Izinto INkanyamba UAndrew Eyayingenakukwazi Ukuzitshabalalisa

KUKHO iinkanyamba nje, kuze kubekho iinkanyamba ezitshabalalisa ngakumbi.a Ezinye zaziwa nje njengesaqhwithi, esiza nezandyondyo zeemvula nesincothula imithi. Kwakha kwakho iNkanyamba uAndrew kumzantsi Florida (ngoAgasti 24, 1992) naseLouisiana (ngoAgasti 26, 1992), eKauai, eHawaii kwakukho iNkanyamba uIniki (ngoSeptemba 12, 1992), kwabakho nesiTshingitshane uOmar eGuam (ngoAgasti 28, 1992).

Aba ngoonozala bomonakalo owanyuka waya kuthi xhaxhe kumawaka ezigidi zeerandi. Itshoba lalal’ umbethe kubantu abaninzi eFlorida. Amawakawaka eentsapho asala engenamakhaya. Abaququzeleli beeinshorensi babemaxhapheshu bejikeleza loo makhaya onakalisiweyo bekhangela abanini bawo yaye bebhala iitsheke.

Ingxelo evela kwiKomiti Yokunikela Uncedo yamaNgqina kaYehova eFort Lauderdale yathi ngamakhaya amaNgqina kaYehova angama-518 kwali-1 033 kwelo phondo awaba nokulungiswa. Ukuba loo mlinganiselo ubunokusetyenziswa kumakhaya abemi ngokubanzi, oko bekuya kuthetha ukuba ubuncinane ama-50 ekhulwini awo onke amakhaya awayesendleleni ka-Andrew atshabalala. Emva koko, abo babenethamsanqa lokuba namakhaya asalungele ukuhlalwa babezama ukomisa impahla yabo yendlu namalaphu yaye becoca udaka olumhlophe olwalubangelwe yisilingi eyayisiwa zizantyalantyala zemvula ezagqobhoza kuphahla olonakeleyo. Abaninzi bakufumanisa kunzima nokujonga umonakalo okumakhaya abo. Mhlawumbi abona bantu basenokuba babetsala nzima ngabo babehlala kumakhaya afuduswayo okanye kwiinqwelwana ezirhuqwayo.

INkanyamba UAndrew Yayingakhethe Bani

Esinye isibini esasikwimeko enjalo yayinguLeonard noTerry Kieffer. Xa babeye kutyelela kwakhona ipaki elalikuyo ikhaya labo elifuduswayo kwisiXeko saseFlorida, kwafuneka bazichaze kwindawo yomkhosi yokuhlola abantu abangenayo ukuze bangene kuloo mmandla. Babona ipaki yamakhaya afuduswayo ikhangeleka ngokungathi yayithwaxwe ngamakhulukhulu ohlobo lweebhombu ezonakalisa ngakumbi—ezingashiyi nawuphi na umngxuma owenziwa yibhombu. Imithi yayincothukile. Amacangci awonakeleyo enziwe ngealuminum, ebefudula eziindonga namaphahla aloo makhaya, ayebhijeleke emithini yaye exhomeke kumasebe ngokungathi luhlobo oluthile lwemihombiso yexesha lomgcobo. Iingcingo zombane zazithe waca kuyo yonke indawo, iipali zomthi zophuke qwashu okwemicinga yematshisi. Iinqwelo-mafutha zaziphethukile yaye zibubutyobo.

UBob van Dyk, ikhaya lakhe elitsha ekwathiwa lalingakufanelanga ukuba lingahlalwa, wayichaza ngolu hlobo imeko yendlu yakhe: “Isilingi yawa bhuma, ityoboza ezityobokayo, igoba ezigobekayo yaye isoyikisa abo boyikayo.”

Izinto zobuqu, izinto zokudlala, iimpahla, iifoto, iincwadi, zingoongqikani naphi na njengezikhumbuzo ezibuhlungu zohlobo lobomi bangaphambili. Usizana lwekati emnyama luzulazula kuloo mabhodlo. Yayibathe ntshoo abakwaKieffer ngamehlo abuzayo. Icilikishe elincinane lidakasa koko kwakusakuba yinto kabani ebalulekileyo. Ivumba elibi lokutya okubolileyo, okuchithakele kwizikhenkcisi ezaphukileyo, lizalise umoya. Kuwo onke amacala yayingumbono woqulukubhode—obangelwe yimimoya, zizitshingitshane, ezivuthuza ngesantya esingaphezulu kweekhilomitha ezingama-260 ngeyure.

