Tou Taupau Totatou ʼUhiga Kilisitiano
“ ‘Ko koutou ko taku kau fakamoʼoni’ ko te ʼui ʼaia ʼa Sehova.”—Isaia 43:10.
1. Ko te ʼu faʼahiga hahaʼi fea ʼaē ʼe taki e Sehova kiā te ia?
KA KOUTOU ʼolo ki te Fale ʼo Te Puleʼaga, koutou vakaʼi fakalelei ia nātou ʼaē ʼi ʼokotou tafa. Ko ai ʼaē ʼe koutou sio ki ai ʼi te fale tauhi ʼaia? ʼE koutou sio ki ni kau tūpulaga fakamalotoloto ʼe nātou mulimuli fakalelei ki te poto ʼaē ʼe haʼu mai te Tohi-Tapu. (Pesalemo 148:12, 13) Pea ʼe koutou toe sio ki ni ʼu pule famili ʼe nātou faiga ke nātou fakafiafia te ʼAtua logola ʼe tou maʼuʼuli ʼi te malamanei kua mavetevete ai te famili. Peʼe lagi koutou sio ki ni kau mātutuʼa, ʼe nātou fakahoko agatonu tanatou fakapapau kiā Sehova, logola tanatou māhahaki ʼuhi ko tanatou kua mātutuʼa. (Tāʼaga Lea 16:31) Ko nātou fuli ʼaia ʼe nātou ʼoʼofa fakamalotoloto kiā Sehova. Pea ʼe fia felogoi ia Sehova mo nātou. Koia ʼaē neʼe ʼui fēnei ai e te ʼAlo ʼo te ʼAtua: “E mole feala ki he tahi ke haù kia te au, kapau e mole taki mai ia kia te au e te Tamai ae nee ina fekaui mai au.”—Soane 6:37, 44, 65.
2, 3. He koʼe ʼe feala ke faigataʼa tatatou taupau mālohi totatou ʼuhiga Kilisitiano?
2 ʼE mole tou fiafia koa ʼi tatatou kau ki te hahaʼi ʼaē ʼe ʼofa ki ai ia Sehova pea mo ina tapuakina nātou? Kae ʼe faigataʼa te taupau ʼo totatou ʼuhiga Kilisitiano ʼi te ʼu “temi faigataa” ʼaenī. (2 Timoteo 3:1) ʼE moʼoni te manatu ʼaia, tāfito ʼo ʼuhiga mo te kau tūpulaga ʼaē neʼe lalahi ake ʼi he loto fale Kilisitiano. Neʼe ʼui fēnei e te tūpulaga: “Logola neʼe au kau ki te ʼu fono, kae neʼe mole au fai haku ʼu fakatuʼutuʼu fakalaumālie, pea ʼi tona fakahagatonu, neʼe mole au fia tauhi kiā Sehova.”
3 Ko ʼihi, logola tanatou fia tauhi moʼoni kiā Sehova, kae ʼe lagi fakahalaʼi nātou e tonatou ʼu kaumeʼa, mo te malamanei, pea mo tonatou ʼu holi ki te ʼu meʼa ʼaē ʼe kovi. Ka lahi te ʼu fakahala ʼaia, pea ʼe feala ke tou galoʼi māmālie ai totatou ʼuhiga Kilisitiano. Ohage la, ia ʼaho nei tokolahi ʼi te malamanei ʼe nātou manatu ko te ʼu lekula ʼa te Tohi-Tapu ʼo ʼuhiga mo te aga ʼaē ʼe tonu ke fai, kua ʼāfea ia pea ʼe mole ʼalutahi ia mo totatou temi. (1 Petelo 4:4) ʼE manatu e ʼihi ʼe mole maʼuhiga te tauhi ki te ʼAtua ʼo mulimuli ki te faʼahiga tauhi ʼaē ʼe ina fakahā mai. (Soane 4:24) ʼI tana tohi ki te kau Efeso, ʼe talanoa Paulo ʼo ʼuhiga mo te “laumalie” ʼo te malamanei, peʼe ko te manatu ʼaē ʼe maʼu e te hahaʼi tokolahi. (Efeso 2:2) ʼE fakaneke e te laumālie ʼaia te hahaʼi ke nātou mulimuli ki te manatu ʼo he sosiete ʼe mole ina ʼiloʼi ia Sehova.
