Tou Faʼifaʼitakiʼi Ia Sesu
“Kuʼau tuku atu kia koutou he faʼifaʼitakiʼaga, o hagepe ko taku fai kia koutou, ke koutou fai feia.”—Soane 13:15.
1. He koʼe ko Sesu ʼe ko he faʼifaʼitakiʼaga lelei ke mulimuli ki ai ia te kau Kilisitiano?
ʼI TE hisitolia kātoa ʼo te malamanei, ko te tagata pe e tahi neʼe mole agahala ʼi tona maʼuli. Ko te tagata ʼaia ʼe ko Sesu. “Ko te tagata fuli pe ʼe agahala” gata pe kiā Sesu. (1 Hau 8:46; Loma 3:23) Koia ʼaē ʼe lelei ai ki te kau Kilisitiano, ke nātou mulimuli ki te faʼifaʼitaki haohaoa ʼa Sesu. ʼI te ʼaho 14 ʼo Nisani ʼo te taʼu 33 ʼo totatou temi, ʼi muʼa pe ʼo tona mate, neʼe ʼui e Sesu ki tana kau tisipulo ke nātou faʼifaʼitakiʼi ia ia. Neʼe ina ʼui fēnei: “Kuʼau tuku atu kia koutou he faʼifaʼitakiʼaga, o hagepe ko taku fai kia koutou, ke koutou fai feia.” (Soane 13:15) ʼI te pō fakaʼosi ʼaia, neʼe talanoa ia Sesu ki te ʼatu ʼu ʼaluʼaga ʼe tonu ke faiga ai e te kau Kilisitiano ke nātou faʼifaʼitakiʼi ia ia. ʼI te alatike ʼaenī, ʼe tou vakaʼi anai ʼihi ʼo te ʼu ʼaluʼaga ʼaia.
Te Maʼuhiga ʼo Te Agavaivai
2, 3. Koteā te ʼu ʼaluʼaga ʼaē ʼe hā ai ko Sesu ʼe ko he faʼifaʼitakiʼaga lelei ʼo te agavaivai?
2 ʼI te fakaloto mālohiʼi e Sesu tana kau tisipulo ke nātou mulimuli ki tana faʼifaʼitaki, neʼe talanoa tāfito ʼo ʼuhiga mo te agavaivai. Tuʼa lahi neʼe tokoni ki tana kau tisipulo ke nātou agavaivai, pea ʼi te pō ʼo te ʼaho 14 ʼo Nisani, neʼe ina fakahā tana agavaivai ʼo ina fufulu te ʼu vaʼe ʼo tana kau ʼapositolo. Pea neʼe ʼui fēnei e Sesu: “Kapau leva nee au fufulu outou vae, e au ko te Aliki mo te faipule, pea e tonu ke koutou fe’fufuluʼaki outou vae.” (Soane 13:14) Ki muli age leva neʼe ina ʼui age ki tana kau ʼapositolo ke nātou mulimuli ki tana faʼifaʼitaki. Pea neʼe ko he faʼifaʼitaki lelei ʼo te agavaivai.
3 ʼE ʼui mai e te ʼapositolo ko Paulo, ko Sesu, ʼi muʼa ʼo tana haʼu ki te kele, neʼe ina “mau te natula o te Atua.” Kae neʼe ina meʼa noaʼi ia ia pea neʼe liliu ko he tagata ohage pe ko tatou. Kae neʼe mole gata ai, he “nee fakavaivai ifo, o liliu o fakalogo o kaku ki te mate, ki te mate i he [“pou fakamamahi,” MN ].” (Filipe 2:6-8) Koutou fakakaukauʼi age muʼa. Ko Sesu, ʼaē ʼe māʼoluga ʼi te ʼatulaulau pea mo hoa kiā Sehova, neʼe ina tali ke liliu ʼo mālalo ifo age ʼi te kau ʼāselo, mo tupu ko he kiʼi toe meamea vaivai, mo lahilahi ake mo fakalogo ki ni ʼu mātuʼa agahala, pea mo mate ohage ko he tagata fai fakapō pea mo fehiʼaʼinaʼi. (Kolose 1:15, 16; Hepeleo 2:6, 7) ʼE ko he toe agavaivai lahi ʼaia! ʼE feala koa hatatou faʼifaʼitakiʼi “te manatu” ʼaia pea mo maʼu te taʼi “agavaivai” ʼaia? (Filipe 2:3-5) Ei, kae ʼe faigataʼa.
