ʼE Maʼuli Te Folafola ʼa Sehova
Ko He ʼu Puani ʼAoga ʼo Te Tohi Ki Te Kau Loma
ʼI TE taʼu 56 ʼo totatou temi, ʼi tana tolu fai folau fakamisionea, neʼe tau atu ia te ʼapositolo ko Paulo ki te kolo ʼo Kolonito. Neʼe mahino ki te kehekehe ʼo te ʼu faʼahiga manatu ʼa te kau Sutea pea mo te kau Senitile Kilisitiano ʼo Loma. ʼI tana loto ʼaē ke ina ʼaumai ia nātou fuli ke natou logotahi iā Kilisito, neʼe fakatuʼutuʼu ai e Paulo ke ina fai ia he tohi kiā nātou.
ʼI tana tohi ki te kau Loma, neʼe fakamahino ai e Paulo peʼe feafeaʼi ʼo he tala ʼe faitotonu ia te tagata pea mo te faʼahiga hahaʼi feafeaʼi ʼaē ʼe tonu ke māʼuʼuli. ʼI te tohi ʼaia, ʼe ina hikihiki ai ia totatou ʼatamai mālama ʼo ʼuhiga mo te ʼAtua pea mo tana Folafola, mo fakamaʼuhigaʼi ia te ʼofa makehe ʼo te ʼAtua, pea mo fakavikiviki ki te gāue ʼa Kilisito ki totatou fakamaʼuli.—Hep. 4:12.
ʼE TALA AI KO NĀTOU KO TE KAU FAITOTONU—ʼO FEAFEAʼI?
Neʼe tohi fēnei e Paulo: “Ko tātou fuli neʼe tou agahala pea mole tou aʼu ki te kolōlia ʼo te ʼAtua . . . ʼe ko he meʼa ʼofa ʼe mole totogi ʼaē ʼe tala ai ko nātou ko te kau faitotonu ʼaki [te] ʼofa makehe [ʼo te ʼAtua], ʼuhi ko te fakaʼāteaina ʼaē neʼe totogi e Kilisito Sesu.” Neʼe toe ʼui foki e Paulo: “Ko he tagata ʼe faitotonu ʼaki te tui, ʼo kehe ia mo te ʼu gāue ʼaē ʼo te lao.” (Loma 3:23, 24, 28) ʼAki tanatou tui ki “he gāue faitotonu e tahi,” ko te kau Kilisitiano fakanofo pea mo nātou ʼo “te toe hahaʼi tokolahi” ʼo “te tahi ʼu ovi” ʼe feala ke ‘tala ai ko nātou ko te kau faitotonu’—ki te kau Kilisitiano fakanofo ko te maʼuli ʼi te lagi, ʼo kaugā tofiʼa mo Kilisito pea ki te toe hahaʼi tokolahi ʼi tonatou ʼuhiga kaumeʼa ʼo te ʼAtua, ʼaki te ʼamanaki ʼaē ko te fakalaka maʼuli ʼi “te mamahi lahi.”—Loma 5:18; Fakh. 7:9, 14; Soa. 10:16; Sake 2:21-24; Mat. 25:46.
Neʼe fehuʼi fēnei age e Paulo: “ ʼE tou haga fai koa te agahala he mole tou ʼi te lao kae ʼi te ʼofa makehe?” Neʼe ina tali fēnei: “Ke mole hoko ʼi he temi he meʼa fēia!” Neʼe fakamahino fēnei e Paulo: “Ko koutou ko te hahaʼi kaugana . . . , pe ko te agahala ʼaē ʼe ina taki ki te mate, peʼe ki te fakalogo ʼaē ʼe ina taki ki te faitotonu.” (Loma 6:15, 16) Neʼe ina ʼui fēnei: “Kapau ʼaki te laumālie ʼe kotou tāmateʼi ia te ʼu gāue ʼo te sino, ʼe kotou māʼuʼuli anai.”—Loma 8:13.