4. Neʼe fakahā lelei feafeaʼi e Sesu te maʼuhiga ʼaē ke tou taupau totatou ʼuhiga Kilisitiano?
4 Kae, ʼi totatou ʼuhiga kaugana ʼo Sehova, ʼe tou ʼiloʼi ʼe feala ke fua kovi kiā tatou fuli—tūpulaga peʼe mātutuʼa—mo kapau ʼe tou galoʼi totatou ʼuhiga Kilisitiano. Ko te manatu ʼaē ʼe totonu ʼo ʼuhiga mo totatou ʼuhiga Kilisitiano, ʼe fakatafito ʼāteaina pe ki te ʼu lekula ʼa Sehova pea mo te ʼu meʼa ʼaē ʼe ina fakamaʼua mai. ʼE tonu ke tou fai ia te faʼahi ʼaia he neʼe ina faʼu tatou ki tona pāki. (Senesi 1:26; Mikea 6:8) ʼE fakatatau e te Tohi-Tapu totatou ʼuhiga Kilisitiano ki hotatou ʼu teu, ʼe tou kofuʼi ke sio kiai te hahaʼi fuli. ʼO ʼuhiga mo totatou temi, neʼe fakatokagaʼi fēnei tatou e Sesu: “Koeni, e au haele mai o hage he tagata kaihaa. Manuia ae e alaʼala pea e ina taupau ona teu, ke aua naa alu telefua pea mo fakaha tona ufiufi.”a (Apokalipesi 16:15) ʼE mole tou fia līaki tatatou ʼu kalitātē faka Kilisitiano pea mo tatatou ʼu lekula māʼoluga ʼo ʼuhiga mo te aga ʼaē ʼe tonu ke fai, kae tou mulimuli tatou ki te ʼu manatu ʼo te mālama ʼa Satana. Kapau ʼe hoko te faʼahi ʼaia, pea ʼe tou pulihi anai totatou ʼu faʼahiga “teu” ʼaia. ʼE ko he ʼaluʼaga fakaʼofaʼofa anai pea mo fakaufiufi.
5, 6. He koʼe ʼe maʼuhiga ke ʼaua naʼa tou lotolotolua?
5 Ka manatuʼi e he tahi tona ʼuhiga Kilisitiano pea ʼe feala ke ina fai he ʼu fetogi lalahi ʼi tona maʼuli. ʼO feafeaʼi? Kapau ko he tahi ʼe ʼatolasio kiā Sehova ʼe ina galoʼi tona ʼuhiga Kilisitiano, pea ʼe feala ke hēʼia, ʼo mole ina fai hana ʼu fakatuʼutuʼu lelei. ʼE lahi te ʼu fakatokaga ʼe fai mai ʼi te Tohi-Tapu ʼo ʼuhiga mo te lotolotolua. Neʼe ʼui fēnei e te tisipulo ko Sakopo: “Ko ae e lotolotolua, e hage ia ko te galu o te moana e lagai e te matagi o fakahou. Pea [ʼaua] naa amanaki [e] te tagata aia e ina tali anai he mea mai te Aliki: ko he tagata e lotolotolua pea e lotomaveu i ana gaue fuape.”—Sakopo 1:6-8; Efeso 4:14; Hepeleo 13:9.
6 ʼE tou lava taupau feafeaʼi totatou ʼuhiga Kilisitiano? Koteā ʼaē ka tokoni kiā tatou ke tou manatuʼi tatatou pilivilesio lahi ʼaē ke tou ʼatolasio ki te Māʼoluga? Tou vakaʼi te ʼu manatu ʼaē ʼe hoa mai.