4. Koteā te ʼu faʼahi ʼaē ʼe feala ke liliu ai he tahi ʼo fia meʼa lahi, kae he koʼe ʼe kovi te agaaga ʼaia?
4 ʼE kehekehe ʼaupito te agavaivai pea mo te fia meʼa lahi. (Tāʼaga Lea 6:16-19) Ko Satana neʼe fia meʼa lahi ʼo tupu ai tana higa. (1 Timoteo 3:6) ʼE faigafua te tupu ʼo te agaaga ʼaia ʼi totatou loto, kae ka ʼosi tauʼaka, pea ʼe faigataʼa tona taʼaki. ʼE fia meʼa lahi te hahaʼi ʼuhi ko tonatou fenua, tonatou lanu, tonatou ʼu koloā, tonatou poto, te ʼu meʼa ʼaē ʼe nātou fakahoko, tonatou tuʼulaga ʼi te gāue, tonatou matalelei, tonatou faiva ʼi te faigaoʼi, pea mo te tahi atu ʼu meʼa. Kae ko te ʼu meʼa fuli ʼaia ʼe mole maʼuhiga kiā mata ʼo Sehova. (1 Kolonito 4:7) Pea kapau ʼe tou liliu ai ʼo fia meʼa lahi, pea ʼe maumau ai tatatou ʼu felogoi mo ia. “Ko Sehova ʼe māʼoluga, kae ʼe sio kiā ia ʼaē ʼe agavaivai; kae ko ia ʼaē ʼe fia meʼa lahi, ʼe mamaʼo ia te ia.”—Pesalemo 138:6; Tāʼaga Lea 8:13.
Tou Agavaivai ʼi Totatou ʼu Tēhina
5. He koʼe ʼe maʼuhiga ke agavaivai te kau tagata ʼāfea?
5 ʼE mole tonu ke tou fiameamea ʼuhi ko te ʼu meʼa ʼaē ʼe tou foaki pea mo te ʼu gāue ʼaē ʼe tou fakahoko moʼo lagolago ki te tauhi kiā Sehova, ʼo feiā mo totatou ʼu pilivilesio ʼi te kokelekasio. (1 Fakamatala 29:14; 1 Timoteo 6:17, 18) Kapau ʼe lahi totatou ʼu pilivilesio ʼi te kokelekasio, pea ʼe tonu ke toe lahi age tatatou fia agavaivai. Neʼe fakaloto mālohiʼi e te ʼapositolo ko Petelo te kau tagata ʼāfea, ke ʼaua ‘naʼa nātou fakamālohiʼi tanatou pule kiā nātou ʼaē ko te tofiʼa ʼa te ʼAtua, kae ke nātou liliu ko he ʼu faʼifaʼitakiʼaga ʼo te faga ōvi.’ (1 Petelo 5:3) Neʼe fakanofo te kau tagata ʼāfea ke nātou tauhi pea mo liliu ko he ʼu faʼifaʼitakiʼaga, kae mole ko he kau pule pea mo ni kau ʼaliki.—Luka 22:24-26; 2 Kolonito 1:24.
