KAMATA HE FAIPALALAU
AKO 3
Tou Agalelei
Pelesepeto: “Ko he tahi ʼe ʼofa, ʼe . . . agalelei.”—1 Ko. 13:4.
Te Meʼa ʼAe Neʼe Fai e Sesu
1. Sioʼi te ʼATA VITEO, peʼe lau ia Soane 9:1-7. Pea tali ki te ʼu fehuʼi ʼaeni:
Kotea ʼae neʼe kamata fai e Sesu? Neʼe palalau muʼa ki te logo lelei ki te tagata pe neʼe ina fakamalolo muʼa?—Vakaʼi ia Soane 9:35-38.
He koʼe ʼe tou ui ʼe fua lelei te faʼahiga fai ʼaia?
Kotea ʼAe ʼe Tou Ako Mai Ai?
2. ʼE fia fakalogo atu anai he tahi moka ʼe ina logoʼi ʼe ke tokagaʼi.
Faʼifaʼitakiʼi Ia Sesu
3. Lotomahino. Fakakaukauʼi te meʼa ʼe feala ke logoʼi e he tahi.
Fai te ʼu fehuʼi ʼaeni: ‘Kotea ʼae ʼe tuʼania ki ai? Kotea ʼae ʼe maʼuhiga mo ʼaoga ki ai?’ Ka ke fai feia, pea ʼe mole malualoi anai tau agalelei ki ai.
Ka ke fagono lelei kia ia ʼae ʼe kolua faipalalau, pea ʼe ke fakaha ai tau tokagaʼi moʼoni te ʼu faʼahi ʼe tau mo ia. Kapau ʼe ina fakaha atu tana manatu peʼe palalau atu ki hona fihifihia, ʼaua naʼa ke palalau ki he tahi age meʼa.
4. Palalau ʼaki he agalelei mo he fakaʼapaʼapa. ʼE logoʼi anai e he tahi ʼi tou leʼo tau agalelei pea mo tau fia tokoni age. Filifili leleiʼi te ʼu kupu ka ke fakaʼaogaʼi pea mo tokaga ki tau faʼahiga ʼaveʼave ʼo tou leʼo. Pea ʼe mahino ia, ʼe mole ke fakamamahiʼi anai ia ia ʼae ʼe kolua faipalalau.
5. Tokoni ki ai. ʼE ʼaoga koa ki ai he tokoni ʼi he aluʼaga pe? Ka kita maʼu he lototokaga feia pea ʼe feala pe ke kamata ʼaki he faipalalau.