Koutou Taupau Mālohi Tokotou ʼUhiga Kilisitiano
7. He koʼe ʼe fua lelei kiā tatou hatatou kole ke sivisivi tatou e Sehova?
7 Koutou tokaga ke mālohi tuʼumaʼu takotou ʼu felogoi mo Sehova. Ko te meʼa maʼuhiga ʼaē ʼe maʼu e he Kilisitiano ʼe ko tana ʼu felogoi mo te ʼAtua. (Pesalemo 25:14; Tāʼaga Lea 3:32) Kapau ʼe tou kamata lotolotolua ʼo ʼuhiga mo totatou ʼuhiga Kilisitiano, pea ʼe tonu ke tou vakavakaʼi fakalelei peʼe lelei pea mo loloto tatatou ʼu felogoi mo te ʼAtua. Koia, neʼe kole fēnei e te tagata fai pesalemo: “Sivi au, Ê Sehova, pea ke ke ʼahiʼahi au; fakamaʼa toku ʼu ifiifi pea mo toku loto.” (Pesalemo 26:2) He koʼe ʼe maʼuhiga te fai ʼo he sivisivi feiā? Koteʼuhi ʼe mole feala ke tou falala kiā tatou totonu, ki te ʼu meʼa ʼaē ʼe ʼi totatou loto pea mo te ʼu meʼa ʼaē ʼe tou holi kiai. ʼE ko Sehova tokotahi pe ʼaē ʼe feala ke mahino ki totatou ʼuhiga moʼoni—ki te ʼu meʼa ʼaē ʼe ina uga tatou, tatatou ʼu manatu pea mo te ʼu meʼa ʼaē ʼi totatou loto.—Selemia 17:9, 10.
8. (a) He koʼe ʼe fua lelei kiā tatou mo kapau ʼe ʼahiʼahiʼi tatou e Sehova? (b) Koteā ʼaē ʼe tokoni kiā tatou ke tou tuputupu ʼi totatou ʼuhiga Kilisitiano?
8 Kapau ʼe tou kole kiā Sehova ke ina sivisivi tatou, pea ʼe tou fakaafe ia ia ke ina ʼahiʼahiʼi tatou. ʼE feala ke ina tuku ke hoko ni ʼu ʼaluʼaga ke hā ai te ʼu meʼa moʼoni ʼaē ʼi totatou loto. (Hepeleo 4:12, 13; Sakopo 1:22-25) ʼE tonu ke tou tali te ʼu ʼahiʼahi ʼaia heʼe tou maʼu ai te faigamālie ke tou fakahā tatatou agatonu lahi ʼaē kiā Sehova. ʼE feala ke hā ai peʼe tou “kātoa pea mo haohaoa ia faʼahi fuli, ʼo mole puli ia [tatou] he meʼa.” (Sakopo 1:2-4, MN ) Pea ka ʼahiʼahiʼi tatou, ʼe tou tuputupu ai ʼi te faʼahi fakalaumālie.—Efeso 4:22-24.
9. Koutou fakamahino pe koʼe ʼe maʼuhiga ke tou tui papau ki te moʼoni ʼa te Tohi-Tapu.
9 Koutou tui papau ki te moʼoni ʼa te Tohi-Tapu. ʼE feala ke galo kiā tatou totatou ʼuhiga kaugana ʼa Sehova, mo kapau ʼe mole fakatafito mālohi ki te ʼatamai mālama ʼo te Tohi-Tapu. (Filipe 1:9, 10) Ko te kau Kilisitiano fuli—nātou tūpulaga pea mo nātou lalahi—ʼe tonu ke nātou ʼiloʼi papau ko te meʼa ʼaē ʼe nātou tui kiai ʼe ko te moʼoni ʼaē ʼe tuʼu ʼi te Tohi-Tapu. Neʼe fakaloto mālohiʼi fēnei e Paulo te kau Kilisitiano: “Koutou vakaʼi peʼe moʼoni ia meʼa fuli; koutou haga puke maʼu te meʼa ʼaē ʼe lelei.” (1 Tesalonika 5:21, MN ) Ko te kau tūpulaga ʼaē ʼe māʼuʼuli ʼi he loto fale Kilisitiano, ʼe tonu ke mahino kiā nātou ʼe mole feala ke nātou mulimuli pe ki te tui ʼo tanatou ʼu mātuʼa. Ko Salomone, neʼe fakaloto mālohi ia ia e Tavite, tana tāmai, ke ina fai te faʼahi ʼaenī: “Ke ke ʼiloʼi te ʼAtua ʼo tau tāmai pea mo ke tauhi kiā te ia ʼaki he loto kātoa.” (1 Fakamatala 28:9) Neʼe mole feʼauga pe ki te tūpulaga ko Salomone ke ina sioʼi peʼe koteā ʼaē neʼe fai e tana tāmai ʼo ʼuhiga mo tana tui kiā Sehova. Neʼe tonu ke ina ʼiloʼi e ia totonu ia Sehova, pea neʼe ina fai ia te faʼahi ʼaia. Neʼe ina kolekole fēnei ki te ʼAtua: “ ʼI te temi nei, foaki mai te poto pea mo te ʼatamai mālama ke feala haku hū kiā muʼa ʼo te hahaʼi ʼaenī pea mo feala ke au liliu.”—2 Fakamatala 1:10.
