼIo, ko te agahala ʼe ina fakagafua ki he tahi agahala, ko he ʼu gāue agakovi ia neʼe uga e Satana! ʼI te temi neʼe felāveʼi ai te kau Iselaele pea mo te kau Amonite, mai ʼoluga ʼo te fakaheketālaʼa ʼo tona fale ʼaliki neʼe sioʼi e Tavite te ʼohoana finemui ʼo Ulia ʼaē ko Pati-Sepa. ʼI te lolotoga tau ʼa Ulia, neʼe ʼaumai e te hau te fafine ko Pati-Sepa ki tona fale ʼaliki pea neʼe tono mo ia. Koutou fakakaukauʼi muʼa tana puna’maʼuli ki muli age ʼi tana ʼiloʼi ʼaē ko te fafine kua faitama! Neʼe fekauʼi e Tavite ia Ulia kio ia, heʼe ʼi tana manatu ke moe ʼi te po ʼaia mo Pati-Sepa, ke manatu pe te hahaʼi neʼe faitama te fafine kia Ulia. Logope la te faka ʼinu e Tavite ia Ulia neʼe mole fia moe ia mo tona ʼohoana. Kua mataku leva Tavite, ʼo ina fekauʼi fakafūfū te pule ko Soape ke ina tuku ia Ulia ki te ʼuluaki ʼatu tau heʼe ina ʼiloʼi papau ʼe mate ai anai. Ko Ulia neʼe matehi ʼi te tau, pea neʼe fai e Pati-Sepa te agaʼi fenua ʼaē ko te putu, pea neʼe ʼohoana leva ia Tavite mo ia ʼi muʼa ʼo he ʼiloʼi e te hahaʼi kua faitama te fafine. — 2 Samuele 11:1-27.
5. Koteā te meʼa neʼe hoko kia Tavite ʼi tana ʼosi agahala pea mo Pati-Sepa, pea koteā te fua ʼo tana ʼu agahala kia ia?
5 ʼAki te polofeta ko Natane, neʼe fakahā e te ʼAtua te ʼu agahala ʼa Tavite pea mo ina ʼui fēnei: “ ʼE ʼau tuku te malaʼia kia te koe, ʼi tou loto fale totonu pe.” ʼO mulimuli ki te palalau ʼaia, ko te tamasiʼi ʼaē neʼe fānauʼi neʼe mate (2 Samuele 12:1-23). Ko te ʼuluaki foha ʼo Tavite ko Amenone, neʼe ina fakaʼalikiʼi tona tuagaʼane ko Tamale pea neʼe matehi leva ia e te tuagaʼane ʼo Tamale (2 Samuele 13:1-33). Ko te foha ʼo Tavite ko Apisalone neʼe ina fia faʼao te tuʼulaga hau pea neʼe ina fakalainoaʼi tana tāmai ʼi tana moe mo te ʼu fafine ʼa tana matuʼa (2 Samuele 15:1–16:22). Neʼe fakaʼosi te tau sivile ʼaki te mate ʼo Apisalone pea ko he tahi ʼaenā meʼa faka lotomamahi kia Tavite (2 Samuele 18:1-33). Kae, ko te ʼu agahala ʼa Tavite neʼe nātou fakalainoaʼi ia ia pea mo fakamahino ki ai ia te maʼuhiga ʼo te nofo ōvi ʼi tona ʼAtua manavaʼofa. Kapau neʼe tou hēhē, tou fakahemala ʼaki te agavaivai pea ke tou fakaōvi kia Sehova. — Vakaʼi ia Sake 4:8.
6. He koʼe koa neʼe lākahala moʼoni te hau ko Tavite?
6 Neʼe agahala moʼoni ia Tavite koteʼuhi ko ia ko te pule ʼo te kau Iselaele neʼe mahino katoa ki te Lao ʼa Sehova (Teutalonome 17:18-20). Neʼe mole ko ia ko te falaone ʼo Esipito peʼe ko te hau ʼo Papiloni ʼaē neʼe hāla mo te mālama ʼaia pea mo feala ke ina fai te ʼu meʼa ʼaē ʼe mole leleiʼia e te ʼAtua (Vakaʼi ia Efesi 2:12; 4:18). ʼI tana kau ki te puleʼaga ʼaē kua foaki maʼa te ʼAtua, neʼe ʼiloʼi e Tavite ko te fai feʼauʼaki pea mo te fakapō ko te ʼu agahala mamafa ia (Ekesote 20:13, 14). Ko te kau kilisitiano ʼe nātou toe ʼiloʼi pe foki te lao ʼa te ʼAtua. Kae ohage ko Tavite, ko ʼihi ʼe nātou talagataʼa ki te lao koteʼuhi ko tonatou ʼuhiga kakano agahala, feiā aipe mo te ʼu vaivaiʼaga ʼo te tagata, pea mo te mole tekeʼi ʼo te fakahala. Kapau ʼe hoko he meʼa feiā kia tatou, ʼe mole tonu ke vaivai totatou faʼahi fakalaumālie pea mo tuku tatou ki te heʼeʼamanaki lahi.