Te ʼu Tali Ki Te ʼu Fehuʼi Fakatohi-tapu:
1:24-32—Ko te aga heʼeʼaoga ʼaē ʼe fakahā ʼi henī, ʼe fakaʼuhiga koa ki te kau Sutea peʼe ki te kau Senitile? Logolā ʼe feala ke fakaʼuhiga kiā nātou ʼaenī, kae neʼe talanoa tāfito ia Paulo ki te kau Iselaele ʼapositā ʼo te temi muʼa. Logopē lā neʼe natou ʼiloʼi ia te ʼu fakatotonu faitotonu ʼa te ʼAtua, kae “neʼe natou manatu ʼe mole lelei ia te tali ʼo te ʼAtua ʼi te ʼatamai mālama.” Ko te tupuʼaga lā ʼaia ʼo tonatou tautea.
3:24, 25—Peʼe feafeaʼi ki te “totogi [ʼa] Kilisito Sesu” hana ʼuʼufi ia “te ʼu agahala ʼaē neʼe fai ʼi te temi muʼa” ʼi muʼa ʼo te fakahoko ʼo te totogi? Ko te ʼuluaki lea fakapolofetā ʼo ʼuhiga mo te Mēsia, ʼaē ʼe tuʼu iā Senesi 3:15, neʼe ʼuluaki fakahoko ʼi te taʼu 33 ʼo totatou temi, ʼi te temi ʼaē neʼe puke ai ia Sesu ke matehi ʼi te pou fakamamahi. (Kal. 3:13, 16) Kae ʼi te temi ʼaē neʼe fakahā ai e Sehova ia te lea fakapolofetā ʼaia, neʼe kua hagē ia kiā ia neʼe kua huʼi ia te totogi, ke ʼaua naʼa ʼi ai he meʼa ʼe ina tāʼofi ia te ʼAtua ʼi te fakahoko ʼo tana fakatuʼutuʼu. Koia ʼo fakatafito ki te sākilifisio ʼa Sesu Kilisito ʼi te kā haʼu, neʼe feala ai kiā Sehova ke ina fakamolemole ia te ʼu agahala ʼo te hōloga ʼo Atama ʼaē neʼe natou tui ki te fakapapau ʼaia. Tahi ʼaē, ko te totogi ʼe ina fakafealagia ia te fakatuʼuake ʼo nātou ʼaē neʼe māʼuʼuli ʼi muʼa ʼo te temi ʼo te kau Kilisitiano.—Gāue 24:15.
6:3-5—Koteā ia te fakaʼuhiga ʼo te papitema iā Kilisito Sesu pea mo te papitema ʼi tona mate? ʼI te temi ʼaē neʼe fakanofo ai e Sehova ia te ʼu tisipulo ʼa Kilisito ʼaki ia te laumālie māʼoniʼoni, neʼe fakatahi nātou mo Sesu pea neʼe natou kau ki te kōkelekāsio ʼaē ko te sino ʼo Kilisito, pea ko ia te Pule. (1 Ko. 12:12, 13, 27; Kol. 1:18) Ko tanatou papitema ʼaia iā Kilisito Sesu. Ko te kau Kilisitiano fakanofo ʼe natou toe ‘papitema foki ʼi te mate ʼo Kilisito,’ ʼo natou maʼuli fakasākilifisio pea mo fakafisi ki tanatou ʼamanaki ki te maʼuli heʼegata ʼi te kele. Koia ko tanatou mamate, ʼe ko he mate fakasākilifisio ia, ohagē ko te mate ʼa Sesu, logolā tanatou mamate, kae ʼe mole ʼi ai hona ʼuhiga ki te totogi. Ko tanatou papitema ʼi te mate ʼo Kilisito ʼe hoki kātoa ʼi te temi ʼaē ʼe natou mamate ai pea mo fakatuʼuake ai nātou ki te maʼuli ʼi te lagi.
