Te ʼu Fehuʼi ʼa Te Kau Lautohi
Koteā ia te manatu tāfito ʼaē ʼe akoʼi mai iā Tāʼaga Lea 24:27?
ʼI tana fai tokoni ki te tama, neʼe ʼui fēnei e te tagata fai Tāʼaga Lea: “Teuteuʼi tau gāue ʼaē ʼi tuʼa, pea ke ke teuteuʼi maʼa koe ʼi te gāueʼaga. Pea ʼosi ʼaia, ʼe tonu anai ke ke toe laga mo tou loto fale.” Koteā te manatu ʼaē ʼe fia fakahā mai ʼi te tāʼaga lea ʼaenī? ʼE tonu ki he tagata ke teuteu lelei ʼi muʼa ʼo hana ʼohoana pea mo faʼu hona maʼuli fakafāmili, ke ina tali ia te ʼu maʼua ʼaē ʼe tonu ke ina fakahoko ʼi tana nofo ʼohoana.
ʼI te temi muʼa, neʼe tautau fakamahino ia te vaega ʼaia, ʼe ko he tagata ʼohoana pea mo tamai, ʼe mole tonu pē ke tokaga ki tana gāue fakamālama kae ʼe tonu foki ke ina laga peʼe ke ina fakalotomālohiʼi tona fāmili, ohagē lā ke ina akoʼi ki tona fāmili ia te ʼu meʼa fakalaumālie. Logolā ʼe ko he manatu ʼe moʼoni pea mo fakatafito ki te Tohi-Tapu, kae ʼe mole ko te puani tāfito ʼaia ʼo te vaega. He koʼē ʼe mole ko te manatu tāfito ʼaia? Tou vakaʼi age muʼa ia puani e lua.
ʼUluaki, ʼe mole talanoa ia te vaega ke ina laga tona fāmili ʼaē kua ʼosi ina maʼu, tona fakaʼuhiga ʼaē ke ina fakalotomālohiʼi tona fāmili. Kailoa ia, heʼe fakaʼuhiga ia te laga ʼaenī, ki he laga moʼoni ʼo he fale. Ko te kupu ʼaē neʼe fakaliliu ʼaki ia te kupu “laga,” ʼe ʼi ai mo tona fakaʼuhiga fakatātā, ko te fakatuʼu ʼo he loto fale, ko tona fakaʼuhiga ke ʼohoana pea mo maʼu fānau.
Lua, ʼe fakahā e te vaega ia te maʼuhiga ʼaē ke fai ia te ʼu meʼa ʼi te fakatokatoka, ohagē pē ʼe fakaʼuhiga fēnei: “Kotou fai muʼa ia te meʼa ʼaenī: pea ki muli age ia te meʼa ʼaē.” Koia, ʼe feala koa ke ʼui ʼi te tāʼaga lea ke fakahoko muʼa ia te ʼu maʼua fakamālama pea ki ʼamuli leva ia te ʼu maʼua fakalaumālie? Kailoa ia!
ʼI te temi muʼa, kapau ʼe loto e he tagata ke ina “laga [hona] loto fale,” peʼe ke ʼohoana ke maʼu ai ia hona maʼuli fakafāmili, neʼe ʼaoga ke ina fai ia te fehuʼi ʼaenī: ‘Kua au lava taupau koa pea mo tokaga ki hoku ʼohoana, pea mo te fānau ʼaē kā mā maʼu ai?’ ʼI muʼa ʼo he fakatuʼu ʼo he maʼuli fakafāmili, neʼe tonu ki te tagata ke gāue, ke tokaga ki tana ʼu gāueʼaga. Koia ʼi te Tohi-Tapu ʼa Segond, ʼe ina fakaliliu fēnei ia te vaega ʼaia: “Teuteu tau gāue ʼi tuʼa, teuteu tau gāueʼaga ke lelei, pea ke fakatuʼu leva tou fale.” ʼE kei ʼaoga koa ia te pelesepeto ʼaia iā ʼaho nei?
ʼEī. Ko he tagata ʼe fia ʼohoana, ʼe ʼaoga ke teuteu fakalelei ki te maʼua ʼaia. Kapau ʼe ina lavaʼi, pea ʼe tonu anai ke gāue kinakina kiai. ʼIo, ko te gāue kinakina ʼa he tagata moʼo taupau ia tona fāmili ʼe mole tonu anai ke fakatuʼakoi pē ki te foaki ʼo te ʼu meʼa ʼaē ʼe ʼaoga ʼi te faʼahi fakasino. ʼE fakahā ʼi te Folafola ʼa te ʼAtua, ko he tagata ʼe mole tokaga ki te maʼuli fakasino ʼo tona fāmili, ʼo fēia mo te ʼu meʼa ʼaē ʼi ʼonatou loto, pea mo te faʼahi fakalaumālie, ʼe kovi age ia ʼi he tagata ʼe mole tui! (1 Tim. 5:8) Koia, mokā teuteu he tama ki te ʼohoana pea mo maʼu hona maʼuli fakafāmili, ʼe tonu anai ke ina fai ia te ʼu fehuʼi ʼaenī: ‘Kua au teuteu lelei koa ke au tokaga ʼi te faʼahi fakasino ki he fāmili? ʼE feala koa ke au takitaki toku fāmili ʼi te faʼahi fakalaumālie? ʼE au tokaga anai koa ʼo fai tuʼumaʼu he ako Tohi-Tapu mo toku ʼohoana pea mo tamā fānau?’ ʼE mahino ia, ʼe fakamaʼuhigaʼi ʼi te Folafola ʼa te ʼAtua ia te ʼu maʼua tāfito ʼaia.—Teu. 6:6-8; Efe. 6:4.
Koia ko he tama ʼe ina kumi hona ʼohoana, ʼe tonu anai ke ina fakakaukauʼi lelei ia te pelesepeto ʼaē ʼe maʼu iā Tāʼaga Lea 24:27. ʼO toe fēia pē, ʼe lelei anai ki he taʼahine ke ina fai kiā ia totonu ia te fehuʼi ʼaē, peʼe kua teuteu ki te ʼu maʼua ʼo he fafine ʼohoana pea mo maʼu fānau. ʼE feala ki he taumātuʼa ke nā fai ia te ʼu fehuʼi ʼaia mokā nā fakakaukau ke maʼu hanā fānau. (Luka 14:28) ʼE lava tokoni ia te taʼi faʼahiga takitaki fakaʼatua ʼaia ki te hahaʼi ʼa te ʼAtua, ke ʼaua naʼa natou lotomamahi pea ke natou maʼu ia he maʼuli fakafāmili fiafia.
[Fakamatala ʼo te pasina 10]
Koteā ia te ʼu fehuʼi ʼo ʼuhiga mo te ʼohoana ʼe tonu anai ke fai e he tama kiā ia totonu?