Ko te kofesio ʼe ina foaki te fīmālie
7, 8. a) Koteā te meʼa neʼe hoko kia Tavite ʼi tana fia fufū ʼo tana ʼu agahala? b) Koteā te tupuʼaga ʼo tana kofesioʼi ʼo tana agahala pea ke ina situʼa ki tana ala kovi?
7 Mo kapau neʼe tou fai he ʼu talagataʼa mamafa ki te ʼAtua, ʼe feala ke mata faigataʼa kia tatou hatatou kofesioʼi ʼatatou ʼu agahala, tatau aipe mokā neʼe kofesioʼi kia Sehova. Koteā te meʼa ʼe feala ke hoko ʼi te ʼu ʼaluʼaga ʼaia? ʼI te Pesalemo 32, ʼe fēnei te fakamoʼoni ʼa Tavite: “ ʼI taku nofo fakalogologo [ʼe mole ʼau kofesio te hāla], ko ʼoku hui neʼe kaina ʼuhi ko taku ʼu tagi lolotoga ʼo te ʼaho katoa. Heʼe ʼi te ʼaho mo te po ko tou nima [ʼaē ʼo Sehova] neʼe mamafa kia te ʼau. Ko te huhuʼa ʼo toku maʼuli neʼe liliu ohage ko te vevela magemage ʼo te temi māfana.” (ʼU vaega 3, 4). Neʼe faigataʼa ke fufū e Tavite tana agahala pea ke ina pulihi te meʼa ʼi tona loto ʼo ʼuhiga mo tana agahala. Kua haga te tuʼania ia ʼo toʼo ia te ia tona mālohi ohage ko he fuʼu ʼakau kua magemage pea ʼe mole kei ʼi ai hona huhuʼa moʼo maʼuli. ʼI te temi ʼaē, lagi neʼe mahaki tona ʼatamai pea mo tona sino. Ko tona fakanounou pe, kua puli tana fiafia. Kapau ʼe feiā he tahi ia tatou ohage ko Tavite, koteā anai te meʼa ke ina fai?
8 Ko te kofesio ki te ʼAtua ʼe feala ke tou maʼu ai he fakamolemole pea mo he fakafimālie. “Ko taku agahala, neʼe ʼau kofesioʼi atu, pea neʼe mole ʼau ʼuʼufi taku hāla”, ko te hiva ʼaia ʼa Tavite. “Neʼe ʼau ʼui: ‘ ʼE ʼau kofesioʼi anai taku ʼu talagataʼa kia Sehova.’ Pea ko koe neʼe ke fakamolemole te hāla ʼo taku ʼu agahala.” (Pesalemo 32:5). ʼE koutou nofo tuʼania koa ʼi he ʼu agahala neʼe fufū? ʼE mole lelei age koa hona kofesioʼi pea mo situʼa ki ai koteʼuhi ke maʼu ai te manavaʼofa ʼo te ʼAtua? He koʼe koa ʼe mole koutou pāui te ʼu tagata ʼāfea ʼo te kokelekasio pea mo koutou kumi he faitoʼo fakalaumālie? (Tāʼaga Lea 28:13; Sake 5:13-20.) ʼE ʼiloʼi anai takotou fia fakahemala, pea ʼe toe feala aipe ke koutou maʼu takotou fiafia faka kilisitiano. “Manuʼia ʼaē ko tana fakafeagai neʼe fakamolemole, ko tana agahala neʼe ʼuʼufi!”, ko te ʼui ʼaia ʼa Tavite. “Manuʼia te tagata ʼaē ʼe mole hili ki ai e Sehova he hāla, pea ʼi tona ʼatamai ʼe mole ʼi ai he faka kākā!” — Pesalemo 32:1, 2.