7:8-11—ʼE fakahā feafeaʼi ‘ ʼe maʼu e te agahala ia te faigamālie ʼuhi ko te fakatotonu’? Neʼe tokoni ia te Lao ki te hahaʼi ke natou mahino peʼe koteā ia te agahala, ʼo lahi age ia tanatou mahino ki tonatou ʼuhiga agahala. Ko tona fua lelei, neʼe natou ʼiloʼi ai ia te agahala ʼaē neʼe natou fai, pea tokolahi neʼe natou mahino age ai ki tonatou ʼuhiga agahala. Koia lā ʼaē ʼe feala ai ke ʼui ʼe maʼu e te agahala ia te faigamālie ʼuhi ko te Lao.
Te ʼu Puani ʼe Tou Lava Tāʼofi:
1:14, 15. ʼE lahi ia te ʼu tupuʼaga ke tou tala ai ia te logo lelei ʼaki he loto faʼafai. ʼI te ʼu tupuʼaga ʼaē ʼe tonu ai ke tou tala te logo lelei, ʼe tou tuʼu maʼua ki te hahaʼi ʼaē neʼe totogi ʼaki te taʼataʼa ʼo Sesu, pea ʼe ko totatou maʼua ke tou tokoni kiā nātou ʼi te faʼahi fakalaumālie.
1:18-20. Ko te hahaʼi ʼaē ʼe aga heʼe lotu pea mo heʼe agatonu “ ʼe mole hanatou takuʼaki,” heʼe hā lelei ia te ʼu kalitātē fakapulipuli ʼa te ʼAtua ʼi tana fakatupu.
2:28; 3:1, 2; 7:6, 7. ʼI tana ʼosi fai tana ʼu palalau ʼaē neʼe hagē ʼe matatuʼu ki te kau Sutea, neʼe hilifaki atu e Paulo ʼaki he ʼu palalau ʼe fakalotofīmālie. ʼE ko he faʼifaʼitaki ʼaia kiā tātou moʼo fakatokatoka ia he ʼaluʼaga faigataʼa ʼaki he ʼu palalau fakaʼeteʼete pea mo fakapotopoto.
3:4. ʼI te temi ʼaē ʼe fakafeagai te palalau ʼa te tagata mo te meʼa ʼaē ʼe ʼui e te ʼAtua ʼi tana Folafola, ʼe tou tuku “ke ʼiloʼi ʼe moʼoni te ʼAtua” ʼaki tatatou falala ki te logo ʼo te Tohi-Tapu pea mo fakaʼalutahi ia totatou maʼuli mo te finegalo ʼo te ʼAtua. ʼAki tatatou faʼafai ʼo lagolago ki te fakamafola ʼo te Puleʼaga pea mo te fai ʼo ni ʼu tisipulo, ʼe feala ai ke tou tokoni ki niʼihi ke natou ʼiloʼi ko te ʼAtua ʼe moʼoni.
4:9-12. Neʼe lau te tui ʼa Apalahamo ko te faitotonu ʼi muʼa mamaʼo atu ʼo tona silikosisioʼi ʼi tona taʼu 99. (Sen. 12:4; 15:6; 16:3; 17:1, 9, 10) ʼAki tona mālohi, neʼe fakahā e te ʼAtua peʼe koteā ʼaē ʼe feala ai ki he tagata hana faitotonu age kiā te ia.
4:18. Ko te ʼamanaki ʼe ko te koga tāfito ʼaia ʼo te tui. Ko tatatou tui ʼe fakatafito ki te ʼamanaki.—Hep. 11:1.
5:18, 19. ʼAki he fakamatalatala fakalelei e Paulo ia te tatau ʼa Sesu pea mo Atama, neʼe ina fakamahino fakanounou peʼe feafeaʼi te lava ki he tagata e tahi ke “ina foaki tona nefesi moʼo totogi ʼaki ʼo te tokolahi.” (Mat. 20:28) ʼE tonu ke tou faʼifaʼitakiʼi ia te faʼahiga faiakonaki ʼaia ʼo tou fai ʼaki he ʼu fakakaukau ʼe mahino lelei pea mo fakanounou.—1 Ko. 4:17.