Kwakubanxunguphalisa kakhulu abanini nabahlali bala makhaya. Emva kweminyaka emininzi yokukhulisa iintsapho yaye benandipha ubomi kunye kuloo makhaya abo akhethekileyo, emva kwesaqhwithi bafumanisa ukuba babuyele emva zonke izinto zibubutyobo yaye zichithakele. AbakwaKieffer babezisindisele ezinye zezinto zabo kutyelelo lwabo lwangaphambili, kodwa kwakubuhlungu kakhulu kubo ukuvumbulula kwelo bhodlo labo oko kwakusele. Noko ke, bayixabisa into yokuba babesaphila yaye besakulungele ukukhonza uThixo.

INkanyamba uAndrew yayitshabalalisa yonke into. Iindawo zoshishino, imizi-mveliso, iivenkile—zonke zaba ngamaxhoba okudlakazwa yiloo ntlaselo yokwemvelo . Imithetho yokwakha engomelelanga ayizange iyithintele loo ntlekele.

Ezona Mpawu Zilungileyo Nezimbi Zoluntu

Uncedo lwaqalisa ukunikelwa eFlorida luvela kulo lonke elo lizwe njengokuba kwaye kwamiselwa amaziko awahlukahlukeneyo okunikela uncedo. IQumrhu Elilawulayo lamaNgqina KaYehova eBrooklyn, eNew York, lingaphozisanga maseko lamisela ikomiti yokunikela uncedo ukuba isebenze kwiHolo yeNdibano yaseFort Lauderdale. Kwakhona lakhupha isixa-mali esiphawulekayo ukuze kuthengwe iimpahla, ukutya nezinto ezifuneka ngokungxamisekileyo. Ngokomphumo, amaNgqina ayephakathi kwabantu bokuqala ukuthabatha amanyathelo kule meko yaye aqalisa ukubiza abasebenzi bokuzithandela. Enyanisweni, abaninzi beza bengabizwanga.

Abasebenzi abangamaNgqina bagaleleka bevela kwelaseKhalifoniya, kuMntla Carolina, eOregon, kwiLizwana iWashington, ePennsylvania, eMissouri nakwezinye iindawo ezininzi. IKomiti Yokwakha YeNqila yaseVirginia edla ngokwakha iiHolo zoBukumkani yathumela iqela lamaNgqina ali-18 ukuba lilungise amaphahla. Lahamba iiyure ezili-18 ukuya apho ngenqwelo-mafutha. Abasebenzi bokuzithandela bathabatha ixesha lekhefi okanye elokungabikho emsebenzini baza benjenjeya ukutyhutyha ilizwe, kangangeekhilomitha ezingamakhulu nezide zibe ngamawaka, ukuya kufikelela kuloo maNgqina bakhonza nawo abandezelekileyo.

Iqela elalisuka kummandla waseCharleston kuMzantsi Carolina laba luncedo ngokungathethekiyo. Ngowe-1989 laba namava okufumana iNkanyamba uHugo. Babekwazi oko kwakulindelekile yaye ngokukhawuleza balungiselela izinto zokunikela uncedo, eziquka izixhobo zokuvelisa umbane nezokwakha. Kwiiveki ezimbini amaqela abasebenzi bokuzithandela ayesele egqibile ukusebenza kumakhaya angama-800 yaye ayesele elungise amaphahla amaninzi.

Amaqabane omtshato nabamelwane abangengomaNgqina bangenelwa kuncedo lokulungisa olwalunikelwa ngamaNgqina. URon Clarke wakwiNtshona Homestead wathi: “Amaqabane angakholwayo ayechukunyiswe ngokwenene kuko konke oku. Ayelila, emangalisiwe koko amaNgqina ayesele ebenzele kona.” Ethetha ngendoda engakholwayo yelinye iNgqina, wongezelela wathi: “Ayiwuvali umlomo luvuyo—amaNgqina aphezulu phaya eluphahleni lwakhe emlungiselela.”