9. Ko te temi fea ʼaē neʼe tohi ai te Pesalemo 51, pea koteā tona tupuʼaga?
9 Neʼe hāla ia Tavite pea mo Pati-Sepa ia muʼa ʼo Sehova ʼAtua ʼuhi ko tanā agahala. Neʼe feala pe honā matehi ʼi tanā agahala ʼaia, kae neʼe manavaʼofa aipe te ʼAtua kia nāua. Neʼe manavaʼofa tāfito te ʼAtua kia Tavite ʼuhi ko te fuakava ʼo te Puleʼaga (2 Samuele 7:11-16). ʼE ʼiloga te loto fakahemala ʼo Tavite ki tana ʼu agahala ohage la ko ʼaē mo Pati-Sepa ʼi te kapite 51 ʼo te tohi ʼo Pesalemo. Ko te pesalemo faka lave loto ʼaia neʼe tohi ʼi te temi fakahemala ʼo te hau ʼi te ʼosi fakamālamaʼi ʼo tona leʼo ʼo loto e te polofeta ko Natane ʼo ʼuhiga mo te mamafa ʼo tana ʼu talagataʼa ki te lao ʼa te ʼAtua. Neʼe tonu foki ke lototoʼa ia Natane moʼo fakahā kia Tavite ke ina tokagaʼi tana ʼu talagataʼa, ʼo toe feiā aipe mo te kau tagata ʼāfea, ʼe tonu anai ke nātou lototoʼa moʼo fai te ʼu meʼa ʼaia ʼi te temi nei. Neʼe mole fakafihiʼi e Tavite te maʼua pea mo te fakatotonu neʼe fai e Natane, ko te hau ʼaki te agavaivai neʼe ina vete tana ʼu agahala (2 Samuele 12:1-14). ʼE fakahā e te Pesalemo 51 te kole ʼaē neʼe fai e Tavite ki te ʼAtua ʼo ʼuhiga mo te meʼa fakaufiufi ʼaē neʼe hoko, pea ʼe ʼaoga pe foki ke tou metitasioʼi te ʼaluʼaga ʼaia ʼi te faikole, tāfito la mo kapau neʼe tou agahala pea ʼe tou kumi moʼoni te manavaʼofa ʼo Sehova.
ʼE ʼi ai ʼo tatou ʼu maʼua ki te ʼAtua
10. Neʼe feafeaʼi te toe maʼu e Tavite tona maʼuli fakalaumālie?
10 Neʼe mole kumi e Tavite hona holaʼaga ʼo ʼuhiga mo tana agahala kae neʼe ina kole ke ina maʼu te fakamolemole: “Fakahā mai tou ʼofa, ê ʼAtua, ʼaki tou finegaloʼofa. ʼAki te lahi ʼaē ʼo tou ʼu manavaʼofa, molehi ʼaku ʼu talagataʼa.” (Pesalemo 51:1). ʼI te talagataʼa ʼa Tavite, neʼe ina maumauʼi te ʼu tuʼakoi ʼo te Lao ʼa te ʼAtua. Kae, neʼe ina fakaʼamu pe ke ina toe maʼu te fīmālie fakalaumālie, mo kapau ʼe tuku age e te ʼAtua te ʼofa ʼaki tona loto ʼofa, peʼe ko tona ʼofa agatonu. ʼO mulimuli ki te ʼu aga manavaʼofa ʼo te ʼAtua ʼi muʼa atu neʼe ko he fakatafitoʼaga ʼaia ki te hau loto fakahemala ke ina maʼu te tui ʼaē ko te ʼAtua ʼe ina molehi anai ʼana ʼu talagataʼa.
11. Koteā ʼaē neʼe fakahā ʼi te ʼAho ʼo te faifakalelei, pea koteā te meʼa ʼe tonu ke tou fai ia ʼaho nei ke tou maʼuli ai?
