Ania ti Kuna ti Biblia Maipapan iti Panag-live-in?
Ti sungbat ti Biblia
Ibaga ti Biblia a kayat ti Dios nga “adaywan[tayo] ti seksual nga immoralidad.” (1 Tesalonica 4:3) Iti Biblia, ti termino a “seksual nga immoralidad” ramanenna ti pannakikamalala, homoseksual nga ar-aramid, ken panagdenna ti lalaki ken babai a saan a nagkasar.
Apay a napateg iti Dios ti panagkasar?
Naggapu iti Dios ti urnos a panagasawa. Inrugina dayta idi pinagtiponna ti umuna a pagassawaan. (Genesis 2:22-24) Saanna nga inranta nga agkabbalay ti lalaki ken babai a dida nagkasar.
Ammo ti Dios ti kasayaatan para kadagiti tattao. Inyurnosna ti panagasawa kas permanente a panagtipon ti lalaki ken babai a pakagunggonaan ken pakaprotektaran ti amin a miembro ti pamilia. Panunotem daytoy a simple nga ilustrasion. Tapno husto ti panang-assemble-mo iti maysa a kabinet, masapul a surotem dagiti instruksion iti manual nga inted ti manufacturer. Iti umasping a pamay-an, isuro kadatayo dagiti instruksion ti Dios no kasano ti maaddaan iti naballigi a pamilia. Kanayon a nasayaat ti pagbanagan dagidiay mangsurot kadagiti pagalagadan ti Dios.—Isaias 48:17, 18.
Ipakita ti manual nga inted ti manufacturer no kasano a ma-assemble ti maysa a kabinet. Isuro kadatayo dagiti instruksion ti Dios no kasano ti maaddaan iti naballigi a pamilia
Dakes dagiti resulta ti panagseks dagiti saan a nagkasar. Kas pagarigan, mabalin nga agresulta dayta iti di kinayat a panagsikog, saksakit a mayakar babaen ti panagseks, ken nariribuk a panunot ken nasaem a rikna.a
Inikkan ti Dios dagiti lallaki ken babbai iti abilidad a maaddaan iti annak babaen ti panagseks. Para iti Dios, ti biag ket sagrado isu a nagpateg a sagut ti abilidad a panagputot ken panaganak. Kayat ti Dios a respetuentayo dayta a sagut babaen ti panangsurottayo iti urnosna iti panagasawa.—Hebreo 13:4.
Ti ngay panag-live-in sakbay ti kasar tapno makita no agkatunosan ti dua?
Tapno agballigi ti panagasawa, saan a masapul nga ag-live-in ti agnobio tapno makita no agkatunosanda. Imbes ketdi, agpaut ti relasionda no matalekda iti maysa ken maysa ken agtinnulongda a mangsolbar kadagiti problema.b Ti panagkasar pabilgenna ti panagasawa.—Mateo 19:6.
Kasano a maaddaan iti natibker a relasion ti agassawa?
Awan ti perpekto a panagasawa. Ngem mabalin nga agballigi dagiti agassawa no surotenda ti balakad ti Biblia a kas iti:
Iyun-unam dagiti kasapulan ti asawam.—1 Corinto 7:3-5; Filipos 2:3, 4.
Ipakitayo ti ayat ken respetoyo iti maysa ken maysa.—Efeso 5:25, 33.
Sursuruem a kontrolen ti panagsaom.—Proverbio 12:18.
Agbalinka a naanus ken alisto a mangpakawan.—Colosas 3:13, 14.
a Kitaen ti artikulo a “Saludsod Dagiti Agtutubo . . . Kasano No Pilitendak a Makiseks?”
b Kitaen ti artikulo a “Naballigi a Pamilia—Kinamatalek.”