6. Ko te ʼu faʼahi fea ʼo te maʼuli ʼaē ʼe tonu ai ki te kau Kilisitiano ke nātou agavaivai?
6 Ko te agavaivai ʼe mole fakamaʼua pe ki te kau tagata ʼāfea. Neʼe tohi fēnei e Petelo ki te ʼu tēhina tūpulaga, ʼaē ʼe feala ke nātou fia meʼa lahi heʼe vave age tanatou fakakaukau pea mo nātou mālolohi age ʼi te ʼu tēhina ʼaē kua mātutuʼa: “Koutou teu te agavaivai koteuhi, e fakafehagai te Atua kia natou fialahi, kae e ina foaki tona [“ ʼofa makehe,” MN ] kia natou agavaivai.” (1 Petelo 5:5) Ei, ʼe maʼuhiga kiā tatou fuli ke tou faʼifaʼitakiʼi te agavaivai ʼaē neʼe maʼu e Kilisito. ʼE tonu ke tou agavaivai moʼo faka mafola te logo lelei, tāfito mokā mole fia logo te hahaʼi peʼe nātou agakovi. ʼE tonu ke tou agavaivai moʼo tali he fai tokoni, peʼe moʼo faka faigafua totatou maʼuli ke lahi age tatatou gāue ki te minisitelio. Pea tahi ʼaē, ʼe tonu ke tou maʼu te agavaivai, te tui mo te lototoʼa mokā laukoviʼi tatou, mo ʼave tatou ki te ʼu telepinale, peʼe fakatagaʼi tatou.—1 Petelo 5:6.
7, 8. Koteā ʼihi ʼaluʼaga ʼe feala ai ke tou fai ke tou maʼu ai te agavaivai?
7 ʼE lava tauʼi feafeaʼi e he tahi te fia meʼa lahi pea ke ‘agavaivai, ʼo faka ʼuhiga ia nātou ʼaē ohage ʼe nātou māʼoluga age’ ia ia? (Filipe 2:3) ʼE tonu ke ina maʼu te manatu ʼa Sehova. Neʼe fakamahino e Sesu te manatu ʼaē ʼe lelei ʼi tana ʼui fēnei: “Ke toe feiā foki mo koutou, ka koutou ʼosi fai anai te ʼu meʼa fuli ʼaē neʼe fakatotonu atu, koutou ʼui, ‘Ko mātou ko te kau kaugana ʼe mole mātou lelei ʼi he meʼa. Neʼe mātou fai pe te meʼa ʼaē neʼe tonu ke mātou fai.’ ” (Luka 17:10, MN ) Tou manatuʼi ʼe mole he meʼa ʼe tou fai ʼe feala ke fakatatau ki te ʼu meʼa ʼaē neʼe fai e Sesu. Logola te ʼu faʼahi ʼaia, kae ko Sesu neʼe agavaivai.
8 Pea ʼe feala ke tou kole ke tokoni mai ia Sehova ke tou maʼu he manatu fakapotopoto ʼo ʼuhiga mo tatou. Ohage ko te tagata fai pesalemo, ʼe feala ke tou faikole fēnei: “Akoʼi mai te lotoʼofa, te aga fakapotopoto pea mo te ʼatamai mālama, he neʼe au tui ki tau ʼu fakatotonu.” (Pesalemo 119:66) ʼE tokoni mai anai Sehova ke tou maʼu he manatu fakapotopoto ʼo ʼuhiga mo tatou, pea ʼe ina fakapale anai tatou ʼuhi ko tatatou agavaivai. (Tāʼaga Lea 18:12) Neʼe ʼui fēnei e Sesu: “Kia ia ae e ina hikihiki ake anai iaʼia, e tukutuku ifo anai ki lalo, pea kia ia ae e fakavaivai ifo anai e hikihiki ake anai iaʼia.”—Mateo 23:12.
Te Manatu ʼAē ʼe Totonu ʼo ʼUhiga Mo Te Meʼa ʼAē ʼe Lelei Pea Mo Te Meʼa ʼAē ʼe Kovi
9. Neʼe feafeaʼi te manatu ʼa Sesu ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi?
9 Logola tana maʼuli ia taʼu e 33 mo te hahaʼi agahala, kae ko Sesu ‘neʼe mole ina fai hana agahala.’ (Hepeleo 4:15) Neʼe fakakikite fēnei e te tagata fai pesalemo ʼo ʼuhiga mo te Mesia: “Neʼe ke manako ki te faitotonu, pea ʼe ke fehiʼa ki te agakovi.” (Pesalemo 45:7; Hepeleo 1:9) ʼE faiga e te kau Kilisitiano ke nātou toe faʼifaʼitakiʼi ia Sesu ʼi te faʼahi ʼaia. ʼE mole gata pe tanatou ʼiloʼi ia te meʼa ʼaē ʼe lelei pea mo te meʼa ʼaē ʼe kovi, kae ʼe nātou toe fēhihiʼa ki te meʼa ʼaē ʼe kovi pea mo manako ki te meʼa ʼaē ʼe lelei. (Amosi 5:15) ʼE tokoni ia te faʼahi ʼaia ke nātou tauʼi tonatou ʼu holi ki te agahala.—Senesi 8:21; Loma 7:21-25.