11 ʼAki te ʼu fakatā faka polofeta ʼaē neʼe ko he ʼu sakilifisio neʼe momoli ʼi te ʼAho ʼo te ʼu faifakalelei, neʼe fakahā e Sehova ʼe ʼi ai tana faʼahiga fakamaʼa kia nātou ʼaē ʼe fakahemala ʼi ʼanatou ʼu agahala. ʼI te temi nei, ʼe tou ʼiloʼi ko tona manavaʼofa pea mo tana fakamolemole kua tou maʼu ʼaki tatatou tui ki te sakilifisio faitotogi ʼo Sesu Kilisito. Kapau neʼe feala ke maʼu e Tavite te falala ki te loto ʼofa pea mo te ʼu manavaʼofa ʼo Sehova, ʼaki tana ʼiloʼi ʼaē te ʼu ʼaluʼaga pea mo te ʼu fakatā ʼo te sakilifisio ʼaia, ʼo toe feiā aipe mo te ʼu kaugana ʼa te ʼAtua ʼo te temi nei, ʼe mole tonu koa la ke nātou haga tui ki te totogi neʼe foaki ʼo ʼuhiga mo tonatou maʼuli! — Loma 5:8; Hepeleo 10:1.
12. Koteā te ʼuhiga ʼo te kupu ʼaē ko te agahala, pea neʼe feafeaʼi te logo sino kia Tavite ʼo tana agakovi?
12 ʼI tana kole ʼaē ki te ʼAtua, neʼe fēnei te ʼui ʼa Tavite: “Fufulu katoa ʼau ʼi taku hāla, pea mo fakamaʼa ʼau ʼi taku agahala. Koteʼuhi, ʼe ʼau ʼiloʼi taku ʼu talagataʼa, pea ko taku agahala ʼe nofo tuʼumaʼu ʼi ʼoku muʼa.” (Pesalemo 51:2, 3). Ko te agahala ʼe ina fakahēhē he tahi ke ʼaua naʼa aʼu ki te ʼu fakatuʼutuʼu ʼa Sehova. ʼE lagi neʼe ko te meʼa ʼaia neʼe hoko kia Tavite. Kae, neʼe mole tatau ia mo he tagata fakapō peʼe ko ia ʼaē ʼe tono, ʼaē ʼe ina meʼa noaʼi tana hāla pea ʼe mole ina tuʼania pe la te tūʼa peʼe ko hana maʼu ʼo he mahaki. Ko Tavite neʼe ʼofa kia Sehova, pea neʼe fehiʼa ki te kovi (Pesalemo 97:10). Neʼe fakalialia ʼaupito ki tana agahala pea neʼe ina loto ke fakamaʼa katoa ia e te ʼAtua. Neʼe ʼiloʼi lelei e Tavite tana ʼu talagataʼa pea ʼi te lahi ʼo tona lotomamahi neʼe taʼomia ia e tana manatu ki tana ʼu agahala. Neʼe tuʼumaʼu pe ʼi ʼona muʼa tana agahala, koteʼuhi ko he tahi ʼe aga faka lotu ʼe mole ina maʼu he leʼo ʼo loto tokalelei mo kapau ʼe mole heʼeki fakahemala, ʼe mole heʼeki kofesio, pea mo ina maʼu te fakamolemole ʼa Sehova.
13. He koʼe koa neʼe feala ke ʼui e Tavite neʼe agahala ki te ʼAtua tokotahi pe?
13 Neʼe ʼiloʼi e Tavite tana lākahala ʼaē ia muʼa ʼo Sehova, koia neʼe ʼui maʼana: “Kia koe, ko koe tokotahi, neʼe ʼau agahala, pea neʼe ʼau fai te meʼa ʼaē ʼe kovi ʼi muʼa ʼo tou ʼu mata, ke ke hā ʼe ke agatonu mokā ʼe ke palalau, ke ke lākatonu mokā ʼe ke fakamāu.” (Pesalemo 51:4). Neʼe maumauʼi e Tavite te ʼu lao ʼa te ʼAtua, neʼe ina fakalainoaʼi te fale ʼaliki, pea “puli moʼoni te fakaʼapaʼapa kia Sehova”, ʼo tuku ia Ia ki te fakaufiufi (2 Samuele 12:14; Ekesote 20:13, 14, 17). Ko te ʼu agahala ʼa Tavite neʼe ko he ʼu hia foki ki te kau Iselaele pea mo te ʼu hahaʼi ʼo tona famili, ohage pe ko he tahi ʼe agakovi kua papitema ia ʼaho nei, ʼe ina tuku he lotomamahi ki te kokelekasio faka kilisitiano pea mo nātou ʼaē neʼe ʼofa kia te ia. Logope, ko te hau loto fakahemala neʼe ina ʼiloʼi neʼe agahala ki tona ʼu kaugā tagata ohage ko Ulia, neʼe ina fakamoʼoni ki tona toe maʼua ʼe taau mo ia kia Sehova (Vakaʼi ia Senesi 39:7-9). Neʼe ʼiloʼi e Tavite ko te tautea ʼa Sehova ʼe totonu anai (Loma 3:4). Ko te kau kilisitiano ʼaē neʼe nātou agahala ʼe ʼaoga ke nātou maʼu te manatu ʼaē neʼe maʼu e Tavite.