10. He koʼe ʼe mole kovi tatatou fai he ʼu fehuʼi ʼaki he ʼu manatu ʼe lelei?
10 ʼE mālohi tatatou tui mo kapau ʼe fakatafito ki te ʼatamai mālama. Neʼe ʼui fēnei e Paulo: “E tupu te tui mai te fagono.” (Loma 10:17) Koteā tona faka ʼuhiga? Ko tona faka ʼuhiga ʼaē, ʼaki tatatou lau te Folafola ʼa te ʼAtua, ʼe mālohi ai tatatou tui pea mo tatatou falala kiā Sehova, mo tana ʼu fakapapau, pea mo tana kautahi. Ko te fai ʼo he ʼu fehuʼi fakahagatonu ʼo ʼuhiga mo te Tohi-Tapu ʼe feala ke tou maʼu ai he ʼu tali lelei. Pea ia Loma 12:2, ʼe tokoni fēnei mai e Paulo: “Koutou iloi, pe kotea te finegalo o te Atua, te mea e lelei mo taau mo ia pea mo te mea ae e katoa.” Kae ʼe tou lava fakahoko feafeaʼi te faʼahi ʼaia? ʼE lavaʼi ia te faʼahi ʼaia ʼaki ia “te ʼatamai mālama totonu ʼo te moʼoni.” (Tito 1:1, MN ) Ko te laumālie ʼo Sehova ʼe lava tokoni mai ke tou mahino ki te ʼu manatu ʼaē ʼe faigataʼa. (1 Kolonito 2:11, 12) ʼE tonu ke tou kole ki te ʼAtua ke tokoni mai mokā mole tou faʼa mahino lelei ki he faʼahi. (Pesalemo 119:10 ,11, 27) ʼE loto e Sehova ke tou mahino ki tana Folafola, ke tou tui kiai, pea mo fakalogo kiai. ʼE ina tali te ʼu fehuʼi ʼaē ʼe tou fai ʼaki he ʼu manatu ʼe lelei.
Tou Faiga Mālohi Ke Tou Fakafiafia Ia Te ʼAtua
11. (a) Koteā te holi ʼe tou maʼu fuli ʼe feala ke liliu ko he hele? (b) ʼE tou lava maʼu feafeaʼi te mālohi moʼo tauʼi te fakaneke ʼa te ʼu kaumeʼa?