10. Kapau ʼe tou fai “te [ʼu meʼa ʼaē ʼe] kovi” kae mole tou fakahemala, pea ʼe hā ʼaki ai teā?
10 Neʼe ʼui fēnei e Sesu ki te Faliseo ko Nikotemo: “Ko ae e ina fakahoko te [“ ʼu meʼa ʼaē ʼe,” MN ] kovi e fehia ki te malama pea e mole laka ki te malama naʼa ha ana gaue. Kae, kia ia e ina fakahoko te [“ ʼu meʼa ʼaē ʼe,” MN ] lelei e laka ki te malama ke fakaha ana gaue, he nee gaueʼi ia i te Atua.” (Soane 3:20, 21) ʼE koutou tokagaʼi neʼe ʼui e Soane ʼe ko Sesu “te malama mooni . . . [ʼaē] e ina fakamalamaʼi te tagata fuli pe.” (Soane 1:9, 10) Pea neʼe ʼui e Sesu kapau ʼe tou fai ‘te ʼu meʼa ʼaē ʼe kovi’—te ʼu meʼa ʼaē ʼe mole tali e te ʼAtua—pea ʼe hā ʼaki ai ʼe tou fēhihiʼa ki te mālama moʼoni. ʼE koutou manatu koa ʼe koutou lava fēhihiʼa kiā Sesu pea mo tana ʼu pelesepeto? Kae ʼe feiā te hahaʼi mokā nātou agahala kae mole nātou fakahemala. Lagi maʼa nātou ia ʼe mole nātou feiā, kae kiā mata ʼo Sesu, ʼe nātou fai nātou ia te faʼahi ʼaia.
ʼE Tou Lava Maʼu Feafeaʼi Te Manatu ʼa Sesu ʼo ʼUhiga Mo Te Meʼa ʼAē ʼe Lelei Pea Mo Te Meʼa ʼAē ʼe Kovi?
11. Koteā ʼaē ʼe maʼuhiga mo kapau ʼe tou fia maʼu te manatu ʼa Sesu ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi?
11 ʼE tonu ke tou mahino lelei ki te manatu ʼa Sehova ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi. ʼE tou lava ʼiloʼi te faʼahi ʼaia ʼaki pe tatatou ako te Folafola ʼa te ʼAtua, te Tohi-Tapu. ʼI tatatou ako ʼaia, ʼe tonu ke tou faikole ohage ko te tagata fai pesalemo: “Fakahā mai kiā te au tou ʼu ala, Ê Sehova! Akoʼi mai kiā te au tou ʼu haʼeleʼaga.” (Pesalemo 25:4) Kae tou manatuʼi, ko Satana ʼe kākā. (2 Kolonito 11:14) ʼE feala ke ina fakaneke he Kilisitiano ʼe mole nofo tokaga, ke manatu ia ko te meʼa ʼaē ʼe kovi ʼe ko he meʼa lelei. Koia ʼe ʼaoga ai ke tou metitasio loloto ki te meʼa ʼaē ʼe tou ako pea mo tou manatuʼi tuʼumaʼu te tokoni ʼa “te tagata kaugana agatonu mo poto.” (Mateo 24:45-47, MN ) Ko te ako, mo te faikole, pea mo te metitasio ki te ʼu meʼa ʼaē ʼe tou ako, ʼe tokoni mai anai ke tou liliu ko he ʼu hahaʼi aga fakapotopoto, pea mo tou kau ia nātou ʼaē “ ʼaki tanatou fakaʼaogaʼi, kua nātou maʼu te ʼu fealagia fakakaukau ʼaē kua akoʼi ke nātou ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14, MN ) Pea ʼe tou liliu ai anai ʼo fehiʼa ki te meʼa ʼaē ʼe kovi kae tou manako ki te meʼa ʼaē ʼe lelei.