7:23. Mai te ʼaluʼaga ʼaē ko te ʼu koga ʼo te sino ohagē ko totatou ʼu nima, mo totatou ʼu vaʼe, pea mo totatou ʼalelo ʼe feala ‘ke ina taki fakapōpula tātou ki te lao ʼo te agahala,’ koia ʼaē ʼe tonu ai ke tou tōkakaga ki tona faʼahiga fakaʼaogaʼi.
8:26, 27. Kā tou felāveʼi mo he ʼu ʼaluʼaga faigataʼa ʼaupitō ʼo mole tou ʼiloʼi peʼe feafeaʼi hatatou faikole, “ko te laumālie totonu ʼe ina kole maʼa tātou.” ʼI te temi leva ʼaia, ko Sehova “ ʼaē ʼe fagono ki te faikole,” ʼe ina tali te ʼu kole ʼi tona temi totonu ohagē ko tona ʼui ʼi tana Folafola, he neʼe ina fakapapauʼi mai.—Pes. 65:2.
8:38, 39. Ko te ʼu tuʼutāmaki, ko te ʼu laumālie kovi, pea mo te ʼu puleʼaga fakatagata ʼe mole feala ke ina tāʼofi ia te ʼofa ʼo Sehova kiā tātou, pea ʼe mole tonu ia ke natou tāʼofi ia totatou ʼofa kiā te ia.
9:22-28; 11:1, 5, 17-26. ʼE lahi ia te ʼu lea fakapolofetā ʼo ʼuhiga mo te toe fakatuʼu ʼo Iselaele ʼaē neʼe fakahoko e te kōkelekāsio ʼo te kau Kilisitiano fakanofo, ko nātou ʼaia “ ʼe mole gata ʼaki ia nātou mai te kau Sutea, kae mo nātou foki mai te ʼu puleʼaga kehekehe.”
10:10, 13, 14. ʼAki totatou ʼofa ki te ʼAtua pea mo totatou kāiga, ko he tui mālohi kiā Sehova pea ko tana ʼu fakapapau ʼe feala ke ina uga tātou ke tou faʼafai ʼi te lagolago ki te minisitelio Fakakilisitiano.
11:16-24, 33. ʼI taulekaleka leva ia tatatou maʼu ia “te agalelei pea mo te hauhau ʼa te ʼAtua”! ʼEī, “ko te Maka, ʼe haohaoa tana gāue, heʼe ko tona ʼu ala fuli ʼe faitotonu.”—Teu. 32:4.
TE MAʼULI ʼO MULIMULI KI TE TALA KO NĀTOU KO TE KAU FAITOTONU
Neʼe ʼui fēnei e Paulo: “Koia ʼe au kole mamahi atu kiā koutou, ʼu tehina, ʼaki te ʼu ʼofa mamahi ʼo te ʼAtua, ke kotou momoli ʼokotou sino ko he sākilifisio maʼuli, mo māʼoniʼoni, pea mo lelei ki te ʼAtua.” (Loma 12:1) “Koia,” peʼe ʼi te ʼui ʼaē ko te kau Kilisitiano ʼe tala ko nātou ko te kau faitotonu ʼuhi ko tanatou tui, ko te ʼu palalau ʼe fai e Paulo ki muli age ʼe tonu ke malave ki tanatou aga ʼe natou femaʼuʼaki iā nātou totonu, mo tanatou aga ʼe natou fai ki ʼihi age, pea ki te ʼu pule māʼoluga.
Neʼe tohi fēnei e te ʼapositolo ko Paulo: “ ʼE au ʼui atu kiā koutou takitokotahi ke ʼaua naʼa lahi fau te fakafuafua ʼo koutou ʼo fakalaka ʼi te fua māhani.” Pea neʼe toe tokoni fēnei: “Ke ʼaua naʼa mālualoi tokotou ʼofa.” (Loma 12:3, 9) “Ke fakalogo te nefesi fuli pē ki te ʼu pule māʼoluga.” (Loma 13:1) ʼO ʼuhiga mo te leʼo ʼo loto, ʼe ina fakalotomālohiʼi ia te kau Kilisitiano ‘ke ʼaua naʼa natou fefakamāuʼiʼaki.’—Loma 14:13.