11 Koutou faiga ke koutou fakafiafia te ʼAtua, kae mole ko te tagata. Ko tatou fuli ʼe tou fia fakatahi mo he kūtuga. ʼE ʼaoga kiā tatou fuli he ʼu kaumeʼa, pea ʼe tou fiafia mokā tali tatou ʼi he kūtuga. ʼI te temi tūpulaga—pea ki muli age—ʼe mālohi ai te fakaneke ʼa te ʼu kaumeʼa, pea ʼe tou loto ai ke tou faʼifaʼitaki ki ʼihi pea mo tou fia lelei kiā nātou. Kae ʼe mole kumi tuʼumaʼu pe e totatou ʼu kaumeʼa te ʼu meʼa ʼaē ʼe lelei kiā tatou. ʼI ʼihi temi ʼe nātou loto pe ke fakatahi niʼihi mo nātou moʼo fai te meʼa ʼaē ʼe kovi. (Tāʼaga Lea 1:11-19) Ka mulimuli he Kilisitiano ki te fakaneke ʼo tona ʼu kaumeʼa, pea ʼi te agamāhani ʼe ina galoʼi tona ʼuhiga Kilisitiano. (Pesalemo 26:4) Neʼe fai te fakatokaga ʼaenī e te ʼapositolo ko Paulo: “Koutou fakagata takotou muliʼi te tuʼu ʼo te ʼu faʼahiga meʼa ʼaenī.” (Loma 12:2, MN ) ʼE foaki mai e Sehova te mālohi ʼaē ʼe ʼaoga kiā tatou ke tou tauʼi ai te fakaneke ʼaē ke tou fai ohage ko te hahaʼi fuli.—Hepeleo 13:6.
12. Koteā te pelesepeto pea mo te faʼifaʼitaki ʼaē ʼe ina fakaloto mālohiʼi tatatou tui ki te ʼAtua?
12 Kapau ʼe feala ke tou galoʼi totatou ʼuhiga Kilisitiano ʼuhi ko te fakaneke ʼa te hahaʼi, pea ʼe lelei ke tou manatuʼi ko tatatou agatonu ki te ʼAtua ʼe maʼuhiga ʼaupito age ʼi te manatu ʼa te hahaʼi peʼe ko te aga ʼa te tokolahi. Ko te vaega ʼo Ekesote 23:2, ʼe ko he pelesepeto ʼe feala ke ina hāofaki tatou. ʼE tou lau fēnei ai: “ ʼAua naʼa ke muliʼi te hahaʼi ʼi he ʼu fakatuʼutuʼu kovi.” Neʼe tokolahi te kau Iselaele neʼe nātou lotolotolua ki te lava fakahoko e Sehova Tana ʼu fakapapau, kae ko Kalepe neʼe fakafisi mālohi ke ina mulimuli ki te hahaʼi tokolahi ʼaia. Neʼe tui papau ia ʼe feala hana falala ki te ʼu fakapapau ʼa te ʼAtua, pea neʼe lahi tana fakapale. (Faka au 13:30; Sosue 14:6-11) ʼE koutou loto koa mo koutou ke koutou fakafeagai ki te manatu ʼaē ʼe maʼu e te tokolahi, ke feala ai hakotou hāofaki takotou ʼu felogoi mo te ʼAtua?
13. He koʼe ʼe ko he aga fakapotopoto te fakahā ʼaē ko tatou ko te kau Kilisitiano?
13 Koutou fakahā ko koutou ko he kau Kilisitiano. Ko te fakahā ʼo totatou ʼuhiga Kilisitiano ʼe ko he faʼahi ʼe lelei ʼaupito moʼo hāofaki ʼo tatou. ʼI te temi ʼaē neʼe felāveʼi ai te kau Iselaele agatonu mo te ʼu fakafeagai ʼaē ke nātou fakahoko te finegalo ʼo Sehova ʼi te temi ʼo Esitalasi, neʼe nātou ʼui fēnei: “Ko mātou ko te ʼu kaugana ʼo te ʼAtua ʼo te lagi pea mo te kele.” (Esitalasi 5:11) Kapau ʼe tou mātataku ki te aga pea mo te valoki ʼo te hahaʼi agakovi, pea ʼe mole tou toe fai anai he meʼa. Ko tatatou fia lelei ki te hahaʼi fuli ʼe mole fua lelei anai kiā tatou. Koia, ʼaua naʼa tou mātataku. ʼE tonu ke koutou fakahā lelei tuʼumaʼu ki te hahaʼi ko koutou ko te Fakamoʼoni ʼa Sehova. ʼAki he aga fakaʼapaʼapa pea mo he loto mālohi, ʼe feala ke koutou fakamahino ki ʼihi te ʼu meʼa ʼaē ʼe maʼuhiga kiā koutou, takotou tui, pea mo tokotou ʼaluʼaga faka Kilisitiano. ʼE tonu ke ʼiloʼi e te hahaʼi takotou loto moʼoni ʼaē ke koutou taupau te ʼu lekula māʼoluga ʼa Sehova ʼo ʼuhiga mo te aga ʼaē ʼe tonu ke fai. Koutou fakahā lelei ʼe maʼuhiga kiā koutou tokotou ʼuhiga Kilisitiano. Koutou fakahā ʼe koutou fiafia ʼi takotou mulimuli ki te ʼu lekula ʼo te aga ʼaē ʼe maʼa. (Pesalemo 64:10) Kapau ʼe koutou fakahā ko koutou ko ni ʼu Kilisitiano pea ʼe koutou maʼu ai anai te mālohi, ʼaē ko he puipuiʼaga kiā koutou pea ʼe lagi uga ai anai ʼihi ke nātou fia ʼiloʼi ia Sehova pea mo tana hahaʼi.