12. Koteā te tokoni ʼaē ʼe fai mai ʼi te Tohi-Tapu ke mole tou fai te meʼa ʼaē ʼe kovi?
12 Kapau ʼe tou fehiʼa ki te meʼa ʼaē ʼe kovi, pea ʼe mole tou tuku anai ke tuputupu ʼi totatou loto he holi ki he ʼu meʼa ʼe kovi. Hili ni ʼu taʼu ʼi te ʼosi mate ʼa Sesu, neʼe tohi fēnei e te ʼapositolo ko Soane: “Aua tautou ofa i te malama-nei, mo te u mea i te malama-nei. Kapau e i ai he tahi e ofa i te malama-nei, e mole mau te ofa o te Tamai ia te ia, koteuhi ko meafuape e mau i te malama-nei, te holi a te kakano mo te holi a te mata pea mo te fiaha i te u koloa, e mole haù ia mai te Tamai, kae e haù mai te malama-nei.”—1 Soane 2:15, 16.
13, 14. (a) He koʼe ʼe feala ke tuʼutāmaki he Kilisitiano mo kapau ʼe ʼofa ki te ʼu meʼa ʼo te malamanei? (b) Koteā ʼaē ʼe tonu ke tou fai ke mole tou ʼofa ki te ʼu meʼa ʼo te malamanei?
13 ʼE feala ke manatu e ʼihi ʼe mole kovi te ʼu meʼa fuli ʼaē ʼi te malamanei. Tatau aipe peʼe moʼoni te faʼahi ʼaia, kae ʼe faigafua ki te malamanei pea mo tona ʼu fakafiafia ke nātou fakaleluʼi tatou mai tatatou tauhi kiā Sehova. Pea ʼe mole he meʼa ʼe foaki e te malamanei ʼe ina fakaōvi ai tatou ki te ʼAtua. Koia, kapau ʼe tuputupu tatatou manako ki te ʼu meʼa ʼo te malamanei, tatau aipe peʼe ko he ʼu meʼa ʼe mole lagi kovi, kae ʼe feala ke tou tuʼutāmaki ai. (1 Timoteo 6:9, 10) Pea ʼi te malamanei ʼe lahi age te ʼu meʼa ʼaē ʼe kovi pea ʼe feala ke nātou ʼulihi tatou. Kapau ʼe tou sioʼi he ʼu ʼata ʼi te televisio ʼe lahi ai te agamālohi, peʼe ko te fia maʼu koloā, peʼe ko te ʼu felāveʼi fakasino, ʼaki te temi ʼe tou tali te ʼu aga ʼaia pea mo nātou fakahalaʼi tatou. Kapau ʼe tou fakatahi mo he ʼu hahaʼi ʼe nātou kumi tāfito ke lahi age tonatou ʼu koloā, peʼe nātou fia maʼu paʼaga, pea ʼe toe feala foki ke liliu te ʼu meʼa ʼaia ko he ʼu meʼa maʼuhiga tāfito kiā tatou.—Mateo 6:24; 1 Kolonito 15:33.
14 ʼI te tahi age faʼahi, kapau ʼe tou fiafia ʼi te Folafola ʼa Sehova, pea ʼe mole lahi anai iā tatou “te holi a te kakano mo te holi a te mata pea mo te fiaha i te u koloa.” Pea kapau ʼe tou fakatahi mo nātou ʼaē ʼe nātou fakamuʼamuʼa te ʼu gāue ʼo te Puleʼaga ʼa te ʼAtua, ʼe tou liliu anai ohage ko nātou, ʼo tou ʼofa ki te ʼu meʼa ʼaē ʼe nātou ʼoʼofa kiai pea mo tekeʼi te ʼu meʼa ʼaē ʼe nātou tekeʼi.—Pesalemo 15:4; Tāʼaga Lea 13:20.
15. Ohage ko Sesu, ʼe lava feafeaʼi hatatou mālolohi mo kapau ʼe tou ʼoʼofa ki te faitotonu kae tou fēhihiʼa ki te talagataʼa ki te lao?