Elinye iNgqina lachaza ngabamelwane balo ababengengomaNgqina elalisoloko libahlola busuku ngabunye. Bathi babeme kakuhle. Ngosuku lwesihlanu, loo mfazi akazange akwazi ukuzibamba waza wasitsho esofelweyo. “Asinazo nezishuba ezi zomntwana. Sisecicini lokuphelelwa kukutya komntwana. Asinakutya namanzi awaneleyo.” Indoda yakhe ibifuna iigaloni ezintlanu zepetroli kodwa ayizange ikwazi ukuzifumana naphi na. Kwangolo suku lunye, iNgqina lazisa zonke izinto ababezifuna lizithabatha kwindawo yokugcina izinto zokunikela uncedo kwiHolo yoBukumkani. Zasuka zeewaxa iinyembezi kulo mfazi ngumbulelo. Umyeni wakhe wafak’ isandla kuloo msebenzi wokunikela uncedo.

Indima ebalulekileyo yaphunyezwa ngabadala nezicaka zolungiselelo zebandla ezazisebenza ngokumanyeneyo ekunikeleni uncedo kwiiHolo ezahlukahlukeneyo zoBukumkani ezazivusiwe ezazikummandla waloo ntlekele. Ngomonde babefikelela onke amaNgqina yaye beqinisekisa iimfuno zawo. Ngokwahlukileyo koku, kwacatshulwa amazwi egosa elithile loMkhosi Womoya lisithi mayela nale migudu yokunikela uncedo komnye ummandla: “Bonke abalawuli bafuna nje ukuba ziingqwangangqwili, kodwa akukho namnye ofuna ukuzithoba aze ngokwenene enze umsebenzi ongcolisayo.”

Iintlekele zinokuvelisa ezona mpawu zintle nezimbi ebantwini. Umzekelo wezona mpawu zimbi yayikukuphanga. Enye intsapho yamaNgqina yagqiba kwelokuba ubuncinane yayisenokulondoloza isikhenkcisi nomatshini wayo wokuhlamba impahla ukuze zisetyenziswe kwiziko lokunikela uncedo kwiHolo yoBukumkani yasekuhlaleni. Yaya eholweni ukuze bafumane ilori. Ngaphambi kokuba ibuye, abaphangi babesele bezibe zombini ezo zinto!

Ingqina lokuzibonela lathi: “Njengokuba sasihamba kwizitalato ezinomonakalo, sabona amakhaya anemiqondiso elumkisa abarhwaphilizi ukuba bangasondeli apho. Eminye imiqondiso yayisithi, ‘Abaphangi Mabafe’ eminye isithi, ‘Abaphangi Baya Kudutyulwa.’ Omnye wathi: ‘Abaphangi ababini badutyulwe. Omnye ufile.’ Iivenkile neendawo zoshishino zaziphangiwe.” Ngokutsho kwenye isajini kwiAirborne Division yama-82, abantu babamba baza babulala ubuncinane abaphangi omnye.

Baninzi kakhulu abaye banjwa. Kubonakala ukuba nakweyiphi na intlekele amaqela olwaphulo-mthetho asoloko ekulungele ukuhlasela oku kwamaxhalanga. Yaye nabo bantu kufane kuthiwe abazizo izaphuli-mthetho bakhokelwa ekuphangeni. Unqulo, imikhwa yokusesikweni nokuziphatha ezo zinto zibonakala zinyamalala xa kukho isilingo sokufumana into simahla.

UVukani! waxelelwa ukuba ekuqaleni amajoni ambalwa ade abelwa imipu yawo engenazimbumbulu ngabaphangi abaxhobileyo. Wambi amajoni aviwa esithi iziko lokunikela uncedo elikwiHolo yoBukumkani ayelijonga njengommandla oluhlaza entlango “ngenxa yokuba nina aniphathi mipu.”