14. ʼE tonu koa ke tou lotovaivai mokā manukiʼi peʼe fakafeagai mai te hahaʼi? Koutou fakamahino.
14 Ei, ʼe feala ke manukiʼi koutou e ʼihi peʼe nātou fakafeagai atu. (Suta 18) ʼAua naʼa koutou lotovaivai mo kapau ʼe mole tali lelei e ʼihi takotou ʼu faiga ʼaē ke koutou fakamahino age takotou tui. (Esekiele 3:7, 8) Tatau aipe peʼe koutou loto moʼoni kiai, kae ʼe mole feala anai ke koutou fakalotoʼi te hahaʼi ʼaē ʼe mole nātou loto kiai. Koutou manatuʼi ia Falaone. Logola te ʼu tautea peʼe ko te ʼu milakulo ʼaē neʼe hoko, ʼo kaku ai mo te mate ʼo tona ʼuluaki foha, kae neʼe mole tui ia ko Moisese neʼe ina fakafofoga ia Sehova. Koia ʼaua naʼa koutou tuku te mataku ki te tagata ke ina tāʼofi koutou. Ko te falala pea mo te tui ki te ʼAtua ʼe lava tokoni atu ke koutou tauʼi takotou mataku.—Tāʼaga Lea 3:5, 6; 29:25.
Koutou Faʼufaʼu Tokotou Ka Haʼu
15, 16. (a) Koteā totatou tofiʼa fakalaumālie? (b) ʼE fua lelei feafeaʼi kiā tatou tatatou fakakaukauʼi totatou tofiʼa fakalaumālie ʼaki te Folafola ʼa te ʼAtua?
15 Koutou faka maʼuhigaʼi tokotou tofiʼa fakalaumālie. ʼE maʼu anai e te kau Kilisitiano he ʼu fua lelei mo kapau ʼe nātou metitasioʼi ʼaki te Tohi-Tapu ki tonatou tofiʼa lahi fakalaumālie. ʼE kau ki te tofiʼa ʼaia te moʼoni ʼo te Folafola ʼa Sehova, te ʼamanaki ʼo te maʼuli heʼegata, pea mo te pilivilesio ʼaē ʼe tou maʼu ke tou fakafofoga te ʼAtua ʼi tatatou tala te logo lelei. ʼE koutou gāue koa mo te kau Fakamoʼoni, te kūtuga maʼuhiga ʼaē neʼe tuku age kiā nātou ia te gāue ʼaē ko te faka mafola ʼo te Puleʼaga, ʼaē ʼe ina hāofaki te maʼuli ʼo te hahaʼi? Koutou manatuʼi ʼe ko Sehova totonu ʼaē ʼe ina ʼui fēnei: “Ko koutou ko taku kau fakamoʼoni.”—Isaia 43:10.