15 Ko Sesu neʼe fehiʼa ki te talagataʼa ʼaē ki te lao kae neʼe ʼofa ia ki te faitotonu, pea neʼe tokoni ai kiā ia ke ina tokagaʼi tāfito “te fiafia nee tuku kia te ia.” (Hepeleo 12:2) ʼE feala ke toe feiā ʼo ʼuhiga mo tatou. ʼE tou ʼiloʼi “e fakamole te malama-nei mo tana u holi.” Ko te ʼu fakafiafia fuli pe ʼaē ʼe foaki mai e te malamanei ʼaenī ʼe faka temi pe ia. Kae “kia ia ae e ina fai te finegalo o te Atua e mauli o talu ai.” (1 Soane 2:17) ʼUhi ʼaē he neʼe fai e Sesu te finegalo ʼo te ʼAtua, neʼe ina faka fealagia ai ki te hahaʼi ke nātou maʼu te maʼuli heʼegata. (1 Soane 5:13) ʼOfa pe ke tou faʼifaʼitakiʼi fuli ia ia pea mo tou maʼu te ʼu lelei mai tana nofo agatonu.
Tou Kātakiʼi Te Fakataga
16. He koʼe neʼe fakaloto mālohiʼi e Sesu te kau Kilisitiano ke nātou feʼofaniʼaki?
16 Neʼe fakahā e Sesu te tahi faʼahi ʼaē ʼe tonu ke faʼifaʼitakiʼi e te kau Kilisitiano, ʼi tana ʼui fēnei: “Koeni taku fekau, ke koutou feʼofaʼaki o hage ko toku ofa ia koutou.” (Soane 15:12, 13, 17) ʼE lahi te ʼu tupuʼaga ke ʼoʼofa ai te kau Kilisitiano ki tonatou ʼu tēhina. ʼI te lakaga ʼaia, neʼe manatuʼi tāfito e Sesu ia te fehiʼa ʼa te malamanei kiā nātou. Neʼe ina ʼui fēnei: “Kapau e fehia te malama-nei kia koutou, iloi e koutou nee uluaki fehia ia te au, ia koutou. . . . ‘E mole lahiʼage te kaugana i tona Aliki.’ Kapau nee natou fakatagai au pea e natou fakatagai anai mo koutou.” (Soane 15:18, 20) Ei, ʼe toe fakatagaʼi te kau Kilisitiano ohage pe ko Sesu. ʼE maʼua ke nātou feʼofaniʼaki mālohi ke tokoni ai kiā nātou ke nātou kātakiʼi tonatou fehiʼaʼinaʼi.
17. He koʼe ʼe fehiʼa te malamanei ki te kau Kilisitiano moʼoni?
17 He koʼe ʼe fehiʼa te malamanei ki te kau Kilisitiano? Koteʼuhi, ohage ko Sesu, ʼe mole nātou “kau ʼi te malamanei.” (Soane 17:14, 16, MN ) ʼE mole nātou kau ki te ʼu tau pea mo te ʼu meʼa faka politike, pea ʼe nātou mulimuli ki te ʼu pelesepeto ʼa te Tohi-Tapu, ʼo nātou fakaʼapaʼapa ki te ʼuhiga taputapu ʼo te maʼuli pea mo nātou mulimuli ki te ʼu lekula māʼoluga ʼo ʼuhiga mo te aga ʼaē ʼe tonu ke fai. (Gaue 15:28, 29; 1 Kolonito 6:9-11) ʼE nātou kumi tāfito te ʼu meʼa fakalaumālie kae mole ko te ʼu koloā. ʼE nātou māʼuʼuli ʼi te malamanei, kae ohage ko tona tohi e Paulo, ʼe mole “nātou fakaʼaogaʼi kātoa” te ʼu meʼa ʼo te malamanei. (1 Kolonito 7:31, MN ) ʼE moʼoni, neʼe fakahā e ʼihi tanatou leleiʼia ia te ʼu lēkula māʼoluga ʼa te kau Fakamoʼoni ʼa Sehova. Kae ʼe mole maumauʼi e te kau Fakamoʼoni ʼa Sehova tonatou lēkula faka Kilisitiano ke feala ki te hahaʼi ke nātou fakaʼapaʼapa kiā nātou pea mo tali nātou. Ko te tupuʼaga la ʼaia ʼo te mole mahino ʼa te hahaʼi tokolahi ki te kau Fakamoʼoni ʼa Sehova, pea mo tupu ai tanatou fēhihiʼa kiā nātou.
