Ukukhotyokiswa Yicrack—Ngaba Kunokunyangwa?

ALITHANDABUZEKI elokuba ukukhotyokiswa yicrack kuye kwafikelela kwimilinganiselo eyothusayo, ibe le ngxaki iyanda. Unomathotholo nomabonwakude bayisasaza emoyeni le ngxaki. Kumaphephandaba nakumaphephancwadi ibhalwa kwimixholo yawo ephambili. Amagumbi ongxamiseko asesibhedlele namaziko abantu abenzakele ngokwengqondo nangokwemvakalelo ajongene ngokuthe ngqo nogonyamelo lwayo. Amagumbi okubelekisa azele ami ngeembambo ziimveku ezonakaliswe kukukhobokisa kwayo. Amagumbi okugcina izinto zesibhedlele asetyenziselwa “ukugcina” iintsana ezishiyiweyo kunokugcina izinto ezisetyenziswayo.

Amaziko okunyanga nawokubuyisela abantu abakhotyokiswe ziziyobisi kwimeko yesiqhelo anyanga abantwana abangekafiki kwiminyaka yeshumi elivisayo. Amaziko enkonzo yezentlalo acela imali ukuze akwazi ukulwisana nale ndyikityha yokufa. Kukho abo bathi abanakukoyisa ukukhotyokiswa kwabo nabo banganqweneli kwenjenjalo. Kwabo kuthethwe ngabo kamva, kulindeleke usizi, udandatheko, ugonyamelo mhlawumbi kwanokufa. Kwabo bakhankanywe kuqala, kukho ithemba.

IThe New York Times ka-Agasti 24, 1989, yanikela le ngxelo, “Kunyaka nje omnye odluleyo, icrack yayigqalwa njengesiyobisi esitsha ngokwentelekiso, esingekaziwa kangako kodwa esineempawu ezikhethekileyo ezikhobokisa ngendlela ephantse ingabi nakunyangeka.” Noko ke, ngoku, abaphengululi bafumanisa ukuba kwiimeko ezifanelekileyo ukukhotyokiswa yicrack, kunokunyangwa ngokuphumelelayo, latsho njalo elo phepha. UGqr. Herbert Kleber, isekela likaWilliam J. Bennett, umalathisi kwisebe laseUnited States elingokusetyenziswa kakubi kweziyobisi wathi, “Ukukhotyokiswa yicrack kunokunyangwa.” Wathi, into ebalulekileyo ikukuba amakhoboka amkeleke entsatsheni nasekuhlaleni nto leyo asenokuba awazange ayifumane ngaphambili. Wagxininisa ngokuthi, “mabancedwe bavelise iimpawu ezintle ngaphezu kokuba babe babuyiselwa kwisimo esihle kwakhona.”

Abaphengululi baye bafumanisa ukuba eyona nkqubo iphumelelayo ekunyangeni amakhoboka ecocaine eyicrack inamanqanaba amathathu​—⁠unyango lokuphelisa ukukhotyokiswa ziziyobisi, ukunikela uncedo olongezelelekileyo lobuqu noqeqesho, yaye okona kubaluleke gqitha ukulixhasa kwimeko-bume efanelekileyo. Ukunyanga ukukhotyokiswa sesi siyobisi, akuyiyo ingxaki eyintloko. Ngokufuthi, ngenxa yeemeko ezithile, ubani unokuzenzela oku. Ukungabi namali yokuthenga esi siyobisi kunokuba sisibakala esifak’ isandla, ibe ngokufuthi kuba siso. Ukuvalelwa entolongweni kwiziko lokohlwaya ngokwasemthethweni apho iziyobisi zingafumanekiyo khona kunokuba sesinye, okanye ukuhlala esibhedlele nako bekuya kukwenza kube yimfuneko ukuba ubani ayeke ukuzisebenzisa. Noko ke, ingxaki yokwenene kukumenza lowo ukhotyokisiweyo angabuyi asisebenzise esi siyobisi xa enokusifumana.

Nangona bambi kwabo bakhotyokisiweyo baye bakhululeka ngokunempumelelo ekubanjisweni yicrack ngoxa bekwinkqubo zonyango ezilungelelaniswe ngokukhethekileyo, iingcali zonyango zibethelela ukuba inkoliso yabo bakhotyokisiweyo ayizange ikwazi ukuyeka ebudeni beeveki ezimbalwa zokuqala. Ngokomzekelo, uGqr. Charles P. O’Brien, ongugqirha wezigulo zengqondo kwiYunivesithi yasePennsylvania, wathi abantu ababini kwabathathu abangamakhoboka eziyobisi ababhalisa kwinkqubo yakhe yonyango behla nomcinga kwinyanga yokuqala. Ezinye iinkqubo zaba nempumelelo enganeno nakuleyo.