16 ʼE feala ke koutou fai te ʼu fehuʼi ʼaenī: ‘ ʼE au faka maʼuhigaʼi koa te tofiʼa fakalaumālie ʼaia? ʼE au faka maʼuhigaʼi koa ʼo au fakamuʼamuʼa ʼi toku maʼuli ia te fakahoko ʼo te finegalo ʼo te ʼAtua? ʼE au leleiʼia lahi koa toku tofiʼa, ke feala haku tekeʼi te ʼu fakahala ʼaē ʼe feala ke nātou faka pulinoa toku tofiʼa ʼaia?’ Tahi ʼaē meʼa, ko totatou tofiʼa fakalaumālie ʼe ina foaki mai he fīmālie fakalaumālie ʼe mole maʼu ʼi he tahi kautahi, gata pe ki te kautahi ʼa Sehova. (Pesalemo 91:1, 2) Kapau ʼe tou toe vakaʼi te ʼu meʼa fakaofoofo ʼaē neʼe hoko ʼi te hisitolia ʼa te kautahi ʼa Sehova ʼi totatou temi, pea ʼe tou tui papau anai ʼe mole he tahi peʼe ko he meʼa ʼe feala ke ina pulihi te hahaʼi ʼa Sehova ʼi te kele.—Isaia 54:17; Selemia 1:19.
17. Koteā te tahi meʼa ʼaē ʼe ʼaoga kehe age ʼi te falala pe ki totatou tofiʼa fakalaumālie?
17 Kae ko totatou maʼuli, ʼe fakalogo pe ki totatou tofiʼa fakalaumālie. ʼE tonu kiā tatou takitokotahi ke tou fakatuputupu he ʼu felogoi lelei mo te ʼAtua. ʼI te ʼosi gāue kinakina ʼa Paulo moʼo fakamālohiʼi te tui ʼa te kau Kilisitiano ʼi Filipe, neʼe ina tohi fēnei kiā nātou: “Koia, oku ofaʼaga, o hagepe ko tautou fakalogo nee koutou fai tuumau, e mole gatape mo te temi e au nofo ai ia koutou, kae tafito moka e au puli, koutou faigai toutou haofaki i te mataku mo te tuania.” (Filipe 2:12) ʼE ko Sehova tokotahi pe ʼaē ʼe fakalogo ki ai totatou hāofaki.
18. ʼE mālohi feafeaʼi totatou ʼuhiga Kilisitiano mokā tou kau ki te ʼu gāue faka Kilisitiano?
18 Koutou kau mālohi ki te ʼu gāue faka Kilisitiano. Neʼe ʼui fēnei “ ʼe ʼiloga he tahi ʼi tana ʼu gāue.” Neʼe fakatotonu ki te kau Kilisitiano ia ʼaho nei ke nātou fakahoko te gāue maʼuhiga ʼaē ko te faka mafola ʼo te logo lelei ʼo te Puleʼaga ʼa te ʼAtua ʼaē kua fakatuʼu. Neʼe ʼui fēnei e Paulo: “Mai tona ʼaluʼaga ʼaē ko au ko te ʼapositolo moʼoni ʼo te ʼu puleʼaga, ʼe au faka kolōliaʼi taku minisitelio.” (Loma 11:13, MN ) ʼI tatatou kau ki te gāue fai faka mafola, ʼe tou makehe ai mai te malamanei, pea ko tatatou kau kiai ʼe ina faka mālohi ai totatou ʼuhiga Kilisitiano. Ko tatatou kau mālohi ki te ʼu gāue ʼo te kokelekasio, ohage ko te ʼu fono, mo te ʼu polokalama laga ʼo te ʼu fale tauhi, tatatou ʼu gāue moʼo tokoni kiā nātou ʼaē ʼe nonofo ʼi te faigataʼaʼia, pea mo te tahi atu ʼu gāue, ʼe feala ke fakaloloto ai totatou ʼuhiga Kilisitiano.—Kalate 6:9, 10; Hepeleo 10:23, 24.
He ʼu Tapuakina Heʼe Tou Taupau Lelei Totatou ʼUhiga Kilisitiano
19, 20. (a) Koteā te ʼu lelei ʼe koutou maʼu ʼi tokotou ʼuhiga Kilisitiano? (b) Koteā ʼaē ʼe ina foaki mai he fakatafito ki totatou ʼuhiga moʼoni?