Ko te ʼu ʼaluʼaga ke tokagaʼi
14. Koteā te ʼu ʼaluʼaga ke tokagaʼi neʼe fakahā e Tavite?
14 Kae neʼe mole fia takuʼaki e Tavite, neʼe ina ʼui: “Koʼeni, ʼaki te mamahi neʼe fānauʼi ʼau ʼi te hāla, pea ʼi te agahala neʼe fakatupu ai ʼau e taku faʼe.” (Pesalemo 51:5). Neʼe fānauʼi Tavite ʼi te mamahi, pea neʼe tau mo tana faʼe te faʼahi ʼaia koteʼuhi neʼe ina maʼu te agahala olisinale (Senesi 3:16; Loma 5:12). Ko tana ʼu palalau ʼe mole faka ʼuhigaʼi ko te ʼu felāveʼi faka taumatuʼa, ko te fia maʼu fānau pea te fanaunau ʼe ko he ʼu agahala, koteʼuhi ko te ʼAtua neʼe ina fakatuʼu te ʼohoana pea mo te fanaunau; pea ko Tavite ʼe mole talanoa ki he agahala ʼo tana faʼe. Neʼe fakatupu ia ia ʼi te agahala koteʼuhi ko tana ʼu mātuʼa ʼe agahala ohage ko te hahaʼi fuli ʼe heʼe haohaoa. — Sopo 14:4.
15. Logope la te haga ʼaē ʼa te ʼAtua ʼo tokagaʼi te ʼu ʼaluʼaga, koteā te meʼa ʼe mole tonu anai ke tou fai?
15 Kapau neʼe tou agahala, ʼe feala ke tou fakahā ki te ʼAtua te ʼu ʼaluʼaga fuli ʼaē neʼe feala ke nātou taki tatou ke tou fai he hāla. Kae ʼaua naʼa tou haga ʼo liliu te agalelei makehe ʼo te ʼAtua moʼo takuʼaki he aga māmio kovi peʼe mo fakaʼaoga totatou ʼuhiga agahala ohage ko he meʼa ke tou hola ʼi totatou maʼua ʼaē ʼo ʼuhiga mo te faʼahi ʼaia (Suta 3, 4). Neʼe ʼiloʼi e Tavite tana haga ʼaē ʼo fafaga tona ʼatamai ʼaki te ʼu manatu heʼemaʼa pea mo te kiʼi temi ʼaē neʼe to ai ki te fakahala. Tou faikole ke ʼaua naʼa tou hē ki te fakahala pea ʼe tonu ke tou mulimuli ʼo gāue tahi mo te ʼu meʼa ʼaē ʼe tou kole. — Mateo 6:13.
Tou faikole ke tou maʼu te fakamaʼa
16. Koteā te kalitate ʼe leleiʼia e te ʼAtua, pea ʼe tonu ke feafeaʼi tona lave anai ki tatatou aga?
16 ʼE feala ke tou sio ki he tahi ʼe agalelei, pea mo pipiki maʼu ki te ʼAtua, kae ko te ʼAtua ia ʼe ina sioʼi ia te meʼa ʼaē ʼe ū pea ʼe ina ʼiloʼi te meʼa ʼaē ʼi te loto ʼo he tahi. Neʼe fēnei te ʼui ʼa Tavite: “Koʼeni, neʼe ke [Sehova] maʼu te lelei ʼo te moʼoni ʼi te loto ʼo te tagata; pea ʼi te lilo ʼo ʼoku totonu, ke ke fakamahino mai te poto ʼe maʼa!” (Pesalemo 51:6). ʼI te haga ʼaē ʼa Tavite ʼo teuteuʼi te mate ʼo Ulia pea mo fufū te faitama ʼo Pati-Sepa, neʼe loi pea mo aga fakapō ia Tavite. Kae, neʼe ina ʼiloʼi ko te ʼAtua ʼe ina leleiʼia te moʼoni pea mo te maʼoniʼoni. ʼE ko he meʼa ʼaia ʼe tonu ke lave lelei anai ki tatatou ʼu aga, heʼe kapau ʼe tou aga fakapō, ʼe tauteaʼi anai tatou e Sehova (Tāʼaga Lea 3:32). Neʼe toe ʼiloʼi e Tavite, kapau ko te ʼAtua ʼe ina ‘fakamahino age te poto ʼe maʼa’, kia te ia, ko te hau fakahemala, ʼe feala anai tana muliʼi te ʼu lekula fakaʼatua ʼi tona maʼuli katoa.