“Musani Ukuhlala Phantsi Ningenzi Nto”

Yintoni amaNgqina kaYehova ayifundileyo kumava awo aloo ntlekele yokwenene? Ukuhlaziya ubumoya bawo ngokukhawuleza okudibene nokungxama. UEd Rumsey, ongumveleli eHomestead, uxelele uVukani! ukuba isakhiwo seeHolo zoBukumkani ezimbini sasisele sikulungele ukuba kungenelwe kuso iintlanganiso ngoLwesithathu olandela uMvulo waloo nkanyamba. Zimbi izinto zophahla zazimkile, iisilingi ziwile yaye kungene amanzi. Abasebenzi bokuzithandela bakhawulezisa ukuzenza ezo Holo zoBukumkani zibe kwimeko elungele iintlanganiso yaye zisetyenziswe njengendawo yokunikela imiyalelo kwimisebenzi yokunikela uncedo kummandla wabo owonakalisiweyo. Kwalungiselelwa amakhitshi ukuze kubekho ukutya kwamaxhoba nokwabasebenzi bokunikela uncedo.

UFermín Pastrana ongumdala kwiBandla leSpanish ePrinceton, wanikela ingxelo yokuba iintsapho ezisixhenxe kwibandla lakhe elinamaNgqina angama-80 zaphulukana namakhaya azo ngokupheleleyo. Luluphi uncedo awalunikelayo kuloo maNgqina? “Khathazekani ukuba kufuneka nikhathazeke. Kodwa ke musani ukuhlala phantsi ningenzi nto. Xakekani ekuncedeni abanye, yaye, kangangoko ninako, phumani niye entsimini. Musani ukuphoswa ziintlanganiso zethu zamaKristu. Combululani okucombululekayo, kodwa musani ukuziqhekez’ iintloko ngoko kungenakucombululeka.” Ngokomphumo, ngokukhawuleza loo maNgqina ayeshumayela yaye ethabatha iibhokisi ezinezinto zokunikela uncedo esiya nazo kwindlu ngendlu. UAndrew akazange ayitshabalalise inzondelelo yawo.

‘Kwixesha Elilandelayo Siza Kufuduka!’

USharon Castro, ibhinqa elineminyaka engama-37 ubudala waseCutler Ridge waxelela uVukani! amava akhe: “Utata wagqiba kwelokuba angafuduki. Wayevakalelwa kukuba ekubeni inkanyamba eyayikho ngaphambili ingazange ifike apho kunxweme lwaseFlorida, uAndrew wayeya kwenza okufanayo. Wayengayi kuzigquma neefestile. Ngethamsanqa, umnakwethu waye wazingisa ekuzigqumeni iifestile ngomthi weplayi. Ngaphandle kwamathandabuzo isenzo sakhe sabusindisa ubomi bethu. Iifestile zethu ngezaziqhekekile, yaye zaziya kusinqunqa.

“Malunga ne-4:30 ekuseni, umbane wacima. Ingxolo eyayiphandle yayisoyikisa. Yayifana nomgqumo kaloliwe omkhulu. Kwakukho izandi njengokuba imithi nezakhiwo zazichachamba yaye zisiwa. Safumanisa kamva ukuba eso sandi soyikisayo yayiyingxolo yezikhonkwane ezide eziseluphahleni njengokuba zazisiya zikhululeka. Indawo ephantsi kophahla yakhululeka, yaye isahlulo sesithathu sophahla semka nomoya. Saphelela ekubeni, soli-12, kuquka umama ongumlwelwe nomakhulu wam onama-90 eminyaka ubudala, kufuneke sizimele kwigumbi eliphakathi elingenazifestile. Sasiqinisekile ukuba sasiza kufela apho.”

Sisiphi isifundo awasifundayo kuloo mava? “Kwixesha elizayo xa besixelela ukuba sifuduke, siya kufuduka—asiyi kubuza. Siya kunikela ingqalelo kwizilumkiso. Kwakhona ndiye ndafunda ukunandipha nokuphila ngokuncinane. Yaye ndiyazi ukuba kulungile ukulila, ukukhathazeka uze umelane nobunjalo bemeko.”

Intshukumo Yamaphephandaba

Kwanamaziko eendaba ayiphawula indlela amaNgqina awayelungelelene ngayo. ISavannah Evening Press yayinomxholo oyintloko othi “AmaNgqina KaYehova Azifumanisa Ukuba Amkelekile KuMzantsi Florida,” yaye iThe Miami Herald yathi: “AmaNgqina Ayazinyamekela—Enyamekela Nabanye.” Yathi: “Akukho mntu eHomestead owambakrazela ucango amaNgqina kaYehova xa ebatyelela kule veki—ukuba phofu basenazo iingcango zokumbakraza. Malunga nama-3 000 abasebenzi bokuzithandela abangamaNgqina abasuka kulo lonke elo lizwe baye bahlanganisana apho kuloo mmandla wentlekele, okokuqala ukuze bancedane, baze bancede nabanye. . . . Nayiphi na intlangano yezomkhosi isenokuba nekhwele ngokunyaniseka, ukuqeqesheka nenkuthalo yamaNgqina.”