18, 19. ʼI tanatou mulimuli ki te faʼifaʼitaki ʼa Sesu, neʼe feafeaʼi te aga ʼa te kau Kilisitiano ʼi te fakafeagai pea mo te fakatagaʼi ʼo nātou?
18 Neʼe sio te kau ʼapositolo ʼa Sesu ki te fehiʼa lahi ʼo te malamanei ʼi te temi ʼaē neʼe puke ai Sesu pea mo matehi ia ia, pea neʼe nātou sio ki te aga ʼa Sesu ʼi tona fehiʼaʼinaʼi ʼaia. ʼI te ʼōloto ʼo Setesemane, ko te ʼu hahaʼi lotu ʼaē neʼe fakafeagai kiā Sesu neʼe nātou ʼōmai ʼo puke ia ia. Neʼe faigaʼi e Petelo ke ina hāofaki ia Sesu ʼaki he heletā, kae neʼe ʼui fēnei age e Sesu kiā Petelo: “Ai tau heleta ki tona aiʼaga, koteuhi ko natou fuape e toʼo heleta e natou matepe anai i te heleta.” (Mateo 26:52; Luka 22:50, 51) ʼI te temi muʼa, neʼe fakaʼaogaʼi e te kau Iselaele te ʼu heletā moʼo tauʼi tonatou ʼu fili. Kae ʼi te temi leva ʼaia neʼe kua fetogi ia te faʼahi ʼaia. Ko te Puleʼaga ʼa te ʼAtua neʼe “mole kau ia ʼi te malamanei ʼaenī” pea neʼe mole ina fia puipui hona ʼu tuʼakoi faka puleʼaga. (Soane 18:36, MN ) Mole tuai pea kau anai ia Petelo ki he puleʼaga fakalaumālie, pea ko nātou ʼaē ʼe nātou faʼufaʼu te puleʼaga ʼaia ʼe nātou māʼuʼuli anai ʼi selo. (Kalate 6:16; Filipe 3:20, 21) Koia, talu mai te temi ʼaia, ko te ʼu tisipulo ʼa Sesu ʼe nātou faʼifaʼitakiʼi te aga ʼa Sesu mokā fehiʼaʼinaʼi pea mo fakatagaʼi nātou—ʼe mole nātou mātataku kae nātou kumi te tokalelei. ʼAki he loto falala, ʼe nātou tuku anai kiā Sehova ke ina fai he puleʼaki ki te faʼahi ʼaia pea mo nātou kole tona mālohi ke feala hanatou kātakiʼi.—Luka 22:42.
19 ʼI ni ʼu taʼu ki muli age, neʼe tohi fēnei e Petelo: “Neʼe mamahi foki ia Kilisito maʼa koutou, ʼo ina tuku atu kiā koutou he faʼifaʼitaki ke koutou mulimuli lelei ki tona ʼu tafuga vaʼe. . . . ʼI te temi ʼaē neʼe leakoviʼi ia ia, neʼe mole ina tali ʼaki he leakovi. ʼI te temi ʼaē neʼe mamahi ai, neʼe mole ina fai he meʼa ʼe kovi, kae neʼe falala tuʼumaʼu pe kiā ia ʼaē ʼe ina fakamāu ʼaki te faitotonu.” (1 Petelo 2:21-23, MN ) Ohage ko tona fakatokaga e Sesu, ʼaki te temi neʼe hoko te ʼu fakataga mālohi ki te kau Kilisitiano. ʼI te ʼuluaki sēkulō pea mo totatou temi, neʼe nātou mulimuli ki te faʼifaʼitaki ʼa Sesu pea mo nātou kātaki agatonu, ʼo nātou fakahā ai ʼe nātou taupau tanatou agatonu ʼi te tokalelei. (Apokalipesi 2:9, 10) ʼOfa pe ke tou faʼifaʼitaki fuli kiai mokā hoko mai he ʼu ʼaluʼaga feiā.—2 Timoteo 3:12.