17. Neʼe faka ʼuhiga feafeaʼi te faikole ʼaē ʼo ʼuhiga mo te fakamaʼa ʼaki te ʼakau ʼaē ko te isope?
17 ʼI te ʼiloʼi e te tagata fai pesalemo te maʼuhiga ʼa te tokoni ʼo te ʼAtua kia te ia moʼo tekeʼi ʼo tana ʼu holi ki te agahala, neʼe ina toe kole age: “Ke ke haga ʼo fakamaʼa ʼau ʼi te agahala ʼaki te isope, ke ʼau liliu ʼo maʼa! Ke ke fufulu ʼau, ke ʼau liliu ʼo hina age ʼi te nive!” (Pesalemo 51:7). Pea tahi ʼaē, ko te ʼakau ʼaē ko te isope (lagi ko te “marjolaine” peʼe ko te Origanum maru) neʼe fakaʼaogaʼi ʼi te ʼu fakamaʼa ʼo te kau kilia ʼi muʼa (Levitike 14:2-7). Koia ʼaē neʼe tau te kole ʼaē ʼa Tavite ke fakamaʼa tana agahala ʼaki te isope. Ko te fakamaʼa ʼe toe pipiki ki tana kole ʼaē ke haga ia Sehova ʼo fufulu ia ia ke liliu ʼo maʼa katoa, pea ke hihina age ʼi te nive ʼaē neʼe mole heʼeki fio mo he meʼa ʼuli peʼe ko he tahi age ʼotaʼota (Isaia 1:18). Kapau ʼe ʼi ai he tahi ia tatou ʼe mamahi tona leʼo ʼo loto ʼi hana ʼu agakovi, ke tou tui moʼoni kapau ʼe tou kumi ʼaki he aga fakahemala ke tou maʼu te fakamolemole ʼa te ʼAtua, ʼe feala ke ina fakamaʼa tatou ʼaki te totogi faka sakilifisio ʼo Sesu.
Ko te kole ke toe maʼu he fīmālie
18. Neʼe feafeaʼi te maʼuli ʼo Tavite ia muʼa ʼo tana fakahemala pea mo tana kofesioʼi tana ʼu agahala, pea ʼi te mahino ki te faʼahi ʼaia, ʼe feafeaʼi hana tokoniʼi tatou ʼi te temi nei?
18 Ko he kilisitiano neʼe kua tau mo he leʼo ʼo loto neʼe lākahala ʼe feala pe ke mahino ki te ʼu palalau ʼaenī ʼa Tavite: “Ke ke [Sehova] haga ʼo tuku mai te fiafia pea mo te nekenekea, koteʼuhi ke fīmālie te ʼu hui ʼaē neʼe ke haga ʼo malamalaki!” (Pesalemo 51:8). ʼI muʼa ʼo te fakahemala pea mo te kofesioʼi e Tavite tana ʼu agahala, ko tona leʼo ʼo loto hoha neʼe faka lotomamahiʼi tona loto. Neʼe mole kei na leleiʼia te ʼu hiva fakafiafia ʼa te kau tagata hiva faiva pea mo te kau tagata fai musika. ʼI te lahi ʼo tona lotomamahi ʼi tana mole maʼu ʼaē ʼo te tapuakina ʼa te ʼAtua neʼe hage ia ko he tagata neʼe malamalakiʼi ʼona ʼu hui. Neʼe ina fia maʼu te fakamolemole, tona mālohi fakalaumālie, pea ke ina maʼu mo te fiafia ʼaē neʼe nofo mo ia ʼi muʼa ʼo tana agahala. ʼO toe feiā aipe mo te temi nei ki te tagata agakovi ʼaē ʼe fakahemala ʼe ʼaoga kia ia te fakamolemole ʼa Sehova koteʼuhi ke ina maʼu te fiafia ʼaē neʼe nofo mo ia ia muʼa ʼo tana fai te meʼa ʼaē neʼe maumauʼi tana felogoi mo te ʼAtua. Ko te toe maʼu ʼo “te fiafia ʼo te laumālie maʼoniʼoni” ki he tahi ʼe fakahemala, ʼe ʼiloga ko Sehova neʼe fakamolemole kia te ia pea mo ʼofa kia te ia (1 Tesalonika 1:6). ʼE ko he fakafimālie!