AmaNgqina aqhelene nokulungiselela ukutyisa izihlwele kwiindibano zawo ezincinane nezinkulu. Ngokubhekele phaya, aye alungiselela amakhulukhulu eeKomiti Zokwakha ZeNqila kulo lonke ihlabathi ukuze zakhe iiHolo zoBukumkani neeHolo zeeNdibano ezinkulu. Ngaloo ndlela, anabasebenzi abaqeqeshiweyo abakulungeleyo ukusabela nakwisaziso seeyure ezimbalwa.

Noko ke, kukho enye inkalo—isimo sengqondo sawo. Le ngxelo ikwanye yahlabela mgama isithi: “Akukho maqela amakhulu kunamanye. Akukho ngquzulwano lokufuna ukuba ngomkhulu. Kunoko, abasebenzi babonakala bechwayitile yaye benentsebenziswano kakhulu ingakhathaliseki indlela ekushushu, abangcole okanye abadinwe ngayo.” Kwachazwa njani oko? Elinye iNgqina laphendula lathi: “Oku kuvela kulwalamano noThixo olusishukumisela ukuba sibonakalise uthando lwethu kwabanye.” Leyo yenye into uAndrew awayengakwazanga ukuyithabatha, uthando lobuKristu lwamaNgqina.—Yohane 13:34, 35.

Olunye uthelekiso olubangel’ umdla lolokuba amaNgqina kwakubonakala ukuba afunda emithini. Elinye ingqina lokuzibonela lathi: “Njengokuba ndandihambahamba, ndandingenakunikela uncedo kodwa ndaphawula ukuba amakhulukhulu emithi emikhulu ayencothukile yaye ethe bhuma emhlabeni. Sasiyintoni isizathu soko? Yayibonakala inokumelana nomoya ngenxa yeziqu zayo ezikhulu, yaye yayinenkqubo yeengcambu ezinabileyo kodwa ezingangenanga nzulu emhlabeni. Kwelinye icala, inkoliso yemithi enciphileyo yesundu yasala imile. Yayigoba nomoya, eminye yaphulukana namagqabi ayo, kodwa inkoliso yayo yahlala isamile emhlabeni.”

AmaNgqina ayeneengcambu zokholo ezendeleyo eLizwini likaThixo yaye ayebhetyebhetye kwizenzo zawo. Ukuba nezinto namakhaya kwakungeyiyo eyona nto ingundoqo kuwo. Ubuncinane ayephila yaye enokuqhubeka emkhonza uYehova phezu kwayo nje loo ntlekele. Ubomi yayiyinto uAndrew awayengenakuwahlutha yona.

Kwenziwa Njani Oku?

Inkampani eyiAnheuser Busch yanikela ngelori yamanzi okusela. Ekufikeni kwayo apho, umqhubi wabuza apho amanzi amele awase khona. Waxelelwa ukuba abona bantu babenento elungeleleneyo yayingamaNgqina. Enyanisweni, emva kweveki uAndrew ehlasele, imithwalo yokunceda eyayikwizikhotshi zeetrekta ezingama-70 yaye yafika kwiHolo yeNdibano yamaNgqina kaYehova eFort Lauderdale.

Umsébenzi wokuzithandela owayelapho uthi: “Ngoko thina safumana ilori yonke yamanzi okusela. Ngokukhawuleza oko sakuquka kukutya esasikuthumela kumaziko okukusasaza akwiiHolo zoBukumkani. Kwakusabelwana ngako nabazalwana nabamelwane ababekuloo mmandla ababeswele.” Inkampani yephepha kwiLizwana iWashington yanikela ngama-250 000 eepleyiti ezenziwe ngephepha.