“Koutou Kofu Te Aliki Ko Sesu Kilisito”
20-22. Koteā tona faka ʼuhiga ki te kau Kilisitiano ke nātou “kofu te Aliki ko Sesu Kilisito”?
20 Neʼe tohi fēnei e Paulo ki te kokelekasio ʼi Loma: “Koutou kofu te Aliki ko Sesu Kilisito, pea aua naa koutou fakafimalieʼi te hohaʼa a te kakano o uhiga mo ana holi.” (Loma 13:14) ʼI hona ʼaluʼaga fakatātā, ko te kau Kilisitiano ʼe nātou kofuʼi ia Sesu, ohage ko he teu. Ko tona faka ʼuhiga, ʼe nātou faiga ke nātou faʼifaʼitakiʼi tona ʼu kalitate pea mo tana ʼu gāue ke hā ʼi tonatou ʼulugaaga ia te ʼulugaaga ʼo tonatou Pule, logola tonatou ʼuhiga heʼe haohaoa.—1 Tesalonika 1:6.
21 ʼE tou lava “kofu te Aliki ko Sesu Kilisito” mo kapau ʼe tou ʼiloʼi lelei te maʼuli ʼo totatou Pule pea mo tou faiga ke tou faʼifaʼitakiʼi. ʼE tou faʼifaʼitakiʼi tana agavaivai, tona ʼofa ki te faitotonu, tana fehiʼa ki te talagataʼa ki te lao, tona ʼofa ki tona ʼu tēhina, tana mole kau ki te malamanei, pea mo tana kātakiʼi fualoa ia te mamahi. ʼE mole tou faiga anai ke tou ‘faka fīmālieʼi te ʼu holi ʼo te kakano’—ʼaē ko te kumi tāfito anai ke tou maʼu tuʼulaga ʼi te mālama peʼe tou fakahoko totatou ʼu holi fakasino. Kae ka tou fai he tonu peʼe tou fakatokatoka he fihifihia, tou fai te ʼu fehuʼi ʼaenī: ‘Kana neʼe ko Sesu la, koteā anai te meʼa ka ina fai? Koteā ʼaē ʼe ina loto ke au fai?’
22 Moʼo fakaʼosi, ʼe tou faʼifaʼitakiʼi ia Sesu mokā tou maʼumaʼua ʼi te “faka mafola ia te logo lelei ʼo te puleʼaga.” (Mateo 4:23, MN; 1 Kolonito 15:58) ʼI te faʼahi ʼaia ʼe toe faʼifaʼitakiʼi e te kau Kilisitiano ia Sesu, pea ʼe tou talanoa anai ki te faʼahi ʼaia ʼi te alatike ka hoko mai.
ʼE Feala Koa Hakotou Fakamahino?
• He koʼe ʼe maʼuhiga ke agavaivai he Kilisitiano?
• E feafeaʼi hatatou maʼu ia te manatu ʼaē ʼe lelei ʼo ʼuhiga mo te meʼa ʼaē ʼe lelei pea mo te meʼa ʼaē ʼe kovi?
• ʼE faʼifaʼitakiʼi feafeaʼi e te kau Kilisitiano te aga ʼa Sesu mokā hoko he ʼu fakafeagai pea mo he ʼu fakataga kiā nātou?
• ʼE lava feafeaʼi ki te kau Kilisitiano ke nātou “kofu te Aliki ko Sesu Kilisito”?
[Paki ʼo te pasina 7]
Neʼe tuku e Sesu te faʼifaʼitaki lelei ʼo ʼuhiga mo te agavaivai
[Paki ʼo te pasina 8]
ʼE maʼua ke agavaivai he Kilisitiano ʼi te ʼu faʼahi fuli ʼo tona maʼuli, ʼo feiā mo te fai faka mafola
[Paki ʼo te pasina 9]
ʼE feala ke fakaliliu e Satana he fakafiafia heʼeʼaoga ko he meʼa ʼe tali lelei e he Kilisitiano
[Paki ʼo te pasina 10]
Ko te ʼofa ʼo totatou ʼu tēhina ʼe ina foaki mai anai te mālohi moʼo tauʼi te fakataga