19. Koteā te meʼa ʼe logoʼi anai e Tavite mo kapau ʼe molehi e te ʼAtua tana ʼu hāla fuli?
19 Neʼe kole e Tavite, ʼo fēnei: “Fakaū tou fofoga ʼi muʼa ʼo ʼaku ʼu agahala, pea ke ke molehi taku ʼu hāla fuli.” (Pesalemo 51:9). Neʼe mole ʼamanaki ia ko Sehova ʼe ina siviʼi tana agahala ʼaki te ʼofa. Koia ʼaē, neʼe ina kole ke fakaū tona ʼu fofoga ʼi muʼa ʼo ʼana ʼu agahala. Neʼe toe kole e te hau ke molehi e te ʼAtua tana ʼu talagataʼa fuli, ke ina molehi mo tana ʼu aga heʼe agatonu fuli. ʼOfa pe ke tokagaʼi e Sehova tana kole! ʼE ko he meʼa ʼe fakafimālie anai kia Tavite, pea mo toʼo anai ia te ia te leʼo ʼo loto hoha, pea mo ina ʼiloʼi ko te ʼAtua neʼe ina fakamolemoleʼi tana agahala.
Koteā te meʼa ʼe tonu ke tou fai mo kapau neʼe tou agahala?
20. Koteā te tokoni ʼe fai ki he kilisitiano neʼe ina fai he agahala mamafa?
20 ʼE fakahā ia Pesalemo 51 ko ʼaē pe ʼi te ʼu kaugana ʼa Sehova neʼe ina fai he agahala mamafa kae ʼe fakahemala, ʼe feala ke falala ʼo kole kia te ia tona ʼofa pea mo fakamaʼa ia ia mai tana agahala. Kapau ko koe ko he kilisitiano neʼe ke fai he hāla, he koʼe koa ʼe mole ke kumi te fakamolemole ʼa te Tāmai ʼe ʼi selo ʼo faikole ʼaki te agavaivai? Ke koutou ʼiloʼi ʼe ʼaoga kia koutou te tokoni ʼa te ʼAtua koteʼuhi ke koutou lelei ʼi ʼona muʼa, pea koutou kole kia te ia ke ina toe tuku atu te fiafia ʼaē neʼe koutou maʼu ʼi muʼa. Ko te kau kilisitiano loto fakahemala ʼe lava tanatou maʼu te falala ʼaenī ʼo faikole kia Sehova, koteʼuhi “heʼe fakamolemole lahi anai ia”. (Isaia 55:7; Pesalemo 103:10-14.) ʼIo, ʼe tonu anai ke nātou pāuiʼi te ʼu tagata ʼāfea ʼo te kokelekasio koteʼuhi ʼe feala hanatou tuku he tokoni fakalaumālie ʼe ʼaoga kia nātou. — Sake 5:13-15.
21. Koteā anai ka tou vakaʼi ʼi te alatike ka hoa mai?
21 Ko te manavaʼofa ʼo Sehova ʼe ina hāofaki tana hahaʼi mai te heʼeʼamanaki. Kae tou vakaʼi ʼihi ʼu faikole fakamalotoloto ʼa Tavite ʼo tana fakahemala ʼi te Pesalemo 51. ʼE fakahā anai e te alatike ka hoa mai ko Sehova ʼe mole ina meʼa noaʼi ia ia ʼaē ʼe loto lavea.
ʼE feafeaʼi anai hakotou tali?
◻ Koteā te meʼa ʼe hoko ki he kaugana ʼa Sehova neʼe agahala mamafa?
◻ Koteā te meʼa neʼe hoko kia Tavite ʼi tana fia fufū tana agahala?
◻ He koʼe koa neʼe ʼui e Tavite neʼe agahala ki te ʼAtua tokotahi pe?
◻ Logope la te haga ʼaē ʼa te ʼAtua ʼo tokagaʼi te ʼu ʼaluʼaga, koteā te meʼa ʼe mole tonu anai ke tou fai?
◻ Koteā anai te meʼa ʼe tonu ke fai ʼe he kilisitiano mo kapau neʼe ina fai he agahala mamafa?