Ekuqalekeni, amagunya esixeko ayethumele abasebenzi bokuzithandela abangengomaNgqina kwiiHolo zoBukumkani, esithi, ‘AmaNgqina akuphela kwabantu abalungelelene ngokufanelekileyo.’ Ekugqibeleni umkhosi wangena waza waqalisa ukumisela amaziko okunikela uncedo ngokutya namanzi neentente zokuhlala.

Iziko lokuqala lamaNgqina lokusasaza izinto zokunikela uncedo lamiselwa yikomiti yokunikela uncedo kwiHolo yeNdibano yaseFort Lauderdale, emalunga neekhilomitha ezingama-60 kumntla ukusuka kuloo mmandla wentlekele ungqonge iHomestead. Ukuze kuphungulwe umsebenzi, kwamiselwa enye indawo yokunikela uncedo kwiHolo yeNdibano kwisiXeko iPlant kufutshane neOrlando, esimalunga neekhilomitha zingama-400 kumntla ntshona waloo ndawo yayinentlekele. Inkoliso yezinto zokunikela uncedo zazithunyelwa apho ukuze zicwangciswe kakuhle zize zifunjwe. Loo komiti yayizifuna izinto ezisweleyo kwisiXeko iPlant yonke imihla, yaye iitrekta ezirhuqa izikhotshi zazidla ngokuthabatha iiyure ezintlanu ukuya eFort Lauderdale.

Ngenxa yoko eli ziko lokunikela uncedo lalinikezela ngokutya, ngeempahla, ngamanzi, ngezixhobo zokuvelisa umbane nangezinye izinto ezaziswelwe kwiiHolo zoBukumkani ezintathu ezazilungisiwe kumbindi wommandla wentlekele. Apho, amaNgqina anobuchule alungiselela amaqela okwakha nawokucoca ukuze atyelele amakhulukhulu amakhaya awayefuna ingqalelo. Amakhitshi nemigca yokufumana ukutya nayo yayivulekile kumabala eHolo yoBukumkani, yaye nabani na wayesamkelwa ukuza kufumana uncedo. Kwanamanye amajoni aye anandipha izidlo yaye kamva abonwa efaka okuthile kwiibhokisi zeminikelo.

Ngoxa amadoda ayexakekile elungisa izindlu, amanye amabhinqa ayelungiselela izidlo. Abanye babephumile beye kutyelela nabaphi na abantu abasenokubafumana bekulungele ukuba babelane nabo ngengcaciso yeBhayibhile mayela neentlekele zokwemvelo baze kwakhona baphe abo basweleyo iibhokisi ezinezinto zokunikela uncedo. Omnye waba yayinguTeresa Pereda. Ikhaya lakhe lalonakele, yaye iifestile zenqwelo-mafutha yakhe zikrobokile—sekunjalo loo nqwelo-mafutha yazaliswa ziibhokisi ezinezinto zokunikela uncedo kubamelwane bakhe. Umyeni wakhe, uLazaro, wayexakekile esebenza kwenye yeeHolo zoBukumkani.—INtshumayeli 9:11; Luka 21:11, 25.

Kwabaninzi ababengenamakhaya, ezinye iindawo zokuhlala zazifumaneka kumakhaya amaNgqina awayengachatshazelwanga nguAndrew. Abanye babehlala kwiinqwelana ezirhuqwayo ekwakubolekiswe okanye ekwakunikelwe ngazo ngaloo njongo. Bambi bafudukela kwiintente zokuhlala ezazigxunyekwe ngumkhosi. Abanye bavela bazishiya izindlu zabo njengabaphulukene nazo baza bayokuhlala nezihlobo nezalamane ezikweminye imimandla yelo lizwe. Babengenamakhaya namisebenzi. Kwakungekho mbane, kungekho manzi, kungekho nkqubo yogutyulo eyaneleyo—ngoko bakhetha eyona ndlela ibalungeleyo.

Isifundo esinye bonke abasifundayo sacaciswa kakuhle lelinye iNgqina elintetho isiSpanish: “Siyabulela ngesifundo esisifundileyo mayela nosukelo lwethu ebomini. Uyazi, usenokusebenza kangangeminyaka eli-15 okanye engama-20 usakha ikhaya lakho, uqokelela izinto eziphathekayo zize nje ngeyure enye, zinyamalale. Oku kuyasinceda sazi usukelo lwethu lokomoya, senze ubomi bube lula ngakumbi yaye ngokwenene sicinge ngokukhonza uYehova.”

