ROMNHORÉ 01
E niha Bíblia te dza aiꞌãma aime.
Wa watsima wẽ dzaꞌra ni wa te waihuꞌu wẽ dzaꞌra da dahöimanadzém na, robdzépatadzém na, dadöꞌödzém na, duré e niha dza aptoꞌoré hã. Wa norĩ dzama wahötöꞌö na wa ꞌre wahöimana dzaꞌra marĩ norĩ uꞌöbö, ãma ĩtsimiré, e niha wa dza romhuri dzaꞌra ni wanhorõwa ꞌremhã wa te ꞌmadöꞌö waihuꞌu petse dzaꞌra da. Daꞌahö na ma tô waihuꞌu dzaꞌra ni Bíblia te te ĩtsadaꞌöbö na hã dadzadanharĩ danhipai u ĩpire dahöimanadzém na. Taha nhipai u Bíblia nhimiroti wẽ di rowẽ na ꞌre dahöimana dzaꞌra mono da. E niha atsimirotsaꞌrada, e atsitsãnawã norĩ Bíblia te te pawapto waihuꞌu petse di.
1. E ma hã dadzadanharĩ norĩ Bíblia te tsadaꞌö.
Dadzadanharĩ ĩpire norĩ Bíblia te tsadaꞌö. Ãma ĩtsimiré: E niha dahöimanadzé ma tô tinhanaꞌrata. E marĩ da wa ꞌre wahöimana dzaꞌra. E marĩ wa, te natsi robdzépata dzaꞌra ni. E marĩ te tihöiba dadöꞌö parimhã. E marĩ wa, datsiꞌwapé te tihöiba romharé tsi da te datsima wẽ dzaꞌra nherẽ hã. E marĩ te dza watobro Tiꞌa dzô. Ãne atsitsadanharĩ wamhã, aihötöꞌö tõ. Daꞌahö na ma tô waihuꞌu dzaꞌra ni ĩtsadaꞌöbödzém norĩ Bíblia hawi tô ĩbö na hã.
2. E niha Bíblia te dza wapawaptob dzaꞌra rowẽ na ꞌre wahöimana dzaꞌra mono da.
Bíblia nhimiroti norĩ dama wẽ dzaꞌra di. Ãma ĩtsimiré, te pawaptob dzaꞌra damama norĩ duré daꞌra norĩ tsena rowẽ na ꞌre höimana dzaꞌra mono da. Te tinha e niha wa dza ꞌre wahöimana dzaꞌra mono roꞌwaꞌrutu nherẽ, duré e marĩ, wa te ĩꞌmanharĩ dzaꞌra da tsi wa te tsaꞌẽtẽ dzaꞌra da wanhimiromhuri dze hã. Te dza ĩwaihu Bíblia te te ĩrowahutudzé hã uburé ta norĩ ãma hã romnhoré wamhã ãhã ĩtsõrédzé rowahutuꞌwai me hã. Taha parimhã te dza ãma atsimidzadze ‘uburé ĩtsimiroti wẽ na robꞌuiꞌéré hã, [Bíblia nhimiroti norĩ uburé petse] da te ãma ꞌre ĩdapawaptob dzaꞌra mono dzéb da hã.’ — 2 Timóteo 3:16.
Ãhã ĩtsõrédzé hã Bíblia õ di, tadzahã rotsaꞌrata dze te aima titsõ atsiꞌuihö na waihuꞌu da Bíblia na. Taha wa tsada ꞌre atsiptete mono romnhihötö norĩ Bíblia na ãhã ĩtsõrédzé te te ĩhöiꞌré hã tsõré da, duré ꞌmadöꞌö Bíblia te te ĩnharĩdzé ĩwaihuꞌudzé aiwab dzô hã.
WAIHUꞌU DURÉ
ꞌMadöꞌö Bíblia te te ĩdapawaptobdzé hã, duré e niha aima tsõré dze ti dza Bíblia hã, duré e marĩ wa, aima wẽ di dza da te aipawaptob da wamhã waihuꞌu da Bíblia na.
3. Bíblia te dza wadzaprõni dzaꞌra wate bödödi dzaꞌra na
Bíblia udzi nhimirowaꞌa dzaꞌẽtẽ ne hã. Te dza wapawaptob dzaꞌra wa te watsima pitsutu wẽ dzaꞌra da, duré te tinha e niha dza aptoꞌoré hã.
Atsiré tsõré aba Salmo 119:105. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Salmo nhihötöꞌwai ma hã, e niha ne hã Ropotoꞌwai mreme.
E niha atsimirotsaꞌrada Bíblia ãma.
4. Bíblia te tsadaꞌö ĩwatsitsadanharĩ dzaꞌra dzém na.
ꞌMadöꞌö e niha Bíblia ma tô pawapto piꞌõ dama romnhoréꞌwa te te tsõpẽtẽ da ĩtsadaꞌöbödzém norĩ ĩpire hã tsô ꞌre ĩrĩtĩ uꞌötsi mono hã. ꞌMadöꞌö aba ĩropodo. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Ĩropoto na hã e marĩ na piꞌõ dama romnhoréꞌwa ma tô te te ꞌre tsitsadanharĩ.