Te ʼu Tali Ki Te ʼu Fehuʼi Fakatohi-tapu:
12:20—ʼE feafeaʼi hatatou “tānaki he ʼu mamala kakaha” ʼi te ʼu ʼulu ʼo he fili? ʼI te temi muʼa, neʼe tutu ia te kele paʼaga ʼi te gutuʼumu ʼo folahi ia te mamala ʼi te fuga gutuʼumu. Ko te vela ʼaē ʼe ʼi ʼoluga ʼo te gutuʼumu ʼe ina fakahuhuʼa ia te ukamea pea mo ina fakamaʼa mai tona ʼu ʼotaʼota. ʼO toe fēia pē mo tātou, ʼe tou ʼai ia te ʼu mamala kakaha ki te ʼulu ʼo totatou ʼu fili ʼo tou agalelei kiā nātou he feala anai ke malū ai ia tanatou aga fefeka pea mo ina kamata fakahā he ʼu kalitātē ʼe lelei.
12:21—ʼE feafeaʼi hatatou “haga mālo aipē ʼi te agakovi ʼaki te agalelei”? Ko hatatou fakahoko ʼo te faʼahi ʼaia ʼe ko totatou lotomālohi ʼo fai te gāue ʼaē neʼe fakatotonu mai e te ʼAtua ke tou fagonogono ia te logo lelei ʼo te Puleʼaga ʼo kaku ki te fakahoko ʼo te finegalo ʼo Sehova.—Mko. 13:10.
13:1—ʼE fakaʼuhiga feafeaʼi te ʼui ʼaē ko te ʼu pule māʼoluga “ ʼe . . . tahi tuʼu ʼi tona tuʼulaga ʼuhi pē ko te ʼAtua”? Ko te ʼu puleʼaga fakatagata “ ʼe natou tahi tuʼu ʼi tona tuʼulaga ʼuhi pē ko te ʼAtua” ʼo natou pule ʼuhi heʼe fakafealagia e te ʼAtua, pea ʼi ʼihi lakaga ko ʼihi pule neʼe fakakikite e te ʼAtua. ʼE ʼiloga lelei te faʼahi ʼaia ʼaki te kau takitaki kaugamālie neʼe fakakikite ʼi te Tohi-Tapu.
Te ʼu Puani ʼe Tou Lava Tāʼofi:
12:17, 19. Ko te liufaki ʼo te agakovi ʼe ko hatatou faʼao ia te meʼa ʼaē ʼe tonu ke fai e Sehova. ʼE ko hatatou fiatuʼu ʼo tou “liufaki ki he tahi te kovi ʼuhi ko te kovi!”
14:14, 15. ʼE mole tonu ke tou fakalotomamahi hotatou tehina, peʼe tou fakatūkia he tahi ʼi te meʼa kai pea mo te meʼa ʼinu ʼaē ʼe tou foaki age ki ai.
14:17. Ko tatatou maʼu ʼo he ʼu felōgoi lelei pea mo te ʼAtua ʼe mole fakalogo pē ki te meʼa ʼaē ʼe tou kai peʼe tou ʼinu peʼe ki tatatou filifili ke ʼaua naʼa tou kakai peʼe tou ʼiʼinu. Kae, ʼe pipiki ki te faitotonu, mo te tokalelei pea mo te fiafia.
15:7. ʼE mole tonu ke tou fakapalatahi kae ʼe tonu ke tou tali ia nātou fuli ʼaē ʼe natou kumi fakamālotoloto ia te moʼoni ʼi te kōkelekāsio pea mo tou tala ia te logo ʼo te Puleʼaga ki te hahaʼi fuli ʼaē ʼe tou fetaulaki mo nātou.
[Paki ʼo te pasina 31]
Peʼe feala koa ki te totogi ke ina fakamolemole ia te ʼu agahala ʼaē neʼe fai ʼi te temi muʼa ʼo te fakahoko ʼo te totogi?