Kunjengokuba umpostile uPawulos wathi: “Zona ezo zinto zaziyinzuzo kum, zona ndazibalela ekuthini ziyinkxwaleko ngenxa kaKristu. Ewe, okunene, ndisuka izinto zonke ndizibalele ekuthini ziyinkxwaleko, ngenxa yokongama kokumazi uKristu Yesu iNkosi yam; endithe ngenxa yakhe ndonakalelwa zezi zinto zonke, ndizibalela ekuthini ziyinkunkuma, ukuze ndimzuze uKristu.”—Filipi 3:7, 8.

Iintlekele zokwemvelo ziyinxalenye yobomi behlabathi esiphila kulo. Ukuba sithobela izilumkiso ezivela emagunyeni, ubuncinane sisenokubusindisa ubomi bethu. Mhlawumbi amakhaya nezinto eziphathekayo usenokuphulukana nazo, kodwa ulwalamano lomKristu ‘noThixo onako konke ukuthuthuzela’ lufanele lomelezwe. Kwanokuba abanye basenokufa kwintlekele ethile, uYesu wathembisa ngokubavusela kwihlabathi elitsha likaThixo kumhlaba obuyiselweyo—umhlaba ongasokuze ube nazinkxwaleko nokufa okubangelwe ziintlekele zokwemvelo.—2 Korinte 1:3, 4; Isaya 11:9; Yohane 5:28, 29; ISityhilelo 21:3, 4.

[Umbhalo osemazantsi]

[Ibhokisi ekwiphepha 19]

Wayemangaliswe Ngokwenene

Iqela lamaNgqina ali-11 amhlophe lahamba laya eTampa, eFlorida, ukunceda kumsebenzi wokunikela uncedo. Bathabatha izixhobo baza baqalisa ukulungisa uphahla lwendlu yeNgqina elintsundu. Xa unyana womnakwalo ongeloNgqina wafikayo, akazange awakholelwe amehlo akhe—wayemangaliswe ngokwenene kukufumanisa ukuba iqela lamaNgqina amhlophe aye afika kuqala kunaye yaye ayelungisa ikhaya likayisekazi. Wayechukumiseke kangangokuba wade wancedisa kumsebenzi wokwakha.

Wathi kwixesha elizayo xa amaNgqina esiza endlwini yakhe, uya kucela isifundo seBhayibhile. Njengokuba wayethetha neqela laseTampa, kwacaca ukuba wayesuka kummandla walo. Engaphozisanga maseko omnye umdala okwelo qela wenza amalungiselelo esifundo seBhayibhile kwiveki elandelayo! Kunjengokuba elinye iNgqina lathi, oku kungqina—ukuba awunakunkqonkqoza nje emnyango kuphela ukuze unikele ubungqina usenokunkqonkqoza nasemaphahleni!

[Imifanekiso ekwiphepha 15]

INkanyamba uAndrew yayitshayela yonk’ into, yaye zazimbalwa izakhiwo ezasindayo

Ikhaya elifundiswayo lentsapho yakwaKieffer—nokwakusele kulo

[Imifanekiso ekwiphepha 16]

URebecca Pérez, iintwazana zakhe nabanye abali-11 basindiswa kukuba lapha kule ndawo incinane

Abezomkhosi bangena ukuza kuthintela abaphangi (ekunene ngasentla); iivenkile ezaphangwayo (ekunene)

Inkanyamba yemka namaphahla ezindlu, yaye iinqwelo-mafutha zaziphoswa ngapha nangapha

[Imifanekiso ekwiphepha 17]

Kwakulungiselelwa uncedo kwiiHolo zoBukumkani

Amakhaya afuduswayo ayebhijeleke emithini; izinto zokudlala zomntwana zilele zodwa phezu komandlalo; uncwadi lweBhayibhile luphakathi kwaloo nkunkuma; amaNgqina, anjengoTeresa Pereda, anikela uncedo kubamelwane bawo

Izinto zokwakha ekwakunikelwe ngazo.

Ukukhethakhetha iimpahla

[Imifanekiso ekwiphepha 18]

Amatsha-ntliziyo aphuma kulo lonke elaseUnited States anceda kumsebenzi wokunikela uncedo