E niha Bíblia ãma romnhoré hã ma tô pawapto.
Bíblia te warétsi dzaꞌra ꞌre warĩtĩ dzaꞌra mono da ĩtsadaꞌöbödzém norĩ dzô ꞌre ĩwatsitsadanharĩ dzaꞌra mono na hã. Atsiré tsõré aba Mateus 7:7. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
E ma norĩ hã dadzadanharĩ norĩ te atsima ĩwẽ Bíblia te te aima tsadaꞌöbö da.
5. Aima tsõré dze ti dza Bíblia
Daꞌahö na dama tsõré dze dzaꞌra di Bíblia, tahã te dapawaptob dzaꞌra. ꞌMadöꞌö aba ĨROPODO. Taha parimhã atsima robdzanhamri aba ãhã dadzadanharĩ norĩ ãma piꞌrebamhã:
Ĩropoto na hã, e niha bö ĩhöibatém norĩ tãma tsõré dze dzaꞌra õ di aré.
Tadzahã e marĩ wa, oto tãma tsõré dze dzaꞌra di Bíblia.
Bíblia nhimiroti te wapẽꞌẽ nomri dzaꞌra duré te wama waihuꞌu dzaꞌra ropitsudu ĩwẽ aptoꞌoré wab da. Atsiré tsõré aba Romanos 15:4. Taha parimhã atsima robdzanhamri aba ãhã dadzadanharĩ ãma piꞌrebamhã:
E te atsima ĩwẽ waihuꞌu da Bíblia nhimiropitsutu norĩ dapẽꞌẽ nomri ãma duré danhimipari ĩwẽ dzô ãma.
6. Ĩhöiba amo norĩ te dza wapawaptob dzaꞌra Bíblia wa te tsadaihuꞌu dzaꞌra da
Daꞌahö na datsiwaprotsi te da te ꞌre tsõré dzaꞌra Bíblia hã, tadzahã ma tô waihuꞌu dzaꞌra ni da te datsima robdzanhamri dzaꞌra wamhã Bíblia ãma te datsipawaptob dzaꞌra. Atsiré tsõré aba Atos 8:26-31. Taha parimhã atsima robdzanhamri aba ãhã dadzadanharĩ ãma piꞌrebamhã:
E niha Bíblia wa dza tsadaihuꞌu dzaꞌra ni.—ꞌMadöꞌö ĩtsihötö ꞌrare norĩ 30 duré 31.
Ĩhöiwarobo Atos te tinha aibö wi tsô ĩrowaptöꞌö na hã danhimipawapto Bíblia te te waihuꞌu da. Ã bötö na hã ĩtsine, daꞌahö ma wẽ di Bíblia ãma da te datsima robdzanhamri dzaꞌra da.
NIꞌWAM NORĨ TE NHARĨ DZAꞌRA ÃNE: “Romnhoré Bíblia na hã bötö nhimini ꞌwa.”
E niha te aré ĩnha. E marĩ wa.
ĨWAIHUꞌUDZÉ HÃ
Bíblia te wama roti dzaꞌra bötö mono norĩ da hã, te wama tsadaꞌöbö dzaꞌra dadzadanharĩ ĩpire hã, te wapẽꞌẽ nomri dzaꞌra, duré danhimipari ĩwẽ dzô te wama tsõmri dzaꞌra.
Ãma aipoꞌre puꞌu
E marĩ na Bíblia te wama roti dzaꞌra.
E ma norĩ hã dadzadanharĩ norĩ Bíblia te tsadaꞌö.
E marĩ te atsima ĩwẽ waihuꞌu da Bíblia na.
TSÔ AIRĨTĨ DURÉ
ꞌMadöꞌö e niha Bíblia nhimiroti te natsi waꞌãma aime dzaꞌra.
“Bíblia nhimiroti norĩ ꞌrata nherẽ dama wẽ dzaꞌra di õne uꞌö” (Roꞌmadöꞌöꞌwa, n.º 1 2018 na)
ꞌMadöꞌö e niha Bíblia ma tô pawapto aibö te te ꞌre ĩꞌwapéi mono hã datsina rotsaꞌrata upa dzada ꞌwatébrémi na ꞌre höimana mono dzém hawi.
Waihuꞌu Bíblia nhimiroti ꞌre wahöimana wẽ dzaꞌra mono da família ꞌremhã.
Daꞌahö na te nharĩ dzaꞌra ni Tiꞌa hã ĩhöimana na hã Höimanaꞌuꞌö nhibꞌrata. E tô tsena tahã. ꞌMadöꞌö Bíblia te te ĩnharĩdzé hã:.