Imeko-bume Engafanelekanga

Omnye umalathisi owaziwayo kwiziko lezonyango wathi, “Kusenokufuneka sibasuse kwibutho labantu. Umele ubashenxise abakhotyokisiweyo kwimeko-bume ekusetyenziswa kuyo iziyobisi. Imeko-bume enjalo iyingozi kubo.” Abaphengululi baye bafumanisa ukuba, oku kusisizathu esiyintloko sokuba inani elingakumbi labo bakhotyokisiweyo nabanyangwa baza bayeka ukusebenzisa iziyobisi baye babuyela kwesi siyobisi sibakhobokisayo. Isizathu sibonakala sicacile. Ngaba ezi asizozinto eziwangqongileyo ezathi okokuqala zawathumela kumaziko ezonyango? Ngaba icrack yayingafumaneki kuzo zonke iimbombo zezitrato, apho ingcinezelo yoontanga, ngokufuthi evela kwiintsapho zawo nakwizihlobo zawo ezisenyongweni, nto leyo eyashukumisa ukutshaya kwabo okokuqala le nqawa enecrack? Ngubani ngoku oza kubakhuthazela ekuhlaleni kwinkqubo yezonyango baze bakhululeke kweli dabi leziyobisi besenzela ubomi babo?

Kwiinkqubo eziphumelela ngakumbi kuye kwabethelelwa imeko-bume engafanelekanga njengesibakala esiyintloko sokuba lowo ukhotyokisiweyo aqhubeke esebenzisa kakubi iziyobisi. IThe New York Times yanikela le ngxelo, “Lowo ungumguli wafundiswa ubuchule bokuzilwa ukuze amele kude kwiziyobisi, kuquka nendlela yokuphepha nantoni na enokumenza anqanqatheke. Ukubona isitrato apho lo mntu wayekhe wathenga khona icrack, ibhotile elahliweyo ecaleni kwendlela, iofisi yogqirha wamazinyo okanye ivumba lamayeza elinuka ngokufanayo nevumba lemichiza yecrack,” zonke ezo zizinto ezinokuvuselela umnqweno wokufumana esi siyobisi, latsho njalo eli phepha. Kwaneenkqubo ezinempumelelo zagxininisa imbaluleka yokuba la makhoboka “aqhawule onke amaqhina nabahlobo nezalamane ezisasebenzisa iziyobisi.” Kunoko, bacetyiswa ukwenza abahlobo abatsha nabantu abangazisebenzisiyo iziyobisi. Eneneni, elo licebiso lobulumko.

Unako Ukwala!

Incwadi ethi Self-Destructive Behavior in Children and Adolescents iyachaza: “Abaselula ngokufuthi ngakumbi bangeniswa okanye ‘bafakwa ngentloko’ kwiziyobisi ezahlukahlukeneyo ngumhlobo osondeleyo . . . Iinjongo [zakhe] zisenokuba kukwabelana ngamava abangel’ imincili okanye amyoli.” Phofu ke, ingcinezelo yoontanga ayipheleliselwanga kwabaselula, njengoko amakhoboka eziyobisi akhulileyo esenokukungqina oko; singazange esi siluleko sobulumko seZibhalo sipheleliselwe kwabaselula, kodwa sisebenza kubantu babo bonke ubudala, njengokuba umbhali weBhayibhile esithi: “Ohamba nezilumko uba sisilumko naye; ke olikholwane lesidenge uya konakaliswa.”​—⁠IMizekeliso 13:⁠20.

Ukuba uthwaxwa ziingxaki ezibonakala zingenakoyiswa, musa ukufuna ukusaba kuzo ngokusebenzisa iziyobisi. Oku kuya kongezelela nje iingxaki zakho. Zixubushe izinto nomzali okanye omnye umntu okhulileyo onembopheleleko obeya kuba nezona zilangazelelo zilungileyo ngawe ezisuka entliziyweni. Kwakhona, khumbula isiluleko seBhayibhile esithi: “Ningaxhaleli nto; mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo. Lwaye uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu.”​—⁠Filipi 4:​6, 7.

[Ibhokisi ekwiphepha 26]

I-Ice, Inamandla Ngaphezu Kwecrack

“Abantu baseJapan bayibiza ngokuba yishabu, abaseKorea bayibiza ngokuba yihiroppon. Kumakhoboka eziyobisi aseMerika ukufumanisa nje ukuyoba kwayo nokudakumbisa kwayo, kwenza ukuba esi siyobisi ngokulula sibizwe ngokuba yi-‘ice,’” litsho njalo iphephancwadi iNewsweek ngesi siyobisi saseAsiya. Siluhlobo lweyeza lokudakumbisa imithambo-luvo (methamphetamine) elenziwa elebhu ngamachiza ekulula ukuwafumana. Ukuyoba kwecrack kuhlala imizuzu embalwa; ukuyoba kweice kuhlala kangangeeyure, ukuya kwezingama-24. Ngokufuthi ibenza abo bayisebenzisayo babe ngabanogonyamelo. Ukusetyenziswa kwayo ngokuzingisileyo kubangela umonakalo ongokwasengqondweni yaye kubangela ukungasebenzi kakuhle kwemiphunga nezintso okubulalayo. INewsweek ithi “imiphumo yeice kwiintsana ezisandul’ ukuzalwa iyothusa.” Omnye umphengululi uthi: “Ukuba ubucinga ukuba ukukhotyokiswa yicocaine kwakuyinto embi, yindlalo nje leyo xa kuthelekiswa nesi siyobisi.” Kunzima ngakumbi ukuyeka ukukhotyokiswa yi-ice kunokuyeka ukukhotyokiswa yicocaine, yaye ukuyoba kunokuba kokunamandla ngokugqithiseleyo ukusa emva kweminyaka emibini yonyango.