19 Tou toʼo muʼa he temi moʼo vakaʼi teʼu tapuakina pea mo te ʼu lelei ʼaē ʼe tou maʼu heʼe ko tatou ko te kau Kilisitiano moʼoni. ʼE tou maʼu te pilivilesio ʼaē ke ʼiloʼi e Sehova ia tatou takitokotahi. Neʼe ʼui fēnei e te polofeta ko Malakia: “Ko nātou ʼaē ʼe manavasiʼi kiā Sehova neʼe nātou fefaipalalauʼaki, ʼo tahi fai palalau mo tona kaumeʼa, pea neʼe tokagaʼi e Sehova pea mo fakalogo. Pea neʼe ʼi ai te tohi fakamanatu neʼe kamata tohi ʼi ʼona muʼa maʼa nātou ʼaē ʼe manavasiʼi kiā Sehova pea mo nātou ʼaē ʼe nātou manatuʼi tona huafa.” (Malakia 3:16) ʼE feala ke tou liliu ko he ʼu kaumeʼa ʼo te ʼAtua. (Sakopo 2:23) ʼE tou maʼu ai he fakatuʼutuʼu ki totatou maʼuli, mo hona faka ʼuhiga pea ʼe tou fai ai he ʼu gāue ʼe lelei pea mo fua lelei. Pea neʼe foaki mai te ʼamanaki ʼaē ʼo he ka haʼu heʼegata.—Pesalemo 37:9.
20 Koutou manatuʼi ko tokotou ʼuhiga moʼoni pea mo tokotou maʼuhiga, ʼe fakalogo ki te manatu ʼa te ʼAtua ʼaē ʼe tāu mo feʼauga ke koutou falala ki ai, kae mole ko te manatu ʼa te hahaʼi. ʼE feala ke fakamāuʼi tatou e ʼihi ʼo mulimuli ki he ʼu lekula fakatagata ʼe mole lelei. Kae ko te ʼofa ʼo te ʼAtua pea mo tana tokaga kiā tatou ʼaē ʼe ina foaki mai he fakatafito moʼoni ke tāu mo tatou ke tou liliu ko hana hahaʼi. (Mateo 10:29-31) Pea ko totatou ʼofa ki te ʼAtua ʼe lava tokoni mai ke tou faka maʼuhigaʼi totatou ʼuhiga Kilisitiano pea mo tou maʼu he takitaki lelei ki totatou maʼuli. “Kapau ko he tahi e ofa ki te Atua, e iloi e te Atua iaʼia.”—1 Kolonito 8:3.
[Kiʼi nota]
a Ko te ʼu palalau ʼaia ʼe faka ʼuhiga ki te ʼu gāue neʼe fai e te ofisie ʼo te fale lotu ʼi te moʼuga ʼo Selusalemi. Lolotoga te ʼu po leʼo, neʼe ina foli te fale lotu moʼo vakaʼi peʼe kei ʼalaʼala te kau tagata leʼo Levite peʼe kua nātou tūlemomoe. Ko he tagata leʼo neʼe maʼu atu kua māʼumoea, ʼe tā ʼaki te koga ʼakau, pea ʼe fai te fakatūʼa fakaufiufi kiā ia, ʼo tutu tona ʼu teu.
ʼE Kei Koutou Manatuʼi Koa?
• He koʼe ʼe maʼuhiga ki te kau Kilisitiano ke nātou taupau tonatou ʼuhiga Kilisitiano?
• Koteā ʼaē ʼe ʼaoga ke mālohi ai totatou ʼuhiga Kilisitiano?
• ʼO ʼuhiga mo te fehuʼi ʼaē pe tou fia lelei kiā ai, ko te ʼu faʼahi fea ʼaē ka tokoni mai ke tou fai he tonu ʼe lelei?
• ʼE feafeaʼi anai totatou ka haʼu mo kapau ʼe tou taupau totatou ʼuhiga Kilisitiano?
[Paki ʼo te pasina 21]
Ko tatatou kau mālohi ki te ʼu gāue faka Kilisitiano ʼe feala ke ina fakamālohiʼi totatou ʼuhiga Kilisitiano